Enyọn̄-Ukpeme ye Awake!—Mme Ekemini N̄wedmbụk Akpanikọ
“Jehovah Abasi akpanikọ, afo amafak mi.”—PSALM 31:5.
1, 2. (a) Didie ke se eyenete an̄wan kiet okokotde ke Enyọn̄-Ukpeme okotụk enye? (b) Nso mme mbụme ke ẹbụp ẹban̄a mme n̄wedmbụk nnyịn?
CHRISTIAN eyenete an̄wan kiet ekewet ete, “Ẹsọsọn̄ọ etieti ke utịbe utịbe etop emi odude ke ibuotikọ Enyọn̄-Ukpeme oro ‘Afo Emekeme Ndikop Ndọn̄esịt ke Ini Ukụt.’a Ata ediwak n̄kpọ oro mbufo ẹkewetde ẹkedi ata ukem ukem ye mme ntụk oro n̄kenyenede ndise mban̄a; etie nte n̄kpọ eke ẹkewetde ibuotikọ oro ẹnọ mi nnennen. Akpa ini oro n̄kokotde enye, mmọn̄eyet ama asiaha mi ke enyịn. Edi ata utịben̄kpọ ndifiọk nte ke owo en̄wen ọfiọk nte etiede mi ke idem! Ami mmokop inemesịt etieti ndidi kiet ke otu Mme Ntiense Jehovah. Ke m̀mọ̀n̄ ke nnyịn ikeme ndikụt mme un̄wọn̄ọ nsinsi uwem ke Paradise ke n̄kpet n̄kpet ini iso ye ndọn̄esịt idahaemi nnọ ukpọn̄ nnyịn! Ẹsọsọn̄ọ-o. Ẹsọsọn̄ọ utịm ike miliọn.”
2 Nte akanam etie fi ntre ke idem? Ndi akanam etie fi ke idem nte ke ẹkewet akpan ibuotikọ ke Enyọn̄-Ukpeme m̀mê nsan̄a esie, Awake!, san̄asan̄a ẹnọ fi? Nso isinen̄ede inam mme magazine nnyịn ẹtụk esịt mme owo ntre? Didie ke nnyịn ikeme ndin̄wam mmọ en̄wen ẹbọ ufọn ẹto anyan̄a-uwem etop emi esịnede ke mmọ?—1 Timothy 4:16.
Mme Magazine Oro Ẹtan̄ade Akpanikọ
3. Kaban̄a nso eti ntak ke mme magazine Enyọn̄-Ukpeme ye Awake! ẹtụk esịt ediwak mme andikot?
3 Jehovah edi “Abasi akpanikọ.” (Psalm 31:5) Ikọ esie, kpa Bible, edi n̄wed akpanikọ. (John 17:17) Mbon esịt akpanikọ ẹsinyịme akpanikọ. (Men John 4:23, 24 domo.) Ntak kiet oro anamde Enyọn̄-Ukpeme ye Awake! ẹtụk esịt ediwak miliọn mme andikot ntre edi nte ke mmọ ẹdi mme n̄wedmbụk nsọn̄ọnda ye akpanikọ. Ke akpanikọ, ekedi eneni aban̄ade edinam akpanikọ nnọ akpanikọ Bible akanam ẹtọn̄ọ ndiwet Enyọn̄-Ukpeme.
4, 5. (a) Nso mme idaha ikada ikosụn̄ọ ke C. T. Russell ndimịn̄ Enyọn̄-Ukpeme? (b) Didie ke “asan̄autom emi anamde akpanikọ, onyụn̄ enyenede ọniọn̄” ada n̄wedmbụk Enyọn̄-Ukpeme anam n̄kpọ?
