Ami Mma Nsụhọde Idem Nnyụn̄ N̄kop Inemesịt

KE 1970, ami n̄kedi owo isua 23 ke emana oro enyenede ọkpọsọn̄ udọn̄ ke uwọrọiso. Ke itieutom mi ke n̄ka use mban̄a n̄kpọisan̄ ke Ivrea, Italy, ẹma ẹnam mi akwa ewetn̄wed. Ami mma mbiere ndikabade ndi ọwọrọiso owo. Edi kpa ye oro ami mma nnen̄ede n̄kop mfụhọ ye idiọkesịt. Ntak-a?

Ebe mi ekesibiat ekese ini esie ke itie un̄wọn̄ mmịn ebrede nsa ye mme ufan esie, onyụn̄ ayak mi mbiom n̄wakn̄kan mbiomo ubon. Itie ebuana nnyịn ama ọtọn̄ọ nditahade. Nnyịn ima isitọhọ utọk ke ata n̄kpri n̄kpọ. Nte utịp, esịt mi ama ọyọhọ ye etikwo etikwo ekikere.

Ami mma nsidọhọ nte, ‘Baba owo kiet inyeneke udọn̄ ke idemfo. Mmọ n̄kukụre ẹyom ndida itie fo nnam ufọn nnọ idemmọ.’ Ami nyesian idemmi nte: ‘Ekeme ndidi Abasi idụhe koro edieke enye okpodude, enye ikpayakke utọ ekese ndutụhọ ye ukwan̄n̄kpọ ẹmi ẹdu. Uwem idịghe n̄kpọ ndomokiet ikan itọk n̄kpa.’ Ami n̄kọfiọkke ntak n̄kpọ ẹketiede ntre.

Ntọn̄ọ Ukpụhọde

Usen kiet ke 1977, owo iba ke otu Mme Ntiense Jehovah ẹma ẹkọn̄ usụn̄ufọk nnyịn. Ebe mi, Giancarlo, ama ọdọhọ mmọ ẹdụk ẹdi, ndien mmọ ẹma ẹbe ẹdụk ẹka akwaufọk ekenyene nneme. Uduak esie ekedi ndinam mmọ ẹkabade ẹdi mme andinịm edito ke unam mforo ke akpanikọ nte enye, edi mmọ ekedi mbon oro ẹkekpụhọrede ekikere esie!

Ikebịghike Giancarlo ama ọtọn̄ọ ndinam ukpụhọde n̄ko ke uwem esie. Enye ama akabade enyene ime akan, esịnde ini oro okponde akan ndidu ye ami ye eyenan̄wan nnyịn. Enye ama esidomo ndinyene nneme ye ami mban̄a mme n̄kpọ oro enye ekekpepde, edi ami kpukpru ini mma nsitre nneme oro ke uyat uyat ikọ.

Ekem usen kiet ke ini Mme Ntiense oro ẹkedide, ami mma nsụhọde ntetie nnyụn̄ nnen̄ede n̄kpan̄ utọn̄. Mmọ ẹma ẹneme ẹban̄a utịt editịm n̄kpọ emi ye Obio Ubọn̄ Abasi, Paradise isọn̄, ye ediset mme akpan̄kpa. Idem ama akpa mi! Ke okoneyo ita oro ẹketienede ami n̄kedehe idap! Ami mma nyom ndidiọn̄ọ ekese n̄kpọ, edi ntan̄idem ikayakke mi mbụp ebe mi mme mbụme. Ekem usen kiet enye ama ọsọn̄ọ ọdọhọ mi ete: “Mfịn emi afo ọmọn̄ akpan̄ utọn̄. Ami mmenyene mme ibọrọ nnọ kpukpru mbụme fo.” Ndien enye ama akam an̄wan̄a akpanikọ Bible ofụk mi.

Giancarlo ama asian mi ete ke Jehovah edi enyịn̄ Andibot, nte ke akpan edu Esie edi ima, nte ke Enye ọkọdọn̄ Eyen Esie edi nte ufak man nnyịn ikpenyene nsinsi uwem, ye nte ke ẹma ẹkesobo mme idiọkowo ke Armageddon, Jesus Christ eyenam mme akpan̄kpa ẹset ke ini Tọsịn Isua Ukara esie. Enye ama ọdọhọ ete ke mbon oro ẹdinamde ẹset ẹyekọri ẹsịm mfọnmma ke ekikere ye ikpọkidem ye nte ke mmọ ẹyenyene ifet ndidu uwem ke nsinsi ke isọn̄ ke Paradise.

Edem usen, ami mma nsan̄a ye ebe mi n̄ka Ufọkmbono Obio Ubọn̄ ke akpa ini. Ke oro ebede mma ndọhọ enye nte: “Mbon ẹmi ẹma kiet eken. Ami nyom ndisikaiso ndi mi koro mmọ ẹnen̄ede ẹkop inemesịt.” Ami mma ntọn̄ọ ndidụk mme mbonoesop kpukpru ini, ndien ẹma ẹnịm ukpepn̄kpọ Bible ye ami. Mma nsikere ekese mban̄a se n̄kekpepde ndien ikebịghike mma nnịm ke akpanikọ nte ke mmokụt ata ikọt Abasi. Ke 1979 ami ye ebe mi ima iyarade uyakidem nnyịn inọ Jehovah ke ndina baptism.

