Ntọt M’Ọkwọrọ Obio Ubọn̄
“Enyịn̄ Jehovah Edi Ọkpọsọn̄ Tower”
NNYỊN idu ke ini oro mînyeneke iwụk. Uwem nnyịn oro etiede nte ke enyene iwụk ekeme ndikpụhọde ke ediyịp enyịn, ndien ye unana edinọ ntọt, ndusụk owo ẹkụt idemmọ ke akamba afanikọn̄ mbemiso mmọ ẹfiọkde oro. N̄kpọndịk ekeme ndito ndutịme ukaraidem, afai afai en̄wan, oto-obot afanikọn̄, m̀mê idiọk udọn̄ọ. Se ededi oro ekemede ndidi ntak, m̀mọ̀n̄ ke Christian ọkpọwọn̄ọde aka ke ini uwem esie odude ke itiendịk?
David, isụn̄utom kiet emi odude ke kiet ke otu n̄kọk itieutom Watch Tower Society, ama ọfiọk iboro mbụme emi oto enyene-ndịk ifiọk n̄kpọntịbe. Anamde utom nte awat o-moto, enye ama ọkpọn̄ n̄kọk itieutom tụhi-tụhi usenubọk kiet ndikemen mbon Bethel emi ẹsisan̄ade-san̄a ẹka utom (mbonutom unyịmesịt emi mîdụn̄ke ke n̄kọk itieutom) ndi. Eyo ikenen̄ekede in̄wan̄a. Enye ama emen Rosalía onyụn̄ awat ebe itieutom mme bodisi ke ini enye okokopde akpa inua ikan̄ oro ẹketopde.
Ekem mme n̄kpọ ẹma ẹtịbe usọp usọp. Enye ama okop uyom emi ebietde eke akprak-kprak ikan̄ onyụn̄ ọfiọk ete ke ofụm ke ọkọwọrọ ke kiet ke otu ọkpọ moto. Ke mbuari enye ama okụt owoekọn̄ adade ke ufọt ọkpọusụn̄ anyande enye ikan̄ nnennen. N̄kpọ ita ama otịbe ke ekperede ndidi ke ebe oro: Udịm udịm ikan̄ oro ẹtopde ama etịbi moto oro ntịme ntịme, obomde mme window; David ye Rosalía ẹma ẹten̄ ẹkûbọ; owo ekọn̄ oro ama otop akrasi iso moto ke udomo enyịn.
Nte mme itiatikan̄ ẹkekade iso nditịbi moto emi, David ama atuak ada nte enye ekekemede ke adan̄aemi osụk okụbọde-kụbọ. David ye Rosalía ẹkekere ke mmimọ imọn̄ ikpa. Mmọ ẹma ẹbọn̄ akam uyo ọwọrọ ẹnọ Jehovah, ẹdọhọde enye ekpeme mmimọ. Rosalía ama etịn̄ ke ukperedem ete ke imọ ima ikere ini oro nte ubon imọ ẹdinamde n̄kpọ ke ini ẹdikopde ẹban̄a n̄kpa imọ!
Ke Ẹsụk Ẹdu Uwem!
Uyo ikan̄ ye eke akrasi oro okebomode ẹma ẹtre ke akpatre, ndien David ama otop enyịn ese Rosalía. Ke ini enye okokụtde ekpri ntọi iyịp ke edem esie, oti ama ekpere ndikịbe enye. Edi mbak akrasi emi ọkọfrọde okowụhọ do, idịghe itiatikan̄. Iyịp ama ọwọrọ ke edọn̄ esie ke mme nde unan emi akrasi oro ẹkeduọn̄ọde ẹkekpide enye, edi ke ebede oro etie nte n̄kpọ ikanamke enye.
Iren oro ẹkesịnede ọfọn̄ ekọn̄ ye afia ofọn̄ oro ẹdiande ke afara ẹma ẹsan̄a ekpere moto oro ẹnyụn̄ ẹdọhọ mmọ ẹwọrọ ẹda ke isọn̄ ẹnyụn̄ ẹmenede ubọk ke enyọn̄. Owo kiet emi eketiede nte akamba owo, ama ọn̄wọn̄ọde ebịne owoekọn̄ emi onyụn̄ ọdọhọ ete: “Ẹma edọhọ fi ete okûtop mbio obio.” Owoekọn̄ oro ama odomo ndiwụt ke se ikanamde ama ẹnen, ọdọhọde ete ke imọ ikokop uyo ikan̄ ndien ikere ke ẹkesịne ke moto oro ẹtop.
Ke ini David okowụtde idemesie ye Rosalía nte Mme Ntiense Jehovah, nte ẹkenamde n̄kpọ ama ọfọn. Enye ama anam se enye esinamde an̄wan̄a, edi mbonekọn̄ oro ẹkesụk ẹyoyom ndimụm mmọ. Etie nte ke tụhi tụhi usenubọk oro, otu mbonekọn̄ ẹma ẹnam ndutịm ndibọ ukara ke odudu nda, ndien mbonekọn̄ ẹmi ẹma ẹtọn̄ọ edinam edibọ itieutom mme bodisi nda nte David ye Rosalía ẹkebede ke moto.
Idem ama enyek Rosalía etieti edi ye uko enye ama omụm idem akama nte David ekekpede ubọk ete ẹsana mmimọ ẹyak. Ke akpatre ẹma ẹyak mmọ ẹnyọn̄ọ—edi ikemenke moto. Mmọ ẹkenyene ndisan̄a efak oro ekekperede nnyụn̄ n̄kodụk bọs n̄ka n̄kọk itieutom, ke ebiet emi ufọkibọk ekesede aban̄a Rosalía.
Odudu Akam
David ama ekpep n̄kpọ oto ifiọk n̄kpọntịbe oro—nditre ndidede nse odudu akam esịt akpanikọ ke ekpri n̄kpọ, inyụn̄ idehede ifre nte ke owo ndiwụt idemesie uko uko nte kiet ke otu Mme Ntiense Jehovah esiwak ndidi n̄kpọ ukpeme. Ekeme ndinen̄ede ndi akpanikọ nte ke “enyịn̄ Jehovah edi ọkpọsọn̄ tower: eti owo efehe odụk ke esịt, ndien odu ke ifụre.”—Mme N̄ke 15:29; 18:10; Philippi 4:6.
[Ebiet Ẹdade Ndise Ẹto ke page 19]
Fotografía de Publicaciones Capriles, Caracas, Venezuela