Uko Uko Mbuọtidem Nditọete Rwanda Nnyịn
KE NTỌN̄Ọ ntọn̄ọ 1994 ndịk ama anam ererimbot nte etop akpakịp uwotowo ẹkewọrọde ke idụt Rwanda ke Africa. Afai afai ekọn̄ mbio obio ama asiaha—kpa utịt usua eke ediwak isua ikie.
Ke ẹsobode akwa n̄wụre ke ibet ye ndutịm, ẹma ẹnyịk se ikande Mme Ntiense Jehovah 2,000 ke Rwanda ndifehe kaban̄a itọn̄uwem mmọ. N̄kpọ nte 1,300 ẹma ẹkụt ubọhọ ke itienna mbon itọk ekọn̄ ke n̄kpet n̄kpet Zaire ye Tanzania, edi ndusụk owo ikekemeke ndifehe mbọhọ ke ini. Nnyịn imokop mfụhọ nditọt nte ke n̄kpọ nte nditọete nnyịn iren ye iban 400—ikpọ owo ye nditọwọn̄, nte ededi kpukpru ẹdide mbio obio ẹmi mîdụkke ekọn̄—ẹma ẹtak ke idat idat afai oro. Mme Christian ke ofụri ererimbot ẹmefụhọ n̄kpa mme enyene uko mbon nsọn̄ọnda ẹmi ẹnyụn̄ ẹbọ ndọn̄esịt ke un̄wọn̄ọ ediset ke n̄kpa eke Bible.—John 11:25.
N̄kpọ etie didie ye nditọete iren ye iban Rwanda oro ẹbọhọde? Ẹma ẹnọ mbiowo ẹto ediwak idụt ẹka man ẹkedụn̄ọde mme n̄kpọ nnennen nnennen. Etop kiet ọdọhọ ete ke nditọete Rwanda ẹsobo idaha oro “ukpono ukpono ye uko uko.” Ke uwụtn̄kpọ, kiet ke otu eben̄e oro nditọete ẹmi ẹkebemde iso ẹnam ekedi kaban̄a mme n̄wed ukpep Bible. Etop oro eberi ete, ‘Etie nte mmọ ẹnen̄ede ẹkere ẹban̄a edibọ udia eke spirit ẹkan un̄wam n̄kpọ obụkidem, okposụkedi mmọ ẹnen̄ede ẹyom ediwak n̄kpọ.’ Ndien okposụkedi idaha ke mme itienna oro ẹdiọkde, ‘nditọete nnyịn ẹdụn̄ ke nsana-n̄kan itie.’
Watch Tower Society amanam okụk odu man ẹda ẹdep udia, mme bran̄kịn, ọfọn̄, ikpaukot, ye ibọkusọbọ. Nditọete nnyịn ke France ẹma ẹtịp n̄kpọ ke ntatubọk, ndien etisịm ntọn̄ọ ntọn̄ọ June, ẹma ẹnọnọ se ikperede tọn n̄kpọ un̄wam iba ẹsọk nditọete Rwanda nnyịn ẹmi ẹdude ke unana.
Nte eyịghe mîdụhe, mme idaha ẹmi ẹmesụn̄ọ ke eti ikọ ntiense. Akpanikọ oro nte ke nditọete Rwanda nnyịn ẹmebọ utọ un̄wam ye ibetedem ntre ẹto ekemmọ Mme Ntiense anam idem akpa mme andida n̄kụt, ndien ẹma ẹkeme ndibuana utọ un̄wam emi ye mbon en̄wen. Ndusụk owo ẹma ẹdọhọ ẹte ke Mme Ntiense ẹdi n̄kukụre mme owo ke itienna oro mbon ido ukpono mmọ ẹdide ẹdise!
Itie nnanenyịn nditọete Rwanda nnyịn eti nnyịn ete ke mme “ukperedem usen,” mme owo ẹyetie “obom obom” ye “afai afai.” (2 Timothy 3:1-5; Today’s English Version) Ndien ke adan̄aemi Jehovah mîn̄wọn̄ọke ndinọ ikọt esie utịbe utịbe ukpeme nsio ke mme n̄kpọndịk oro ẹkụtde ke enyịn, enye ọmọn̄wọn̄ọ ndikpeme idaha eke spirit mmọ ye itie ebuana mmọ ye enye nnyụn̄ nnam mbon oro ẹtakde idahaemi ẹset ke ini Tọsịn Isua ukara Christ. (Psalm 91:1-10) Akpakam nnyịn ikaiso ndibọn̄ akam ke ibuot mmọ ite Jehovah omụm nditọete Rwanda nnyịn ẹmi ẹbọhọde akama onyụn̄ an̄wam mmọ ke ini mfịna emi.—Psalm 46:1.