Ke Ini Edem Usiahautịn Osobode ye Edem Usoputịn
“OH, EDEM usiahautịn edi Edem Usiahautịn, Edem Usoputịn onyụn̄ edi Edem Usoputịn, ndien tutu amama mbiba emi idisoboke.” Mme ikọ ewetuto owo Britain oro, Rudyard Kipling, ẹti nnyịn adan̄a nte akwa ukpụhọde ke ido edinam abaharede ubonowo, emi etịpde esịn ke usua eke ekpụk, orụk, ye idụt oro atarade asuana akanade nnyịn mfịn. Ediwak owo ẹbụp ete, Nte Abasi ikemeke ndinam n̄kpọ mban̄a idaha emi? Ih, enye ekeme! Ndien enye ke ananam n̄kpọ idem idahaemi! Ọyọhọ udịm iba ke uto Kipling emi etịn̄ otụk emi. Edem Usiahautịn ye Edem Usoputịn ẹdibahade ebịghi adan̄a didie? Ewetuto emi ọkọdọhọ ete: “Tutu Isọn̄ ye Ikpaenyọn̄ ẹda kemi ke akwa Itie Ikpe Abasi.”
Abasi ọmọnọ Eyen esie, Jesus Christ, utom edikpe ikpe. (John 5:22-24, 30) Edi ini ewe ke ini ikpe oro ọtọn̄ọ? Mmanie ke ekpe ikpe ẹnọ, ndien ye nso utịp? Jesus edi enyeemi eketịn̄de ke prọfesi aban̄a mme ekọn̄ ererimbot ye nnanenyịn oro ẹketọn̄ọde ndinọmọ ubonowo ke isua 1914. Enye ọkọdọhọ ete ke mmọemi ẹwụt “idiọn̄ọ” aban̄ade ‘edidu esie’ oro enyịn mîkwe “ye eke akpatre ini eyo emi.”—Matthew 24:3-8.
Ke utịt akwa prọfesi emi, Jesus owụt ini nnyịn emi nte ini ikpe, etịn̄de aban̄a idemesie ete: “Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie. Ndien ẹyebon kpukpru mme idụt ke iso Esie: Enye eyenyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot; ndien eyenịm erọn̄ ke ubọk nnasia Esie, ye ebot ke ufien.” Ke ndamban̄a usụn̄, idahaemi ke ẹtan̄ kpukpru owo ke isọn̄ ẹbok ke iso Ebiereikpe oro ndien mmọ ẹyenam ibat kaban̄a usụn̄ nte mmọ ẹkenamde n̄kpọ ẹban̄a etop edinyan̄a esie. Ke ini ẹbierede ikpe ke akwa ukụt ke mîbịghike, mme ọsọn̄ibuot mbon mbietebot “ẹyedaha ẹkodụk ke nsinsi [edisịbe mfep, NW], edi ndinen owo [mme okopitem mbon mbieterọn̄] ẹyedụk ke nsinsi uwem.”—Matthew 25:31-33, 46; Ediyarade 16:14-16.
‘Ke Edem Usiahautịn ye ke Edem Usoputịn’
Ikpe ererimbot emi ekenen̄ede ọtọn̄ọ ke mme isua ndutịme eke Ekọn̄ Ererimbot I. Ke ini oro, mme ọkwọrọ ederi Christendom ẹma ẹnọ otu mme an̄wana ekọn̄ ọyọhọ ibetedem. Emi ama onịm mmọ idiọn̄ọ nte ubak mbiara ererimbot oro odotde ndibọ “iyatesịt Abasi.” (John 3:36) Edi nso kaban̄a mme Christian ama emem oro ẹkenyenede mbuọtidem ke Abasi? Ọtọn̄ọde ke isua 1919, ẹma ẹtọn̄ọ nditan̄ mmọemi mbok ke n̄kan̄ Edidem oro, Christ Jesus.
Mmọ ẹto kpukpru ikpehe ekondo, akpa nsụhọ ke otu owo 144,000 emi ẹyetde aran, ẹmi ẹmekde ke ofụri isua ikie eke eyo Christian emi. Mmọemi ẹdidi ‘mme andisan̄a ye Christ nnyene udeme’ ke Obio Ubọn̄ esie eke heaven. (Rome 8:17) Prọfet Abasi etịn̄ ọnọ mmọemi ete: “Kûfehe, koro ami ndude ye afo: nyeda ubon fo ke edem usiahautịn ndi, nyetan̄ fi ke edem usoputịn mbon: nyedọhọ edem edere, nte, Yak nọ: nyedọhọ usụk, nte, Kûbaha: da nditọiren mi ke anyan idụt di, ye nditọiban mi ke utịt ererimbot; kpa kpukpru mmọ eke ẹkerede enyịn̄ mi: ndien mmanam enye mban̄a ubọn̄ mi, mbot enye, n̄kọm mmanam enye.”—Isaiah 43:5-7.
Edi ikụreke ke oro! Akpan akpan ọtọn̄ọde ke mme iduọkisua 1930, ẹma ẹtọn̄ọ nditan̄ akwa otuowo, emi ẹsịmde ediwak miliọn idahaemi, mbok. Mmọemi ẹdi “erọn̄” ẹmi Jesus eketịn̄de aban̄a ke Matthew 25:31-46. Ukem nte nsụhọ oro ẹyetde aran ẹmi ẹkebemde mmọ iso, mmọemi “ẹdinyene mbuọtidem” (NW) ke Enyeemi ọdọhọde ete: ‘Mbufo ẹdi ntiense mi, ndien ami ndi Abasi.’ (Isaiah 43:10-12) Editan̄ akwa otuowo emi mbok ke akaiso n̄ko ‘ke edem usiahautịn ye ke edem usoputịn, ke edem edere ye edem usụk, ye ke ofụri isọn̄.’
Ke ẹtan̄ mme erọn̄ ẹmi ẹdide mme ama emem ẹdian ke ebuana nditọete ofụri ererimbot. Mmọ ẹsem ediwak nsio nsio usem ke idụt 231 oro mmọ ẹdụn̄de. Edi mmọ ẹdiana kiet ke n̄kan̄ eke spirit ke ndikpep “edisana usem” (NW) etop Obio Ubọn̄ ke Bible, “man kpukpru mmọ ẹkot enyịn̄ Jehovah, man ẹnam n̄kpọ ẹnọ enye ke esịt kiet.” (Zephaniah 3:9) Edidianakiet mmọ ke se ẹnịmde ke akpanikọ, uduak, ye edinam ọnọ utịbe utịbe ikọ ntiense nte ke Edem Usiahautịn osobo ye Edem Usoputịn ke akpanikọ, ọkọrọ ye mme owo ke kpukpru ebiet eken, man ẹnam n̄kpọ ẹnyụn̄ ẹtoro Ọbọn̄ Jehovah Andikara.
Ke ndusụk idụt editan̄ mbok emi ke ada itie ke ata n̄wọrọnda usụn̄, nte mme ntọt ẹtienede mi ẹdiwụtde.