Mụm Nsọn̄ọnda Kama Nyụn̄ Du Uwem!
“KPỌN̄ Abasi, ndien kpa n̄kpa.” Ikpaedem magazine nnyịn owụt n̄wan Job, emi eketịn̄de mme ikọ oro ye enye ndien ndien. Oro ekedi ke n̄kpọ nte isua 3,600 ẹmi ẹkebede. Edi en̄wan inua oro ẹkedade ẹtiene anam-akpanikọ asan̄autom Abasi do owụt eneni oro ubonowo osobode tutu osịm mfịn emi. Anam-akpanikọ Job ama osobo enyene-ndịk ntakurua—ufene esie, ufọkidụn̄ esie, nditọ esie duop. Idahaemi udọn̄ọ oro ebịghide ke anyanini ama otụhọde enye ikpọkidem, odomode enye okosịm akpatre. Nso ikedi ntak? Akwa asua Abasi ye owo, Satan kpa Devil, ke akanam n̄kpọ aban̄a ata oro enye akamiade nte ke owo ikemeke ndimụm nsọn̄ọnda ye Abasi n̄kama ke idak ọkpọsọn̄ udomo.—Job 1:11, 12; 2:4, 5, 9, 10.
Mfịn, kpa nte ekedide ke eyo Job, “ofụri ererimbot onyụn̄ esịne ke ubọk andidiọk,” Satan kpa Devil. (1 John 5:19) Ke akpanikọ, oro akam ototịm edi akpanikọ mfịn, koro kemi ẹma ẹsio enyeemi “ẹkotde enye ete, andidori ikọt Abasi ikọ ye Satan, andibian̄a ofụri ererimbot,” ke heaven ẹduọk ke isọn̄ emi. (Ediyarade 12:9) Emi edi ntak ọkpọsọn̄ unọmọ oro ọnọmọde ubonowo ke eyo nnyịn. Akpa ekọn̄ ererimbot, emi akasiahade ke 1914, ekedi idiọn̄ọ “ntọn̄ọ ubiak-uman” oro akade iso osịm ọyọhọ isua ikie 20 emi.—Matthew 24:7, 8.
Ke ibak ibak, esuene esuene ererimbot emi, ndi akanam afo emekere ke imọ imọyọ isịm akpatre nte owo? Ndi akanam afo emeyịk ete, ‘Nte uduak ekededi odu ke uwem?’ Ekeme ndidi Job ama ekere n̄kpọ ke usụn̄ oro, edi enye ikedehede iduọk mbuọtidem ke Abasi, okposụkedi enye akanamde mme ndudue. Enye ama etịn̄ ubiere esie ke mme ikọ ẹmi: “Ndisioho mfọnmma ke idemmi mfep tutu ndikpa.” Enye ama enyene mbuọtidem nte ke Abasi ‘eyefiọk mfọnmma esie.’—Job 27:5; 31:6.
Jesus Christ, Eyen Abasi, ekenyene n̄ko ndiyọ mme idomo ke adan̄aemi okodude mi ke isọn̄. Satan ama ada en̄wan etiene Jesus ke nsio nsio usụn̄. Enye ama anam n̄kpọ aban̄a udọn̄ ikpọkidem Jesus onyụn̄ odomo ibetedem Esie ke Ikọ Abasi, nte ekedide ke obot emi enye akadade idomo etiene enye. (Matthew 4:1-11) Enye ama afịna Jesus ebe ke ndinam mme ọsọn̄ibuot scribe ye mme Pharisee ye mbon oro mmọ ẹbian̄ade ẹkọbọ enye, ẹdori enye ikọ nte ke osụn̄i Abasi, ẹnyụn̄ ẹdụk odu ndiwot enye. (Luke 5:21; John 5:16-18; 10:36-39; 11:57) Mmọ ẹma ẹnam Jesus se itịmde idiọk ikan se abian̄a abian̄a mbon ndọn̄esịt ita oro ẹkenamde Job.—Job 16:2; 19:1, 2.