4 Ke 1876, Charles T. Russell ama odụk ediomi ye Nelson H. Barbour, eke Rochester, New York. Russell ama ọnọ okụk man ẹda ẹtọn̄ọ ntak ẹmịn̄ n̄wed ido ukpono Barbour oro, Herald of the Morning, oro ekesimịn̄de ke ini ke ini, ye Barbour nte akpan ewetn̄wed ndien Russell nte udiana ewetn̄wed. Nte ededi, ke n̄kpọ nte isua kiet ye ubak ke ukperedem, ke nsiondi Herald eke August 1878, Barbour ama ewet ibuotikọ oro akafan̄ade aban̄a ufọn uwa ufak n̄kpa Christ. Russell, emi Barbour ọkọsọn̄de akan ke se ikperede ndisịm isua 30, ama anam n̄kpọ aban̄a emi ke ibuotikọ kiet ke udiana nsiondi oro ọkọsọn̄ọde etịn̄ n̄kpọ aban̄a ufak, emi enye eketịn̄de aban̄a nte “kiet ke otu ata akpan ukpepn̄kpọ Ikọ Abasi.” (Matthew 20:28) Ke ama okodomo ukeme ediwak ini ndikọk ibuot ke N̄wed Abasi ye Barbour, ke akpatre Russell ama ebiere ndisịbe kpukpru ebuana esie mfep ye Herald. Ọtọn̄ọde ke nsiondi eke June 1879 eke n̄wedmbụk oro, enyịn̄ Russell ikesịneke aba nte udiana ewetn̄wed. Ọfiọn̄ kiet ke ukperedem, Russell emi ekedide isua 27 ke emana ama ọtọn̄ọ ndimịn̄ Zion’s Watch Tower and Herald of Christ’s Presence (emi ẹdiọn̄ọde idahaemi nte Enyọn̄-Ukpeme Ọnọ Ntọt Obio Ubọn̄ Jehovah), emi tọn̄ọde ke ntọn̄ọ esie ọsọn̄ọde omụm akpanikọ N̄wed Abasi, utọ nte ufak, akama.
5 Ke isua 114 ẹmi ẹkebede, Enyọn̄-Ukpeme, ukem nte lọya oro enyenede usọ, omowụt idem esie nte andida nnọ akpanikọ ye ukpepn̄kpọ Bible. Ke edinam emi, enye omụm mbuọtidem ediwak miliọn mme andikot enye oro ẹwụtde esịtekọm. Enye ke osụk ọsọsọn̄ọ ufak ọkpọsọn̄ ọkpọsọn̄. (Ke uwụtn̄kpọ, se nsiondi eke February 15, 1991.) Ndien enye ke osụk ededi akpan n̄kpọutom eke “asan̄autom emi anamde akpanikọ, onyụn̄ enyenede ọniọn̄” ye Otu Ukara esie ke ndinọ ntọt mban̄a Obio Ubọn̄ Jehovah oro ẹma ẹkewụk ke heaven onyụn̄ ọnọ udia eke spirit “ke edikem ini.”—Matthew 24:14, 45.
6, 7. Nso ke ẹkewụt nte edide uduak The Golden Age, ndien nso iwụt nte ke mbon oro ẹkerede n̄kpọ ẹma ẹnam n̄kpọ ẹban̄a etop esie?
6 Nso kaban̄a magazine Awake!? Toto ke ntọn̄ọ, Awake! n̄ko amatan̄a akpanikọ. Ẹkenam magazine emi ke akpa ẹkekotde The Golden Age man ẹsuan ke an̄wa. Kaban̄a uduak esie, akpa nsiondi, emi usenọfiọn̄ esie ekedide October 1, 1919, ọkọdọhọ ete: “Uduak esie edi ndinam se ikpọ n̄kpọntịbe eke eyomfịn ẹwọrọde ẹn̄wan̄a ke un̄wana ifiọk Abasi ndinyụn̄ n̄wụt mbon oro ẹkerede n̄kpọ ebe ke uyarade oro owo mîkemeke ndifan̄a onyụn̄ edide se ẹkemede ndinịm ke akpanikọ nte ke ini n̄kponn̄kan edidiọn̄ ubonowo emekpere.” Mbon oro ẹkerede n̄kpọ ẹma ẹnam n̄kpọ ẹban̄a etop The Golden Age. Ke ediwak isua, ẹma ẹsuan enye awak akan Enyọn̄-Ukpeme.b
7 Nte ededi, se inamde Enyọn̄-Ukpeme ye Awake! ẹdemede udọn̄ mme owo aka anyan akan akpanikọ oro nte ke mmọ ẹsuan ukpepn̄kpọ ido ukpono edide akpanikọ ẹnyụn̄ ẹnam se mme idaha ererimbot emi ẹwọrọde ẹn̄wan̄a. Akpan akpan ke isua duop m̀mê edịp ẹmi ẹkebede, mme magazine nnyịn ẹtụk esịt mme owo kaban̄a ntak efen n̄ko.
