Sịn Mme Mfụmmfụm Ekikere Ererimbot, Bịne Mme Ata Idem N̄kpọ Obio Ubọn̄

“Ẹkam ẹbemiso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ ẹmi ẹnọ mbufo.”—MATTHEW 6:33.

1. Nso ntọt ke Ikọ Abasi ọnọ aban̄a ndamban̄a esịt, ndien nso idi kiet ke otu akpan usụn̄ oro enye esibian̄ade nnyịn?

“TỊM kpeme esịt fo kan kpukpru se ekpemede; koro uwem otode enye.” (Mme N̄ke 4:23) Ntak okoyomde ete enyene-ọniọn̄ Edidem Solomon ọnọ ntọt emi-e? Koro “esịt abian̄a akan kpukpru n̄kpọ, onyụn̄ abiara fap.” (Jeremiah 17:9) Akpan usụn̄ kiet emi ndamban̄a esịt nnyịn ekemede ndibian̄a nnyịn edi ke ndinam nnyịn isịn idem ke mme mfụmmfụm ekikere ererimbot. Edi nso ẹdi mme mfụmmfụm ekikere? Mmọ ẹdi mme nsunsu ekikere oro mîwọrọke usụn̄, ndap ndap idotenyịn, ye ifu ifu nyoyok ekikere. Ke ini mme ndap ndap idotenyịn ẹmi ẹkabarede ẹdi mfụmmfụm ekikere ererimbot, mmọ idịghe sụk n̄kpọ ubiat ini edi ẹdi n̄ko ata n̄kpọ unan. Ntem, ana nnyịn isịn mmọ ofụri ofụri. Ke akpanikọ, edieke nnyịn isuade se ikwan̄ade nte Jesus akasuade, nnyịn iyekpeme esịt nnyịn ibiọn̄ọ edisịn idem ke mme mfụmmfụm ekikere ererimbot.—Mme Hebrew 1:8, 9.

2. Nso ẹdi mme mfụmmfụm ekikere ererimbot, ndien ntak emi nnyịn ikpesịnde mmọ-ọ?

² Edi nso ẹdi mme mfụmmfụm ekikere ererimbot? Mmọ ẹdi mme mfụmmfụm ekikere oro ẹnịmde edu ererimbot emi odude ke idak odudu Satan mi idiọn̄ọ. Kaban̄a emi, apostle John ekewet ete: “Ofụri ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot.” (1 John 2:16; 5:19) Ntak emi anade mme Christian ẹsịn mme mfụmmfụm ekikere ererimbot? Koro mme utọ mfụmmfụm ekikere oro ẹsidemede ibụk ibụk udọn̄ ke ekikere ye esịt. Edinyene ndap ndap idotenyịn mban̄a edinam se idiọkde ke akpanikọ ekeme ndidi edinam ndomonse ke ekikere ke se owo oro edikam anamde. Mbet James odụri nnyịn utọn̄ ete: “Idomo iduọ osịm kpukpru owo ke adan̄aemi idiọk udọn̄ atapde enye odụri. Ekem idiọk udọn̄ ama oyomo, aman idiọkn̄kpọ; idiọkn̄kpọ ama ọkọkọri, osion̄o n̄kpa.”—James 1:14, 15.

Mme Ntọt Uwụtn̄kpọ

3. N̄kpọ aban̄ade anie ọnọ nnyịn mfọnn̄kan ntọt uwụtn̄kpọ aban̄ade unan oro mfụmmfụ ibụk ibụk ekikere esinọde?

³ Ẹyak nnyịn ikere mme uwụtn̄kpọ ẹmi ẹwụtde ntak oro anade ẹsịn mfụmmfụm ekikere ererimbot. Se iban̄ade Satan kpa Devil ọnọ mfọnn̄kan uwụtn̄kpọ aban̄ade unan oro ekemede ndisụn̄ọ nto edisịn idem ke ibụk ibụk mfụmmfụm ekikere. Enye ama ayak ekikere edida idem ke akpan n̄kpọ ọkọri ke esịt esie okosịm udomo oro enye ofụbede ufụp aban̄a anana-mbiet idaha Jehovah nte Andikara Ekondo onyụn̄ oyom ẹtuak ibuot ẹnọ imọ. (Luke 4:5-8) Mfụmmfụm ekikere oro mîwọrọke usụn̄? Ke akpanikọ ekedi ntre! Ẹyewụt oro ke usụn̄ oro eyịghe mîdụhe ke ini ẹdikọbide Satan ke tọsịn isua ndien akpan akpan ke ini emi ẹditopde enye ẹsịn ke “akwa n̄kpọdiọhọ ikan̄,” kpa udiana n̄kpa.—Ediyarade 20:1-3, 10.

