Nte Abasi Onyịme Ukọkudọn̄ọ Mbuọtidem?
“NNYỊN imokụt mme utịben̄kpọ mfịn.” Ih, ama otụk mme andida nse ke esịt. Ẹma ẹkọk eren emi ọkọdọn̄ọde ata idiọk akpauben̄ ke iso mmọ. Ọkọkudọn̄ọ emi ọkọdọhọ eren oro ete: “Daha ke enyọn̄, men mbri fo, nyọn̄ ufọk.” Ndien eren oro ama anam kpasụk ntre! Enye ikọdọn̄ọke akpauben̄ aba. Eyịghe idụhe mbon oro ẹkedude do ‘ẹketọn̄ọde nditoro Abasi’! (Luke 5:18-26) Ukọkudọn̄ọ emi Jesus Christ akanamde mi ke se ikperede ndisịm isua 2,000 ẹmi ẹkebede, nte otịmde an̄wan̄a ama enyene unyịme Abasi.
Nso kaban̄a mfịn? Nte utịbe utịbe ukọkudọn̄ọ osụk ododu ọnọ mbon oro mîkemeke ndinyene usọbọ eke n̄kan̄ ibọkusọbọ? Jesus ama anam mme utịbe utịbe ukọkudọn̄ọ. Mme ọkọkudọn̄ọ mbuọtidem mfịn ẹdọhọ ke ikpebe enye. Didie ke nnyịn ikpese se mmọ ẹdọhọde?
Ẹkabade ukọkudọn̄ọ mbuọtidem nte “usụn̄ edikọk mme udọn̄ọ ebe ke akam ye edikọn̄ mbuọtidem ke Abasi.” Encyclopædia Britannica ọsọn̄ọ ete: “Mbụk ukọkudọn̄ọ mbuọtidem ke Ido Ukpono Christ ọkọtọn̄ọ ye ndyọ ndyọ ọkpọkpọ utom ukwọrọikọ Jesus ye eke mme apostle.” Ih, Jesus ama esinam mme n̄wọrọnda ukọkudọn̄ọ. Ndi mme ọkọkudọn̄ọ mbuọtidem mfịn ẹnam mme utịben̄kpọ nte enye akanamde?
Mbuọtidem—Se Ẹyomde?
Nte ekemde ye Black’s Bible Dictionary, Jesus “ama etịn̄ in̄wan̄în̄wan̄ ete ke [mbuọtidem] ekedi se ẹyomde ke mme utịbe utịbe ukọkudọn̄ọ imọ.” Edi nte ekedi ntre? Nte Jesus ama oyom owo udọn̄ọ enyene mbuọtidem mbemiso ọkọkde enye? Ibọrọ edi baba. Ẹkeyom mbuọtidem ke n̄kan̄ ọkọkudọn̄ọ edi inen̄ekede idi ke n̄kan̄ owo udọn̄ọ. Ke idaha kiet mme mbet Jesus ẹma ẹkpu ndikọk eyeneren kiet emi ọkọdọn̄ọde ndisi. Jesus ama ọkọk eyeneren oro ndien ke oro ebede asian mme mbet ntak emi mmọ mîkekemeke ndikọk enye. “Enye ọdọhọ mmọ ete, Oto ke ntak ekpri mbuọtidem mbufo.”—Matthew 17:14-20.
Nte ekemde ye Matthew 8:16, 17, Jesus “[ama] anam kpukpru mbon udọn̄ọ ẹkop nsọn̄idem.” Edi akpanikọ, mme owo ẹmi ẹma ẹnyene ndusụk udomo mbuọtidem ke Jesus oro akanamde mmọ ẹka ẹbịne enye. (Matthew 8:13; 9:22, 29) Ke ata ediwak idaha mmọ ẹkenyene ndidedi nnyụn̄ ndiben̄e mbemiso enye ọkọkde mmọ. Nte ededi, owo ikoyomke ikọ uyarade mbuọtidem ndomokiet man ẹnam utịben̄kpọ. Ke idaha kiet Jesus ama ọkọk eren kiet emi ekedide mbụn̄ọ emi mîkakam ifiọkke enyeemi Jesus ekedide. (John 5:5-9, 13) Ke okoneyo oro ẹkemụmde enye, Jesus ama anam utọn̄ asan̄autom akwa oku oro ẹkesịbede akabade ọfọn, okposụkedi eren emi ekedide kiet ke otu mme asua Jesus oro ẹkedide ndimụm enye. (Luke 22:50, 51) Ke akpanikọ, ke ndusụk idaha, Jesus ama akam esinam mme akpan̄kpa ẹset!—Luke 8:54, 55; John 11:43, 44.
Jesus akasan̄a didie anam mme utọ utịben̄kpọ oro? Koro enye ekeberide edem ke edisana spirit, m̀mê anamutom odudu Abasi. Emi edi se ikanamde ukọkudọn̄ọ oro, idịghe mbuọtidem owo udọn̄ọ. Edieke afo okotde mbụk ẹmi ke mme Gospel, afo eyekụt n̄ko ete ke mme ukọkudọn̄ọ ẹmi Jesus akanamde ẹkedi ye unana ido n̄wụtidem. Edinam n̄kpọ man ẹdụri ntịn̄enyịn mme owo ikodụhe m̀mê edida ntụk nnam n̄kpọ ke usụn̄ oro mîfọnke. N̄ko-n̄ko, inamke n̄kpọ m̀mê nso orụk udọn̄ọ ke ekedi, Jesus akananam ikpụhe ndikọk. Enye kpukpru ini ama esikụt unen, ndien enye akananam ibọhọ okụk.—Matthew 15:30, 31.