Mme Ekemini Ibuotikọ Oro Ẹtụkde Uwem Mme Owo
8. Nso ukpụhọde ke Jude akanam ke ndiwet n̄kpọ, akpakde mme andikot n̄wed esie ndibiọn̄ọ ewe odudu ke esịt esop?
8 N̄kpọ nte isua 30 ke Jesus Christ ama akakpa onyụn̄ eset ke n̄kpa, Jude, andiwet Bible, ama osobo idaha oro okodoride ata. Mme oburobụt owo ẹmi ẹnyenede edu ebietde eke unam ẹma ẹdọn̄ ikpat ẹdụk ke otu mme Christian. Jude okoyom ndiwet nnọ ekemmọ mme Christian mban̄a ukpepn̄kpọ ido ukpono—kpa edinyan̄a oro kpukpru mme Christian oro ẹyetde aran ẹnyenede. Utu ke oro, ebede ke ndausụn̄ edisana spirit, enye ama okụt nte ke odot ndikpak mme andikot n̄wed esie ndibiọn̄ọ odudu idiọkn̄kpọ ke esịt esop. (Jude 3, 4, 19-23) Jude ama okpụhọde ekekem ye idaha oro okodude onyụn̄ ọnọ ekemini item oro ekekemde ye udọn̄ nditọete Christian esie.
9. Nso ibuana ke ndinam mme n̄wedmbụk nnyịn ẹnyene mme ekemini ibuotikọ?
9 Kpasụk ntre, nditịm mme ekemini ibuotikọ nnọ mme n̄wedmbụk nnyịn edi mbiomo oro odoride ata. Mme ini ẹsikpụhọde, ntre n̄ko ke edi ye mme owo—se mmọ ẹyomde ye mme udọn̄ mmọ idịghe ukem ye se mmọ ẹkedide ke idem isua duop m̀mê edịp ẹmi ẹkebede. Esenyịn kiet emi asan̄ade-san̄a ama etịn̄ ke ndondo emi ete: “Ke ini n̄kakabarede ndi Ntiense ke edem ko ke mme iduọkisua 1950, usụn̄ emi nnyịn ikesidade ikpep mme owo Bible akpan akpan ekedi ndikpep ukpepn̄kpọ ido ukpono—ikpepde mmọ akpanikọ aban̄ade Abasi-Ita-ke-Kiet, hell ikan̄, ukpọn̄, ye ntre ntre eken. Edi idahaemi, etie nte mme owo ẹsobo ata ediwak mfịna ye nsọn̄ọn̄kpọ ke uwem anam nnyịn inyene ndikpep mmọ nte ẹdude uwem.” Ntak emi edide ntre?
10. Ntak emi mîkpakpaha nnyịn idem nte ke nditaha oro akade-kaiso omodu ke mme mbubehe owo toto ke 1914?
10 Kaban̄a “ukperedem ini,” Bible ama ebemiso etịn̄ ete: “Ndiọi owo ye mbon abian̄a ẹyedọdiọn̄ ẹdiọk ẹkaiso, ẹbian̄a owo, owo ẹyenyụn̄ ẹbian̄a mmọ.” (2 Timothy 3:1, 13) Ke ntre, ikpenyeneke ndikpa nnyịn idem nte ke nditaha oro akade-kaiso omodụk mbubehe owo toto ke 1914 emi utịt ini ọkọtọn̄ọde. Satan, emi ini oro osụhọde ọnọ enye otịmde-tịm ekpri akan nte akanam edide, ke an̄wan̄a iyatesịt esie ofụk n̄kaowo akan nte akanam edide. (Ediyarade 12:9, 12) Nte utịp, mme ido uwem ye ido ubon ẹkpụhọde akamba akamba ye se mmọ ẹkedide ke n̄kpọ nte isua 30 m̀mê 40 ẹmi ẹkebede. Mme owo ke ofụri ofụri inyeneke udọn̄ aba ke ido ukpono nte ekedide ke mme isua ẹmi ẹkebede. Ubiatibet odu ke kpukpru ebiet tutu mme owo ẹdidu ke ukpeme ke usụn̄ oro owo mîkokopke iban̄a ke n̄kpọ nte isua 20 m̀mê 30 ẹmi ẹkebede.—Matthew 24:12.
11. (a) Nso orụk n̄kpọ ẹdu ke esịt mme owo, ndien didie ke asan̄autom emi anamde akpanikọ onyụn̄ enyenede ọniọn̄ anam n̄kpọ aban̄a mme udọn̄ ẹmi? (b) Nọ uwụtn̄kpọ ban̄a ibuotikọ kiet ke Enyọn̄-Ukpeme m̀mê Awake! oro okotụkde uwem fo.