4. Didie ke Satan akabian̄a Eve?

⁴ Nnyịn imenyene ntọt uwụtn̄kpọ efen ke n̄kpọ aban̄ade akpa an̄wan, Eve. Ke ukeme Satan ndinyene udọn̄ esịt esie, enye ama atap Eve ke ndisịn mfụmmfụm ekikere ke esịt esie nte ke edieke enye adiade mfri oro ẹkekpande, enye idikpaha edi editie nte Abasi, ọfiọk eti ye idiọk. Nte mfụmmfụm ekikere oro ekedi se mîwọrọke usụn̄, kpa ibụk? Ke akpanikọ ekedi ntre, nte nnyịn ikemede ndikụt nto ubiomikpe oro Jehovah okobiomde Eve ye ebe esie, Adam, ke ini Jehovah okobụpde onyụn̄ ebierede ikpe ọnọ mmọ. Nte utịp, mmọ ẹma ẹduọk unen mmọ ndidu uwem ke Paradise ye eke kpukpru anana-mfọnmma nditọ mmọ.—Genesis 3:1-19; Rome 5:12.

5. Nso ikanam ndusụk nditọ Abasi ẹdide angel ẹduọn̄ọ, ndien osụn̄ọde ke nso utịp ọnọ mmọ?

⁵ Nnyịn imenyene n̄ko ntọt uwụtn̄kpọ aban̄ade ndusụk nditọ Abasi ẹdide angel. (Genesis 6:1-4) Utu ke ndiyụhọ ye mme edidiọn̄ oro mmọ ẹkedarade ke ndidu ye Jehovah ke heaven, mmọ ẹma ẹnyene mfụmmfụm ekikere ẹban̄a iban ke isọn̄ ye nte edidide inem n̄kpọ ndinyene ebuana idan̄ ye mmọ. Ke ntak ẹkenamde n̄kpọ ẹban̄a mfụmmfụm ekikere ẹmi, ẹkụk mme ọsọn̄ibuot angel oro idahaemi ẹsịn ke ekịm eke spirit ẹkotde Tartarus, ẹtiede ẹbet edisobo mmọ mfep ofụri ofụri ke utịt Ukara Tọsịn Isua eke Jesus Christ.—2 Peter 2:4; Jude 6; Ediyarade 20:10.

Sịn Mme Mfụmmfụm Ekikere Ererimbot

6, 7. Ntak emi mme mfụmmfụm ekikere ererimbot kaban̄a inyene obụkidem esinọde unan onyụn̄ edide abian̄a?

⁶ Ẹyak nnyịn idahaemi ikere iban̄a kiet ke otu ata ọsọ ye enyene-ndịk mfụmmfụm ekikere oro Satan esịnde udọn̄ ọnọ. Ebede ke kpukpru orụk usụn̄ usuanetop, ẹdomo nnyịn man isịn idem ke mme mfụmmfụm ekikere ererimbot. Mmọemi ẹsiwak nditịbe nto udọn̄ itọn̄ uyom inyene. Inyeneke se idiọkde ke ndinyene inyene. Mme abak-Abasi oro, Abraham, Job, ye Edidem David ẹma ẹnyene n̄kpọ etieti, edi mmọ ikọdiọkke itọn̄ ibịne inyene obụkidem. Mme mfụmmfụm ekikere inyene obụkidem esinụk mme owo ndinam utom ọkpọsọn̄ ke ediwak isua man ẹkọ inyene ẹbon. Mme utọ mfụmmfụm ekikere oro n̄ko esinụk mme owo esịn ke kpukpru orụk mbre mfọniso, utọ nte edikọp ikpọ ubọk etịbe ye edidep tiket mbre mfọniso. Ẹyak nnyịn ikûnyene ndap ndap ekikere ndomokiet kaban̄a uforo. Edieke nnyịn ikerede ke inyene obụkidem eyekpeme nnyịn, kere ban̄a enyene-ọniọn̄ n̄ke emi: “Inyene ididoroke ke usen iyatesịt: edi eti ido osio owo ke n̄kpa.” (Mme N̄ke 11:4) Ke akpanikọ, inyene obụkidem idinọhọ un̄wam ndomokiet ke ndibọhọ “akwa ukụt.”—Matthew 24:21; Ediyarade 7:9, 14.

