Mme Enyene-Efịk Christian Eke Britain

Se isụhọrede ikan mbahade 10 eke ikie ke otu mbon Britain miliọn 56 ẹdi mme enyene-ifịk Christian idahaemi, nte ekemde ye The Economist. Ke Sunday nte akam esidide, se ikpride ikan owo miliọn inan̄ ẹsidụk ederi ke ufọkabasi. Ke otu mmọemi, owo miliọn 1.1 kpọt ẹdi mbon Anglican. Kpa ye oro ekikere oro nte ke owo ifiọkke m̀mê Abasi odu m̀mê idụhe atarade, nte ededi, Ufọkabasi England ke akaiso ke idaha esie oro ẹma ẹkesọn̄ọ ẹwụk nte ido ukpono Idụt. Magazine mbụk n̄kpọntịbe oro ẹkesiakde do ọdọhọ ete ke “Britain idịghe n̄kaowo emi ẹdide Christian ke ediwak isua edi enye esịn ndinyịme ye ekikere oro nte ke owo ifiọkke m̀mê Abasi odu m̀mê idụhe, akpan akpan ke ntak ndịk.” Eyịghe idụhe mme ebre mbre ukaraidem eyomfịn ye n̄wedmbụk n̄kpọntịbe ẹdọhọde ẹbọ Ufọkabasi ifet oro enye enyenede, ẹsịbe ebuana Ufọkabasi ye Ukara ẹfep.

Walter Bagehot, ewetn̄wed eke ọyọhọ isua ikie-19 ke The Economist ekeseme ete, “Mme owo oro ẹnen̄erede ẹdi eke ererimbot, ẹmi ẹdọhọde nte idide Christian, edi ndiọkn̄kan mme owo.” Edi ke akpa isua ikie E.N., Jesus Christ ama ọdọhọ ke mme mbet esie ‘idịghe eke ererimbot, kpa nte enye mîkedịghe eke ererimbot.’ (John 17:16) Nte ededi, enye okosio mmọ ọdọn̄ ke ererimbot ndikwọrọ mban̄a Obio Ubọn̄ Abasi. Kpasụk ntre mfịn, ẹtịm ẹdiọn̄ọ Mme Ntiense Jehovah ke ofụri ererimbot ke ndikwọrọ ikọ ifịk ifịk “an̄wan̄wa . . . [ye] ke ufọk ke ufọk.”—Utom 20:20.

Ke ẹmende ẹdomo ye mbon Anglican, Mme Ntiense 126,173 ke Britain ẹdi esisịt ke ibat. Edi mmọ ẹsisịn n̄kpọ nte hour 20 ke ọfiọn̄ ndidụk mme mbonoesop Christian. N̄ko-n̄ko, ke 1992 Ntiense kiet kiet ama esịn hour 16 efen efen ke ẹbaharede ukem ukem ke ọfiọn̄ ndikwọrọ eti mbụk Obio Ubọn̄ Abasi nnọ mbon en̄wen, kpa ukara oro ediwụkde edinen obufa ererimbot ke mîbịghike. (Matthew 24:14; 2 Peter 3:13) Ini efen oro Mme Ntiense Jehovah ẹdide ufọk fo, nte afo eyekpan̄ utọn̄ ke in̄wan̄în̄wan̄ etop mmọ onyụn̄ okụt se idide ntak ifịk oro mmọ ẹsịnde?