11 Eyịghe idụhe, ndien, nte ke mme n̄kpọ ẹban̄ade ntụk, ebuana n̄kaowo, ye ubon ẹdi se idude ke ekikere ediwak owo. Otu asan̄autom emi anamde akpanikọ onyụn̄ enyenede ọniọn̄ amanam n̄kpọ uko uko aban̄a emi ke Enyọn̄-Ukpeme ye Awake! ebe ke ndimịn̄ mme ekemini ibuotikọ oro ẹnyenede n̄kpọ ndinam ye ata udọn̄ mme owo oro ẹnyụn̄ ẹnen̄erede ẹtụk uwem mmọ. Kere ban̄a ndusụk uwụtn̄kpọ ẹmi.
12. (a) Ntak emi ẹketịmde mme ibuotikọ ẹban̄ade mme ubon oro edide ete m̀mê eka ikpọn̄ ese aban̄a ke Enyọn̄-Ukpeme ke 1980? (b) Didie ke eyenete an̄wan kiet okowụt esịtekọm esie kaban̄a mme ibuotikọ oro ẹkeban̄ade mme ubon oro edide ete m̀mê eka ikpọn̄ ese aban̄a?
12 N̄kpọ ẹban̄ade ubon. Ke ini mbụk ofụri ererimbot ẹkewụtde usọp usọp n̄kọri ke ibat mme ubon oro ẹdide ete m̀mê eka ikpọn̄ ese aban̄a, ẹma ẹtịm udịm udịm ibuotikọ oro ẹkedọhọde “Mme Ubon Oro Ẹdide Ete m̀mê Eka Ikpọn̄ Ese Aban̄a—Ndiyọ Mme Mfịna Mmọ” ke nsiondi Enyọn̄-Ukpeme (Ikọmbakara) eke September 15, 1980. Mme ibuotikọ oro ẹkenyene adiana-iba uduak: (1) ndin̄wam ete m̀mê eka oro edide enye ikpọn̄ ese aban̄a ubon ọyọ mme san̄asan̄a mfịna oro enye osobode ye (2) ndin̄wam mmọ eken ẹnyene nnennen ifiọk man otodo mmọ “ẹkop mbọm ye kiet eken,” ẹnyụn̄ ẹnen̄ede ẹkeme “ndisan̄a nse” mme ubon oro ẹdide ete m̀mê eka ikpọn̄ ese aban̄a. (1 Peter 3:8; James 1:27) Ediwak mbon oro ẹkekotde enye ẹma ẹwet n̄wed ndiwụt esịtekọm mmọ kaban̄a mme ibuotikọ oro. Eka kiet oro edide enye ikpọn̄ ese aban̄a ubon ekewet ete, “Ke ini n̄kokụtde ikpaedem esie, enye ke akpanikọ ama anam mmọn̄eyet asiaha mi ke enyịn, ndien ke ini n̄kokụbọrede magazine oro nnyụn̄ n̄kot se ẹwetde, esịt mi ama ọyọhọ ye ekọm ọnọ Jehovah ke ndinọ utọ ntọt oro ke ini oro n̄koyomde.”
13. Nso ntotụn̄ọ nneme aban̄ade mfịghe ke ẹkemịn̄ ke Awake! ke 1981, ndien nso ke andikot kiet eketịn̄ aban̄a oro?
13 Mme n̄kpọ ẹban̄ade ntụk. Ẹma ẹneme ibuotikọ oro aban̄ade mfụhọ ke Enyọn̄-Ukpeme ye Awake! ọtọn̄ọde ke mme iduọkisua 1960. (1 Thessalonica 5:14) Edi ẹma ẹfiak ẹneme ibuotikọ oro ke obufa ye in̄wan̄în̄wan̄ usụn̄ ke udịm udịm ibuotikọ ikpaedem oro “You Can Fight Depression!” (Afo Emekeme Ndikan Mfịghe!) ke Awake! eke September 8, 1981. Ikebịghike Watch Tower Society ama ọbọ mme leta esịtekọm oto kpukpru ikpehe ererimbot. Eyenete an̄wan kiet ekewet ete: “N̄kpewewet didie nte etiede mi ke idem? Ami ndi isua 24 ke emana, ndien ke isua duop ẹmi ẹkebede, ami mma nsikop mfụhọ ediwak ini. Edi idahaemi, etie mi ke idem nte mmenen̄ede n̄kpere Jehovah n̄kan nnyụn̄ n̄kop inemesịt nte ke enye anam n̄kpọ aban̄a udọn̄ mbon mfụhọ ebe ke mme inem inem ibuotikọ ẹmi, ndien n̄koyom ndisian mbufo ntre.”
