Ubon Oro Ẹnamde Akpanikọ Ẹnam N̄kọri Awara ke Sri Lanka

ẸKEDIỌN̄Ọ nte Ceylon tutu ke 1972, Sri Lanka edi ediye isuo emi enyenede mme esụk ẹmi eyop ẹdade, udịm udịm ikpọ obot, ye n̄kpri desat. Ke n̄kan̄ obot obot, Obot Adam, edide mita 2243, edi edisana itie ọnọ akpan ido ukpono inan̄.a Se idude ikpere edi Utịt Ererimbot, kpa itiat itiat ebeden̄ emi otụn̄ọde akan mita 1500. Ebiet oro edi kiet ke otu nye-n̄kan itie ke Sri Lanka.

Mme andidụn̄ Sri Lanka ẹdide owo miliọn 18 ẹbuana inem inem idaha ke uwem. Toto ke ọyọhọ isua ikie ition M.E.N., mbon Europe ẹmi ẹketode edere edere India ẹkedụn̄ ke isuo oro. Mbon Sinhalese ẹdu, ẹmi ẹdide mbahade ita ke itie inan̄ ke otu ibatowo. Ekem, ke ufan̄ ntọn̄ọ ntọn̄ọ isua ikie osịm ọyọhọ isua ikie 12, ediwak mbon Tamil ẹma ẹto usụk usụk India ẹwọrọ ẹkedụn̄ do; mmọemi idahaemi ẹnen̄ede ẹdụn̄ ke edem edere ye edem usiahautịn isuo oro. Mbon Portugal, Netherlands, ye Britain n̄ko ẹma ẹnịm idiọn̄ọ ekemmọ toto ke ini ukara mbon esenidụt. Adianade do, mbonurua ẹdide mme awat inyan̄ ẹtode inua-akpa Arabia ye Malay ẹma ẹdidụn̄ ke otu mbon n̄kann̄kụk oro. Ibat ibat mbon Europe, Persia, China, ye mbon efen ẹdu do n̄ko.

Ke ẹsiode mbuaha ekpụk ẹfep, usem ye ido ukpono ke Sri Lanka ẹwụt nsio nsio idaha esie. Mme akpan usem ke isuo oro ẹdi usem Sinhalese, Tamil, ye Ikọmbakara. Ediwak mbon Sri Lanka ẹsem ke nsụhọde n̄kaha usem iba ke otu ita ẹmi. Idaha ekpụk n̄ko enyene akamba udeme ke ido ukpono mme owo. Ata ediwak mbon Sinhalese ẹdi mbon Buddha, ke adan̄aemi ata ediwak mbon Tamil ẹdide mbon ido ukpono Hindu. Mbon oro ẹtode Arabia ye Malaya ẹsiwak ndisọn̄ọ nyịre ye Islam, ndien mbon oro ẹtode Europe ẹwak ndidi mbon ufọkabasi Christendom, Catholic ye Protestant.

Ndisobo N̄kpọ-Ata

Kpukpru emi onịm akwa n̄kpọ-ata ọnọ Mme Ntiense Jehovah ke Sri Lanka. Mmọemi ẹsinam utom ọkpọsọn̄ man ẹnam ewụhọ Jesus oro: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Ke ẹsiode edinam n̄kpọ mban̄a nsio nsio usem ẹfep, mme asuanetop eti mbụk ẹkeme ndinyene nneme ye mbon Buddha, Hindu, ye mme andibuana ke mme ufọkabasi Christendom, ọkọrọ ye mbon oro mînịmke edidu Abasi ke akpanikọ—kpukpru emi ke ufan̄ ukwọrọikọ eke hour ifan̄.