Ke in̄wan̄ Gethsemane, nte Jesus akasan̄ade ekpere ata utịt udomo emi, enye ama ọdọhọ mme mbet esie ete: “Ukpọn̄ Mi ofụhọ etieti ekpere ndikpa.” Ekem, enye ama “ọduọ okịbi iso ke isọn̄, ọbọn̄ akam ete, O Ete Mi, edieke usụn̄ odude, yak cup emi ebe ọkpọn̄ Mi; edi yak okûdi nte Ami nnyịmede; edi yak edi nte Afo onyịmede.” Ke akpatre, ke ọkọn̄ọde ke eto ndutụhọ, ke ndisu mme ikọ prọfesi eke Psalm 22:1, Jesus ama ofiori ete: “Abasi Mi, Abasi Mi, nsinam Afo ọkpọn̄de Mi?” Edi ke akpatre Abasi ikọkpọn̄ke Jesus koro Jesus ama omụm mfọnmma nsọn̄ọnda akama ye Enye, onịmde uwụtn̄kpọ ọnọ kpukpru mme ata Christian nditiene. Jehovah ama ọnọ nsọn̄ọnda Jesus utịp ebe ke ndinam enye eset nnyụn̄ mmenede enye ndori ke n̄kon̄n̄kan heaven. (Matthew 26:38, 39; 27:46; Utom 2:32-36; 5:30; 1 Peter 2:21) Abasi eyenọ kpukpru mmọ eken oro ke ukem usụn̄ oro ẹmụmde nsọn̄ọnda ke enye ẹkama utịp.
Ikụreke ke nsọn̄ọnda Jesus ndikọnọ ọyọhọ ibọrọ ke ata oro Satan akamiade edi uwa mfọnmma uwem esie eke owo ama ọnọ ufak, emi ọkọn̄ọde ke oro mme owo oro ẹmụmde nsọn̄ọnda ẹkama ẹkeme ndinyene nsinsi uwem. (Matthew 20:28) Akpa, Jesus atan̄ “ekpri otuerọn̄” oro ẹyetde aran obok ẹmi ẹkabarede ẹdi nsan̄a mme ada udeme nnyene ye enye ke Obio Ubọn̄ eke heaven. (Luke 12:32) Ke emi ebede, ẹtan̄ “akwa otuowo” ẹbok man ẹbọhọ “akwa ukụt,” ẹwọn̄ọde ke enye man ẹdida nsinsi uwem ẹnyene ke ikpehe Obio Ubọn̄ Abasi ke isọn̄.—Ediyarade 7:9, 14-17.
Job oro okomụmde nsọn̄ọnda akama eyedu ke otu ediwak biliọn owo ẹmi ẹkekpan̄ade ẹmi ẹdinamde ẹset adan̄aoro man ẹkabade ẹdi ubak emem emem n̄ka “obufa isọn̄” oro. (2 Peter 3:13; John 5:28, 29) Nte ẹwụtde ke ikpaedem magazine nnyịn, nsọn̄ọnda ama enyene utịp esie ke eyo Job ke ini Jehovah ‘ọkọdiọn̄de Job ke ukperedem akan eke mbemiso.’ Enye ama enyene odudu ke n̄kan̄ eke spirit nte owo emi ‘mîkanamke idiọk ke n̄kpọkinua esie.’ Abasi ama adian isua uwem 140 ọnọ enye. Ke n̄kan̄ n̄kpọ obụkidem, enye ama ọnọ Job kpukpru se enye ekenyenede ke mbemiso utịm ikaba, ndien Job “obon nditọiren itiaba ye nditọiban ita,” kpa nditọiban oro ẹkedade nte nye-n̄kan ke ofụri idụt oro. (Job 2:10; 42:12-17) Edi ofụri uforo emi ekedi sụk ntabinse ke otu mme edidiọn̄ oro mme omụm nsọn̄ọnda n̄kama ẹdidarade ke Paradise “obufa isọn̄.” Afo n̄ko emekeme ndibuana ke idatesịt oro, nte mme page oro ẹtienede ẹdinamde an̄wan̄a!
[Ndise ke page 4]
Jesus ama onịm mfọnmma uwụtn̄kpọ nte omụm nsọn̄ọnda n̄kama