Ntak Amade Mbọhọidụn̄ Fo-o?

NSINSI uwem ọkọn̄ọ ke ima oro nnyịn inyenede inọ Abasi ye mbọhọidụn̄. Ẹketịn̄ akpan n̄kpọ oro ke nneme oro akadade itie ke se ikperede ndisịm isua 2,000 ẹmi ẹkebede.

Owo Jew emi ọkọfiọkde Ibet Moses ama obụp Jesus Christ ete: “Ndinam nso man nnyene nsinsi uwem?” Jesus ama ọbọrọ ete: “Ẹwewet didie ke ibet? Okot didie?” Ke okotde oto Ibet, eren oro ama ọdọhọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri odudu fo, ye ke ofụri ekikere fo; nyụn̄ ma mbọhọidụn̄ fo nte idemfo.” Jesus ama ọdọhọ ete, “Omotịm ọbọrọ: nam ntre, ndien eyedu uwem.”—Luke 10:25-28.

Do, owo oro okobụpde Jesus mbụme ama obụp ete: “Anie edi mbọhọidụn̄ mi nan̄a?” Utu ke ndibọrọ nnennen nnennen, Jesus ama ọnọ mbụk uwụtn̄kpọ aban̄ade owo Jew emi ẹkewode, ẹmiade, ẹnyụn̄ ẹkpọn̄de enye do ekpere n̄kpa. Mbon Jew iba ẹma ẹsan̄a ẹdi—akpa oku ndien ekem owo Levite. Mmọ mbiba ẹma ẹkụt idaha oro ekemmọ owo Jew okodude edi ikanamke n̄kpọ ndomokiet ndin̄wam enye. Ekem owo Samaria ama asan̄a edi. Ke mbọm onụkde, enye ama ọbọp unan owo Jew oro ẹkenọde unan do, ada enye aka ke ufọkisen, onyụn̄ anam ndutịm ọnọ n̄kaiso edise enye enyịn.

Jesus ama obụp owo oro okobụpde enye mbụme ete: “Ke otu owo ita oro, ese ete anie edi mbọhọidụn̄ owo emi ọkọduọde ke otu mbon n̄wo?” Nte an̄wan̄ade, ekedi owo Samaria oro okokopde mbọm. Jesus ke ntem ama owụt ete ke ata ima mbọhọidụn̄ esikan mme ubiọn̄ọ ẹtode orụk.—Luke 10:29-37.

Unana Ima Mbọhọidụn̄

Mfịn usua ke akaiso odu ke ufọt mme owo ẹtode nsio nsio orụk. Ke uwụtn̄kpọ, ke ndondo emi mbon Nazi eyomfịn ke Germany ẹma ẹmenede eren kiet ẹtọ ke isọn̄ ẹnyụn̄ ẹdịghi enye ke ikpọ ndodobi ikpaukot mmọ, ẹkperede ndibụn̄ ofụri akpatara n̄kan̄ esie. Mmọ ndien ẹma ẹmen ata ọkpọsọn̄ mmịn ẹtop ẹduọk enye ke idem ẹnyụn̄ ẹkịm ikan̄ ẹta enye. Ẹkenam owo emi ẹkekpọn̄de ẹnịm ndikpa do n̄kpọ emi koro ẹkekerede ẹte ke enye ekedi owo Jew. Ke n̄kpọntịbe efen, ẹma ẹduọk bọm oro asakde ikan̄ ke ufọk kiet oro ekperede Hamburg, atade amanaisọn̄ mbon Turkey ita owot—kiet ke otu mmọ ekedi eyenan̄wan isua duop.

Ke mme idụt ẹnamde se ẹkotde Balkans ye ata nsannsan edem usiahautịn, mme ekọn̄ orụk ye orụk ẹma ẹda uwem ediwak tọsịn owo. Mmọ eken ẹma ẹkpan̄a ke mme ntuaha oro ẹkedude ke ufọt mme owo oro ẹnyenede nsio nsio idaha ke uwem ke Bangladesh, India, ye Pakistan. Ndien ke Africa, mme en̄wan ke ufọt ekpụk ye ekpụk ye eke orụk ye orụk ẹma ẹda uwem mmọ en̄wen n̄ko.

Ata ediwak owo ẹmekop ndịk ẹban̄a utọ afai oro idinyụn̄ inamke n̄kpọ ndomokiet ndinọmọ mbọhọidụn̄ mmọ. Ke akpanikọ, ikpọ ntịme ke Germany ẹmebiom afai eke orụk do ikpe. Edi, The New Encyclopædia Britannica ọdọhọ ete: “Mme andibuana ke se ikperede ndidi kpukpru ido edinam ke ererimbot ẹda usụn̄uwem mmọ nte enyeoro ọfọnde akan idem eke n̄kpet n̄kpet mbọhọidụn̄ mmọ.” Mme utọ ekikere oro ẹbọbiọn̄ọ ima mbọhọidụn̄. Nte ẹkeme ndinam n̄kpọ ndomokiet mban̄a emi, akpan akpan sia Jesus ọkọdọhọde ke uwem ọkọn̄ọ ke ima ẹnyenede ẹnọ Abasi ye mbọhọidụn̄?

[Ebiet Ẹdade Ndise Ẹto ke page 2]

Ikpaedem: Jules Pelcog/Die Heilige Schrift

[Ebiet Ẹdade Ndise Ẹto ke page 3]

Eti Owo Samaria/The Doré Bible Illustrations/Dover Publications, Inc.