Ndiyama Nte Mme Ọnọ Un̄wana ke Ererimbot

KE ERERIMBOT emi ukwan̄ ido uwem ye edu nnam-se-mmade ẹsabarede, mme ata Christian ke ofụri ererimbot ẹnyene ndidi ebiet emi un̄wana otode. Mmọ ẹnyene ndidi mme ọnọ un̄wana ke n̄kịm n̄kịm ererimbot. (Philippi 2:15) Ediwak tọsịn owo ke ẹnyịme ndinam emi nte mme asiakusụn̄, m̀mê mme ọkwọrọikọ uyụhọ-ini. Ediwak mmọ ẹmenam utom emi ke ediwak isua ndien ẹma ẹnyụn̄ ẹnọ mmọ utịp ke ndikụt mme owo eke kpukpru orụk ẹnamde mme ukpụhọde ke uwem mmọ ndikabade ndi mme ata mbet Jesus Christ.—Matthew 28:19.

Man ẹsịn udọn̄ ẹnọ mme asiakusụn̄ ẹmi ẹkaiso ke edisana utom emi ẹnyụn̄ ẹnam n̄kọri ke usọ ukpepn̄kpọ mmọ, Mme Ntiense Jehovah ẹmediomi Ufọkn̄wed Utom Usiakusụn̄. Enye edi ndutịm unọ ukpep a-Bible ebịghide ke usen duop emi ẹdiomide ndin̄wam mme asiakusụn̄ ke usụn̄ ita: ndisan̄a ye Jehovah nte mme anditiene Jesus Christ; ndikọri ima oro ẹnyenede ẹnọ ofụri otu nditọete; ndiyama nte mme ọnọ un̄wana ke ererimbot.

Ufọkn̄wed Usiakusụn̄ keCentral African Republic

Ke Bangui, kpa ibuot obio Central African Republic, nditọ ufọkn̄wed 48 ye mme andikpep 2 ẹma ẹsop idem ọtọkiet ke August eke 1991. Nditọ ufọkn̄wed oro ẹkenyene ndibọ mme item ye mme ekikere oro ẹkemede ndida nnam n̄kpọ kaban̄a utom mmọ. Nso ikedi n̄kpọ nduaidem ntre iban̄a otu nditọ ufọkn̄wed eke Bangui oro?

N̄kpọ kiet edi, owo 21 ke otu nditọ ufọkn̄wed oro ke ẹkesụk ẹka n̄wed. Ke adan̄aemi ẹdude ke ufọkn̄wed, mmọ ẹma ẹkeme ndidiomi ndutịm mmọ man ẹbuana ke utom ukwọrọikọ ofụri ini. Mmọ ẹma ẹda mme ọfiọn̄ oro mmọ ẹdude ke nduọkodudu, mme utịturua mmọ, ye mme uwemeyo ndikwọrọ ikọ nnyụn̄ n̄kpep mme owo n̄kpọ.

N̄kparawa owo ẹmi ẹma ẹkụt nte edide akpan n̄kpọ ndinam n̄kpọ Andibot mmọ idahaemi. (Ecclesiastes 12:1; men 1 Corinth 7:29 domo.) N̄wọrọnda edi akpanikọ oro nte ke owo 12 ke otu mmọ ẹkenyene mme ete ye eka oro mîdịghe mme andinịm ke akpanikọ. Ke ufọk mmọ ẹkedi n̄kukụre mbon oro ẹdude ke akpanikọ. N̄kparawa iren iba, ẹmi ẹdide ata nditọeka, ẹdi se ete mmọ ẹkebịnde osio ke ufọk ke ntak mbuọtidem mmọ. Ebe ye n̄wan ẹdide n̄kparawa owo ke esop ẹma ẹnyịme nditọiren ẹmi ẹdụn̄ ye mmọ.

N̄kpọ ama okpụhọde ke n̄kan̄ Michée ye Sulamithe Kaleb. Mmọ mbiba ẹdi mme asiakusụn̄ ndien mmọ n̄ko ke ẹka n̄wed, edi ete ye eka mmọ ẹdi Mme Ntiense Jehovah. Ke akpanikọ, ete mmọ ekedi eyen ufọkn̄wed ke ukem otu nditọ ufọkn̄wed oro!

Mme esop ke Bangui ẹma ẹtiene ẹbuana ke ufọkn̄wed oro n̄ko, edi ke isio isio usụn̄. Mmọ ẹma ẹse ẹban̄a mme n̄kpọ obụkidem oro ẹkeyomde, utọ nte udia. Ẹma ẹtịp okụk, ọkọrọ ye unen, sugar, edesi, ye manioc ẹnọ ndida nse mban̄a otu nditọ ufọkn̄wed oro.

Mme esop ẹkedude ẹkpere ẹma ẹnam ndutịm ẹnọ mbonutom utem udia man ẹtem mmemmem udia edi oro ekenemde. Central African Republic ọwọrọ etop ke ngunza, kpa udia oro kpukpru owo ẹmade. Nso ke ẹkama ẹtem? Ikọn̄ manioc, aran, oyịm, ediwak garlic, ukọkọk mbansan̄, ye edinyene ime ntem enye enen̄ede ebiet. Mbonutom emi kiet kiet ẹma ẹnyene san̄asan̄a usụn̄ eke idemmọ nte ẹtemde enye. Emi ama enyene akwa uforo; idụhe owo ndomokiet oro ekpesịnde ndidia.

Ke ọwọrọde ọkpọn̄ Bangui ẹma ẹnịm otu iba efen, kiet ke Bouar ndien kiet ke Bambari, anamde ofụri ibat nditọ ufọkn̄wed osịm 68. Ke ufan̄ isua iba oro ẹkebede, Central African Republic ama enyene n̄kọri ke ibat mme asiakusụn̄. Ke January 1992 mme asiakusụn̄ ofụri ini 149 ye mme akpan asiakusụn̄ 17 ẹkedu ọkọrọ ye mme asiakusụn̄ unọ un̄wam 78. Emi ama ada okosụn̄ọ ke n̄kọri utom ke ofụri idụt oro ye obufa n̄wakn̄kan ibat mme asuanetop, hour, mfiakn̄ka, ye mme ukpepn̄kpọ Bible. Ke ini ediwak mbonutom ẹdude, idọk enyene n̄kọri.—Isaiah 60:21, 22; Matthew 9:37, 38.

Nnyịn imọkọm Jehovah Abasi ke ndutịm ẹmi ye esop esie eke isọn̄ ke ndidiomi ufọkn̄wed emi. Mmọ ẹn̄wam nditọ ufọkn̄wed ye mme andikpep n̄ko ndiyama nte mme ọnọ un̄wana ke n̄kịm n̄kịm ererimbot emi.

[Ndise ke page 24]

Nditọ ufọkn̄wed 21 ke ufọkn̄wed usiakusụn̄ ẹmi ẹsụk ẹdude ke akamba ufọkn̄wed

[Ndise ke page 25]

Nditọiren iba ẹmi ẹkenyene ndikpọn̄ ufọk ke ntak akpanikọ