Utom Uyọhọ-Ini

Ekem ke mbono circuit ke isua oro, ẹma ẹnọ utịn̄ikọ ẹsịnde udọn̄ ẹnọ edidụk utom ukwọrọikọ uyọhọ-ini. Mma n̄kop nduaidem ndidụk utom oro, ndien mma n̄ka mbịne Jehovah ke akam mban̄a n̄kpọ emi. Edi ekem mma nyomo idịbi, ndien uduak mi ẹma ẹkpu. Ke ufan̄ isua inan̄ efen, nnyịn ima inyene nditọ ita. Iba ke otu mmọ, ke nsio nsio idaha, ẹma ẹduọ udọn̄ọ ubiomo ndo oro ekesịnde uwem ke itiendịk. Ye inemesịt, ke idaha kiet kiet, mmọ ẹma ẹfiak ẹnyene ọyọhọ nsọn̄idem.

Idahaemi mma n̄kere ke n̄kemeke ndisịk uduak mi kaban̄a utom uyọhọ-ini nnịm aba. Mma n̄kpọn̄ utom idịbi udia mi man ntịn̄ enyịn nse mme mbiomo mi nte n̄wanndọ ye eka. Ami ye ebe mi ima inam ndutịm ndidu uwem ke okụkọfiọn̄ owo kiet, emi ọwọrọde ndikpọn̄ kpukpru n̄kpọ oro mînyeneke ufọn. Edi, Jehovah ama ọdiọn̄ nnyịn uwak uwak, iyakke nnyịn ibuene m̀mê inana n̄kpọ.

Ke 1984 adiaha mi, emi ke ini oro ekedide isua 15 ke emana onyụn̄ anade baptism ndondo oro, ama ọtọn̄ọ utom uyọhọ-ini nte asiakusụn̄. Ke ukem ini oro, ẹma ẹmek ebe mi nte ebiowo. Ndien nso kaban̄a mi? Ke n̄kerede nte ke n̄kemeke ndisiak usụn̄ kan̄a, mma mbiere ndisịn hour 30 ke ọfiọn̄ ke utom ukwọrọikọ. Mma nsịm oro nnyụn̄ ndọhọ idemmi nte: ‘Amanam etieti! Afo amanam ekese.’

Inikiet efen, nte ededi, ntan̄idem ama afiak edi mfịna mi. (Mme N̄ke 16:18) Mma n̄kaiso n̄kere mban̄a nte nnamde ọfọn ye nte ke iyomke nnam n̄kaiso n̄kọri ke n̄kan̄ eke spirit. Idaha eke spirit mi ama ọtọn̄ọ ndinịme, ndien ami mma n̄kam ntọn̄ọ nditaba nti edu oro n̄kenyenede. Ekem mma mbọ ntụnọ oro n̄koyomde.

Ke 1985 esenyịn iba oro ẹsan̄ade-san̄a ye iban mmọ ekedi isen ke ufọk nnyịn nte mmọ ẹkenamde edidi mmọ eke ini ke ini ndise esop nnyịn. Ke ntịn̄de enyịn nse mme osụhọde idem, anam n̄waidem Christian ẹmi ama enen̄ede anam mi ntie n̄kere mme n̄kpọ. Mma nnam ndụn̄ọde ke ibuotikọ oro aban̄ade nsụhọdeidem, n̄kamade mme n̄wed Watch Tower Society. Mma n̄kere mban̄a akwa nsụhọdeidem oro Jehovah owụtde ke edinam esie ye nnyịn mme anamidiọk owo. (Psalm 18:35) Mma mfiọk ke n̄kenyene ndikpụhọde ekikere mi.

Ami mma mben̄e Jehovah nte an̄wam mi n̄kọri nsụhọdeidem man nnam n̄kpọ esie ke usụn̄ oro enye oyomde mi nnam onyụn̄ ekpeme mi ndida enọ oro ami nyenede nnam n̄kpọ ke ubọn̄ esie. Mma n̄wet n̄kpọ nyọhọ n̄wed eben̄e utom usiakusụn̄, nnyụn̄ ntọn̄ọ ndinam n̄kpọ esie ke utom uyọhọ-ini ke March 1989.

Mmekeme ndidọhọ idahaemi ke ami ke akpanikọ mmokop inemesịt ye nte ke ndikosụhọde idem omotịp n̄kpọ esịn ke ami ndikop inemesịt. Ami mmokụt ata ntak ndidu uwem—eke edin̄wam mbon unana ẹdi ẹdidiọn̄ọ nte ke Jehovah, kpa Abasi akpanikọ, iyomke usụn̄ ikpọn̄ mbon oro ẹyomde enye.—Nte Vera Brandolini obụkde.