Mme Andikụre Ukpep Gilead Ẹnyene Udọn̄ Ndisuan Eti Mbụk
“ATA ndyọ ndyọ n̄kpọ oro nnyịn ikemede ndikere mban̄a.” Nte Anders ye Amalia Groth ẹkekerede ẹban̄a ukpep isụn̄utom mmọ edi oro. Mmọ ẹketịn̄ ekikere ofụri owo 48 emi ẹkekụrede ukpep ke ọyọhọ otu 97 eke Watchtower Bible School of Gilead ke ndidian ete: “Ukpep Gilead omonụk onyụn̄ otịm nnyịn idem, ntre ọdọn̄ nnyịn ndika mbufa utom nnyịn.”
Nnyịn imekeme ndikụt idara emi nte nditọ ufọkn̄wed ẹtịn̄de n̄kpọ ẹban̄a edinam ukụre ukpep oro; owo 6,420 ẹma ẹsop idem ke September 4, 1994, kaban̄a edinam emi.
“Theodore Jaracz eke Otu Ukara ekeberede ndutịm oro ke nditịn̄ ikọ ke ibuotikọ oro ọdọhọde ‘Ndidi Se Jehovah Ekpepde,’” ntre ke David Abel ye n̄wan esie Kelli ẹkedọhọ. “Akpan n̄kpọ oro nnyịn mîdifreke tutu amama ekedi ke ini Brọda Jaracz ọkọdọhọde ete: ‘Ana nnyịn idiọn̄ọ nte nnyịn ikpride ke ẹmende ẹdomo ye Jehovah,’ onyụn̄ anam emi an̄wan̄a ebe ke okopodudu ukpepn̄kpọ oro ẹkụtde ke Job ibuot 38 ye 39. Brọda Jaracz ama osio owụt ete ke adan̄aemi nnyịn ima ikanam ifiọk Bible nnyịn ọkọri ebe ke Ufọkn̄wed Gilead, nnyịn ifiọkke ibọrọ kpukpru mbụme. Ana nnyịn ikaiso ndikpep Ikọ Abasi.”
Christian ye Angele Coffy kemi ẹma ẹtịn̄ ikọ: “Utịn̄ikọ oro Max Larson ọkọnọde ke ibuotikọ oro ọdọhọde ‘Nso Idi Ufọn Eti Itiat Idakisọn̄?’ ama otụk nnyịn. Nnyịn ima ima enye ndimen nnyịn ndomo ye ufọk oro oyomde itiat idakisọn̄ oro ẹsịnde otụn̄ọ ke isọn̄ oro ọsọn̄de idem man ekeme ndisọn̄ọ nda idem ke ini unyekisọn̄. Ebede ke ndikpep n̄kpọ ifịk ifịk, nnyịn imekeme ndikọri n̄kpet n̄kpet itie ebuana ye Jehovah inyụn̄ ikeme ndikọn̄ mbuọtidem nnyịn ke ntotụn̄ọ ifiọk man nnyịn ikeme ndisọn̄ọ nda ke ini nsọn̄ọn̄kpọ.”
“Utịn̄ikọ oro Milton Henschel, etieibuot ufọkn̄wed oro ọkọnọde ke ibuotikọ, oro ọdọhọde ‘N̄kpọ Ẹdat ke In̄wan̄ Ndikpen̄e’ edi se iditide ke anyanini,” ntre ke Gary ye Lynn Elfers ẹkedọhọ. “Akpan itien̄wed oro, John 4:35-38, ama ọsọn̄ọ etịn̄ aban̄a ifet oro nnyịn inyenede ndidụk in̄wan̄ emi mbonutom oro ẹkebemde iso ẹma ẹketọtọ n̄kpọ. Emi eyedemede nnyịn ndinam utom ye usọp usọp ini ke ekikere.” Ke ẹnyịmede ye emi, Jan ye Sirpa Vaahtola ẹma ẹdọhọ ẹte: “Brọda Henschel ama edemede udọn̄ nnyịn kaban̄a ukpen̄e oro odude ke iso ebe ke ndinọ ntọt eke ndondo emi otode mme Stet Baltic. N̄kọri oro odude ke Estonia ekedi mbahade 51 eke ikie, ke Latvia mbahade 106 eke ikie, ndien ke Lithuania mbahade 51 eke ikie. Emi edi n̄kpọ nduaidem didie ntem! Nditọete do ke ẹben̄e Eteutom ẹte osio mbonutom efen efen ọdọn̄. Nnyịn ima inen̄ede idara ndikop emi, sia utom nnyịn ekedide ke Estonia!”
