“Akani Testament” M̀mê “N̄wed Abasi Usem Hebrew”—Ewe?
EDI ọsọ edinam mfịn ke Christendom ndida mme ikọ oro “Akani Testament” ye “Obufa Testament” ntịn̄ mban̄a mme ikpehe Bible oro ẹkewetde ke usem Hebrew/Aramaic ye Greek. Edi nte isọn̄ ekededi odu ke Bible ndida mme ikọ ẹmi? Ndien ke nso ntak ke Mme Ntiense Jehovah ẹfep ndida mmọ ofụri ofụri ke mme n̄wed mmọ?
Edi akpanikọ, 2 Corinth 3:14, nte ekemde ye King James Version ọkọrọ ye ndusụk n̄kani edikabade eken, utọ nte Septembertestament usem German, kpa akpa edikabade eke Martin Luther (1522), ekeme nditie nte ọsọn̄ọ edinam emi. Ke King James Version, ufan̄ikọ emi okot ete: “Edi ekikere mmọ ama okịm: koro tutu osịm mfịn emi ukem ufụhọn̄kpọ oro osụk ododu owo imenke ifep ke edikot akani testament; kpa ufụhọn̄kpọ emi Christ emende efep.”
Nte ededi, nte apostle oro etịn̄ mi aban̄a n̄wed 39 oro ẹwakde ndikot “Akani Testament”? Ikọ Greek oro ẹkabade “testament” mi edi di·a·theʹke. Ọwọrọetop n̄wed-ofụri-orụk-ifiọk ukpepn̄kpọ ido ukpono eke usem German oro Theologische Realenzyklopädie, ke etịn̄de aban̄a 2 Corinth 3:14, ọdọhọ ete ‘edikot akani di·a·theʹke’ ke ufan̄ikọ oro edi ukem nte ‘edikot Moses’ ke ufan̄ikọ 2Co 3:15 etienede. Ntem, enye ọdọhọ ete, ‘akani di·a·theʹke’ ada aban̄a Ibet Moses, m̀mê ke nnam-n̄kaha, Akpa N̄wed Ition eke Bible. Enye ke akpanikọ idaha inọ ofụri otu N̄wed Abasi eke odudu spirit emi okodude mbemiso eyo Christian.
Apostle oro etịn̄ aban̄a sụk ikpehe kiet ke N̄wed Abasi Usem Hebrew, kpa akani Ibet ediomi, emi Moses ekewetde ke Akpa N̄wed Ition eke Bible; enye itịn̄ke iban̄a N̄wed Abasi Usem Hebrew ye Aramaic ke ofụri ofụri. N̄ko-n̄ko, ikọ esie iwọrọke ke mme uwetn̄kpọ Christian eke odudu spirit eke akpa isua ikie E.N. ẹnam “obufa testament,” sia ikọ emi mîsịneke ke ebiet ndomokiet ke Bible.
Enyene n̄ko ndifiọk nte ke ikọ Greek oro di·a·theʹke emi Paul adade mi enen̄ede ọwọrọ “ediomi.” (Kaban̄a n̄kaiso ntọt se New World Translation of the Holy Scriptures—With References, Appendix 7E, page 1585, emi Watchtower Bible and Tract Society of New York, Inc., emịn̄de, 1984.) Ke ntre nte enende ediwak edikabade eke eyomfịn ẹkot “akani ediomi” utu ke “akani testament.”
Ke afan̄ emi, “National Catholic Reporter” ọdọhọ ete: “Ikọ oro ‘Akani Testament’ nte owo mîkemeke ndifan̄a ọnọ ekikere aban̄a usụhọde itie ye se mîkemke ye eyomfịn.” Edi Bible enen̄ede edi n̄wed kiet, inyụn̄ idụhe ikpehe oro mîkemke ye eyomfịn, m̀mê edide “akani.” Etop esie odu ke n̄kemuyo ọtọn̄ọde ke akpa n̄wed ke ikpehe eke Hebrew tutu osịm akpatre n̄wed ke ikpehe eke Greek. (Rome 15:4; 2 Timothy 3:16, 17) Ntre nnyịn imenyene nti ntak ndifep mme ikọ ẹmi oro ẹkọn̄ọde ke mme ukwan̄ ekikere, ndien nnyịn imemek ndida mme ikọ oro ẹnende ẹkan “N̄wed Abasi Usem Hebrew” ye “N̄wed Abasi Christian Usem Greek.”