Ntọt M’ọkwọrọ Obio Ubọn̄

N̄kparawa Owo Ẹkwọrọ Eti Mbụk ke Africa

IBIO ini ke Jesus ama ekeset ke n̄kpa, owo Africa kiet ama edika Jerusalem. Bible isiakke enyịn̄ esie. Ẹdiọn̄ọ enye n̄kukụre nte “[owo] emi odude ke idak Candace ọbọn̄an̄wan mbon Ethiopia onyụn̄ akamade ofụri inyene esie.” Ntak ẹsiakde enye ke Bible? Koro angel akada Philip ọkwọrọ eti mbụk edide Christian usụn̄ man ọkọkwọrọ ‘eti mbụk aban̄ade Jesus’ ọnọ enye. Owo Ethiopia emi ekedi akpa owo Africa emi odude ke n̄wetnnịm n̄kpọ emi akakabarede edi andibuana ke esop Christian.—Utom 8:26-39.

Mfịn, ediwak tọsịn Mme Ntiense Jehovah ke mme itie ikie ẹdu ke Africa. Mmọ ẹda kpukpru ifet ndibuana eti mbụk aban̄ade Jesus ye mbon en̄wen. Ifiọkutom ẹtienede mi ẹwụt nte ke idem n̄kparawa owo ke Africa ẹtiene ẹnyene udeme.

◻ Sandy ye Priya, nditọiban iba ẹdide isua 11 ke Nairobi, Kenya, ẹkedi mbọhọidụn̄. Mmọ ẹma ẹsikop idatesịt ndibre mbre ọtọkiet nnyụn̄ nnọ kiet eken mme n̄wedmbụk. Ete ye eka Priya ẹma ẹtọn̄ọ ndikpep Bible ye Mme Ntiense Jehovah. Idahaemi Priya ama enyene mbufa n̄wed ndidian ke otu n̄wed esie, esịnede kiet akpan akpan oro enye amade akan, Edikpañ Utöñ nö Aqua Andikpep, emi Watchtower Bible and Tract Society emịn̄de. Enye ama esikot n̄wed Aqua Andikpep esie ye Sandy ufan esie, ndien nditọiban iba ẹmi ẹma ẹtọn̄ọ ndikpep enye kpukpru ini.

Nte ededi, Una, eka Sandy ekesika Ufọkabasi Anglican ikonyụn̄ iyomke eyen esie okot n̄wed Mme Ntiense Jehovah. Kpa ye ubiọn̄ọ otode eka, ukpepn̄kpọ oro ama akaiso. Usen kiet Sandy ama eben̄e eka esie ete akam akpan̄ utọn̄ ke nneme mimmọ inikiet. Ibuotikọ emi nditọiban oro ẹkekotde usen oro ekedi “Owo Iba Ẹmi Ẹkenamde Mme Usọrọ Usen Emana.” Una ama ọnọ n̄kpan̄utọn̄ ndien ama otụk enye etieti. Enye ama aka ebịne eka Priya usọp usọp ye ediwak mbụme Bible.

Eka Priya ama anam ndutịm yak Ntiense kiet ekpep Bible ye Una. Ikebịghike Una ke idemesie ama abuana se enye ekekpepde ye Dolly nsan̄autom esie. Kan̄a kemi, Priya emi ekedide isua 11 ke emana ama akaiso ndinam n̄kọri onyụn̄ ebiere ndiyarade uyakidem esie nnọ Jehovah ke mmọn̄ baptism ke mbono district Mme Ntiense Jehovah. Kpa ke mbono oro, ke ata inemesịt Priya, Una ye Dolly ẹma ẹna baptism n̄ko!

◻ Odu ndusụk idụt ke Africa emi owo mîsịnke utom Mme Ntiense Jehovah ke n̄wed. Ke kiet ke utọ idụt oro, mme owo ke ofụri ofụri ifịnake iban̄a mme edinam ye mme ukpepn̄kpọ Mme Ntiense. Ke ufọkn̄wed kiet ke idụt oro, ẹma ẹnyịme eyeneren isua itiaba ye eyeneka esie eren isua itiokiet—kpa nditọ Mme Ntiense—ẹsitre nditiene mbuana ke ini akam ido ukpono.

Usen kiet obufa andikpep ama oyom ete nditọiren oro ẹtiene ẹbuana ke akam ye nditọwọn̄ eken. Eyeneren oro okokponde akan ama esịn ndien andikpep ama amia enye. Shadrack, ekpri eyeneka esie eren, ama eyịre oyom ndikụt akamba etubom ufọkn̄wed ke ọfis esie. Akamba etubom ufọkn̄wed ye obufa andikpep oro ẹma ẹbụp enye ntak emi enye mîkoyomke ndibuana ye mbon eken. Mmọ ẹma ẹbụp m̀mê enye efehe mbak ete ye eka esie ẹdimia enye. Enye ama ọbọrọ ke ata eti usem Arabic ete: “Baba, Abasi emi ntuakde ibuot nnọ idịghe Abasi ndutịme edi eke ndutịm. Ami n̄kemeke ndidi kiet ke otu Mme Ntiense Jehovah ke ufọk ndien ndi owo ido ukpono efen ke ufọkn̄wed!” Nte utịp, ẹma ẹdọhọ enye okûtiene abuana.

Ke ama akana baptism, owo Ethiopia oro ẹsiakde ke n̄wed Utom Mme Apostle ama “ọnyọn̄ esie ke idatesịt.” (Utom 8:39) Kpasụk ntre mfịn, mme ọkwọrọ Obio Ubọn̄ ke akwa ikpehe Africa ẹdara ke ifet oro mmọ ẹnyenede ‘ndikwọrọ eti mbụk aban̄ade Jesus.’—Utom 8:35.