“Joel Adams ama ọnọ utịn̄ikọ efen ke ibuotikọ oro ọdọhọde ‘Buọt Idem ye Jehovah,’” nte Kevin ye Evelyn Cortina ẹtide. “Enye ama ọnọ nnyịn item ete ke nnyịn ikpedehede ikere ke ndusụk ini nnyịn imekeme ndibuọt idem ye Jehovah ndien ndusụk ini nnyịn imekeme ndiberi edem ke ekikere nnyịn. Ke utom nnyịn iyesobo ekese n̄kpọ-ata—nsọn̄idem, udia, usem, ido edinam, ye mme n̄kpọ ntre. Kpukpru mmọ ẹyeyom ete nnyịn ibuọt idem ye Jehovah.”
Owo efen ekedi Gerrit Lösch, owo Otu Ukara, emi akatatde ibuotikọ oro ọdọhọde “Ẹkaiso Ndiwụt Mbọm Jehovah.” Alen ye Ann Marie Gokavi ẹma ẹdọhọ ẹte: “Enye ama owụt ete ke edi idiọn̄ọ edikọri nsịm ọyọhọ idaha Christian ndiwụt ekemmọ isụn̄utom nnyịn ye mbon oro nnyịn ibuanade eti mbụk ye mmọ mbọm. Utom esenidụt esịne uwaidem, edi edieke mbọm ananade, do uwaidem nnyịn edinyene ata esisịt ufọn.” (Matthew 9:13) Peter ye Fleur Hupston ẹma ẹdian ẹte: “Brọda Lösch ama ọdọhọ ke nnyịn ikpenyene ndiwụt nditọete nnyịn iren ye iban n̄ko mbọm, yak idọhọ, idade edem akrasi use n̄kpọ ke anyan usụn̄ ise mmọ, man mme ndudue mmọ ẹkpekpri utu ke ndikpokponi.”
“Jack Redford, kiet ke otu andikpep Gilead nnyịn, ama etịn̄ ikọ ke ibuotikọ oro ọdọhọde ‘Nte Afo Emekeme Ndinyịme Nsuannọ?’” ntre ke Mickey ye Sherry Minsky ẹketi. “Enye ama osio owụt nte ke ntan̄idem esinam edi ọkpọsọn̄ n̄kpọ ndinyịme nsuannọ ye nte ke edieke nnyịn isikopde ọkpọsọn̄ iyatesịt iban̄a item, nnyịn iyetaba mme ufọn esie. Ekem enye ama ọnọ ndusụk nti ekikere ke ndinyịme nsuannọ oro ọkọn̄ọde ke Eseme 3:27-31.” Charles ye Joan Held ẹma ẹdian ẹte: “Ata ekese ini nnyịn isifiọkke ndudue oro nnyịn ke idem nnyịn inamde; ke ntre, ana nnyịn ise nsuannọ nte usụn̄ nditat nnyịn enyịn ndifiọk mme n̄kpọ oro nnyịn mîkọfiọkke. Nsuannọ m̀mê item ẹtode Jehovah edi uyarade ima oro enye amade nnyịn.”
“Andikpep efen, Ulysses Glass, ama etịn̄ ikọ ke ibuotikọ oro ọdọhọde ‘Ẹnyene Ata Ọniọn̄ Oro Adade Osịm Uwem.’ Enye ama obụp ete: ‘Nso ke mbufo ẹdinam ye se mbufo ẹkpepde?’” ntre ke Kenneth ye Lisbeth Ardkäll ẹkedọhọ. “Ekem enye ama ọnọ uwụtn̄kpọ ọkọn̄ọde ke Mme N̄ke 30:24-26 aban̄a cony (eku abaitiat) ye nte Jehovah ọnọde enye kpukpru n̄kpọ ndida ndu uwem. Ke n̄kan̄ eken, ọniọn̄ nnyịn itoho ntụk, ntre oyom nnyịn isịn ukeme ke idem nnyịn ndinyene ọniọn̄. Jehovah ọmọnọ nnyịn kpukpru se nnyịn iyomde ndida nnam oro. Adan̄a nte nnyịn isịkde ikpere Jehovah ye kiet eken ke ima, nnyịn iyenam ekese n̄kpọ.”