Man ẹkụt unen ke utom ukwọrọikọ mmọ, ana mme asuanetop ẹkama mme magazine Enyọn̄-Ukpeme ye Awake! ye mme n̄wed Bible efen ke usem Tamil, Sinhalese, ye Ikọmbakara. Mbon oro ẹkopde idem ekem ẹsikam ẹkama mme Bible ke mme usem ẹmi. Mme asuanetop ẹma ẹnen̄ede ẹkop inemesịt ke ndondo emi ke ini ẹkesiode n̄kpri n̄wed oro, Nte Abasi Enen̄ede Ekere Aban̄a Nnyịn? ye Our Problems—Who Will Help Us Solve Them? ye tract oro, Nte Ererimbot Emi Eyebọhọ? ke usem ita oro ke ukem ini. Emi ọkọwọrọ ndinyene mme n̄kpọutom efen efen nnọ utom oro.

Mme Ntiense ke ẹnam utom ọkpọsọn̄ toto ke 1912, ke ini Charles Taze Russell, etieibuot N̄ka Nditọ Ukpepn̄kpọ Bible eke Ofụri Ererimbot ini oro, akakade ekese Ceylon. Akwa n̄kọri, nte ededi, ekenyene ndibet tutu mme andikụre ukpep ke Watchtower Bible School of Gilead ẹdisịm ke 1947. Toto ke ini oro, mme asuanetop ke Sri Lanka ẹmedara nti utịp ẹtode utom ukwọrọikọ mmọ. Ke 1994 mme asuanetop Obio Ubọn̄ 1,866 ẹma ẹnịm, ke ẹbaharede ukem ukem, ukpepn̄kpọ Bible 2,551 kpukpru ọfiọn̄. Ndien owo 6,930 ẹmi ẹkedụkde Editi ẹma ẹkpere ndiwak utịm ikanan̄ n̄kan ibat mme asuanetop ke kpukpru esop. Nso utịbe utịbe edidiọn̄ ke emi edi ntem!

Ke ẹmende ẹdomo ye ndusụk idụt eken, n̄kọri ke Sri Lanka ekeme nditie nte isọpke. Etie nte ọkpọsọn̄ mbọbọ ubon edi ntak kiet. Nte ededi, mbọbọ ubon ekeme n̄ko ndida ufọn edi. Ke ini Cornelius, akwa owoekọn̄ Rome, okonyịmede akpanikọ, mbonufọk esie ẹma ẹnyịme ye enye n̄ko. (Utom 10:1, 2, 24, 44) N̄wed Utom Mme Apostle n̄ko asiak mbonufọk Christian efen oro ẹkesọn̄de idem, esịnede eke Lydia, Crispus, ye owo oro ọkọkọbide Paul ye Silas.—Utom 16:14, 15, 32-34; 18:8.

Ke akpanikọ, ọkpọsọn̄ mbọbọ ubon ekeme ndinyene ufọn ke ebiet emi eti ndutịm ye nsịnifịk esịt akpanikọ odude. Ye mme ikọ eke Isaiah 60:22 ke ekikere, Ray Matthews, isụn̄utom oro ama akanam utom ke anyanini ọdọhọ ete: “Etie nte Jehovah ke anam mme n̄kpọ ẹwara kemi ke edikem ini, ibehe ke owo kiet kiet kpọt edi n̄ko ebe ke ubon.”

Ubon Oro Ẹtịmde Ada Itoro Edi

Ke akpanikọ mme utọ anam-akpanikọ ubon oro ẹdu ke Sri Lanka mfịn. Ke uwụtn̄kpọ, ubon Sinnappa oro odude ke eti ndutịm odu emi odụn̄de ke Kotahena, ikpehe Colombo, kpa akpan obio Sri Lanka. Okposụkedi mîbịghike Marian, ibuotufọk, akakpa, n̄wan esie, Annamma, ye 12 ke otu nditọ 15 mmọ, ọtọn̄ọde ke isua emana 13 osịm 33, ẹkaiso ke ndinam n̄kpọ Jehovah nte ubon. Idahaemi, nditọ itiaita ẹma ẹna baptism, ndien ita ẹdu ke utom uyọhọ ini, ẹnamde utom nte mme asiakusụn̄ ofụri ini. Ita eken ẹsisịn enyịn̄ ke utom usiakusụn̄ unọ un̄wam ke ini ke ini. Owo inan̄ ke otu n̄kpri owo ke ubon oro ẹkedi mme asuanetop oro mînaha baptism. Ke adianade do, nditọ nditọ inan̄, okposụkedi ẹkpride ke isua emana, ke ẹkekpep Bible ẹnyụn̄ ẹdụk mme mbonoesop Christian ke Esop Colombo North eke Mme Ntiense Jehovah.