⁷ Inyene obụkidem ekeme ndibian̄a nnyịn mmemmem mmemmem. Oro edi ntak ẹsiande nnyịn ẹte: “Inyene ọbọn̄ ẹdi ọkpọsọn̄ obio esie, enye onyụn̄ ese ete ke etie nte edikon̄ ibibene [“mmọ ẹnyụn̄ ẹtie nte ibibene ukpeme ke ekikere esie,” NW].” (Mme N̄ke 18:11) Ih, edi n̄kukụre “ke ekikere esie,” koro inyene obụkidem esinọ esisịt ukpeme ke ini odudu udep n̄kpọ oro okụk enyenede osụhọrede, n̄wụre ke ndutịm uforo, ndutịme ke ukaraidem, m̀mê udọn̄ọ n̄kpa. Jesus Christ ama ọtọt nte edide ndisịme n̄kpọ ndikọn̄ mbuọtidem nnyịn ke inyene obụkidem. (Luke 12:13-21) Nnyịn imenyene n̄ko mme ikọ item apostle Paul emi: “Itọn̄ inyene edi orụn̄ kpukpru orụk mme idiọkn̄kpọ; ndien ke edinyanade mbịne enye, ndusụk owo ẹma ẹyo ẹkpọn̄ mbuọtidem, ẹnyụn̄ ẹda ediwak mfụhọ ẹnọ idemmọ unan.”—1 Timothy 6:10.

8. Mme mfụmmfụm ekikere ererimbot kaban̄a edu idan̄ ẹtara adan̄a didie, ndien nso n̄kpọndịk ke emi ẹkama?

⁸ Mfụmmfụm ekikere efen enyene ebuana ye oburobụt ido idan̄. Udomo nte anamidiọk owo ẹmade ndisịn esịt ke mfụmmfụm ekikere idan̄ edi se ẹkemede ndikụt nto uwọrọetop ke ndek ndek ikọ oro odude ke ndiyụt ndusụk nọmba ke ukwak urụk ukopikọ nnyụn̄ n̄kpan̄ utọn̄ ke mme etop ẹban̄ade idan̄. Ke United States, ndutịm usuanetop idan̄ ebe ke urụk ukopikọ edi mbubehe ediwak biliọn dollar. Edieke ikpayakde ekikere nnyịn owụhọ ke oburobụt ido idan̄, nte nnyịn ikpedịghe mbubịk, oro n̄kukụre itiede nte idi mme Christian oro ẹsanade? N̄ko nte n̄kpọndịk idụhe nte ke utọ mfụmmfụm ekikere oro ekeme ndida n̄kosịm oburobụt ebuana? Emi esitịbe ndien esinyụn̄ osụn̄ọ ke ndusụk owo ndidi se ẹsiode ẹfep ke esop Christian ke ntak edinam use m̀mê edisịn efịbe. Ke ikerede iban̄a mme ikọ Jesus ke Matthew 5:27, 28, nte kpukpru mbon oro ẹsisịnde idem ke utọ mfụmmfụm ekikere oro kpukpru ini iduehe isop edisịn efịbe ke esịt mmọ?

