Mme Andikara Ke Ikpehe Eke N̄kan̄ Spirit
ANIE akara ererimbot? Nte odu ndusụk ndausụn̄ emi otode odudu oro akande eke owo? Mîdịghe nte Abasi ayak mme owo ẹse ẹban̄a idemmọ? Ke ndiyom mme ibọrọ nnọ mme mbụme ẹmi, ẹyak nnyịn ibemiso ikere iban̄a n̄kpọntịbe emi akadade itie ke ini utom ukwọrọikọ Jesus Christ ke isọn̄.
Esisịt ini ke enye ama akana baptism, edibotn̄kpọ eke spirit oro enyịn mîkwe emi ẹkotde Satan kpa Devil ama edidomo Jesus. Ke asiakde kiet ke otu mme idomo oro, Bible ọdọhọ ete: “Satan ada [Jesus] aka ke ata edikon̄ obot, onyụn̄ owụt Enye kpukpru mme obio ererimbot ye ubọn̄ mmọ.” (Matthew 4:8) Satan ndien ama ọdọhọ Jesus ete: “Nyenọ Fi ofụri odudu emi ye ubọn̄ mme obio ẹmi: koro ẹma ẹyak kpukpru ẹnọ mi, nnyụn̄ nda ubọn̄ oro nnọ owo eke mmade. Mmọdo edieke Afo edituakde ibuot ke iso mi, kpukpru ẹyedi okwo.”—Luke 4:6, 7.
Satan ọkọdọhọ ke imọ inyene odudu ke ofụri obio ubọn̄, m̀mê ukara, ererimbot emi. Nte Jesus ama afan̄a ikọ emi? Baba. Ke akpanikọ, enye ama ọsọn̄ọ emi ke idaha efen ebe ke ndiketịn̄ mban̄a Satan nte “ọbọn̄ ererimbot.”—John 14:30.
Nte Bible ọdọhọde, Satan edi idiọk angel emi enyenede akwa odudu. Christian apostle Paul abuan Satan ye “udịm mme idiọk spirit” onyụn̄ etịn̄ aban̄a mmọ nte “mme andikara ekịm ererimbot.” (Ephesus 6:11, 12) Akan oro, apostle John ọkọdọhọ ete ke “ofụri ererimbot onyụn̄ esịne ke ubọk andidiọk.” (1 John 5:19) N̄wed Ediyarade eke Bible ọdọhọ ete ke Satan ke ‘abian̄a ofụri ererimbot.’ (Ediyarade 12:9) Ke ndamban̄a ikọ, Ediyarade n̄ko owụt Satan nte dragon emi ayakde “ukeme esie, ye ebekpo esie, ye akwa nsọn̄uyo esie” ọnọ ndutịm ukara ererimbot.—Ediyarade 13:2.
Mme n̄kpọntịbe ererimbot n̄ko ẹnọ uyarade nte ke odu idiọk odudu emi odude ke edinam, akarade mme owo ọnọ mmọ unan. Kaban̄a nso ntak efen ke mme ukara owo ẹkpu ke ndinam emem odu? Nso efen akpanam mme owo ẹsua ẹnyụn̄ ẹwot kiet eken? Ke eyịkde aban̄a uduọkiyịp ye n̄kpan̄a ke ekọn̄ mbio obio, ntiense kiet emi okokụtde ke enyịn ọkọdọhọ ete: “Mfiọkke nte emi akpakadade itie. Enye akan usua. Edi idiọk spirit ada mme owo ẹmi usụn̄ ndisobo kiet eken.”
Ata Owo Emi Ọbiọn̄ọde Abasi
Mfịn, ediwak owo inịmke ke akpanikọ ite ke Satan kpa Devil odu. Edi, enye idịghe ikpîkpu ekikere idiọkn̄kpọ ke idem ubonowo, nte ndusụk owo ẹnịmde ke akpanikọ. Bible ye mme n̄kpọntịbe ererimbot ẹwụt nte ke enye edi ata owo. N̄ko-n̄ko, Satan ọbọbiọn̄ọ Jehovah Abasi ke kpukpru usụn̄. Nte ededi, Satan idịghe ukem ye Abasi. Sia Jehovah edide Andibot emi enyenede ofụri odudu, enye edi enyene-unen Andikara ofụri edibotn̄kpọ.—Ediyarade 4:10b.
