Nso ke Christmas Ọwọrọ Ọnọ Fi?
Afo ọkpọbọrọ didie? Christmas edi (1) ini ndidu ye ubon fo; (2) ini usọrọ; (3) ini ido ukpono; (4) ini mfịghe; (5) ini ọkpọsọn̄ udọn̄; (6) ini ọkpọsọn̄ mbubịne.
OKPOSỤKEDI ekemede ndikpa owo idem, ke otu se iwakde ibe owo 1,000 oro ẹkedụn̄ọrede ke Britain, mbahade 6 eke ikie kpọt ẹkeda Christmas nte akpan ini edinam ido ukpono. Ke edide isio ye oro, mbahade 48 eke ikie ẹkeda Christmas nte n̄wọrọnda ini ndidu ye ubon mmọ. Ke akpanikọ, ediwak owo ẹdọhọ ke enye edi san̄asan̄a ini ọnọ nditọwọn̄. Ke uwụtn̄kpọ, ke ini ẹkebụpde eyenan̄wan kiet edide isua 11 ke emana se enye amade akan kaban̄a Christmas, enye ọkọbọrọ ete: “Nduaidem, edikop inemesịt, [ye] edinọ mme enọ.” The Making of the Modern Christmas onyịme ete ke “n̄kponn̄kan nsọn̄uyo . . . oro ẹdoride ke ‘ido edinam’ Christmas nte eyịghe mîdụhe enen̄ede edi ke ufọk, ke ubon ye akpan akpan nditọwọn̄.”
Edi, edi akpan akpan ke Christendom edem usoputịn ke Christmas edi edinam ubon, ini emi mme iman ẹsobode ọtọkiet ndinọ mme enọ. Ke mme idụt ẹmi Ufọkabasi Orthodox Edem Usoputịn omụmde isọn̄, mme owo ẹdori nsọn̄uyo akpan akpan ke Easter; kpa ye oro, ini Christmas esidi ini nduọkodudu.
“Mbubehe Unyamurua”
Christmas edi “ini enyene ndịk . . . unyamurua,” nte The New Encyclopædia Britannica ọdọhọde. Etie nte emi idịghe ntre ke ebiet en̄wen nte edide ke Japan.
“Mbon Japan ẹduọn̄ọ kpukpru n̄kari ẹban̄ade ido ukpono ẹnyụn̄ ẹwọn̄ọde Christmas ẹsịn ofụri ofụri ke mbubehe unyamurua,” nte Daily Record eke Washington ọtọtde. Enye adian do ete ke Christmas ke Japan edi “akpan edinam oro ọkọn̄ọde akpan akpan ke edu unam mbubịne onyụn̄ odori esisịt nsọn̄uyo ke n̄kpọ aban̄ade ido ukpono.”
Idem ke ediwak idụt inua-okot Christian, ekese ini esisọsọn̄ ndidiọn̄ọ “n̄kpọ aban̄ade ido ukpono” mi. Ke n̄kpọ nte isua 40 ẹmi ẹkebede, ekpri n̄wed kiet ẹmi ọbiọn̄ọde-biọn̄ọ Christmas ama eseme ete: “Ererimbot unyamurua esịn udọn̄ ọnọ Christmas. Enye edi n̄kponn̄kan ini ndinam okụk ke isua. Mme anam mbubehe ẹmi ẹdọhọde nte idide mme Christian ẹsidori enyịn ẹban̄a ini Christmas, idịghe ke ntak Christ, edi ke ntak ndinyene okụk.” Mme ikọ ẹmi ẹdi akpanikọ didie ntem mfịn! Ke ediwak idụt, nnyịn isiwakke ndisịm ọyọhọ ọfiọn̄ duop ke isua mbemiso ikopde mme ikọ editi ẹban̄ade ibat usen ẹmi ẹsụhọde ndidep mme enọ kaban̄a Christmas efen. N̄kpọ esinyama akan nte isua osịmde utịt, mbahade kiet ke itie inan̄ emi ufọkurua ẹsinyamde ke isua ke isua esidi ke ini Christmas.
Se ededi oro Christmas ọwọrọde ọnọ fi idahaemi, ekeme ndidi afo n̄ko emeyịk aban̄a nte enye ọkọtọn̄ọde. Nte Bible, ke akpanikọ, ọsọn̄ọ edinọ mme enọ Christmas? Nte mme usọrọ Christmas mfịn ẹnen̄ede ẹdi eke Christian? Ẹyak nnyịn ise.
[Ebiet ẹdade ndise ẹto ke page 2]
Ikpaedem: Thomas Nast/Dover Publications, Inc., 1978