9. Nso eti item idu ke N̄wed Abasi ndinọ nnyịn ntọt mbiọn̄ọ mme mfụmmfụm ekikere ererimbot?

⁹ Man ibiọn̄ọ ntụhọ anam idiọkn̄kpọ esịt nnyịn ndisịn idem ke utọ mfụmmfụm ekikere oro, oyom nnyịn inyene ntọt Paul emi ke ekikere: “Baba n̄kpọ kiet eke odịbede [Abasi] ke enyịn inyụn̄ idụhe; edi kpukpru n̄kpọ ẹna iferi ye ata in̄wan̄în̄wan̄ ke enyịn Abasi, emi nnyịn isan̄ade n̄kpọ ye Enye [“inyenede ndinam ibat nnọ,” NW].” (Mme Hebrew 4:13) Nnyịn kpukpru ini ikpoyom nditie nte Moses, emi “[ọkọsọn̄ọde] ada nte n̄kpọ eke okụtde Enyeemi enyịn owo mîkwe.” (Mme Hebrew 11:27) Ih, ana nnyịn ikaiso nditi idem nnyịn nte ke mme mfụmmfụm ekikere ererimbot inemke Jehovah esịt ye nte ke ẹkeme n̄kukụre ndisụn̄ọ ke ndinọ idem nnyịn unan. Ana nnyịn ikere iban̄a edikọri mbun̄wụm spirit Abasi, akpan akpan mfara ke idem, koro nnyịn ikemeke ndifep akpanikọ oro nte ke edieke nnyịn itọde inọ obụkidem, nnyịn ididọk mbiara ito obụkidem.—Galatia 5:22, 23; 6:7, 8.

Mme Ata Idem N̄kpọ Obio Ubọn̄

10, 11. (a) Mme akpanikọ ewe ẹsọn̄ọ nte ke Andibot enen̄ede odu? (b) Nso uyarade idu nte ke Bible enen̄ede edi Ikọ Abasi? (c) Nso uyarade idu nte ke Edidem Obio Ubọn̄ enen̄ede odu?

¹⁰ Mfọnn̄kan usụn̄ ndisịn mme mfụmmfụm ekikere ererimbot edi ndikaiso mbịne mme ata idem n̄kpọ Obio Ubọn̄. Mme ata idem n̄kpọ Obio Ubọn̄ oro Abasi ọnọde ẹdi ata isio ye mme mfụmmfụm ekikere ererimbot. Nte Abasi enen̄ede odu? Mfan̄a baba kiet idụhe iban̄a edidu esie. Mme n̄kpọ obot oro ẹkụtde ke enyịn ẹdi ntiene ẹban̄a akpanikọ emi. (Rome 1:20) Ẹti nnyịn ẹban̄a se ẹketịn̄de ke se iwakde ikan isua ikie ẹmi ẹkebede ke n̄wed The Divine Plan of the Ages, emi Watch Tower Society ekemịn̄de. Enye ọkọdọhọ ete: “Owo oro ekemede ndida ukwak use n̄kpọ nse ikpaenyọn̄, mîdịghe akam esede ke ata enyịn ikpọn̄îkpọn̄, onyụn̄ okụtde ediwak n̄kpọ obot, eti idaha, uyai, ndutịm, n̄kemuyo ye uwak uduot esie, edi eyịkde m̀mê Andibot mmọemi enen̄ede okpon akan imọ ke ọniọn̄ ye ke odudu, mîdịghe oro ekemede ndikere ke idaha kiet nte ke utọ ndutịm oro ekedidu ke mbuari, ye unana Andibot, ọduọk mîdịghe ofụmi ifiọk ukere n̄kpọ nditịm n̄kere se Bible okotde enye, ndisịme (owo emi ofụmide m̀mê ananade ifiọk).”—Psalm 14:1.

¹¹ Nnyịn ikpep kpukpru n̄kpọ aban̄ade Obio Ubọn̄ ke Edisana Bible. Nte Bible enen̄ede edi Ikọ Abasi oro ẹwetde-wet? Enye ke ata akpanikọ edi, nte ẹkemede ndikụt nto n̄kemuyo esie, edidi nnennen ke se iban̄ade ifiọk ntaifiọk, ye odudu esie ndikpụhọde uwem mme owo ndien akpan akpan ebe ke edisu oro mme prọfesi esie ẹsude.a Nso kaban̄a Edidem Obio Ubọn̄ Abasi, Jesus Christ? Nte enye ama enen̄ede odu? Mme mbụk Gospel ye mme n̄wed eke odudu spirit ke N̄wed Abasi Christian usem Greek ẹsọn̄ọ mbụk aban̄ade Jesus Christ in̄wan̄în̄wan̄ ye nte enende. Kaban̄a mbụk Jesus, uyarade odu n̄ko ke Talmud mme Jew, emi etịn̄de otụk enye nte owo. Ntre n̄ko ye mme ewetmbụk ẹdide mme Jew ye mbon Rome eke akpa isua ikie E.N.

12, 13. Mme akpanikọ ewe ẹwụt ke Obio Ubọn̄ Abasi edi ata idem n̄kpọ?

