Mme Ntiense Jehovah ke Ofụri Ererimbot—Zambia

NTATARA ntatara, akwa unaisọn̄ oro edide ọdọdọk ososụhọde, oro odude ke enyọn̄ obot emi okon̄de ke mita 1,200—emi edi Zambia, obio emi odude ke esịt ufọt ufọt edem usụk Africa. Ke ufọt edem edere ye edem usiahautịn, mme Obot Muchinga ọwọrọ okon̄ ke mita 2,100. Akwa Akpa Zambezi, emi oyomode ọkpọsọn̄ ọkpọsọn̄ ewet odụk Victoria Falls emi ọwọrọde etop ke ererimbot, anam n̄kponn̄kan ikpehe ke adan̄a n̄kan̄ usụk usụk idụt emi mmọn̄ akande okụk mi. Akamba ukpụhọde odu ke otu mme owo mi, ẹnyenede se iwakde ikan nsio nsio ekpụk 70. Ẹsem akpan usem itiaita mi, edi ediwak mmọ eken ẹdu.

Ke 1911 isio isio usem ama ọtọn̄ọ onyụn̄ atara asuana ke Zambia. Isenowo ẹma ẹmen Studies in the Scriptures ẹdi, ndien ọtọn̄ọde ke ini oro Mme Ntiense Jehovah ẹma ẹdomo ndisuan “edisana usem” akpanikọ Bible ke Zambia. (Zephaniah 3:9, NW) Se inen̄ede ikama n̄kpọ-ata edi mme edinịm ke akpanikọ ẹban̄ade idaha mme akpan̄kpa oro mîkemke ye N̄wed Abasi. Ke ini mme owo ẹkpepde akpanikọ ẹnyụn̄ ẹkụtde nte mme nsunsu ekikere ẹkesịnde mmọ ke ufụn, utịp edi edibọhọ ufụn!—John 8:32.

Ke uwụtn̄kpọ, eyenete an̄wan kiet emi anamde akpanikọ ọtọt ete: “Ke ini eyeneka eka mi edide eren akakpade ke unana idotenyịn, eka mi, ọsọn̄idem owo United Church of Zambia, ama okop editịmede esịt. Ke ẹma ẹkenam usọrọ ubụkowo ekebịghide ke urua kiet ẹma, mma mfiak nnyọn̄ obio in̄wan̄ man n̄kese nte n̄kpọ etiede ye enye. Ke ini n̄kosịmde, mma n̄kụt akanieren kiet ke ufọk, ndien ke enye ama ọkọnyọn̄, mma mbụp ekaeka mi m̀mê enye ekedi anie. Enye ama ọdọhọ ete ke eren emi ekedi abiaifọt. Eka mi okoyom ndikot enye edisio usiene n̄kpa ọnọ eyeneka esie man ukpọn̄ esie okpodu ke emem. Enye okonịm ke akpanikọ ete kemi ke enye ‘oyoyo ntre,’ nte enye eketịn̄de.

“Ekaeka mi ama anam an̄wan̄a n̄ko nte ke edidi mi ekedi edidiọn̄ koro ubon ẹkeyomde okụk ndikpe abiaifọt emi. Enye ama ọdọhọ mi ntịp okụk, edi mma ntịn̄ nnọ enye ke usọ usọ usụn̄ ke nte Christian, ke ndikemeke nditiene mbuana. Mma n̄kọk ibuot ye enye ke Psalm 146:4, emi owụtde ete ke mme akpan̄kpa ifiọkke n̄kpọ—ntre ukpọn̄ ndomokiet idụhe emi ‘asan̄ade oyo.’ Nnyịn n̄ko ima ineme N̄wed Mbon Rome 12:19, emi owụtde ete ke usiene enyene Jehovah inyụn̄ idịghe nnyịn. Ke oro ebede, mma ntịn̄ nnọ eka mi mban̄a idotenyịn ediset ke n̄kpa oro Jesus eketịn̄de aban̄a, nte ẹwetde ke John 5:28, 29. Ọkpọsọn̄ mbuọtidem mi ke mme un̄wọn̄ọ Abasi ama enen̄ede otụk enye ke idem. Ke mîbịghike enye ama ọtọn̄ọ ndikpep n̄kpọ ye Ntiense kiet onyụn̄ anam usọp usọp n̄kọri. Enye ama osịbe kpukpru ebuana ye akani ido ukpono esie onyụn̄ ayarade uyakidem esie ọnọ Abasi ebe ke baptism. Idahaemi enye edi kiet ke otu Mme Ntiense Jehovah.”

Eyenete an̄wan efen ọtọt ete: “N̄kaka edibụk n̄wan eyeneka eka mi. Ke nsịmde do, mma n̄kụt eyeneka eka mi edide eren ye eyen eyeneka eka mi ẹtiede biọn̄. Mmọ ikadiaha n̄kpọ ndomokiet ọtọn̄ọde ke usen oro n̄wan eyeneka eka mi akakpade. Ke ini n̄kobụpde ntak, mmọ ẹma ẹbọrọ ẹte ke nte ekemde ye ido obio, ke owo iyakke mmimọ ibara ikan̄ item udia. Mma ndọhọ ke nyetem udia, edi ndusụk mme andibuana ke ubon ẹma ẹfehe ndịk nte ke edieke mbiatde ido ukpono ndem emi, ofụri owo ẹyedama idat!

“Mma nnam an̄wan̄a ke nte kiet ke otu Mme Ntiense Jehovah, ke n̄kpono se Bible etịn̄de ke Leviticus 18:30 nnyụn̄ ntieneke mme ido obio oro mîkemke ye N̄wed Abasi. Ekem mma n̄wụt mmọ ediye uduot ekpri n̄wed Spirit Mme Akpan̄kpa. Ye oro esịt ama osụhọde mmọ, ndien mma n̄kaiso nnyụn̄ ntem udia nnọ eyeneka eka mi ye mbon eken. Uko mi ama otụk mme iman owo emi akakpade mi ndien mmọ ẹma ẹnyịme ndikaiso n̄kpep Bible. Mmọ ẹdedi mme asuanetop oro mînaha baptism, ndien ofụri ubon ẹdori enyịn ndina baptism ke mîbịghike.”

Nnyịn isinem esịt didie ntem ke ini edisana usem akpanikọ owụride ndutịme eke mme nsu ido ukpono, akpan akpan mmọ oro ẹbiọn̄ọde ukeme ukere n̄kpọ oro ẹsịnde mbon oro mînyeneke ifiọk ke ufụn! Ye edidiọn̄ Jehovah, edisana usem ke atara asuana ke Zambia, idem nte edide ke ofụri isọn̄.—2 Corinth 10:4.

[Ekebe ke page 9]

IDAHA IDỤT ORO:

Isua Utom 1994

N̄WAKN̄KAN IBAT ẸMI ẸNỌDE IKỌ NTIENSE: 82,926

MBAHADE: Ntiense 1 ke owo 107

MME ANDIDỤK EDITI: 363,372

UKEM MBAHADE MME ASUANETOP ẸDIDE MME ASIAKUSỤN̄: 10,713

UKEM MBAHADE UKPEPN̄KPỌ BIBLE: 108,948

IBAT ẸKENADE BAPTISM: 3,552

IBAT ESOP: 2,027

ỌFIS N̄KỌK ITIEUTOM: LUSAKA

[Ndise ke page 9]

Ufọkutom n̄kọk itieutom Watch Tower ke ọwọrọde ọkpọn̄ Lusaka

[Ndise ke page 9]

Ndikwọrọ ikọ ke Shimabala, edem usụk Lusaka