Ekedi ke 1978 ke Annamma okokop eti mbụk Obio Ubọn̄ ke akpa ini ke ini enye ọkọbọde idem Enyọn̄-Ukpeme kiet. Ẹma ẹtọn̄ọ ukpepn̄kpọ Bible, ndien ke ama okokụre n̄wed un̄wam ukpep Bible oro, Akpanikö oro Adade osim Nsinsi Uwem, Annamma ama ayak uwem esie ọnọ Jehovah Abasi onyụn̄ ana baptism, ntem onịmde ntọn̄ọ uwụtn̄kpọ ọnọ ediwak owo ke ubon esie.

Nte Cornelius, owoekọn̄ oro, Annamma enyene eti ndutịm ke ubon esie. Annamma eti ete: “Nnyịn ikesinyene ndinam ndutịm nnọ mme mbonoesop ye mme mbono Christian—owo itịn̄ke-tịn̄ iban̄a ufọkn̄wed. Ọfọn̄ ekedi mfịna kiet, edi ye un̄wam Jehovah nnyịn ima isikeme ndinyene mbufa ọfọn̄ nnọ mbono kiet kiet. Kpukpru owo ke ubon ẹma ẹsịm ẹsịnede ọfọn̄ ediye ediye ẹnyụn̄ ẹdiade udia ẹyụhọ—ẹnyenede iso imam n̄ko.”

Nditọ ẹsiti ndutịm ubon mmọ ye idatesịt. Man an̄wam ofụri ubon ndidụk mme mbonoesop Christian, ẹma ẹsinọ mbon oro ẹkponide san̄asan̄a mbiomo. Ke uwụtn̄kpọ, Mangala ekesiyet mme ọfọn̄, ndien Winnifreda ọkwọhọde. Winnifreda, emi n̄ko ekesin̄wamde ke ndisịne n̄kpri owo ọfọn̄, ọdọhọ ete: “Kpukpru owo ẹma ẹsiye etieti nte mmọ ẹkpọn̄de ufọk.”

Ẹma ẹsinam eti ndutịm n̄ko ẹnọ mme udia eke spirit. Eyenan̄wan Pushpam, emi edide asiakusụn̄ ofụri ini idahaemi, eti ete: “Kpukpru usen, ubon nnyịn ama esidara edikot Bible ye edidụn̄ọde itien̄wed Bible eke usen ke usen ọtọkiet.” Annamma adian ete: “Eyen kiet kiet enyene ọkpọkpọ Bible, Enyọn̄-Ukpeme, ye mme n̄wed eken. Mmesitịm nnọ n̄kpan̄utọn̄ ke mme ibọrọ mmọ ke mme mbonoesop. Ke ebiet oyomde, mmesinọ nsịnudọn̄ ye nnen̄ede ke ufọk. Ke okoneyo nnyịn iyediana kiet ndida usen oro nsịm utịt ke akam ubon nnyịn.”

Nditọ oro ẹma ẹkekponi ẹdi ọsọn̄urua un̄wam ke ndin̄wam Annamma ndinọ kpukpru owo ke ubon nti ukpep Christian. Ndinyene ekese n̄kpọ ndinam, nte ededi, ibiọn̄ọke udọn̄ oro mmọ ẹnyenede ndibuana eti mbụk ke ọwọrọde ọkpọn̄ ufọk. Ke ofụri ofụri, nsio nsio owo ke ubon ẹnịm ukpepn̄kpọ Bible 57 ye mme owo ke mbọhọ oro. Ebe eyen mmọ Rajan ọdọhọ ete: “Ubon oro onịm mme ukpepn̄kpọ Bible oro ẹnyenede n̄kọri. N̄wan mi, Pushpam, enyenyene ifet ndikụt kiet ke otu nditọ ukpepn̄kpọ Bible esie ayakde uwem esie ọnọ Jehovah.”