Mme Ukọkudọn̄ọ Eyomfịn Ẹbiet eke Jesus?
Udọn̄ọ edi enyene-ndịk mfịna, ndien ke ini enye edide, nnyịn ke ndammana usụn̄ imesiyom ubọhọ. Nte ededi, nso edieke nnyịn idụn̄de ke ebiet emi “mbiaibọk usọbọ ẹnamde n̄kpọ ye mme owo, akpan akpan mbon oro ẹnyenede esisịt n̄kpọ udu-uwem, nte mme unam inyụn̄ idịghe nte mme owo”? Oro edi idaha emi dọkta kiet okokụtde ke idụt Latin-America kiet. Ndien nso edieke nnyịn idụn̄de ke ebiet emi, kpa nte edide ke idụt oro, emi ‘mbahade 40 eke ikie kpọt ke otu mme dọkta ẹdotde ndinam ubọkọkọ mmọ’?
Eyịghe idụhe nte ke ediwak owo, ke mîkwe usụn̄ ubọhọ efen, ẹse ukọkudọn̄ọ mbuọtidem nte edide ke nsụhọde n̄kaha se idotde ẹdomo ẹse. Edi, mfan̄a odu ke mme usọbọ oro mme ọkọkudọn̄ọ mbuọtidem ẹdọhọde nte inamde. Ke uwụtn̄kpọ, ibat owo ẹmi ẹkerede nte edide 70,000 ẹma ẹdụk mbono kiet ke São Paulo, Brazil, ke ebiet emi ọkọkudọn̄ọ iba ‘ẹkenuakde mme akrasi enyịn ẹmi ẹkewakde ke mme itie ke ikpat, ẹmi otuowo ẹketopde ẹduọn̄ọ, ẹn̄wọn̄ọde ẹnọ mme andinyene oro ẹkesọpde idem ndinịm ke akpanikọ nte ke iyenam enyịn mmọ ẹfọn.’ Kiet ke otu mme ọkọkudọn̄ọ ẹmi ama onyịme ye esịt akpanikọ ke ndụn̄ọde ẹkenamde ete: “Ami n̄kemeke ndidọhọ ke ẹyekọk kpukpru mbon udọn̄ọ oro nnyịn ibọn̄de akam inọ. Enye ọkọn̄ọ ke mbuọtidem mmọ. Edieke owo onịmde ke akpanikọ, ẹyekọk enye.” Enye ọkọdọhọ ke edikpu ekededi ndikọk owo oto ntak unana mbuọtidem ke n̄kan̄ owo udọn̄ọ. Nte ededi, nte nnyịn ikokụtde ke mbemiso, ti ete ke Jesus ọkọdọhọ ke edikpu ndikọk owo oto unana mbuọtidem ke n̄kan̄ ọkọkudọn̄ọ!
Ọkọkudọn̄ọ efen ama ọn̄wọn̄ọ ndikọk cancer ye akpauben̄. Nso ikotịbe? Nte ekemde ye magazine Veja, “un̄wọn̄ọ oro, nte an̄wan̄ade, ikosụho.” Ndien kpan̄ utọn̄ ke usụn̄ nte eren oro akanamde n̄kpọ: “Ke se ikperede ndisịm hour iba, [ọkọkudọn̄ọ mbuọtidem oro] ama ọkwọrọ ikọ, ọbọn̄ akam, ofiori n̄kpo, ọkwọ ikwọ ọnọ otuowo—idem ọtọde owo ita, ye ekikere edibịn mme demon oro ẹdụn̄de ke idem mme anam-akpanikọ nduọn̄ọ. Ke akpatre, enye ama otop tai ye ukwọhọdeinua esie ọnọ otuowo oro ẹkenen̄erede ẹkop idatesịt onyụn̄ ada usan etịbe asan̄a mmọ ke iso man ọbọ ‘mme enọ imaesịt.’” Jesus ye mme apostle esie ikedehede iyom okụk ke ẹnamde mme utịbe utịbe ukọkudọn̄ọ, mmọ ikonyụn̄ idehede ibuana ke mme utọ esen esen edinam ntre.
Nte an̄wan̄ade, ndien, mme utọ ọkọkudọn̄ọ mbuọtidem eyomfịn oro inamke se Jesus akanamde. Ndien ọsọsọn̄ ndikụt nte ke Abasi okponyịme se mmọ ẹnamde. Nte ededi, nte enye onyịme utịbe utịbe ukọkudọn̄ọ ekededi mfịn? Mîdịghe nte usụn̄ ekededi odu oro mbuọtidem nnyịn ekemede ndin̄wam nnyịn ke ini udọn̄ọ omụmde nnyịn m̀mê mbonima nnyịn?