Ukeme Usio N̄kpọ Ndi Enọ Ntatubọk Otode Abasi
JEHOVAH esidat esịt ke utom ubot n̄kpọ esie. (Psalm 104:31) Ẹwụt ntotụn̄ọ uyụhọ oro enye enyenede oto utom ubot n̄kpọ ke Genesis 1:31: “Abasi okụt kpukpru se enye akanamde, ndien, sese ẹfọn etieti.”
Jehovah ikonịmke idatesịt emi inọ idemesie ikpọn̄. Enye ama ọnọ Jesus ifet edidi asan̄autom, m̀mê n̄kpọutom, emi ebede ke enye ẹbot kpukpru n̄kpọ eken. (John 1:3; Colossae 1:16, 17) Nte “etubom anamutom” (NW), Jesus n̄ko ama ‘adara ke iso Jehovah kpukpru ini.’—Mme N̄ke 8:30, 31.
Edi ukeme usio n̄kpọ ndi idụhe ke heaven kpọt. “Ẹbot enye ẹsịn mme owo ke idem,” ntre ke Eugene Raudsepp ewet ke n̄wed esie oro How Creative Are You? Emi idịghe n̄kpọntịbe unana idotenyịn, koro ẹkenam owo ke mbiet Abasi. (Genesis 1:26) Jehovah ke ntem ọnọ ubonowo mme ọnọ-uyụhọ ukeme usio n̄kpọ ndi.—James 1:17.
Ke ntre, nte mîkpaha owo idem, Bible etịn̄ inem inem aban̄a ukwọ ikwọ, unek unek, edidọk n̄kpọ, utemudia, usọ, ye mme ukeme usio n̄kpọ ndi eken. (Exodus 35:25, 26; 1 Samuel 8:13; 18:6, 7; 2 Chronicles 2:13, 14) Bezalel, owo usọ, ama ada enọ esie ke “n̄kari usọ” an̄wam ke ndibọp ataya. (Exodus 31:3, 4) Anaedi ekpemerọn̄ oro Jabal ekedi owo emi okosiode tent edi, kpa ufọkidụn̄ emi eferede owo ke idem ndimen ke itie kiet n̄ka efen. (Genesis 4:20) David ikedịghe ọkwọ ikwọ ye otịm ikwọ kpọt, edi n̄ko andisio mbufa ndido ikwọ ndi. (2 Chronicles 7:6; Psalm 7:17; Amos 6:5) Ekeme ndidi Miriam ọkọtọn̄ọ unek idatesịt oro ẹkedade ẹdara utịbe utịbe ubọhọ nditọ Israel ke Ididuot Inyan̄.—Exodus 15:20.
Ukeme usio n̄kpọ ndi esiwak ndidi n̄kpọ ndida mmenede utuakibuot akpanikọ ke enyọn̄. Jesus ama osion̄o mme n̄ke ye mme uwụtn̄kpọ oro ẹkụtde ke enyịn edi ndida nneme mme etop esie. Ẹteme mme anditiene enye ukem ntre ẹte “[ẹkpa] utom ke ukwọrọikọ ye ukpepn̄kpọ.” (1 Timothy 5:17) Ih, utom ukwọrọikọ mmọ idịghe ikpîkpu edinam ofụri ini. Enye edi usọ emi oyomde ẹsion̄o mme ido ukpepn̄kpọ ẹdi. (Colossae 4:6) Emi edi akpan n̄kpọ akpan akpan ke ini owo ekpepde nditọ esie n̄kpọ.—Deuteronomy 6:6, 7; Ephesus 6:4.
Ntem, Jehovah abuana idatesịt oro edibotn̄kpọ ọnọde enye ye mbon en̄wen. Nso enọ ntatubọk ke emi edi ntem!