Mme Mbụme Ẹtode Mme Andikot

Sia mme Christian mîdaha okụk imia ata, nte mmọ ẹkeme ndibọ tiket m̀mê ndibuana ke edinam edisịn afia emi mmọ ẹkemede ndibọ utịp?

Emi edi mbụme oro ẹsidahade ada ke ini ke ini, ntre ẹma ẹneneme ẹban̄a enye ke mme n̄wed nnyịn. Ke ndusụk usem, nnyịn imenyene mme index inọ mme n̄wed nnyịn, utọ nte Watch Tower Publications Index 1930-1985 (ye efen ebietde emi oro edide 1986-1990). Edieke Christian enyenede mme utọ index ẹmi ke usem esie, ẹmi ẹkeme ndinyene ufọn ata etieti ke ndikụt mme ọnọ-uyụhọ ibọrọ usọp usọp.

Mbụme oro ẹbụpde ke enyọn̄ emi edi uwụtn̄kpọ kiet. Ke esede Index eke 1930-1985 ke idak ibuotikọ “Questions From Readers” (Mme Mbụme Ẹtode Mme Andikot), eyekụt ekpri ibuotikọ oro “‘drawings,’ may Christian accept ticket for?” (edinam edisịn afia, nte Christian ekeme ndibọ tiket?) Ẹda andikot ẹka ikpehe “Mme Mbụme Ẹtode Mme Andikot” ke Enyọn̄-Ukpeme (Ikọmbakara) eke February 15, 1973, page 127.a Ediwak Ntiense ẹnyene eboho (m̀mê mme nsiondi kiet kiet) eke Enyọn̄-Ukpeme eke 1973, mîdịghe ẹkeme ndikụt enye ke itie ubonn̄wed ke ediwak Ufọkmbono Obio Ubọn̄.

Nneme emi ẹkemịn̄de ke 1973 ama osio owụt nte ke mme Christian nte enende ẹsifep ndibre nsa m̀mê edinam edisịn afia oro abuanade edikpe okụk ke mfọniso (utọ nte mme tiket raffle) m̀mê ndida okụk mbre nsa man ẹbọ ndusụk utịp. Nditịn̄ in̄wan̄în̄wan̄, nnyịn ifefep mbre mfọniso, emi ke akpanikọ edide ediwụt edu idiọkitọn̄.—1 Corinth 5:11; 6:10; Ephesus 4:19; 5:3, 5.

Ufọkurua m̀mê itie mbubehe, nte ededi, ekeme ndikama edinam edisịn afia nte usụn̄ edisuan etop n̄kpọurua. N̄kukụre se owo enyenede ndinam edi ndinọ enyịn̄ esie mîdịghe ọnọ babru m̀mê tiket, ye unana edidep n̄kpọ ndomokiet. Edinam edisịn afia emi edi sụk ubak ndutịm usuanetop n̄kpọurua; enye edi usụn̄ unana asari ndida mbiere m̀mê anie ke ẹdinọ utịp m̀mê mme utịp. Ndusụk Christian ẹkeme ndikere nte ke mmimọ imekeme ndibọ utịp oro ẹnọde ke edinam edisịn afia oro mîkabuanake mbre mfọniso, kpa nte mmimọ ikemede ndibọ n̄kpọ mfọn m̀mê mme enọ efen oro itie mbubehe m̀mê ufọkurua ekemede ndinọ ke ndutịm usuanetop n̄kpọurua esie.

Nte ededi, ndusụk Christian ẹfep n̄kpọ ekededi eke etiede ntem, sia mîyomke ndinam mbon efen ẹtuak ukot ẹduọn̄ọ m̀mê ndinam mmọ efen ẹnyene eyịghe ẹnyụn̄ ẹyomde n̄ko ndifehe n̄kpọn̄ n̄kpọ etabi ekededi ndibuọt idem ke inua-okot Abasi Mfọniso. Nte Isaiah 65:11 (NW) owụtde, mme asan̄autom Abasi idianke idemmọ ye “abasi Mfọniso” m̀mê “abasi Akan̄a.” Mmọ ẹkeme n̄ko ndikere nte ke mmimọ iyomke ndidi ubak usuanetop ekededi oro ẹkemede ndiyom mme andikan ẹbuana ke esịt. Mbon oro ẹkerede n̄kpọ ke usụn̄ emi ke akpanikọ ikpenyeneke ndikụt ndudue nnọ Christian m̀mê mme Christian ẹmi ubieresịt mmọ ayakde ẹbuana ke mme utọ edisịn afia oro.—Men Rome 14:1-4 domo.

[Mme Ikọ idakisọn̄]