Ntọt M’ọkwọrọ Obio Ubọn̄

Ikọt Abasi Ẹnọ Idemmọ Unyịme Unyịme

Enyịn̄ esie ekedi Joseph, ndien enye ekedi amanaisọn̄ isuo Cyprus. Enye okodu ke otu mme Christian akpa isua ikie oro ẹkenyamde mme in̄wan̄ ye mme ufọk man ẹtịp n̄kpọ ke n̄kan̄ okụk ẹsịn ke n̄kọri Ido Ukpono Christ. Ke ntak mbọm ye ntatubọk esie, ẹkedidiọn̄ọ enye nte Barnabas, emi ọwọrọde “Eyen Ndọn̄esịt.”—Utom 4:34-37.

Utọ edinyene ata udọn̄ ntre ke idem mmọ efen esiwak ndidi idiọn̄ọ mme ata andituak ibuot nnọ Jehovah. Mme Ntiense Jehovah mfịn inyeneke ukpụhọde, nte ifiọkutom etienede mi otode Solomon Islands owụtde.

Otu Mme Ntiense ẹwakde ẹbe owo 60 ẹtode Australia ye New Zealand ẹma ẹnam isan̄ ẹka Honiara, ibuot obio Solomon Islands ke Guadalcanal. Mmọ ẹkedi ndin̄wam ke ndibọp Ufọk Mbono nnọ ikpọ mboho Christian. Akada mmọ n̄kpọ nte urua iba kpọt ndibọp ufọkmbono oro odụkde n̄kpọ nte owo 1,200!

Ke n̄kpọ nte ukem ini oro, ukara n̄kann̄kụk ekpri obio Munda, ke isuo New Georgia, ama ọnọ esop Mme Ntiense Jehovah isọn̄ ke ata ufọt obio. Mmọ ẹkeyom ndibọp Ufọkmbono Obio Ubọn̄, kpa itie utuakibuot. Ndien mmọ ẹma ẹnen̄ede ẹyom ndinyene kiet. Mmọ ẹkesisop idem ke akwaufọk ekpri ufọk n̄kanya, edi mmọ ikenyeneke okụk ndida mbọp Ufọkmbono Obio Ubọn̄.a Ekese ke otu mme andibuana ke esop oro ẹkedi mbonusọn̄ ye mbon udọn̄ọ ye nditọwọn̄, ndien ikodụhe owo oro ekenyenede ifiọk ke utom ubọpn̄kpọ.

Mme Ntiense ẹtode obio Honiara, oyomde usụn̄ ke n̄kpọ nte kilomita 380, ke isuo Guadalcanal, ẹma ẹnọ idemmọ unyịme unyịme. (Psalm 110:3) Mmọ ẹkedọhọ ẹte: “Edieke nditọete nnyịn ke mme idụt efen ẹkenyịmede ndibọp Ufọk Mbono nnọ nnyịn ke urua iba, do nnyịn ke akpanikọ imekeme ndin̄wam nditọete nnyịn ke Munda nnyụn̄ mbọp Ufọkmbono Obio Ubọn̄ nnọ mmọ ke urua iba.”

Se ikotịbede edi oro. Usen kiet ubom emi mme okop-inemesịt ye ifịk ifịk Ntiense ẹdide mme anamutom unyịmesịt ẹkeyọhọde ama edibehe ke Munda. Iren ye iban, ikpọ ye n̄kpri, kpukpru ẹma ẹsịn idem ke ndision̄o mbiomo mmọ ẹnyụn̄ ẹben̄e idem nditọn̄ọ utom ubọpn̄kpọ ye eto, cement, tian, ye mme n̄kpọ utom eken oro ẹkebemde mmọ iso ẹbehe ke Munda.

Ikebịghike ke ẹma ẹketọn̄ọ utom oro, ọkpọsọn̄ obuma ama otop onyụn̄ abiat itie unọ mmọn̄ obio oro. Nte ededi, emi ikedịghe mfịna oro owo mîkemeke ndikan ubọk. Mme Ntiense oro ẹma ẹtịbi obube mmọn̄ oro ẹkenyenede mmọn̄ ẹto ke ofụri ini utom ubọpn̄kpọ oro. Nso kaban̄a udia ndinọ ofụri mbonutom oro? Oro ikedịghe mfịna n̄ko. Mbonutom unyịmesịt ẹketode Honiara ẹkesan̄a ye ekese udia oro mme esop ke Honiara ẹkenọde. Mmọ ẹma ẹkam ẹsan̄a ye mme etemudia mmọ ẹdi!

Mme mbọhọidụn̄ ẹma ẹse n̄kọri utom oro akakade iso ye n̄kpaidem. Kiet ke otu mmọ ọkọdọhọ ete: “Mme n̄kpọ isidaha itie ke usen ifan̄ mi. Mmọ ẹsida ediwak isua.” Mbọhọidụn̄ efen, adaiso ido ukpono, ama onyịme ete ke ufọkabasi imọ amakama utom ubọpn̄kpọ ke isua 20 ẹmi ẹkebede edi isụk ikụreke. Ke edide isio ye oro, obufa Ufọkmbono Obio Ubọn̄ eke Mme Ntiense Jehovah ke Munda ama okụre ke usen duop kpọt!

[Mme Ikọ idakisọn̄]

[Mme ndise obio ke page 24]

(Ama oyom ndikụt nte enye enen̄erede etie, se n̄wed)

Inyan̄ibom South Pacific

SOLOMON ISLANDS

Munda

GUADALCANAL

Honiara

[Ndise Obio]

AUSTRALIA

NEW ZEALAND