Abasi ikobotke idiọk edibotn̄kpọ ndibiọn̄ọ idemesie. Utu ke oro, kiet ke otu “nditọ Abasi” ẹdide mme angel ama ọkọri idiọk udọn̄ ndibọ ke idemesie utuakibuot emi nte enende enyenede Jehovah. (Job 38:7; James 1:14, 15) Udọn̄ emi ama anam enye odụk usụn̄ nsọn̄ibuot ye Abasi. Ke ndisọn̄ ibuot, edibotn̄kpọ eke spirit emi ama anam idemesie Satan (emi ọwọrọde “andibiọn̄ọ”) ye Devil (emi ọwọrọde “ọdọk-edidọk”). Ke ndikere mban̄a kpukpru ẹmi, afo emekeme ndiyịk ntak ẹyakde Satan akara ererimbot.
Ntak Ẹyakde Satan Akara
Nte afo emeti se Satan ọkọdọhọde Jesus aban̄a ukara isọn̄? Satan ọkọdọhọ ete: “Nyenọ Fi ofụri odudu emi . . . koro ẹma ẹyak kpukpru ẹnọ mi.” (Luke 4:6) Ikọ oro owụt nte ke Satan kpa Devil owụt odudu esie n̄kukụre ebe ke unyịme Abasi. Edi ntak emi Abasi ayakde Satan odu?
Ibọrọ mbụme oro enyene n̄kpọ ndinam ye mme n̄kpọntịbe ke in̄wan̄ Eden, emi Satan ọkọtọn̄ọde utom esie nte andikara ererimbot. Do Satan ama ọnọ ekikere ete ke Abasi akakara ke idiọk usụn̄ ke ndisịn ndinọ akpa ete ye eka oro, Adam ye Eve, se ifọnde. Nte Satan ọkọdọhọde, edieke mmọ ẹdiade mfri oro Abasi akakpande, mmọ ẹyewọrọ ufụn. Adam ye Eve ẹyedu ke ifụre ẹnyụn̄ ẹda ke idem ẹkpọn̄ Jehovah. Mmọ ẹyetie nte Abasi ke idemesie!—Genesis 2:16, 17; 3:1-5.
Ebede ke ndisu nsu ke usụn̄ emi ye nditap Eve onyụn̄ ebede ke n̄wan oro ndinam Adam abiat ibet Abasi, Satan ama ada akpa owo iba oro edisịn ke idak ndausụn̄ ye ukara esie. Devil ke ntem ama akabade edi abasi mmọ, kiet oro ọbiọn̄ọde Jehovah. Nte ededi, utu ke ediwọrọ ufụn, Adam ye Eve ẹma ẹdụk ufụn ẹnọ Satan, idiọkn̄kpọ, ye n̄kpa.—Rome 6:16; Mme Hebrew 2:14, 15.
Ke n̄kemuyo ye mfọnmma unenikpe esie, Jehovah ekpekekeme ndiwot Satan ye mbufa mme anditiene enye iba oro ke ndondo oro. (Deuteronomy 32:4) Edi eneni ido uwem ama abuana. Satan ama edemede eneni aban̄a nte usụn̄ edikara Jehovah enende. Ke ọniọn̄ esie, Abasi ama ayak ini ebe man otodo ẹkeme ndisọn̄ọ nte ke edida ke idem n̄kpọn̄ enye esida afanikọn̄ edi. Jehovah ama ayak mbon nsọn̄ibuot oro ẹkaiso ẹdu uwem ke ndusụk ini, ayakde Adam ye Eve ẹnyene nditọ.—Genesis 3:14-19.
Okposụkedi ekese nditọ Adam mîsụkke idem inọ itie ukara Jehovah, mme edinam Abasi ye mme andituak ibuot nnọ Enye ẹmewụt nte emi ọfọnde akan. Edinyịme itie ukara Jehovah nte ọfọnde esida inemesịt ye ata ifụre edi. Ke n̄kan̄ eken, ukara owo ke idak odudu Satan amada unana inemesịt ye unana ifụre edi. Ih, “owo akara owo ọnọ unan.” (Ecclesiastes 8:9, NW) Mme owo ikwe ata ifụre ye inemesịt oro ebịghide ke idak ukara owo ke ererimbot emi esịnede ke odudu Satan. Nte ededi, eti ntak odu ndinyene idotenyịn.
