Ntọt M’ọkwọrọ Obio Ubọn̄

Ẹyekọbọ Mme Ata Christian

TOTO ke eyo Abel, ediwak mme asan̄autom Jehovah ẹmeyọ ukọbọ ido ukpono. (Luke 11:49-51) Ndien idịghe n̄kpọ n̄kpaidem, koro Bible ọtọt ete ke “kpukpru owo eke ẹyomde ndidu eti uwem ke Christ Jesus ẹnyene ndibiom isịnenyịn”! (2 Timothy 3:12) Nte ekemde, mfịn ke se iwakde ikan idụt 25, Mme Ntiense Jehovah ẹdu ke idak ukpan ẹnyụn̄ ẹyọ ukọbọ.

Ke idụt kiet emi owo mîkpanke utom Mme Ntiense Jehovah kpọt edi n̄ko emi mbon ido ukpono ẹkọbọde, se ikande mme asuanetop eti mbụk 12,000 ke ẹkaiso ndinam utom ifịk ifịk, ẹkpepde se iwakde ikan owo 15,000 Bible. Nte ededi, mmọ ẹnam utom ukwọrọikọ mmọ ye mbufiọk. Ke ofụri ofụri, mmọ ẹsinịm mme mbonoesop mmọ ke mme ufọk owo, ndien mmọ ẹsidu ke ukpeme ke ini ẹkotde mbon oro ẹnyenede udọn̄ ẹdidụk mme utọ mbonoesop oro.

Ke ndondo emi ukara enen̄ede enyene mmemmem edu aban̄a Mme Ntiense, ẹmi idahaemi ẹnamde ekese utom mmọ ye unana ọkpọsọn̄ ubiọn̄ọ. Nte ededi, nsio nsio otu ido ukpono ẹmeda odudu mmọ ẹsịn ntịme.

Ke akwa obio kiet otu mbon ntịme ẹmi ẹdide n̄kpọ nte owo 200 ẹmi ẹnyenede ukwan̄ ifiopesịt ido ukpono ẹma ẹsan̄a ke udịm ẹka ufọk kiet emi n̄kpọ nte Mme Ntiense Jehovah 50 ẹkenịmde mbonoesop. Ndusụk ke otu mbon ntịme oro ẹma ẹkama ikpọ itiat ẹnyụn̄ ẹtoho mme ufiet ido ukpono. Akpan uduak mmọ ekedi ndin̄wana ye Mme Ntiense oro nnyụn̄ mbiat ufọk oro. Eyedi mme adaiso ido ukpono ke ẹkenọ ntịn̄enyịn ke mme mbonoesop oro ke ndusụk ini ndien ẹketie ẹbet edikem ini man ẹda en̄wan ẹka. Akayak esisịt mbon ntịme oro ndidụk ufọk oro ke ini bodisi 15 ẹkedide ẹdisịm ẹnyụn̄ ẹnọ uyo ẹte yak otuowo oro ẹsuana. Emi ekedi n̄kpọ n̄kpaidem ọnọ Mme Ntiense oro, sia owo mmọ ndomokiet mîkakam inyeneke ini ndikot bodisi.

Ke mme idaha efen, nte ededi, mme andibiọn̄ọ ẹma ẹnen̄ede ẹkụt unen. Ẹma ẹda ediwak Mme Ntiense ẹka ikpe ẹnyụn̄ ẹbiere n̄kpọkọbi ẹnọ. Ikpe kiet ama odu ke esop ke ediwak isua, ndien ekeme ndidi mme okot ikpe ikenyeneke udọn̄ aba ke enye. Nte ededi, ke ntak nsọk oro ọkwọrọ ederi n̄kann̄kụk ekesịnde, ẹma ẹfiak ẹmen n̄kpọ oro ẹka esop, ndien ẹma ẹbiere n̄kpọkọbi ẹnọ Ntiense oro.

Ke ebiet efen Mme Ntiense ẹnamde otu kiet ẹma ẹsop idem ke ufọk owo man ẹnịm Udia Mbubịteyo Ọbọn̄. Nte ini akade ke mbubịteyo oro ediwak bodisi ẹma ẹmụm enyeneufọk oro ye ebiowo emi ọkọnọde utịn̄ikọ oro. Ke itieutom mme bodisi, ẹma ẹtịm mmọ idiọk idiọk. Afai afai ubụp mbụme ama akaiso ke ediwak hour. Kiet ke otu Mme Ntiense oro ama ọyọ n̄ko ndutụhọ ke ndidi se ẹsịnde ke obube mbịtmbịt mmọn̄.

Ntak emi mme bodisi ẹkenamde utọ n̄kpọ ndịghe oro? Ini kiet efen, otu mme enyene ukwan̄ ifiopesịt ido ukpono, ye un̄wam ẹnyenede ẹto ọkwọrọ ederi n̄kann̄kụk, akanam mme bodisi ẹnam n̄kpọ ntre. Ekem akwa owo bodisi ama ayarade ete ke ẹkemụm mme owo ye unana imọ ndinyịme. Ẹma ẹsịn n̄kpeubọk, ndien ẹma ẹnọ mbon oro ẹketịmde mme owo do ufen.

Ke ofụri ererimbot Mme Ntiense Jehovah ke ẹkaiso ndikwọrọ eti mbụk Obio Ubọn̄ Abasi, idem ke ẹsobode afai afai ubiọn̄ọ. Mmọ ẹtiene item Jesus: “Sese, mmosio mbufo ndọn̄ nte mme erọn̄ ke ufọt mme ekpe ikọt; mmọdo mbufo ẹnyene ibuot nte urụkikọt, ẹnyụn̄ ẹfụre nte ibiom.”—Matthew 10:16.

[Ndise ke page 31]

Abel ekedi akpa owo oro ẹkekọbọde