Akpan Utịn̄ikọ
“Brọda Karl F. Klein, owo Otu Ukara, ama eneme ufiop ufiop aban̄a Psalm ọyọhọ 19 ye nnyịn ke utịn̄ikọ esie oro ọdọhọde ‘N̄kpọuto ke Otu Mme N̄kpọuto,’” ntre ke Jay ye Gwen Abraczinskas ẹkedọhọ. “Enye ama etịn̄ aban̄a ntotụn̄ọ esịtekọm oro David, andiwet psalm, ekenyenede aban̄a Jehovah ye ima oro enye ekenyenede ọnọ Ikọ Abasi.” “Brọda Klein ama abahade psalm oro esịn ke ikpehe ita,” ntre ke Keith ye Donna Hornback ẹkedọhọ. “Ikpehe 1 (Ps 19 ufan̄ikọ 1-6) owụt esịtekọm oro David ekenyenede aban̄a n̄kpọ obot Abasi, ikpehe 2 (Ps 19 ufan̄ikọ 7-10) owụt esịtekọm oro enye ekenyenede ọnọ ibet Abasi, ndien ikpehe 3 (Ps 19 ufan̄ikọ 11-14) eti nnyịn nte, ukem nte David, nnyịn ikpoyom ndinyene eti itie ebuana ye Jehovah.”
David ye Raylene Long ẹkedọhọ ẹte: “Nnyịn ima ikop idatesịt ke ikọ oro nte ke mbak Jehovah edi akpan n̄kpọ edieke anade nnyịn ifep se idiọkde. Emi ada nnyịn osịm ndinam se inende ke enyịn esie.” Frank ye Vibeke Madsen ẹma ẹnyịme ye oro. Mmọ ẹma ẹdọhọ ete: “Mme ikọ Brọda Klein kaban̄a nte mme item, mbet, ye mme ewụhọ Jehovah ẹnyenede ufọn edi ediye usụn̄ nditịn̄ ibio ibio se nnyịn ikekpepde ke Gilead. Oro ama anam nnyịn itotịm ibiere ndisọn̄ọ nyịre ye Ikọ Abasi ke ini iso nnyụn̄ nda enye nte ekebe udọn̄ n̄kpọuto.”
Ke etienede akpan utịn̄ikọ emi, nditọ ufọkn̄wed ẹma ẹbọ n̄wed itoro mmọ, ndien ẹma ẹtọt utom esenidụt mmọ. Ke ini nduọkodudu ama okokụre, kpukpru mmọ ẹma ẹfiak ẹsop idem kaban̄a edinam uwemeyo. Mme andikụre ukpep ẹmi ẹma ẹbuana ke ndibọrọ mme mbụme oro ẹkebụpde ke ini ibio ibio Ukpepn̄kpọ Enyọn̄-Ukpeme.
“Ekem edinam nditọ ufọkn̄wed oro, ‘Ẹnọ Ukpep Ndikabade Ndi Mme Ọkwọrọ Obio Ubọn̄ ke Ofụri Isọn̄,’” ama etiene, ntre ke Bob ye Shannon Lakatos ẹketi. “Akpa ikpehe ndutịm oro okowụt mme ifiọkutom nditọ ufọkn̄wed ke utom an̄wautom ke ufan̄ ukpep ọfiọn̄ ition nnyịn. Enye okowụhọ ke edibụp mme mbụme ke usọ usọ usụn̄ ke utom ukwọrọikọ nnyịn. Ikpehe ndụn̄ọde ama owụt mme in̄wan̄în̄wan̄ usụn̄ ndisak iso nse mme n̄kpọ-ata ye mme ukpụhọde idaha ke uwem isụn̄utom. Ndise slide ita oro ẹkewụtde, eke Costa Rica, India, ye Malawi, ẹma ẹnam nnyịn ikụt esop Jehovah eke ofụri ererimbot ukpọn̄ ukpọn̄.”
“Drama oro eketienede, Di eke Ukara Abasi, Kûdi eke Ererimbot, ama owụt idiọk utịp oro mme iman ẹdide mbon ererimbot ẹnyụn̄ ẹkerede n̄kpọ ke usụn̄ idemmọ ẹkemede ndinyene,” ntre ke Jesse ye Michelle Duncan ẹkedọhọ. Wenzel ye Kelly Koula ẹma ẹdian ẹte: “Enye ama owụt nte ke ana mme Christian ẹnyịme mme item ye ndausụn̄ Ukara Abasi nte se ẹyomde ye se inyenede ufọn.”
Akpatre ikwọ ye akam ama ada inem inem ndutịm oro osịm utịt. Nte mme andikụre ukpep ẹkekpọn̄de ye udọn̄ oro mmọ ẹnyenede ndika utom esenidụt ke idụt 18, ikọ unyọn̄ Tommi ye Jael Kauko emi ama otịm owụt ekikere mmọ: “Nnyịn imenen̄ede inyene udọn̄ ndika utom nnyịn nnyụn̄ n̄kesịn se nnyịn ikekpepde ke edinam. Nnyịn imọbọ ekese—idahaemi edi ini ọnọ nnyịn ndinọnọ.”
[Ndise ke page 26]
Ọyọhọ Otu 97 Oro Ẹkụrede Ukpep ke Watchtower Bible School of Gilead
Ke udịm enyịn̄ ẹtienede mi, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet. (1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.