“Mbemiso Ikpọ Obot”
“AFO edi ebietidụn̄ nnyịn ke ofụri emana. Mbemiso ikpọ obot ẹkemanade m̀mê afo akanamde isọn̄ ye ererimbot, toto ke nsinsi sịm nsinsi afo edi Abasi.” (Psalm 90:1, 2, New International Version) Ẹketịn̄ mme ikọ oro ẹban̄a Andibot nnyịn, ndien mmọ ẹnọ ndọn̄esịt didie ntem—akpan akpan mfịn, emi etiede nte baba n̄kpọ kiet inyeneke iwụk!
Ke idaha ndutịm uforo oro osụk ataharede, ibat ibat owo ẹnyene mbuọtidem ẹban̄a ini iso. Enyene-ndịk n̄kọri ke ubiatibet ye uda n̄kpọsọn̄ ibọk ke idiọk usụn̄ ẹmekpụhọde ndusụk ikpọ obio esịn ke iso ekọn̄. Idem n̄kaowo oro ebịghide ke ediwak emana do, kpa ubon, ke eten̄. Nnyịn imokop mme utọ esen esen n̄kpọ nte mme ubon idan̄ ukem uduot. Mme ubon oro ete m̀mê eka ikpọn̄ esede enyịn ke ọkọri, ye ete m̀mê eka awakde ndiyọ ọkpọsọn̄ mfụhọ. Ẹmetịmede emem ediwak ubon ebe ke mme utọ oburobụt edinam nte edimia nsan̄andọ ye edikama eyen ke idiọk usụn̄.
Anie edida nnyịn usụn̄ ebe n̄kpọsọn̄ ini ẹmi? Ọfọn, owo inanake item ẹtode mme ekpep n̄kpọ mban̄a ekikere, mme ekpep n̄wed, ye mbon eken, edi ekese mmọ ẹsinyene ntuaha. Ye mme idụt oro mîkodụhe ke idak ukara Communist, Dr. Benjamin Spock ekedi n̄wọrọnda ọnọitem ke n̄kpọ aban̄ade unọ nditọ ukpep. Ekem enye ama onyịme ete ke item esie ikenenke!
Owụt ọniọn̄ didie ntem akan ndinyene Abasi nte “ebietidụn̄” nnyịn! Ke ntịme ntịme ini ẹmi, enye edi akwa itiat nsọn̄ọnda, odude “toto ke nsinsi sịm nsinsi.” Enye ama etịn̄ aban̄a idemesie ebe ke prọfet Malachi ete: “Ami [ndi] Jehovah, n̄kpụhọkede.” (Malachi 3:6) Mme idaha oro Abasi onịmde, nte ẹwetde ke Bible, ẹdi se ẹberide edem ọyọhọ ọyọhọ. Enye ama odu “mbemiso ikpọ obot,” ndien item esie, oro ẹkemede ndikụt ke Edisana N̄wed Abasi, ọkọn̄ọ ke nsinsi ọniọn̄ esie. Emi edi se nnyịn inen̄erede iyom kaban̄a inemesịt ye edikụt unen.
Edi se iwụtde ifiọk, ndien, ndinyene mbuọtidem ke Ikọ Abasi, kpa Bible. Kpep enye man ọbọ ufọn oto ọniọn̄ Abasi. Nịm se afo ekpepde ke akpanikọ, nyụn̄ yak enye edi un̄wana oro adade fi usụn̄ osụhọde ke usụn̄ uwem. (Psalm 119:105) Mbon oro ẹnamde ntre kpọt ẹnyene ntak ndinyene mbuọtidem ke ini iso ẹnyụn̄ ẹnyene ata emem eke ekikere.