Mme Isụn̄utom eke Micronesia

OKPOSỤKEDI akwa Inyan̄ibom Pacific emi etiede nte inyeneke utịt oro anyanarede ana abaharede, mme isụn̄utom eke Micronesia ẹsisụk ẹn̄wana ẹsop idem kpukpru isua ẹnọ edinam “edidianakiet ubon.” Ndien ke m̀mọ̀n̄ ke kpukpru mme ọkwọrọikọ ẹmi ẹtode mme nsannsan isuo mi ẹsisop idem? Nte odotde, ke ebiet emi ukara n̄kann̄kụk okotde Efak Jehovah—kpa adres ọfis n̄kọk itieutom ke Guam emi mmọ ẹnamde utom ke idak esie.

Ke June 1992, isụn̄utom 56 ẹma ẹsop idem ke n̄kọk itieutom ndidụk Mbono District “Mme Ọnọ Un̄wana.” Imam ye inem inem nneme idatesịt ama ọyọhọ kpukpru ebiet nte mmọ ẹkefiakde edemede itie ufan eke anyanini ẹnyụn̄ ẹnamde mbufa ufan. Nte esidide kpukpru ini, mmọ ẹma ẹbahade idemmọ ẹda ke mme udịghi-ukot udọk Ufọkmbono Obio Ubọn̄ ndisio foto ndien ekem ẹsụhọde ẹtetie ke nnyan okpokoro udia ita ndibuana udia isụn̄utom ofụri isua ọtọkiet, emi Albert Schroeder, owo Otu Ukara akadade usụn̄ isua emi.

Ye ediwak isụn̄utom ẹmi, edinam usop idem eke kpukpru isua emi ke Guam edi n̄kukụre ifet ẹnyenede ndikpọn̄ n̄kpri ufọk mmọ ke mme obio oro ẹfiopde. Ndien mmọemi ẹdi ata n̄kpri. Isuo Ebeye, kiet ke otu mme Isuo Marshall, okpon ke hectare 32 kpọt. Ufọkidụn̄ isụn̄utom ke Majuro ke mme isuo Marshall ye eke Kiribati ke mme Isuo Gilbert kpukpru ẹdu ke anyan, n̄kpafaha obot oro ọwọrọde ada emi ekpride akan mbahade iba itiat. Ntre mme isụn̄utom ẹsinam ata aduai-owo idem isan̄ mmọ ẹka Guam.

Ke adan̄aemi ekikere edikwọrọ ikọ ke ata nsannsan isuo obio ẹmi ẹfiopde etiede inem inem, ke ata idem n̄kpọ enye edi n̄kpọ-ata oro ibat ibat owo ẹben̄ede idem ndisobo. Nte enemde, owo 7 kpọt ke otu isụn̄utom 56 oro ẹto Watchtower Bible School of Gilead. N̄wakn̄kan mmọ ẹto Hawaii mîdịghe Philippines ke ebiet emi mmọ ẹkedide mme asan̄autom asiakusụn̄ ẹmi ẹma ẹkememehe ye uwem ke mme obio ẹmi ẹfiopde, ndien mmọ ẹketo mme obio emana mmọ nnennen ẹbe ẹka itieutom isụn̄utom mmọ.

Ke ntak emi mme isuo Micronesia ẹdude ẹkpere ufọt ererimbot, mme isụn̄utom ẹsin̄wana ye ọkpọsọn̄ ufiop ye ndodobi ofụm man ẹda eti mbụk ẹsọk mme andidụn̄ do. Nneme ekeme ndikam ndi n̄kpọ-ata n̄kan. Isuo kiet kiet m̀mê otu isuo ẹnyene usem ekemmọ—ndusụk ẹsọn̄de etieti tutu owo ikam ikemeke ndiwet ke n̄wed ukabadeikọ—ndien ẹkeme ndida ediwak isua mbemiso obufa owo ekeme ndisem udọn udọn. Man ẹn̄wam mme owo ke isuo nsio nsio ido edinam emi ẹdiọn̄ọ Bible, n̄kọk itieutom Guam esimịn̄ n̄wed ke usem 11, usem 9 ke otu ẹmi ẹdi se ẹsemde ke Micronesia ikpọn̄îkpọn̄.