14, 15. (a) Didie ke ẹkeneme ẹban̄a edikama eyen ke idiọk usụn̄ ke n̄wedmbụk nnyịn? (b) Mme ibuotikọ ewe ke magazine ẹketụk esịt awat enan̄-mbakara ke Australia?
14 Mme n̄kpọ ẹban̄ade n̄kaowo. Bible ama ebemiso etịn̄ ete ke “ukperedem ini” mme owo ẹdidi “mme ama idem, . . . ẹnana ima uduot owo; . . . ẹyak idiọkitọn̄ akan mmọ ubọk, ẹtie obom obom, ẹnyụn̄ ẹsua se ifọnde.” (2 Timothy 3:1-3) Ke ntre, ikpanaha akpa nnyịn idem nte ke edinam edikama nditọ ke idiọk usụn̄ odu ke akamba udomo mfịn. Ẹma ẹneme ẹban̄a n̄kpọ emi in̄wan̄în̄wan̄ ke ibuotikọ oro “Un̄wam Ẹnọde Mbon Idan̄ Iman” ke Enyọn̄-Ukpeme (Ikọmbakara) eke October 1, 1983. Isua itiaita ke ukperedem, udịm udịm ibuotikọ ikpaedem oro “Healing the Wounds of Child Abuse” (Ndikọk Unan Edikama Eyen ke Idiọk Usụn̄) ke Awake! eke October 8, 1991 edi se ẹkenen̄erede ẹtịm man anam mbon unọmọ oro ẹnyene ọniọn̄ ye idotenyịn onyụn̄ anam mmọ en̄wen ẹnyene ifiọk man ẹkeme ndinọ un̄wam oro enyenede ufọn. Ẹma ẹbọ mme leta ẹtode mme andikot kaban̄a udịm udịm ibuotikọ ẹmi awak akan nte akanam edide ke ofụri mbụk n̄wedmbụk nnyịn. Andikot kiet ekewet ete: “Se ikenen̄erede in̄wam mi ndifiak n̄kop nsọn̄idem ekedi mme ọnọ ndọn̄esịt ekikere ye mme itie ke N̄wed Abasi oro ẹkekotde ẹto ke mme ibuotikọ emi. Ndifiọk nte ke Jehovah ikefreke iban̄a mi ekedi akwa n̄kpọ oro ọkọnọde mi ifụre. Ndifiọk nte ke idịghe ami ikpọn̄ nsobo utọ n̄kpọ oro ekedi n̄ko n̄kpọ ndọn̄esịt.”
15 Awat enan̄-mbakara kiet ke Melbourne, Australia, ama ọnọ ikot ke urụk ukopikọ aka ọfis Watch Tower Society ke Sydney, etịn̄de nte imọ ikopde itekesịt iban̄a n̄kann̄kụk mbuba uwat enan̄-mbakara. Enye ọkọdọhọ ke imọ ikosụk ikụre ndikot Awake! eke March 8, 1993, oro ọdọhọde “Rape—A Woman’s Nightmare,” ndien ke ọsọsọn̄ ndinịm ke akpanikọ nte ke utọ ọsọn̄urua magazine oro ama odu. Enye ama obụp mme mbụme ke n̄kpọ nte minit 30 onyụn̄ okop inemesịt ndikop mme ibọrọ oro ẹkenọde.
16. Ke mme usụn̄ ewe ke afo ekeme ndiwụt esịtekọm emi enyenede ọnọ mme n̄wedmbụk nnyịn?
16 Nso kaban̄a fi? Nte odu akpan ibuotikọ oro ẹmịn̄de ke Enyọn̄-Ukpeme m̀mê ke Awake! oro otụkde uwem fo? Ke edide ntre, eyịghe idụhe nte ke afo omowụt ntotụn̄ọ esịtekọm aban̄a mme n̄wedmbụk nnyịn. Didie ke afo ekeme ndinam n̄kpọ n̄wụt esịtekọm fo? Ke akpanikọ edi ke ndikot nsiondi kiet kiet ke idemfo. Afo n̄ko emekeme ndibuana ke ndisuan mme ọsọn̄urua n̄wedmbụk ẹmi ke ata ntatara usụn̄. Didie ke ẹkeme ndinam emi?