Ini Satan Edi Ibio!
Odudu Satan ke isọn̄ edi ke ibio ini. Jehovah idinyịmeke ukara Satan otịm ọniọn̄! Edinam Satan ọmọn̄ etre ke mîbịghike. Obufa andikara eyekara isọn̄, kpa edinen edidem emi Abasi ke idemesie emekde. Edidem oro edi Jesus Christ. Kaban̄a edidori enye ke ebekpo ke heaven, Ediyarade ọdọhọ ete: “Obio Ubọn̄ ererimbot emi amakabade edi Obio Ubọn̄ Ọbọn̄ [Jehovah] nnyịn ye Christ Esie.” (Ediyarade 11:15) Ubatini Bible, adianade ye edisu prọfesi N̄wed Abasi, ọsọn̄ọ nte ke n̄kpọntịbe emi akada itie ke isua 1914.—Matthew 24:3, 6, 7.
Bible n̄ko etịn̄ aban̄a se ikotịbede esisịt ini ke ẹma ẹkedori Jesus ke ebekpo. Enye ọdọhọ ete: “[Ekọn̄] otịbe ke heaven; Michael [Jesus Christ] ye mme angel esie ẹn̄wana ekọn̄ ye dragon [Satan kpa Devil]; dragon ye mme angel esie ẹnyụn̄ ẹn̄wana ekọn̄, edi mmọ ikanke. Ufan̄ inyụn̄ idụhe aba inọ mmọ ke heaven. Ndien ẹsio akwa dragon ẹduọk ke isọn̄, kpa akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.”—Ediyarade 12:7-9.
Nso idi utịp edibịn Satan nsio ke heaven? Mbon oro ẹdude ke heaven ẹkeme ndidara, edi nso kaban̄a mme andidụn̄ isọn̄? Ediyarade 12:12 ọdọhọ ete: “Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.” Ke akpanikọ, edisio Satan mfep ke heaven amada mbọm ọsọk isọn̄. The Columbia History of the World ọdọhọ ete: “Akwa nsobo Ekọn̄ Isua Inan̄ eke 1914–1918 . . . ama owụt ererimbot N̄kan̄ Edem Usoputịn nte ke mmọ ikemeke ndikpeme ntatenyịn oto ke ndisịme ye idiọk uduak esie. Edem Usoputịn itọn̄ọke aba ntak inyene uko toto ke ekọn̄ oro.”
Mfụhọ emana emi enen̄ede okpon akan uko emi ẹbiatde. Jesus ama etịn̄ prọfesi ete: “Idụt eyedaha an̄wana ye idụt, obio edidem kiet eyenyụn̄ adaha an̄wana ye obio edidem efen: akan̄ ye unyekisọn̄ ẹyenyụn̄ ẹdu ke nsio nsio ebiet.” Enye n̄ko ama ebemiso etịn̄ aban̄a idiọk udọn̄ọ. (Matthew 24:7, 8; Luke 21:11) Akan oro, Bible ọdọhọ ete ke “ukperedem ini” eke editịm n̄kpọ Satan, ediwak owo ẹyedi “mme ama idem, mme ama inyene, . . . ẹsọn̄ ibuot ye ete ye eka, . . . ẹnyụn̄ ẹbiat un̄wọn̄ọ.” N̄ko mme owo ‘ẹyema mbre ẹkan Abasi.’—2 Timothy 3:1-5.
Mme ekọn̄, ndiọi udọn̄ọ, unana udia, unyekisọn̄, ye mme idaha ido uwem ndikabade ndiọk n̄kan—kpukpru mme utọ n̄kpọ ẹmi ẹmeda itie ke anana-mbiet udomo toto ke 1914, kpa nte Bible ekebemde iso etịn̄. Mmọ ẹwụt nte ke ẹma ẹsio ofụtesịt asua Abasi ye owo—Satan kpa Devil—ẹfep ke heaven ndien ana enye idahaemi anam iyatesịt esie etre ke ikpehe n̄kan̄ isọn̄. Edi Bible owụt n̄ko ete ke owo idiyakke Satan odu ke edinam otịm ebịghi. Enye n̄kukụre enyene ‘ekpri ibio ini’ oro osụhọde tutu osịm Armageddon, ke ini Abasi edisobode ndutịm ererimbot emi Satan akarade.