¹² Nso kaban̄a ata idem n̄kpọ Obio Ubọn̄ ke idemesie? Enye edi se Christendom ofụmide ke akamba udomo, nte ẹwụtde ke n̄kụni ọwọrọiso owo Presbyterian emi: “Ke akpanikọ ebe isua edịp-ye-duop tọn̄ọ nte n̄kokop ọkwọrọikọ odomode ndinam ata idem n̄kpọ Obio Ubọn̄ an̄wan̄a ikọt esie.” Edi, edinam enyịn̄ Jehovah asana ebe ke Obio Ubọn̄ edi ibuotikọ Ikọ esie. Abasi ke idemesie akanam akpa un̄wọn̄ọ aban̄ade Obio Ubọn̄, ọdọhọde ete: “Nyenyụn̄ nsịn usua ke ufọt fo ye n̄wan, ye ke ufọt ubon fo ye ubon esie: enye eyenuak fi ibuot, afo eyenyụn̄ anuak enye nditịn̄-ikpat.” (Genesis 3:15) Idụt Israel akada aban̄a Obio Ubọn̄, akpan akpan ke ini ukara Edidem Solomon. (Psalm 72) N̄ko-n̄ko, Obio Ubọn̄ ekedi ibuotikọ ukwọrọikọ Jesus. (Matthew 4:17) Enye ama esisio emi owụt ke ediwak n̄ke esie, utọ nte mmọ oro ẹdude ke Matthew ibuot 13. Jesus ama asian nnyịn ete ibọn̄ akam iyom Obio Ubọn̄ inyụn̄ ikaiso iyọm enye akpa. (Matthew 6:9, 10, 33) Ke akpanikọ, ẹsiak Obio Ubọn̄ Abasi ekpere ndisịm utịm ike 150 ke N̄wed Abasi Christian usem Greek.

¹³ Obio Ubọn̄ edi ata ukara, ye odudu ye ubọn̄, ndien enye eyesu kpukpru nti n̄kpọ ẹkedoride enyịn ẹban̄a. Enye enyene udịm udịm ibet, oro ẹkụtde ke Bible. Obio Ubọn̄ oro ama ananam ediwak n̄kpọ ẹdi ata idem n̄kpọ. Enye enyene mme andidu ke idak oro ẹnamde akpanikọ—ẹwakde ẹbe Mme Ntiense Jehovah 4,000,000. Ke idụt 211 mmọ ke ẹkwọrọ eti mbụk Obio Ubọn̄, ke ndisu Matthew 24:14. Ke isua utom mmọ eke 1991, mmọ ẹma ẹsịn hour 951,870,021 ke ndikwọrọ etop Obio Ubọn̄. Utom emi ke osion̄o mme utịp oro ẹkụtde ke enyịn, emi ebịghide nte ediwak owo ẹkpepde “edisana usem” akpanikọ Bible.—Zephaniah 3:9, NW.

Ndibịne Mme Ata Idem N̄kpọ Obio Ubọn̄

14. Didie ke nnyịn ikeme ndisọn̄ọ esịtekọm oro nnyịn inyenede iban̄a nte Obio Ubọn̄ edide ata idem n̄kpọ?

¹⁴ Didie, ndien, ke nnyịn ikeme ndibịne mme ata idem n̄kpọ Obio Ubọn̄? Ana idotenyịn nnyịn ọkọn̄ọ mfọn mfọn ke ọkpọsọn̄ uyarade. Ana obufa ererimbot oro Abasi ọn̄wọn̄ọde edi ata idem n̄kpọ ọnọ nnyịn. (2 Peter 3:13) Ndien ana nnyịn inyene mbuọtidem ke un̄wọn̄ọ oro nte ke Abasi “eyekwọhọde kpukpru mmọn̄eyet ke enyịn [nnyịn] efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” (Ediyarade 21:4) Didie ke nnyịn ikeme nditịm mfiọk nte ke emi idịghe mfụmmfụm ekikere? Enye ke akpanikọ eyeda itie ke ekemini Abasi, koro enye mîkemeke ndisu nsu. (Titus 1:1, 2; Mme Hebrew 6:18) Oyom nnyịn itie ikere mme un̄wọn̄ọ oro. Ndikụt idem nnyịn ke obufa ererimbot Abasi nnyụn̄ ndara mme edidiọn̄ esie idịghe mfụmmfụm ekikere oro mîwọrọke usụn̄ edi ọnọ uyarade mbuọtidem. Nte Paul akanamde enye an̄wan̄a, “mbuọtidem edi ọyọhọ edibet mme n̄kpọ oro ẹdoride enyịn ẹban̄a, in̄wan̄în̄wan̄ edinam ata idem n̄kpọ n̄wụt okposụkedi owo mîkwe.” (Mme Hebrew 11:1, NW) Ẹyak nnyịn inam mbuọtidem nnyịn ọsọn̄ idem ke ndibọk idem nnyịn kpukpru ini ke Ikọ Abasi ye mme n̄wed Christian oro ẹn̄wamde nnyịn ndidiọn̄ọ nnyụn̄ nda enye nsịn ke edinam. Ndien adan̄a ediwak ini nte idade ke ndisian mbon en̄wen mban̄a Obio Ubọn̄, ke nnennen edinam ye ke ido nneme, kpa ntre ke isọn̄ọ mbuọtidem nnyịn inyụn̄ inam idotenyịn ayama ke enye.