Buana Mmọ ye Mbon En̄wen!
17. Nso ke mme esop ẹkeme ndinam man ẹnam ibat magazine oro ẹsuande ọdọk?
17 Akpa, odu n̄kpọ emi esop kiet kiet ekemede ndinam. Nsiondi Informant (emi edide Utom Obio Ubọn̄ Nnyịn idahaemi) eke October 1952 ọkọdọhọ ete: “Usụn̄ usuan magazine oro enyenede uforo akan edi to ke ufọk sịm ufọk ye to ke ufọkurua sịm ufọkurua. Ntem N̄ka otoro ete usụn̄ usuan magazine enyeemi edi ubak usụn̄ unam utom ke Usen Magazine kpukpru ini.” Item oro osụk enyenyene ufọn mfịn. Mme esop ẹkeme ndinam ndutịm ofụri ini nnọ Usen Magazine, kpa usen emi ẹsiode ẹnịm akpan akpan ẹnọ unọ ikọ ntiense magazine. Ye ata ediwak esop, ekeme ndidi mme akpan usen Saturday ẹyefọn. Ih, yak esop kiet kiet osio mme akpan usen m̀mê mbubịteyo onịm ọnọ unọ ikọ ntiense magazine—to ke ufọk sịm ufọk, to ke ufọkurua sịm ufọkurua, ke utom eke efak, ye ke mme afan̄ magazine. Adianade do, nso ke afo, asuanetop Obio Ubọn̄, ekeme ndinam man an̄wam edisuan mme magazine ọkọri?
18, 19. (a) Didie ke ndinyene udọn̄ ke Enyọn̄-Ukpeme ye Awake! ekeme ndin̄wam fi ndinịm mme magazine ẹmi? (b) Nso idi ufọn ibio ibio nneme, oro osiode akpan n̄kpọ owụt ke ini inọde mme magazine? (c) Nso iwụt ufọn edinam mme magazine ẹsịm ufọk mme owo?
18 Ndinyene udọn̄ ke “Enyọn̄-Ukpeme” ye “Awake!” edi akpa usio-ukot. Babak kot mme magazine ẹmi. Nte afo okotde ibuotikọ kiet kiet, bụp idemfo, ‘Anie edinyene udọn̄ ke ibuotikọ enyeemi?’ Kere ban̄a mme ikọ ifan̄ ẹmi afo ekemede nditịn̄ man edemede owo udọn̄ ke ibuotikọ oro. Adianade ke ndinọ Usen Magazine ofụri ini ibetedem, ntak emi mûkamake ndusụk mmọ man ekpekeme ndida kpukpru ifet oro edibederede mbuana mmọ ye mmọ en̄wen—ke ini akade isan̄ m̀mê akade urua ye ke ini enyenede nneme ye mme nsan̄autom fo, mme mbọhọidụn̄, mme nsan̄a ufọkn̄wed, m̀mê mme andikpep?