Nso iditịbe inọ Satan ini oro? Apostle John ekewet ete: “N̄kụt angel otode ke heaven osụhọde, akama ukpọhọde editụn̄ọ ukpe ye akwa n̄kpọkọbi ke ubọk. Enye onyụn̄ omụm dragon, akani urụkikọt, emi edide Andidori ikọt Abasi ikọ ye Satan, onyụn̄ ọkọbi enye ke tọsịn isua, onyụn̄ otop enye esịn ke editụn̄ọ ukpe, onyụn̄ ọkọbi ukpe, onyụn̄ esịri abaha enye, onịm ufịkn̄kpọ ke esịt.” (Ediyarade 20:1-3) Nso ubọhọ ke emi edidi ntem ọnọ ubonowo emi ọbọde ndutụhọ!
Ndidat Esịt ke Idak Ukara Obio Ubọn̄
Ye Satan emi mîdụhe aba, Obio Ubọn̄ Abasi ke idak Jesus Christ eyenyene ọyọhọ odudu ke mme mbubehe ubonowo. Utu ke ndinyene ediwak ukara ke isọn̄, ukara eke heaven kiet kpọt edidu akara ofụri ekondo. Ekọn̄ edidi n̄kpọ eset, ndien emem eyefiọrọ ke kpukpru ebiet. Ke idak ukara Obio Ubọn̄ Abasi, kpukpru owo ẹyedụn̄ ọtọkiet ke ima ima otu nditọete.—Psalm 72:7, 8; 133:1; Daniel 2:44.
Nso orụk andikara ke Jesus ediwụt nte idide? Ke ini enye okodude ke isọn̄, enye ama owụt ntotụn̄ọ ima ọnọ mme owo. Jesus ke mbọm ama ọnọ mbon oro ẹkekopde biọn̄ udia. Enye ama anam mbon udọn̄ọ ẹkop nsọn̄idem onyụn̄ anam nnan ẹkụt usụn̄, imụm ẹtịn̄ ikọ, onyụn̄ anam mbụn̄ọ ẹkop nsọn̄idem. Jesus ama akam anam mme akpan̄kpa ẹset ẹdidu uwem! (Matthew 15:30-38; Mark 1:34; Luke 7:11-17) Mme utịben̄kpọ oro ẹkedi ntabinse kaban̄a mme utịben̄kpọ ẹmi enye edinamde nte Edidem. Edidi utịben̄kpọ didie ntem ndinyene utọ anam-ufọn andikara oro!
Mbon ẹmi ẹsụkde idem ẹnọ itie edikara Jehovah ẹyenyene mme anana-utịt edidiọn̄. N̄wed Abasi ọn̄wọn̄ọ ete: “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ ẹyenek nte edop, edeme imụm eyenyụn̄ ọkwọ.” (Isaiah 35:5, 6) Ke anyande ubọk owụt akwa usen oro, apostle John ama ewet ete: “Ndien n̄kop ọkpọsọn̄ uyo nte otode ke ebekpo ọwọrọ ete, Sese, ebietidụn̄ Abasi omodu ye owo. Enye eyenyụn̄ odụn̄ ye mmọ; ndien mmọ ẹyedi ikọt Esie, Abasi ke Idemesie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Ediyarade 21:3, 4.
Idara oro itie ukara Jehovah Abasi edinọde ebe ke Eyen esie, Jesus Christ, eyekpe utịp akamba akamba ke se ededi ndutụhọ emi ekemede ndidi nnyịn ima isobo ke editịm n̄kpọ odude kemi emi Satan kpa Devil akarade. Ke obufa ererimbot emi Abasi ọn̄wọn̄ọde, mme owo idiyịkke ite, ‘Anie enen̄ede akara?’ (2 Peter 3:13) Okopitem ubonowo eyedu ke inemesịt ye ifụre ke ikpehe n̄kan̄ isọn̄ enyenede mme ima ima Andikara oro, Jehovah ye Christ, ẹmi ẹdude ke ikpehe eke n̄kan̄ spirit. Ntak mûnyeneke idotenyịn edidi anditiene mbuana ke otu mme andidu ke idak mmọ?
[Ndise ke page 7]
Ubonowo eyedu ke ifụre ke ikpehe n̄kan̄ isọn̄ eke Obio Ubọn̄ Abasi
[Ebiet Ẹdade Ndise Ẹto ke page 4]
Foto NASA