Mme Mbụme Ẹtode Mme Andikot

Sia Bible esiwakde nditịn̄ mban̄a “eyen eren emi mînyeneke ete,” ndi emi owụt unana edikere mban̄a nditọiban?

Baba-a.

New World Translation of the Holy Scriptures ada mme ikọ oro “eyen eren emi mînyeneke ete” ke ediwak ufanikọ oro owụtde edikere mban̄a oro Abasi enyenede ọnọ nditọ oro enanade ete m̀mê eka. Abasi ama anam edikere mban̄a emi an̄wan̄a ke ibet oro enye ọkọnọde Israel.

Ke uwụtn̄kpọ, Abasi ọkọdọhọ ete: “Ẹkûfịk baba ebeakpa, ye eyen akpa [“eyen eren emi mînyeneke ete,” NW]. Edieke afo efịkde enye, enye onyụn̄ eseme ọnọ mi, nditreke ndikop eseme esie; iyatesịt mi eyenyụn̄ obumede, ndien nyewot mbufo ke ofụt; iban mbufo ẹyenyụn̄ ẹdi mme ebeakpa, [nditọiren, NW] mbufo, nditọ akpa.” (Exodus 22:22-24) “Jehovah mbufo [edi] Abasi mme abasi, ye Ọbọn̄ mme mbọn̄, Abasi emi edide ata akwa, ye ọkpọsọn̄, ye akpakop, emi mîten̄eke owo baba kiet enyịn, mînyụn̄ ibọhọ enọ: emi ekpede edinen ikpe ọnọ [eyen eren emi mînyeneke ete, NW] ye ebeakpa.”—Deuteronomy 10:17, 18; 14:29; 24:17; 27:19.

Ediwak edikabade Bible okot “eyen emi mînyeneke ete” m̀mê “eyen akpa” ke mme ufan̄ikọ ẹmi, ke ntre esịnede nditọiren ye nditọiban. Nte ededi, mme utọ edikabade oro ẹfụmi inem oro ẹkụtde ke akpasarade ikọ Hebrew oro, (ya.thohm’), emi edide ke orụk erenowo. Utu ke oro, New World Translation of the Holy Scriptures ada nnennen edikabade “eyen eren emi mînyeneke ete,” nte ke Psalm 68:5, emi okotde ete: “Abasi edi ete nditọiren ẹmi mînyeneke ete ye ebiereikpe mme ebeakpa ke edisana idụn̄ esie.” Ọkọn̄ọde ke ntụk emi odude ke akpasarade ikọ Hebrew oro, uduot eke n̄wan ke ikọ edinam oro ke Psalm 68:11 otoro edikot emi: “Iban ẹmi ẹkwọrọde ẹdi akamba udịm.”a

Okposụkedi “eyen eren emi mînyeneke ete” edide akpan usụn̄ edikabade ya.thohm’, owo ikpadaha emi nte ọnọde ekikere unana edikere mban̄a nditọiban ẹmi mînyeneke ete m̀mê eka. Mme ufan̄ikọ oro ẹkotde ẹto do ye mmọ eken ẹwụt nte ke ẹma ẹsịn udọn̄ ẹnọ ikọt Abasi ndikere mban̄a iban, mme ebeakpa. (Psalm 146:9; Isaiah 1:17; Jeremiah 22:3; Zechariah 7:9, 10; Malachi 3:5) Ke Ibet, Abasi n̄ko ama esịn ntọt aban̄ade ubiereikpe oro ọkọnọde nditọiban Zelophehad emi mîkenyeneke ete unen ndidia n̄kpọ akpa. Ubiereikpe oro ama akabade edi ewụhọ ndikama ke ndise mban̄a mme ukem idaha oro, ntem ọsọn̄ọde omụm unen nditọiban ẹmi mînyeneke ete akama.—Numbers 27:1-8.

Jesus ikọtọhọ ubahade ke ufọt uduot ke ndiwụt mfọnido nnọ nditọwọn̄. Utu ke oro, nnyịn ikot ite: “Ẹda n̄kpri nditọ ẹsọk Enye ete, Enye otụk mmọ ubọk: edi mbet Esie ẹsua ẹnọ mmọemi ẹdade mmọ ẹdi. Edi ke ini Jesus okụtde, Enye ayat esịt, onyụn̄ ete mbet Esie, Ẹyak n̄kpri nditọ ẹtiene Mi; ẹkûkpan mmọ: koro Obio Ubọn̄ Abasi edide eke orụk emi. Ke akpanikọ ke ndọhọ mbufo, Owo ekededi eke mîdibọhọ Obio Ubọn̄ Abasi nte ekpri eyen, ididụkke-dụk ke esịt. Ndien Enye emen mmọ akama, odori mmọ ubọk, onyụn̄ ọdiọn̄ mmọ.”—Mark 10:13-16.

Ikọ Greek oro ẹkabarede “n̄kpri nditọ” mi odu ke uduot eke mîwụtke eren m̀mê n̄wan. N̄wed ukabadeikọ Greek oro ẹtịmde ẹdiọn̄ọ ọdọhọ ete ke “ẹda ikọ emi ndida mban̄a nditọiren ye nditọiban.” Jesus okowụt ukem udọn̄ oro Jehovah enyenede ke idem kpukpru nditọ, iren ye iban. (Mme Hebrew 1:3; men Deuteronomy 16:14; Mark 5:35, 33-42 domo.) Ẹkpenyene ndifiọk nte ke item oro ke N̄wed Abasi Usem Hebrew emi aban̄ade edikere mban̄a “nditọ iren ẹmi mînyeneke ete” edi item oro ẹnọde ke nte nnyịn ikpekerede ibana kpukpru nditọwọn̄ oro mînyeneke ete m̀mê eka mîdịghe ete ye eka.

[Mme ikọ idakisọn̄]