‘Oh, Ke Ekpedide Kpukpru Owo Ẹketie Nte Mmọ!’
Mmọemi ẹkedi mme ikọ ewet n̄wedmbụk n̄kpọntịbe ke n̄wedmbụk n̄kpọntịbe Luxembourg oro Letzebuerger Journal. Enye eketịn̄ aban̄a mmanie?
Enye ama aka Poland man okodụk usọrọ ọyọhọ isua 50 oro aban̄ade edinyan̄a Auschwitz onyụn̄ okụt ete ke owo ikasiakke otu kiet emi ekenen̄erede ọbọ ufen. Ke ikpehe uwetn̄kpọ esie eke February 2, 1995, enye ama anam ẹdiọn̄ọ otu emi nte Mme Ntiense Jehovah onyụn̄ ewet ete: “Ata ndiọkn̄kan n̄kọbi ntem m̀mê itienna ekikere, m̀mê ndịghe edikpan̄a esuene esuene ke mme itie utie biọn̄ m̀mê ke ekụri m̀mê ukwak usịbe owo ibuot ikekemeke ndinam mmọ ẹkan̄ mbuọtidem mmọ.” Enye ama akaiso ete: “Idem mme afai afai mbon ukpeme SS ẹma ẹkop n̄kpaidem ẹban̄a nte Mme Ntiense Jehovah ẹkekpan̄ade uko uko.”
Mme Ntiense Jehovah ikoyomke n̄kpa. Edi, ukem nte mme Christian ke akpa isua ikie, ediwak tọsịn mmọ ẹma ẹmek n̄kpa utu ke ndikan̄ mme edumbet Christian. Utọ mbuọtidem oro akanam ẹdiọn̄ọ mmọ nte mbon oro ẹwọrọde ẹda ata isio isio ke n̄kịmn̄kịm eyo Ukara Idụt Germany Ọyọhọ Ita oro.
Ewet n̄wedmbụk n̄kpọntịbe oro ekeberi ete: “Oh, ke ekpedide kpukpru owo ẹketie nte Mme Ntiense Jehovah!” Ke ekpedide mmọ ẹketie ntre, ekọn̄ ererimbot ọyọhọ iba ikpakasiahake tutu amama.