Akwa ndutịme ama odu ke Kotahena ke ini utọ akamba ubon oro ọkọkpọn̄de Ufọkabasi Catholic. Okposụkedi oku ke idemesie akananam mîkaha ikese ubon oro inyụn̄ ibụp ntak, enye ama osio mme usụhọde mme andibuana ke ufọkabasi oro ọdọn̄ ẹkenam ndụn̄ọde. Ẹma ẹnyene ekese nneme, akpan akpan aban̄ade ukpepn̄kpọ Abasi-Ita-ke-Kiet. Annamma kpukpru ini ekesiberi edem ke Jehovah ye Bible ndin̄wana mban̄a mbuọtidem esie. Itien̄wed oro enye amade ndikama n̄kan ke nneme ẹmi ekedi John 17:3.

Ubon Sinnappa nte an̄wan̄ade owụt nte ke eti ndutịm ye ukeme oro enyenede iwụk ekeme ndida utịp oro ọnọde uyụhọ edi. Ebede ke ifịk ifịk ukeme mmọ, obufa emana eke mme asuanetop Obio Ubọn̄ ke ọkọri, kpukpru ke itoro Jehovah.

Ubiọn̄ọ Adian Ubon Ọtọkiet ke Utuakibuot Akpanikọ

Ubon Ratnam iyomke usụn̄ ikpọn̄ ubon Sinnappa, ke Narhenpitya, ikpehe efen ke Colombo. Mmọ n̄ko ẹkedi mbon Roman Catholic ke akpa. Ke 1982, Mme Ntiense ẹmi ẹkebuanade ke utom ukwọrọikọ eke ufọk ke ufọk ẹma ẹsobo ye Balendran, ebe Fatima, adiaha. Ẹma ẹtọn̄ọ ukpepn̄kpọ Bible ye ofụri ubon oro. Ikebịghike nditọ mmọ mbita ẹma ẹbụp Ignasiamal, ekaete mmọ, ẹban̄a enyịn̄ Abasi. Ke ini nditọ oro ẹkenọde ibọrọ “Jehovah,” mmọ ẹma ẹdemede udọn̄ ekaete mmọ, ndien ẹma ẹtọn̄ọ ukpepn̄kpọ Bible ye enye. Ekem, iba ke otu nditọ esie, Jeevakala ye Stella, ẹma ẹtiene ẹbuana ke ukpepn̄kpọ oro, ndien etisịm 1988 mmọ mbita ẹma ẹna baptism.

Kan̄a kemi, Balendran ye Fatima ẹma ẹbuana akpanikọ ye nditọeka iban Fatima efen, Mallika, ye ebe esie, Yoganathan. Etisịm 1987 ebe ye n̄wan emi ẹma ẹna baptism, ndien mmọ ẹmesịn ima Jehovah oro akade-kaiso ndikọri ke esịt nditọ mmọ iba. Pushpa, owo efen ke otu n̄kpri nditọeka iban Fatima, ama adiana. Enye ama ayak idemesie ọnọ onyụn̄ ana baptism ke 1990. Ke adan̄aemi ẹdude ke Tokyo, ebe esie, Eka, okodu ke esop Ikọmbakara, ndien Pushpa ama an̄wam ekpri eyeneren mmọ, Alfred, ndikọri n̄wọrọ owo ke usụn̄ Jehovah.

Kan̄a kemi, inan̄ ke otu nditọ duop ke ubon Ratnam ẹmeda idaha mmọ ẹnọ utuakibuot akpanikọ. Ke inemesịt, ita efen ke ẹnam eti n̄kọri ke ọkpọkpọ ukpepn̄kpọ Bible mmọ. Ke otu nditọ nditọ 11, eyenan̄wan kiet, Pradeepa, anana baptism. Ke ẹnọ n̄kpri owo itiaba eken ukpep kpukpru ini ebe ke ukpepn̄kpọ Bible ubon mmọ. Ke adianade do, ke ẹnịm ukpepn̄kpọ Bible 24 ye mbon oro ẹnyenede udọn̄ ke mbọhọ oro.

