Ntọt M’ọkwọrọ Obio Ubọn̄
Uwọrọ-ufụn Eke Spirit Ke Colombia
TOTO ke ini mme andikara ẹdide mbon Spain, Ido Ukpono Catholic ama enyene ọkpọsọn̄ odudu eke ido ukpono ke South America. Ke Colombia enye ekedi ido ukpono ofụri Idụt ke anyanini. Ke isua 105 ẹmi ẹkebede, Ukara pope ama odiomi ediomi ye ukara Colombia oro ekekpemede ufọkederi onyụn̄ ọnọde enye san̄asan̄a ifet ke n̄kan̄ ukpep n̄wed ye ke ndọ.
Ke December 1990 mbon Colombia ẹma ẹmek n̄ka kiet nditịm obufa mbet, emi ẹkekụrede ke ufọt ufọt 1991. Obufa mbet oro okpụhọde idaha ido ukpono ke Colombia. Kpukpru ido ukpono idahaemi ẹnyene ukem ukem unen nte ekemde ye ibet, ndien owo ikemeke ndinyenyịk nditọwọn̄ ndibọ ukpepn̄kpọ ido ukpono ke ufọkn̄wed. Ye mme ukpụhọde ẹmi ke mbet ke ekikere, oyom ẹfiak ẹnen̄ede ediomi oro ẹkenyenede ye Ukara pope oro.
Akwa ifụre oro ido ukpono ẹnyenede mi eyesụhọde odudu oro Ufọkederi Catholic enyenede, anamde edi mmemmem n̄kpọ ọnọ mbon esịt akpanikọ ndinyene ifiọk Bible nnyụn̄ nnyene uwọrọ-ufụn eke spirit.
Ke ẹdade ẹkụt uwọrọ-ufụn eke spirit emi, Mme Ntiense Jehovah 51,000 ẹmi ẹdude ke idụt oro ke ẹnam ndutịm man ẹse ẹban̄a mme oyom ubọhọ eke spirit ẹmi. Obufa n̄kọk itieutom mmọ ye mme n̄kpọutom oro ẹtatde, ẹmi ẹsịnede ukwak umịn̄n̄wed ke ọyọhọ uduot, ke ekpere ndikụre ke esịt esie. Ẹma ẹnọ mme akpan asiakusụn̄ eke ibio ini ẹka n̄kpri obio ndikoyom mme erọn̄ Jehovah oro ẹkesopde ndien ẹmenam utịbe utịbe utom unọ ukpep Bible. Ke obio 63, emi kiet kiet enyenede n̄kpọ nte mme andidụn̄ 10,000, ẹma ẹtọn̄ọ mbufa esop ye mme otu 47.
Nte spirit Jehovah akade iso ndinụk mbon esịt akpanikọ, ediwak uyen n̄ko ke ẹyere ikot. N̄wed Questions Young People Ask—Answers That Work omowụt nte idide ata eti n̄kpọ un̄wam inọ utọ n̄kparawa owo oro ye mme ete ye eka mmọ. Ke adan̄aemi asan̄ade to ke enyịnusụn̄ sịm enyịnusụn̄, Ntiense kiet ama osobo ye eren kiet emi ama okokot ndusụk ikpehe n̄wed emi, kpa idem kiet emi mbọhọidụn̄ esie ọkọnọde enye. Ata mbufiọk oro n̄wed emi owụtde ke ndineme mme mfịna ubon ama otụk eren emi ke idem. Ibuot 4, “Why Did Dad and Mom Split Up?” [Ntak Emi Papa ye Mama Ẹdianarede Ẹtie] ama otụk enye ke idem akpan akpan, sia enye ye n̄wan esie ẹkedude ke idaha ndidianade ntie. Eren emi ama ọdọhọ ete ke n̄wed emi ama anyan̄a enye osio ke akpan n̄kpọ mmọn̄eyet. Idahaemi enye ye ubon esie ke ẹkpep Bible ye Mme Ntiense Jehovah ke ẹnyụn̄ ẹdụk kpukpru mbonoesop. Mmọ ẹnen̄ede ẹwụt esịtekọm ẹban̄a ata mbufiọk oro Jehovah ọnọde ebe ke Bible ye esop esie.
Ifiọkutom emi anam an̄wan̄a uwọrọ-ufụn eke spirit oro adade itie ke Colombia nte Mme Ntiense Jehovah ẹn̄wamde mbon oro ẹkopde biọn̄ ke n̄kan̄ eke spirit ndikpep mban̄a mme utịbe utịbe uduak Jehovah ye obufa ererimbot esie, emi ekperede kemi.—2 Peter 3:13.