Ntọt M’Ọkwọrọ Obio Ubọn̄
Akpanikọ Bible Adian Ubon Ọtọkiet
MFỊN, ke ediwak ikpehe ererimbot, edidianakiet eke ubon ekpere ndidi n̄kpọ eset. Nte ededi, Bible ayarade se ẹyomde man ubon adiana kiet. Kere ban̄a mme ikọ Jesus ẹmi: “Kpukpru owo eke ẹkopde ikọ Mi ẹmi, ẹnyụn̄ ẹnịmde mmọ, nyedomo enye ye enyene-ibuot owo emi ọbọpde ufọk esie ke enyọn̄ akamba itiat.” (Matthew 7:24) Ediwak tọsịn ubon ke otu Mme Ntiense Jehovah ẹmenyene edidianakiet ebe ke ndida mme ikọ emi nsịn ke edinam ye ke ndida Bible nte itiat idakisọn̄ uda mbọp ubon oro otịmde adiana kiet. Mbon efen ke ẹnyene utọ edidianakiet oro n̄ko, nte ifiọkutom oro etienede mi owụtde.
Ke adan̄aemi Daniel akanamde utom ekọn̄ ke France, ọkwọrọikọ nnọ mbonekọn̄ kiet ama ọnọ ekikere ete Daniel edep Bible, emi enye ekedepde, ndien enye ama ọtọn̄ọ ndikot enye kpukpru ini. Ke akpatre ẹma ẹnọ enye aka Tahiti. Ndusụk ke otu ekemmọ mbonekọn̄ Daniel ẹkedi mbon Adventist, ndien mbon eken ẹkedi mbon Mormon. Nneme mmọ ẹkesiwak ndikọn̄ọ ke n̄kpọ aban̄ade ido ukpono. Usen kiet akwa owoekọn̄ kiet ama emen Daniel owụt n̄wan esie, emi ekedide kiet ke otu Mme Ntiense Jehovah. N̄wan emi ama ada ofụri uwemeyo kiet ndibọrọ ediwak mbụme Daniel onyụn̄ anam enye abuana ye kiet ke otu esop n̄kann̄kụk Mme Ntiense Jehovah ke Tahiti. Ikebịghike enye ama ọtọn̄ọ ukpepn̄kpọ Bible ofụri ini.
Ete ye eka Daniel ko ke France ẹkedi mme ata enyene-ifịk mbon Catholic. Ete esie ekedi ọnọitem ufọkn̄wed onyụn̄ ese n̄kpọ aban̄a item ido ukpono ke ufọkn̄wed Catholic kiet. Ke oyomde ndibuana ndusụk ke otu mme ọsọn̄urua ifiọk eke spirit oro enye ekekpepde ye ete ye eka esie, Daniel sụn̄sụn̄ ama ọtọn̄ọ ndisịn ndusụk ekikere Bible ke leta oro enye ekesiwetde ọnọ ẹsọk mmọ.
Ke akpa eka Daniel ama okop idatesịt, edi ekem enye ama okop n̄kpaidem ndikụt enyịn̄ oro Jehovah ke kiet ke otu leta eyen esie. Usen ifan̄ ke ukperedem, enye ama okop edinam kiet ke radio oro okowụtde Mme Ntiense Jehovah nte “idiọk isio n̄ka.” Enye ama ewet Daniel, ọdọhọde enye etre kpukpru ebuana ye Mme Ntiense usọp usọp. Nte ededi, Daniel ama akaiso ndinam n̄kọri ke ukpepn̄kpọ Bible esie ndien ibịghike ama anam mme ndutịm ndikpọn̄ ekọn̄ onyụn̄ afiak ọnyọn̄ France.
Ke ndondo oro enye akafiakde osịm ufọk, Daniel ama esida kpukpru mbubịteyo—ndusụk ini tutu osịm ufọt okoneyo—ke ndineme nnyan nneme Bible ye eka esie. Ke akpatre enye ama onyịme ndisan̄a ye Daniel n̄ka Ufọkmbono Obio Ubọn̄. Ke ini enye okodụkde akpa mbonoesop, ama enem enye etieti tutu enye ama ọtọn̄ọ ndinyene ukpepn̄kpọ Bible esie kpukpru ini. Enye ama anam usọp usọp n̄kọri ndien ikebịghike ama ana baptism.
Ete Daniel ekedi eren oro ekenyenede in̄wan̄în̄wan̄ esịt edi enen̄ede esịn idem ke ubọkọkọ ye mme edinam ido ukpono esie. Edi, ini kiet enye ama emen n̄wan esie ye Daniel aka mbono district. Ekedi ke July 14, ndien enye ekenyene ke ekikere ndise isan̄ Usen Bastille ke akwa obio oro. Ke adan̄aemi enye ekebetde enye ama ebiere, ke ntak ọkpọsọn̄ udọn̄, ndise esịt ufọk mbono. Ndutịm ye emem oro enye okokụtde ke otu ikọt Jehovah ama otụk enye, ndien nte enye akasan̄ade ke nsio nsio itieutom mbono kpukpru owo ẹkekot enye “brọda.” Enye ama efre ofụri ofụri aban̄a isan̄ Usen Bastille oro onyụn̄ odu tutu mbono asuana. Enye ama oyom ukpepn̄kpọ Bible onyụn̄ anam usọp usọp n̄kọri ke ndikpep akpanikọ. Nte ededi, nte enye ekekpepde n̄kpọ, ama ọtọn̄ọ ndifịna enye ke ntak utom esie, ntre ke edide isua 58 ke emana, enye ama ọkpọn̄ utom esie. Idahaemi mmọ mbita ke ubon oro ẹma ẹyak idem ẹnọ ẹnyụn̄ ẹna baptism ke ẹnyụn̄ ẹnam n̄kpọ Jehovah ọtọkiet ke edidianakiet.
Akpanikọ Bible akadian ubon Daniel ọtọkiet. Enye n̄ko ekeme ndidian mme ubon efen ọtọkiet edieke mmọ ẹkpepde n̄kpọ ẹnyụn̄ ẹdade se ẹkpepde ẹsịn ke edinam ke ofụri esịt.