Mme Mbụme Ẹtode Mme Andikot

Nte Matthew 28:17 ọwọrọ nte ke ndusụk mme apostle ẹma ẹkaiso ndiyịk ke anyanini ke Jesus oro ẹnamde eset ama okowụt mmọ idem?

Baba, iyomke nnyịn isịm utọ ubiere oro ito Matthew 28:16, 17, emi ọdọhọde ete: “Mbet duopekiet ẹka ke Galilee ke obot oro Jesus okonịmde ọnọ mmọ. Ndien ke ini mmọ ẹkụtde Enye, ẹtuak ibuot ẹnọ Enye: edi ndusụk mmọ ẹyịk.”

Jesus ke ata mbemiso ama odomo ndin̄wam mme mbet ndidiọn̄ọ nte ke “Imọ inyene ndika ke Jerusalem n̄kokụt ediwak ukụt ke ubọk mbiowo ye ikpọ oku ye mme scribe; mmọ ẹyenyụn̄ ẹwot Imọ, ndien ke ọyọhọ usen ita Abasi eyenam Imọ iset.” (Matthew 16:21) Nte ededi, edimụm ye ediwot enye ama anam mme mbet ẹkụt edikpu ẹnyụn̄ ẹdu ke editịmede esịt. Etie nte ediset ke n̄kpa esie ekedi n̄kpọ n̄kpaidem. Ndien ke ini enye okowụtde idemesie ke uduot eke owo, ke akpa “idatesịt [ika]yakke mmọ ẹnịm ke akpanikọ.” (Luke 24:36-41) Ediwụt oro enye okowụtde idemesie ke ama ekeset, nte ededi, ama an̄wam mme n̄kpet n̄kpet anditiene enye ndinyịme akpanikọ aban̄ade ediset ke n̄kpa esie; idem apostle Thomas ama onịm ke akpanikọ nte ke ẹma ẹnam Jesus eset.—John 20:24-29.

Ke oro ebede mme anam-akpanikọ apostle 11 ẹma “ẹka ke Galilee.” (Matthew 28:16; John 21:1) Ke adan̄aemi mmọ ẹdude do, Jesus “ayarade idem ini kiet owụt nditọete ẹmi ẹwakde ẹbe owo ikie ition.” (1 Corinth 15:6) Edi ke idaha enyeemi ke Matthew 28:17 etịn̄ nte ke “ndusụk mmọ [ẹma] ẹyịk.” Ntre ekeme ndidi mmọ oro ẹkesụk ẹnyenede eyịghe ẹma ẹdu ke otu mme anditiene 500 oro.

Tịmfiọk inem inem utịn̄ikọ oro C. T. Russell, akpa etieibuot Watch Tower Society, eketịn̄de:

“Nnyịn ikemeke ndikere nte owụtde ifiọk nte ke mbon oro ẹkeyịkde ẹkedi kiet ke otu mme apostle duopekiet, koro mmọ ẹma ẹkop uyụhọ ọyọhọ ọyọhọ, ẹnen̄ede ẹnịm ke akpanikọ, ẹma ẹnyụn̄ ẹwụt ke idemmọ nte edide ntre ke mbemiso. Nnyịn ikere ite ke mmọ oro ẹkeyịkde anaedi ẹkedu ke otu ‘nditọete ikie ition’ ẹmi ẹkedude ke mbono emi ẹkemekde ẹnịm mi, emi mîkenyeneke ebuana ndomokiet ye enye toto nte enye ekeset, ndien ndusụk mmọ, nnyịn nte owụtde ifiọk imekeme ndidọhọ, ẹma ẹmem ke mbuọtidem ẹkan mme apostle ye mme n̄kpet n̄kpet ufan esie. Ikọ oro ‘ndusụk mmọ ẹyịk’ edi uyarade aban̄ade in̄wan̄în̄wan̄ n̄wetnnịm n̄kpọ eke mme Andiwet Gospel. Enye owụt nnyịn, n̄ko, nte ke mme anditiene Ọbọn̄ ikonịmke se ẹmama ke akpanikọ, edi utu ke oro ẹkesisasat ẹnyụn̄ ẹdomo mme uyarade oro ẹnọde ẹse, ndien ifịk adianade ye odudu ye edu n̄waidem mbon oro ẹkenịmde ke akpanikọ ọnọ nnyịn akpakịp uyarade ẹban̄ade edinịm ke akpanikọ oro mmọ ẹkenyenede ẹban̄a ediset ke n̄ka Ọbọn̄ nnyịn, ẹmi mmọ ukem nte nnyịn idiọn̄ọde nte edide ata akpan n̄kpọ ọnọ mbuọtidem oro nnyịn inyenede ke enye. Edieke mîkanamke Christ eset, mbuọtidem nnyịn ọwọrọ ikpîkpu, ndien nnyịn ke isụk idu ke mme idiọkn̄kpọ nnyịn.—1 Cor. 15:17.”—Zion’s Watch Tower and Herald of Christ’s Presence, May 1, 1901, page 152.

Nnyịn imekeme ndifiọk nto ikọ emi nte ke usụn̄ nte Matthew etịn̄de akpan n̄kpọ emi ọnọ nnyịn uyarade nte ke Bible edi akpanikọ ye se ẹkemede ndiberi edem. Edieke owo ọkpọnọde mbụk oro mîdịghe akpanikọ, enye okpoyom nditịn̄ mme akpan n̄kpọ oro edinamde mbụk oro enye otịbide edi etie nte akpanikọ; enye ekpekere ke ndikpọn̄ mme akpan n̄kpọ m̀mê se itiede nte akwa ubahade oro odude eyenam ẹyịk nsu esie. Nso kaban̄a Matthew?

Enye ikekereke nte ke obiomo imọ nditịn̄ ikọ esie oro nte ke “ndusụk mmọ [ẹma] ẹyịk” an̄wan̄a ke nde ke nde. Mme mbụk oro Mark, Luke, ye John ẹwetde itịn̄ke n̄kpọ ndomokiet iban̄a emi, ntem ikọ oro Matthew ekewetde ke ẹsiode ẹnịm san̄asan̄a ekeme nditie nte esịne mme apostle 11, emi enye ekedide kiet. Nte ededi, Matthew ọkọnọ ibio ibio utịn̄ikọ ye unana edinam an̄wan̄a. N̄kpọ nte isua 14 ke ukperedem, apostle Paul ama ewet n̄wed Akpa Corinth. Ke un̄wana ọyọhọ ntọt oro enye ọkọnọde ke 1 Corinth 15:6, nnyịn imekeme ndisịm ubiere oro etiede nte ke mbon oro ẹkeyịkde ikedịghe mme apostle edi ẹkedi mme mbet ke Galilee emi Jesus mîkowụtke mmọ idem kan̄a. Ntem, utịn̄ikọ Matthew oro nte ke “ndusụk mmọ [ẹma] ẹyịk” edi akpanikọ; enye enen̄ede enyene uyo anam-akpanikọ ewet n̄wed emi owụtde mbụk akpanikọ ye unana edinam ofụri ntọt an̄wan̄a ke nde ke nde.