19 Nam nte ọnọde enye edi mmemmem edi ọyọhọ ekikere iba oro ẹnọde. Enyọn̄-Ukpeme (Ikọmbakara) eke December 1, 1956, ọkọdọhọ ete: “Ibio ibio utịn̄ikọ, oro otụkde akpan n̄kpọ edi mfọnn̄kan usụn̄ ke ndinọ mme magazine. Uduak edi ndinịm uwak ibat. Mmọ ‘ẹyetịn̄ ikọ’ ke idemmọ.” Ndusụk mme asuanetop ẹsikụt nte ọfọnde ndisio akpan ekikere kiet ke ibuotikọ kiet, ẹtịn̄de enye ke mme ikọ ifan̄, ndien ẹnọ mme magazine. Ke enye akam odude ke ufọk, mme magazine ẹkeme “nditịn̄ ikọ” nnọ mmọ efen ọkọrọ ye owo emi ọkọbọde mmọ oto fi. Ke Ireland uyen kiet ke ufọkn̄wed ntaifiọk kiet ama okot nsiondi Enyọn̄-Ukpeme eke September 1, 1991, emi ete esie ọkọbọde oto Ntiense kiet. Mme ibuotikọ oro ẹkeban̄ade nneme ye mme ibuotikọ eken ẹma ẹdemede udọn̄ esie. Ke ndondo oro enye ama okokot magazine oro, eyenan̄wan oro ama ada nọmba ẹmi ẹdude ke n̄wed urụk ukopikọ okot Mme Ntiense. Ukpepn̄kpọ Bible ama ọtọn̄ọ usọp usọp, ndien n̄kaiferi oro ama ana baptism ke Mbono District “Ukpepn̄kpọ Abasi” ke July 1993. Ke akpanikọ, ẹyak inam mme magazine ẹmi ẹsịm ufọk mme owo, ke ebiet mmọ ẹkemede “nditịn̄ ikọ” nnọ mme owo! Esenyịn kiet emi asan̄ade-san̄a ama ọnọ ekikere aban̄a mfefere usụn̄ efen: “Sio mme magazine ẹmi ke ekpat n̄wed fo.” Ke akpanikọ, edieke se afo etịn̄de mîmụmke udọn̄ enyeneufọk, do ekeme ndidi ndise ikpaedem mmọ oro edemerede udọn̄ eyenịm magazine emi ọnọ fi.
20, 21. (a) Didie ke afo ekeme ndikpụhọde nda ekekem ye idaha ke ini abuanade ke utom magazine? (b) Nso ke afo ekeme ndinam man onịm ediwak magazine ke ọfiọn̄ kiet kiet?
20 Ọyọhọ ekikere ita oro ẹnọde edi ndikpụhọde nda ekekem ye idaha oro odude. (Men 1 Corinth 9:19-23 domo.) Tịm mbio mbio usụn̄ unyene nneme ifan̄. Nyene ibuotikọ kiet oro edidemerede irenowo udọn̄, ye efen oro edidemerede iban udọn̄, ke ekikere. Ye mme uyen, afo emekeme ndiwụt ibuotikọ kiet ke ikpehe “Young People Ask . . .” (N̄kparawa Owo Ẹbụp . . .). N̄ko, kpụhọde ekekem ye idaha oro odude, ke ini abuanade ke utom magazine. Adianade ye Usen Magazine, afo emekeme ndikụt nte ke unọ ikọ ntiense mbubịteyo esinọ ata eti ifet ndinọ mme magazine to ke ufọk sịm ufọk.
21 Ọyọhọ ekikere inan̄ oro ẹnọde edi nịm ọkpọkpọ utịtmbuba. “Mme Magazine Ẹwụt Owo Usụn̄ Uwem” emi okodude ke esịne-esịt Utom Obio Ubọn̄ Nnyịn eke July 1984, ọkọdọhọ ete: “Nte ekikere ẹnọde, mme asuanetop ẹkeme ndinyene utịtmbuba edinịm, yak idọhọ, mme magazine 10 kwa ọfiọn̄, ọkọn̄ọde ke mme idaha mmọ; mme asiakusụn̄ ẹkeme ndidomo ndinịm 90. Ke akpanikọ, ndusụk mme asuanetop ẹkeme ndinịm mme magazine ẹwakde ẹkan oro kpukpru ọfiọn̄ ndien ke ntre ẹyenịm utịtmbuba idemowo oro okponde akan oro. Nte ededi, otode ke ntak unana nsọn̄idem, orụk efakutom, m̀mê nti ntak eken, utịtmbuba mbon eken ẹkeme ndisụhọde n̄kan oro. Kpa ye oro utom emi mmọ ẹnamde ẹnọ Jehovah enyene kpa ukem ufọn. (Matt. 13:23; Luke 21:3, 4) Akpan n̄kpọ edi ndinyene utịtmbuba idemowo.”
22. Ke ewe usụn̄ ke nnyịn ikeme ndiwụt nte ke nnyịn imowụt esịtekọm inọ Jehovah iban̄a mme ekemini n̄wedmbụk akpanikọ nnyịn?
