N̄kpọ-ata Oro Odude ke Ndikwọrọ Ikọ ke Kiet ke Otu N̄kponn̄kan Esụkmbehe ke Ererimbot
ROTTERDAM, emi odude ke ebiet emi Rhine, kpa akpa Europe emi ẹnamde mbubehe ẹkan, ewetde odụk North Sea, enyene uwọrọiso nte kiet ke otu n̄kponn̄kan esụkmbehe ke ererimbot. Ye nsụn̄ikan̄ ẹmi n̄kpọ nte nsio nsio usiakifia 500 ẹnyenede ẹsidide ẹdidian mi, Rotterdam enyene nnennen ebuana ye mme itiembehe ẹwakde ẹbe 800 ke ofụri ererimbot. Enye ke akpanikọ edi esụkmbehe ọnọ ofụri ererimbot.
Nte ededi, esụkmbehe obio Netherlands emi ebịghide ke isua 650 mi idịghe sụk itiembehe inọ mme nsụn̄ikan̄ kpọt. Enye n̄ko edi ebiet emi mme owo ẹsisobode. Uwak mme awat nsụn̄ikan̄ ẹmi ẹtode ke kpukpru itụn̄ ererimbot ẹsibehe mi ofụri okoneyo ye uwemeyo. Mme awat inyan̄ ẹmi ibọhọke ntịn̄enyịn Mme Ntiense Jehovah ke Netherlands. Ukem nte Mme Ntiense ke mme ebiet efen, mmọ ẹyom mme usụn̄ ndikwọrọ mfọnn̄kan mbụk ke ererimbot—nnọ kpukpru orụk owo, esịnede mme awat nsụn̄ikan̄—nte ke Obio Ubọn̄ Abasi eyesọp ndinam isọn̄ akabade edi Paradise.—Daniel 2:44; Luke 23:43; 1 Timothy 4:10.
“Utom Isụn̄utom ke Isio Isio Usụn̄”
Ke ndusụk isua ẹmi ẹkebede, Watch Tower Society ke Netherlands ama eben̄e mme ọkwọrọikọ uyọhọ-ini, m̀mê mme asiakusụn̄ 6, ndinam utom to ke nsụn̄ikan̄ sịm nsụn̄ikan̄ ke ofụri esụkmbehe Rotterdam. Mme asiakusụn̄ ẹmi ẹma ẹsọsọp ẹda ifet emi ẹnam n̄kpọ ye ọkpọsọn̄ udọn̄. Mmọ ẹma ẹbọ ntọt ẹto ufọkutom emi esede n̄kpọ aban̄a esụkmbehe oro, ẹnamde ndụn̄ọde ẹban̄a mme itiembehe nsụn̄ikan̄ ẹmi, ndien ke mîbịghike ẹma ẹdikụt ẹte ke mmimọ imenyene utom emi odoride ata.
Meinard, emi anamde ndutịm ọnọ utom ukwọrọikọ ke itiembehe nsụn̄ikan̄ emi ọdọhọ ete, “Enye etie nte utom isụn̄utom ke ukpụhọde usụn̄.” Nso ke ikọ esie ọwọrọ? “Nte ido edide isụn̄utom esisan̄a anyanusụn̄ ndika mbịne mme owo, edi ke eke nnyịn mme owo ẹmi ẹsito anyanusụn̄ ẹsan̄a ẹbịne nnyịn.” Enye adian do ete, “efakutom ukwọrọikọ nnyịn aka nditie nte ofụri ererimbot nte afo ekemede ndikụt.” N̄wedisua Rotterdam Europoort eke 1985 eketịn̄ ete ke 1983, kpa isua oro mme asiakusụn̄ ẹmi ẹketọn̄ọde akpan utom emi, nsụn̄ikan̄ 30,820 ẹmi ẹtode nsio nsio idụt 71 ẹma ẹdidian ke esụkmbehe Rotterdam. Oro edi eke ofụri ererimbot!
Nte odotde, “mme isụn̄utom esụkmbehe”—nte mme awat nsụn̄ikan̄ ke mîbịghike ẹketọn̄ọde ndikot mme asiakusụn̄ ẹmi—n̄ko ẹma ẹwụt edu ofụri ererimbot. Geert, Peter, ye n̄wan esie, Karin, ẹdi mbon Netherlands; Daniël ye Meinard ẹketo Indonesia; ndien Solomon edi owo Ethiopia. Mmọ ndidi mbon Europe, Asia, ye Africa ama an̄wam ndikan mme mfịna usem itiaita, edi man ẹkụt unen ke utom emi, mmọ ẹma ẹnyene mme ubiọn̄ọ efen ndikan.