15. Nso mbiomo ke nnyịn inyene kaban̄a utom ukwọrọikọ Christian?

¹⁵ Oyom nnyịn n̄ko inam utom ke n̄kemuyo ye mme ata idem n̄kpọ Obio Ubọn̄ ke ndifori uduot utom ukwọrọikọ nnyịn. Sia edide ekese ke osụk odu ndinam, didie ke nnyịn ikeme ndinam emi? (Matthew 9:37, 38) Ikọ oro nte ke akanam owo isọn̄ke ikaha ndikpep n̄kpọ edi akpanikọ. Inamke n̄kpọ m̀mê adan̄a ediwak isua didie ke nnyịn ibuana ke utom unọ ikọ ntiense, nnyịn imekeme ndinam n̄kọri. Ke ndikabade nnyene uforo n̄kan ke ndikama Ikọ Abasi, nnyịn iyekeme ndinam ọfọn akan ke ndin̄wam mbon efen ndikop uyo nnọ Edidem, Jesus Christ. (Men John 10:16 domo.) Ke ini nnyịn inyenede ke ekikere ite ke nsinsi ebietidụn̄ mme owo abuana, nnyịn ikpoyom ndikụre efakutom nnyịn nte ọfọnde man nnyịn inọ mmọ ifet efen efen ndiwụt n̄kan̄ emi mmọ ẹdade, edide nte “erọn̄” m̀mê nte “ebot.” (Matthew 25:31-46) Ke akpanikọ, oro ọwọrọ nditịn̄ enyịn nnịm n̄wetnnịm n̄kpọ kaban̄a mbon oro mîdụhe ke ufọk akpan akpan mbon oro ẹnyenede udọn̄ ke etop Obio Ubọn̄.

Kaiso Ndibịne Obio Ubọn̄

16. Mmanie ẹkenịm eti uwụtn̄kpọ ke ndibịne mme ata idem n̄kpọ Obio Ubọn̄, ndien didie ke mmọ ẹbọ Obio Ubọn̄ ẹnyene ke “nsọn̄ubọk”?

¹⁶ Oyom ọkpọsọn̄ ukeme man ikaiso ndibịne mme ata idem n̄kpọ Obio Ubọn̄. Nte nnyịn ibọhọ nsịnudọn̄ ebe ke ifịk ifịk uwụtn̄kpọ mme Christian oro ẹyetde aran ẹmi ẹsụhọde? Mmọ ẹmebịne mme ata idem n̄kpọ Obio Ubọn̄ ke ediwak isua. Ẹma ẹtịn̄ ẹban̄a edibịne emi ke mme ikọ Jesus ẹmi: “Ọtọn̄ọde ke mme usen John Baptist tutu osịm emi, Obio Ubọn̄ Heaven akpa unyan̄a, mbon unyan̄a ẹnyụn̄ ẹda enye ke nsọn̄ubọk ẹnyene.” (Matthew 11:12) Mi owo inọhọ ekikere iban̄a mme asua ndibọ Obio Ubọn̄ nda nnyene ke odudu. Utu ke oro, emi ada aban̄a utom mbon oro ẹdude ke udịm edida Obio Ubọn̄ nnyene. Eyen ukpepn̄kpọ Bible kiet ọkọdọhọ ete: “Ke usụn̄ emi ke ẹtịn̄ ẹban̄a ọkpọsọn̄ udọn̄, ukeme ye unyan̄a oro n̄kpọ mîbiọn̄ọke emi ẹnyenede ẹban̄a obio ubọn̄ Messiah emi asan̄ade ekpere.” Mbon oro ẹyetde aran ibiatke ini ke ndinam Obio Ubọn̄ edi ekemmọ. Ẹyom ukem ọkpọsọn̄ ukeme oro ẹto “mme erọn̄ en̄wen” man mmọ ẹdot nte mme andidu ke idak Obio Ubọn̄ Abasi eke heaven oro ke isọn̄.—John 10:16.