22 Nnyịn iwụt esịtekọm didie ntem nte ke Jehovah, “Abasi akpanikọ,” amada otu asan̄autom emi anamde akpanikọ onyụn̄ enyenede ọniọn̄ ye Otu Ukara esie ndinọ nnyịn mme ekemini n̄wedmbụk ẹmi! (Psalm 31:5) Adan̄a nte Jehovah onyịmede, mme magazine ẹmi ẹyekaiso ndise mban̄a ata udọn̄ mme owo. Mmọ ẹyekaiso ndisọn̄ọ mmụm n̄kokon̄ idaha ido uwem eke Jehovah n̄kama. Mmọ idikpụho ndimenede nnennen ukpepn̄kpọ ido ukpono ke enyọn̄. Ndien mmọ ẹyekaiso ndidụri ntịn̄enyịn n̄wụt edisu prọfesi oro onịmde eyo nnyịn idiọn̄ọ nte ini emi Obio Ubọn̄ Abasi akarade emi ata mme andituak ibuot nnọ Jehovah oro ẹkade-kaiso ndikọri ke ibat ẹnyụn̄ ẹnamde uduak Abasi ke isọn̄ ke usụn̄ oro akanam owo mînamke. (Matthew 6:10; Ediyarade 11:15) Nso ọsọn̄urua n̄kpọuto ke nnyịn inyene ntem ke Enyọn̄-Ukpeme ye Awake! Ẹyak nnyịn ida kpukpru ifet oro inyenede ibuana mme akpan n̄wedmbụk ẹmi ẹtụkde uwem mme owo ẹnyụn̄ ẹmenerede akpanikọ Obio Ubọn̄ mi ke enyọn̄ ye mbon nsụkesịt.
Nso Idi Ibọrọ Fo?
◻ Nso iwụt nte ke Enyọn̄-Ukpeme ye Awake! ẹdi mme n̄wedmbụk akpanikọ?
◻ Didie ke Enyọn̄-Ukpeme ye Awake! ẹtụk uwem mme owo?
◻ Nso ke mme esop ẹkeme ndinam man ẹnam ibat magazine oro ẹsuande ọkọri?
◻ Nso mme ekikere oro ẹnọde ẹkeme ndin̄wam fi ndinịm ekese magazine?
[Mme Ikọ idakisọn̄]
a July 15, 1992, page 19-22.
b Ke ediwak isua ẹkeda Enyọn̄-Ukpeme nte magazine emi enyenede mme Christian oro ẹyetde aran akpan akpan. Nte ededi, ọtọn̄ọde ke 1935, ẹma ẹdori akwa nsọn̄uyo ke ndisịn udọn̄ nnọ “akwa otuowo,” emi ẹnyenede idotenyịn nsinsi uwem ke isọn̄, ndibọ nnyụn̄ n̄kot Enyọn̄-Ukpeme. (Ediyarade 7:9) Isua ifan̄ ke ukperedem, ke 1940, ẹma ẹsinọ mme owo Enyọn̄-Ukpeme ke mme efak kpukpru ini. Ke oro ebede, ibat oro ẹsuande enye ama ọdọk usọp usọp.
[Ekebe ke page 22]
Ndusụk Ibuotikọ Oro Ẹketụkde Uwem Mme Owo
Ke mme isua ẹmi ẹkebede, ediwak mme andikot ẹma ẹwet n̄kpọ ndiwụt esịtekọm mban̄a mme akpan ibuotikọ oro ẹkemịn̄de ke Enyọn̄-Ukpeme ye Awake! Se ẹwetde ke idak emi edi sụk ibat ibat ke otu ediwak ibuotikọ oro ẹketụkde mme andikot n̄wed nnyịn. Nte mme ibuotikọ ẹmi m̀mê mmọ efen ẹma ẹkpụhọde uwem fo?
Enyọn̄-Ukpeme
“Nyịme Un̄wam Abasi Ndikan Mme Ndedịbe Ndudue” (October 15, 1985)
“Ndinam Se Idotde Nnọ Mme Ete ye Eka Oro Ẹsọn̄de” (June 1, 1987)
“Unọ Ukpep ye Uduak” (November 1, 1992)
Awake!
“You Can Fight Depression!” (Afo Emekeme Ndikan Mfịghe!) (September 8, 1981)
“When Someone You Love Dies . . .” (Ke Ini Owo Emi Afo Amade Akpade . . . ) (April 22, 1985)
“Protect Your Chilren!” (Ẹkpeme Nditọ Mbufo!) (October 8, 1993)
[Ndise ke page 23]
Ke Canada—ndikwọrọ ikọ to ke ufọk sịm ufọk ye mme magazine
[Ndise ke page 24]
Ke Myanmar—ndinọ mme magazine oro ẹnyande ubọk ẹwụt usụn̄uwem