Ndusụk isuo ẹdu ata nsannsan tutu eyedi se ẹkemede ndida ubom kpọt nsịm mmọ. Ufọkidụn̄ isụn̄utom ke isuo Tol ke Chuuk (Truk) odu ke utọ isuo oro, ndien mme isụn̄utom do esiberi edem ke odudu otode utịn ndinyene ikan̄ elektrik ke hour ifan̄ kpọt ke usen kiet kiet.

Ke ofụri ofụri, ufọkidụn̄ isụn̄utom 14 ẹdu ke ofụri Micronesia, emi okponde nte ikpehe isọn̄ oro ekperede ndidi ukem ye akamba ikpehe isọn̄ United States. Ke se iwakde ikan owo 400,000 ẹmi ẹdụn̄de ke ikpehe emi, owo 1,000 ẹdi mme asuanetop eti mbụk, ẹtịmde ẹdọn̄ ke esop 20 ye otu 3 oro ẹdude nsannsan.

Ke adan̄aemi mbio Micronesia ke ofụri ofụri ẹtiede ufan ufan, mme ido edinam ido ukpono n̄kann̄kụk ye mfịghe ubon ẹsinam ediwak owo ẹnana udọn̄ ke ndinyịme akpanikọ Obio Ubọn̄ Abasi. Ntre okposụkedi utom ukwọrọikọ enyenede uforo (mme asuanetop Obio Ubọn̄ 1,000 oro ẹnịm se ibede ukpepn̄kpọ Bible 2,000), owo ẹsụk ẹdi ibat ibat ke ndusụk esop ye mme otu. Ke uwụtn̄kpọ, mme asuanetop 5 kpọt ẹdu ke isuo Tinian, mme asuanetop 7 kpọt ke isuo Nauru, ndien mme esop ke Yap, Kosrae, ye Rota kiet kiet ẹnyene se mîwakke ikan mme asuanetop 40. Edi, ndusụk isụn̄utom ke ẹsụk ẹdu ke utom mmọ ke se ibede isua 20. Se itịmde idot, ofụri isụn̄utom itiokiet ẹmi ẹdude ke isuo Belau ẹdu do ke nsụhọde n̄kaha isua 12.

Ye mbon oro ẹyọde, utịp omokpon. Mme ifet ẹdu ke usen ke usen ndidara mban̄a ndiye n̄kpọ obot Jehovah. Nti isuo Micronesia ẹmi ẹdu ntomo ntomo nte n̄kpri awawa n̄kpọuto ẹmi ẹsuanade ẹyọhọ awawa mmọn̄ inyan̄ibom Pacific. Esụkmbehe ye mme obom utatan oro owo mîsiwakke ẹmi ẹniọn̄de ke ediwak itiat ẹyọhọde ye ndiye uduot iyak ẹsidụri mme aka uyere ye mme aka ewọk ndinam isan̄ n̄ka ndusụk mfọnn̄kan itie ewọk ke ererimbot. Ndien ke utịt usen kiet kiet, ediye ndise oro utịn osopde esidu ke akpa inyan̄ibom.

N̄kponn̄kan utịp, nte ededi, edi ifet edinam n̄kpọ Jehovah ebe ke ndisian mmọ en̄wen mban̄a mme utịbe utịbe un̄wọn̄ọ esie kaban̄a ini iso. Ke ntak emi mme isụn̄utom Micronesia ẹkade iso ndinyanade mbịne utịp oro, mmọ ke ẹsu mme ikọ eke Isaiah 42:12: “Ẹyenịm ubọn̄ ẹnọ Jehovah, ẹnyụn̄ ẹbụk itoro esie ke mme isuo.”

[Ndise obio/Ndise ke page 31]

(Ama oyom ndikụt nte enye enen̄erede etie, se n̄wed)

Barrigada, Guam

Santa Rita, Guam

Koror, Belau

Dublon, Chuuk (Truk)

Moen, Chuuk (Truk)

Faro Tol, Chuuk (Truk)

Tarawa, Kiribati

Lelu, Kosrae

Ebeye

Mme Isuo Marshall

Majuro

Kolonia, Pohnpei

Songsong, Rota

Chalan Kanoa, Saipan

Yap

MICRONESIA

MELANESIA

MME ISUO CAROLINE

INYAN̄IBOM PACIFIC

PHILIPPINES

NEW GUINEA

EQUATOR

[Ndise]

Mme isụn̄utom ẹsop idem ke Guam, June 1992