Nte Mme Apple Gold

APPLE—mmọ ẹye ke enyịn ẹnyụn̄ ẹnem didie ntem ke nsịn̄! Bible ada edinem mfri emi ke ndamban̄a usụn̄ oro edemerede owo ekikere etịn̄ ikọ ke ini enye ọdọhọde ete: “Ikọ eke ẹtịn̄de ke ekemini, edi apple o-gold ke usan e-silver.” (Mme N̄ke 25:11) Nso ke ikọ emi ọwọrọ?

“Apple o-gold ke usan e-silver” ekeme ndida mban̄a n̄kpọ oro ẹkapde-kap, utọ nte nainai oro ẹdade silver ẹnam ye mfri oro ẹnamde ke gold ke esịt esie. Sia mme ufan̄ikọ oro ẹkebemde iso ke ibuotn̄wed emi ẹtịn̄de ẹban̄a nte ẹkade ẹkesobo ye edidem N̄ke 25:2, 3, 5, 6, ufan̄ikọ emi ekeme nditịn̄ mban̄a enọ oro ẹnọde andikara—n̄kpọmbana gold ke uduot apple oro ẹdọn̄de ke mme nainai ẹnamde ke silver. (Mme N̄ke 25:6, 7) Ata ediye n̄kpọ, ke akpanikọ!

Ukem uyai oro odu ke ikọ oro ẹdotde, ẹwụtde ukpono, ẹnyụn̄ ẹdide ke ekemini, edide ẹwewet m̀mê ẹtetịn̄. Mmọ ẹnem, ẹnọ nsịnudọn̄, ẹnyụn̄ ẹnyene ufọn ke ediwak usụn̄. Mme ikọ odudu spirit Abasi oro ẹdude ke Bible ẹnen̄ede ẹtie nte ndiye “apple o-gold ke usan e-silver.”

Nte ikọ ọniọn̄ Edidem Solomon owụtde ke Mme N̄ke 25:11, enye ama “ẹsịn ubọk oyom edinem ikọ: ndien se ewetde edi ikọ akpanikọ.” (Ecclesiastes 12:10; Mme N̄ke 25:1) Ediwak isua ikie ke ukperedem, Christian apostle Paul ama ewet ete: “Kpukpru n̄wed, eke ẹdade odudu Spirit Abasi ewet, ẹnyụn̄ ẹdi se ifọnde.” (2 Timothy 3:16) Ih, Bible ọdọn̄ọ nti item, mme prọfesi, mme in̄wan̄în̄wan̄ ikọ, ye mme akpanikọ eke utọ un̄wana ye uyai oro tutu mmọ ẹnen̄ede ẹfọn ẹkan utom mfọnn̄kan mbonusọ. Akan oro, owo ekededi oro enyenede ọniọn̄ otode Ikọ Abasi, kpa Bible, enyene ọsọn̄urua inyene onyụn̄ ekeme ndinyene idotenyịn nsinsi uwem.—Mme N̄ke 4:7-9; John 17:3.