Kpukpru emi ikedịghe mfefere n̄kpọ. Ke akpa, ubiọn̄ọ ama odu ke ubon. Ete mmọ, Muthupillai, ye ikpọ nditọeka iren ẹma ẹbiọn̄ọ owo ubon mmọ ekededi ndidụk mme mbonoesop ke Ufọkmbono Obio Ubọn̄ m̀mê ndibuana ke an̄wan̄wa utom ukwọrọikọ. Ke adan̄aemi ndusụk ukọbọ emi ekedide ke ntak udọn̄ oro ẹkenyenede ẹban̄a ọkpọkpọ ukpeme, Muthupillai adian do ete: “Mma nyak idemmi ofụri ofụri nnọ ‘ndisana owo’ ndien n̄kenyịmeke ubon mi ẹkpọn̄ Ufọkabasi Catholic.” Idahaemi, nte ededi, enye onịm ke akpanikọ ete ke mmọ ẹtuak ibuot ẹnọ Abasi akpanikọ koro enye ekeme ndikụt mme ufọn oro mbuọtidem mmọ adade ọsọk mmọ.

Ke uwụtn̄kpọ, ini kiet ete enyene-ebiet oro mmọ ẹdụn̄de ama odomo ndida odudu ibọk mbịn mmọ nsion̄o ke ufọk. Enye ama edi okoneyo kiet onyụn̄ edibon n̄kpri osokoro oro ekesịnde “ibọk” akanade ufọk. Ndịk ama anam mme mbọhọidụn̄ oro ẹkenịmde nsunsu ekikere ke akpanikọ, sia kpukpru mmọ ẹkedori enyịn ndikụt idiọkn̄kpọ etịbede ọnọ ubon Ratnam. Ke ini Ignasiamal okokụtde n̄kpọ emi, nte ededi, enye ye nditọ esie ẹma ẹtan̄ mfri oro ẹsion̄o ye unana ndịk m̀mê nyekidem ndomokiet—ndien idiọkn̄kpọ ndomokiet iketịbeke inọ mmọ. Uko uko edinam mmọ ama akabade edi ata ikọ ntiense ke n̄kann̄kụk oro, anamde mme owo ẹnyene akamba ukpono ẹnọ mmọ. Stella ama ekeme nditọn̄ọ ukpepn̄kpọ Bible iba ye ubon efen oro okodụn̄de ekpere. Ke okopde nsịnudọn̄ oto emi, n̄wan eyen mmọ Nazeera ama onyịme ukpepn̄kpọ Bible n̄ko.

Ke afiakde ese ediwak edidiọn̄ oro osịmde ubon esie, Ignasiamal ọdọhọ ete: “Mmokop inemesịt ata etieti ndikụt n̄kọri eke spirit ke ubon mi. Jehovah ọmọdiọn̄ nnyịn koro ubiọn̄ọ osụhọde ubọk, ndien edidianakiet ubon nnyịn ọmọkọri.”

Nso edidiọn̄ ke ikpọ ubon ẹmi ẹdi ntem! Mmọ ẹmedian uyo mmọ ọtọkiet ye n̄kpri ubon, mme ubon oro ete m̀mê eka ikpọn̄ odude, ye mme Christian ẹmi mîdọhọ ndọ ẹmi ẹdomode ọkpọsọn̄ ndinam editan̄a eti mbụk Obio Ubọn̄ awara ke “nyayama idụt,” nte enyịn̄ oro Sri Lanka ọwọrọde. Adianade ye mme ekemmọ Christian ke ofụri ererimbot, Mme Ntiense ke Sri Lanka ẹsak iso ẹse edifiak n̄wụk Paradise, emi nnyịn ikemede nditi idahaemi nte nnyịn ikụtde mme esụk ye ikpọ obot ediye Sri Lanka.

[Mme Ikọ idakisọn̄]

[Mme ndise ke page 24, 25]

Ediwak owo ke Sri Lanka ke ẹnam n̄kpọ ẹban̄a ukwọrọikọ ye ukpepn̄kpọ Christian