Nte Afo Emesifen Ọnọ?

BILL ye Lisa, eyen esie an̄wan edide isua 16 ke emana, ẹma ẹnyene mfịna ndikaiso ye kiet eken. N̄kpri ndutan̄uyo ke ufọt mmọ ẹma ẹsikọri ẹkabade n̄kpọsọn̄ utọk ndien ndien. Ke akpatre, mfịna oro ama ọkọri okosịm udomo oro ẹkedọhọde Lisa ọkpọn̄ ufọk.a

Nte ini akade, Lisa ama edifiọk ete ke imọ ima idue onyụn̄ oyom ete imọ efen ọnọ imọ. Edi utu ke ndifụmi n̄kani ndudue Lisa, ete esie oro okokopde iyatesịt ama esịn mme ukeme esie ndinam emem. Kere ban̄a oro! Enye ikonyịmeke ndiwụt eyen esie mbọm!

Ke ediwak isua ikie ẹmi ẹkebede, ẹma ẹbiom eren kiet emi mîkeduehe ikpe n̄kpa ke idiọkn̄kpọ oro enye mîkanamke. Mme ntiense ẹma ẹnọ ikọ ntiense nsu, ndien mme akara ukaraidem ẹma ẹkokoi ẹsịn ndikpe unenikpe. Eren oro mîkeduehe do ekedi Jesus Christ. Esisịt ini mbemiso enye akakpade, enye ke akam ama ọdọhọ Abasi ete: “Ete, dahado nọ mmọ; koro mmọ mîfiọkke se mmọ ẹnamde.”​—⁠Luke 23:34.

Jesus ama esifen ọnọ ifụre ifụre, ke ofụri esịt, ndien ẹma ẹkpak mme anditiene enye ndikpebe enye ke afan̄ emi. (Ephesus 4:32) Nte ededi, ukem nte Bill, ediwak owo ke isọn̄esịt isinyịmeke ndifen nnọ. Didie ke afo emen udomo ke afan̄ emi? Nte afo emesinyịme ndifen nnọ mbon efen ke ini mmọ ẹduede fi? Ndien nso kaban̄a ikpọ idiọkn̄kpọ? Nte ana ẹfen mmọemi n̄ko?

Edifen Nnọ N̄kpọ-Ata

Isidịghe mmemmem n̄kpọ ndifen nnọ kpukpru ini. Ndien ke ndiọkeyo ẹmi, itie ebuana owo ye owo amakabade etie mfịna mfịna akan. Uwem ubon akpan akpan awak ndiyọhọ ye mfịna ye mfịghe. Christian apostle Paul ama etịn̄ anyanini ko ete ke mme utọ idaha ntre ẹyedu ke “ukperedem ini.” Enye ọkọdọhọ ete: “Mme owo ẹyedi mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, . . . ẹnyụn̄ ẹsua se ifọnde; mmọ ẹdi mme ada owo nnọ mme asua, ye mbon idiọk iwụk, ye mbon n̄kohodeidem.”​—⁠2 Timothy 3:​1-⁠4.

Do, nte owo mîkemeke ndifep, kpukpru nnyịn imesisobo mfịghe otode an̄wa oro ẹsidomode ukeme nnyịn ndifen mbon en̄wen. Ke adianade do, nnyịn n̄ko imesin̄wana ibiọn̄ọ mme mfịghe esịtidem. Paul ama eseme ete: “Nnamke eti n̄kpọ eke ọdọn̄de mi ndinam, edi idiọkn̄kpọ eke mîdọn̄ke mi ndinam, oro ke nnanam. Edi edieke nnamde se mîdọn̄ke mi ndinam, idịghe aba ami nnam oro, edi idiọkn̄kpọ emi odụn̄de ke esịt mi.” (Rome 7:​19, 20) Nte utịp, ediwak nnyịn isifenke inọ nte nnyịn ikpoyomde ndifen. Idem n̄kpọ, ndammana unana mfọnmma ye idiọkn̄kpọ ẹsinyene ọkpọsọn̄ odudu ke idem nnyịn, ndusụk ini ẹnamde nnyịn ikûwụt ima oro ikpowụtde ekemmọ owo.

Ke ini ẹkesịnde udọn̄ ẹnọ n̄wan kiet ndifen kiet eken n̄kpri ndudue, enye ama ọbọrọ ete: “Baba owo kiet idotke ukeme oro edifen nnọ oyomde.” Ke enyọn̄ enyọn̄, utọ ikọ oro ekeme nditie nte ẹwụt unana esịtmbọm, isọn̄esịt, idem emiom. Nte ededi, ke nditịm ndụn̄ọde, nnyịn ikụt ke enye ayarade edikpu oro ediwak owo ẹkụtde ke ini mmọ ẹnamde n̄kpọ ye ererimbot oro mmọ ẹsede nte ibụk, mîkereke iban̄a, onyụn̄ ọsọn̄de ido. Eren kiet ọkọdọhọ ete: “Mme owo ẹsida owo ẹyom ufọn idemmọ ke ini owo efende ọnọ mmọ. Etie nte ẹdida owo ẹnịm n̄kpọ ukwọhọde ikpat.”

Eyịghe idụhe, ndien, ọsọn̄de ndikọri edu edifen nnọ ke ukperedem ini ẹmi. Kpa ye oro, Bible esịn udọn̄ ọnọ nnyịn ndifen nnọ ke mfọnido. (Men 2 Corinth 2:7 domo.) Ntak emi nnyịn ikpefende inọ-⁠ọ?

[Mme Ikọ idakisọn̄]