17. Nso ididi udeme mbon oro ẹbịnede mme mfụmmfụm ekikere ererimbot?

¹⁷ Ke akpanikọ, nnyịn idu uwem ke akpan ikpehe ini emi ifet odude. Usen kiet mbon oro ẹbịnede mme mfụmmfụm ekikere ererimbot ẹyedi ẹdidiọn̄ọ ata idem n̄kpọ ke mbrenyịn. Ẹtịn̄ ẹban̄a idaha mmọ nte ọfọnde ke mme ikọ ẹmi: “Eyetie nte owo [ọ]biọn̄ adabade ndap, ndien, sese, enye adia n̄kpọ: edi ke ini enye edemerede, ukpọn̄ esie edi ukpọk: ye nte owo emi itọn̄ asatde adabade ndap, ndien, sese, enye ọn̄wọn̄ mmọn̄; edi ke ini enye edemerede, sese, enye etie mba mba.” (Isaiah 29:8) Ke akpanikọ, mme mfụmmfụm ekikere ererimbot tutu amama idinamke owo ndomokiet okop uyụhọ ye inemesịt.

18. Ke ikerede iban̄a ata idem n̄kpọ Obio Ubọn̄, nso usụn̄uwem ke nnyịn ikpebịne, ye nso idotenyịn ke ekikere?

¹⁸ Obio Ubọn̄ Jehovah edi ata idem n̄kpọ. Enye ke akara ifịk ifịk, ke adan̄aemi idiọk editịm n̄kpọ emi asakde iso ese usọp usọp, nsinsi nsobo. Ke ntre, da item Paul emi sịn ke esịt: “Mmọdo ndien, ẹyak nnyịn ikûde idap, nte mmọ eken, edi ẹyak nnyịn itaba idap ikpeme, imụm idem ikama.” (1 Thessalonica 5:6) Nnyịn ikpakam ikaiso iwụk esịt ye ekikere nnyịn ke mme ata idem n̄kpọ Obio Ubọn̄ ndien ke ntre idara mme nsinsi edidiọn̄. Ndien enye akpakam edi udeme nnyịn ndikop Edidem Obio Ubọn̄ oro ọdọhọde ete: “Ẹdi, mbufo emi Ete Mi ọdiọn̄de, ẹdida ubọn̄ emi ẹkonịmde ẹnọ mbufo toto ke editọn̄ọ ererimbot.”—Matthew 25:34.

[Mme Ikọ idakisọn̄]

Didie ke Afo Ọkpọbọrọ?

◻ Nso ẹdi mme mfụmmfụm ekikere ererimbot, ndien ntak emi nnyịn ikpenyenede ndisịn mmọ?

◻ Mme uwụtn̄kpọ ewe ẹwụt nte edide ndisịme ndisịn idem ke mme mfụmmfụm ekikere ererimbot?

◻ Mme akpanikọ ewe ẹwụt nte Andibot, Ikọ esie oro ẹwetde-wet, Jesus Christ, ye Obio Ubọn̄, edide ata idem n̄kpọ?

◻ Didie ke nnyịn ikeme ndisọn̄ọ mbuọtidem nnyịn ke mme ata idem n̄kpọ Obio Ubọn̄?

[Ndise ke page 15]

Mme mfụmmfụm ekikere ererimbot ẹsiwak ndito edinyene ọkpọsọn̄ udọn̄ mban̄a inyene obụkidem

[Ndise ke page 16]

Edikwọrọ eti mbụk edi usụn̄ kiet ndibịne mme ata idem n̄kpọ Obio Ubọn̄

[Ndise ke page 17]

Nte afo ke ebịne mme ata idem n̄kpọ Obio Ubọn̄ ke ndisịn ifịk n̄kpep Ikọ Abasi?