‘Ẹkûfụhọ Kpa Nte Mmọ Eken Ẹfụhọde’
NTE akanam omokụt nte flawa ọtọde itọn̄ etehede ke ama ọkọbọhọ oyobio? Ke ndusụk udomo emi esidi ndise oro otụkde owo. Kamse, etie nte ikpọ ukotedịm ama anam ata ediwak unam ye mme owo—mme edibotn̄kpọ ẹmi ẹtịmde ẹsọn̄ idem ẹkan flawa ekededi—ẹfen̄e ẹyom itie udakibuot. Edi, flawa akada kpa do, ọdọn̄ n̄kam, asak iso ese ofụri iyatesịt edịm oro. Idahaemi, enye mi owụhọ, ọtọ itọn̄ etehede edi ibụn̄ọke, owụtde odudu oro okpụhọrede ye mmemmem idaha esie. Afo emekeme ndiyịk, nte adade ese, m̀mê enye eyefiak okop odudu onyụn̄ ọtọn̄ọ ntak emenede ediye ibuot esie ke enyọn̄.
Emi edi ata ukem ye mme owo. Ke ntịme ntịme ini ẹmi, nnyịn isak iso ise kpukpru orụk oyobio. Nsọn̄ọn̄kpọ ndutịm uforo, mfụhọ, unana nsọn̄idem, ediduọk owo ima ke n̄kpa—mme utọ oyobio oro ẹsisịm kpukpru nnyịn ke ini kiet m̀mê eken, ndien ndusụk ini nnyịn isikemeke ndifehe mbọhọ mmọ kpa nte flawa mîkemeke ndiwụbede idemesie nnyụn̄ mfehe ndụk itie udakibuot. Esidi n̄kpọ oro otụkde owo ndikụt mme owo oro ẹtiede ata mmemmem mmemmem ẹwụtde odudu oro akpade owo idem ẹnyụn̄ ẹyọde mme utọ ikan̄îkan̄ en̄wan oro. Didie ke mmọ ẹsinam oro? Ediwak ini ukpọhọde esidi mbuọtidem. James eyeneka Jesus Christ ekewet ete: “Mbufo ẹmefiọk ẹte ke ini mbuọtidem mbufo akande ke ndisobo mme utọ idomo oro, utịp esidi ukeme ndiyọ.”—James 1:3, Today’s English Version.
Ukpọhọde efen edi idotenyịn. Ke ini n̄kpa adade owo ima, ke uwụtn̄kpọ, idotenyịn ekeme ndinam akamba ukpụhọde odu ọnọ mme oduuwem. Apostle Paul ama ọnọ n̄wed ẹsọk mme Christian ke Thessalonica ete: “Nnyịn imaha mbufo ẹnana ifiọk, nditọete, ẹban̄a mmọemi ẹdede, mbak mbufo ẹdifụhọ, kpa nte mmọ eken eke mînyeneke idotenyịn.” (1 Thessalonica 4:13) Ke adan̄aemi mme Christian ke akpanikọ ẹsifụhọde ke ntak n̄kpa, ukpụhọde esidu. Mmọ ẹnyene nnennen ifiọk ẹban̄a idaha mme akpan̄kpa ẹnyụn̄ ẹnyene ẹban̄a idotenyịn ediset ke n̄kpa.—John 5:28, 29; Utom 24:15.
Ifiọk emi ọmọnọ mmọ idotenyịn. Ndien idotenyịn oro, n̄ko, esisụhọde mfụhọ mmọ sụn̄sụn̄. Enye esin̄wam mmọ ndiyọ, onyụn̄ anam se ikande oro. Nte ini akade, ukem nte flawa ke oyobio ama ekebe, mmọ ẹkeme ndimenede ibuot mmọ ke enyọn̄ ẹsio ke mfụhọ ẹnyụn̄ ẹtọn̄ọ ntak ẹkop idatesịt ye uyụhọ ke uwem.