“Ufọk Abasi Uwat Enan̄ukwak”
Peter, kpa akani awat nsụn̄ikan̄ emi edide isua 32 ke emana ọdọhọ ete, “Afo ukemeke ndikam ndụk itie ubehe nsụn̄ikan̄, ndọk obukpọk mbenesụk, nnyụn̄ ndụk nsụn̄ikan̄. Ana afo enyene n̄wed unyịme emi eseutom ọnọde.” Oro ọwọrọ n̄wed unyịme ndidụk mme itie ubehe nsụn̄ikan̄ ye n̄wed unyịme ndidụk nsụn̄ikan̄. Peter afiak eti ete, “Ekedi ọkpọsọn̄ ndutịm oro awakde n̄kukọhọ, edi ke nnyịn ima ikọbọ n̄wed unyịme itiaita oro ẹdiande foto nnyịn ẹnyụn̄ ẹfịkde idiọn̄ọ ukara, nnyịn ima iben̄e idem ndinam ofụri ukeme nnyịn.” Mmọ ẹma ẹbahade itiembehe nsụn̄ikan̄ emi ọniọn̄de ke itiat 23 mi ẹsịn ke ikpehe ita, emi asiakusụn̄ iba ẹsede ẹban̄a ikpehe kiet kiet.
Nte ededi, didie ke mbufo ẹkenam n̄kpọ ye uwak usem oro mme awat nsụn̄ikan̄ ẹmi ẹtode ata ediwak idụt mi ẹsemde? Idem okposụkedi mme asiakusụn̄ ẹmi ẹkekamade mme n̄wed Bible ke mme usem 30 ẹnyụn̄ ẹbiomde adan̄a ediwak ibat nte mmọ ẹkekeme ke enan̄ukwak mmọ, akanam itiehe nte se ẹnyenede ekem. Solomon emi edide isua 30 ke emana ama obụk ye inua imam ete, “Afo ukemeke ndifiọk nnennen m̀mê ewe usem ke afo ediyom. Ediwak ini mme awat nsụn̄ikan̄ ẹsiyom mme n̄wed ke usem oro afo mûkamake, ndien ekem ẹdọhọ ke nsụn̄ikan̄ mmimọ ọmọn̄ adianade ke hour ita m̀mê n̄kpọ ntre.” Sia mîkoyomke ndikpu mme awat nsụn̄ikan̄ ẹmi, kiet ke otu mme asiakusụn̄ ẹmi ama ọsọsọp aka, akatan̄ nnennen n̄wed oro ẹkeyomde, afiak ọsọp edi, onyụn̄ edikpọn̄ ọnọ mme awat nsụn̄ikan̄ ẹmi ẹkenyenede udọn̄ mi. Peter ọdọhọ ete, “Ke ini ukem mfịna emi akadahade ada ke ini ikọkwọrọde ikọ ke ikpehe itiembehe nsụn̄ikan̄ oro ẹkemede ndida hour ita ndiwat ke enan̄ukwak nsịm, ama ana in̄wan̄în̄wan̄ nte ke nnyịn imoyom mme usụn̄ efen ndise mban̄a n̄kpọ emi.”
Usen kiet ndusụk Mme Ntiense oro ẹdụn̄de ke n̄kann̄kụk itiembehe nsụn̄ikan̄ emi ẹma ẹnọ mme asiakusụn̄ ẹmi ukpatn̄kpọ iba ẹmi enan̄ukwak ẹsidụride, kiet kiet ebietde besịn ke udomo. Mme asiakusụn̄ ẹmi ẹma ẹyọhọ mme ukpatn̄kpọ ẹmi ye mme n̄wed ke kpukpru usem oro ẹkedude, ẹnyụn̄ ẹyịri mmọ ke enan̄ukwak mmọ, ẹnyụn̄ ẹnam isan̄ ẹka itiembehe nsụn̄ikan̄. Ibịghike mme owo ẹdiọn̄ọ mme ukpatn̄kpọ ẹmi. Kiet ke otu mme asiakusụn̄ ẹmi ọdọhọ ete, “Mmọ ẹkabade ẹdi se ẹdade ẹdiọn̄ọ nnyịn. Ke ini ekpeme inuaotop okụtde nnyịn idide, enye eyeberede usụn̄, ofụn̄ ubọk ọnọ nnyịn ndibe ndụk, onyụn̄ ofiori ete: ‘Ufọk Abasi uwat enan̄ukwak ẹka oko!’” Ke mme ini efen, ke ini ekpeme inuaotop okụtde nte “ufọk Abasi uwat enan̄ukwak” ẹwatde ẹdi n̄kan̄ esie, enye eyeberede inuaotop onyụn̄ ofiori ete: “Nsụn̄ikan̄ mbon Poland iba ye nsụn̄ikan̄ mbon China kiet ẹdu ke esụk!” Utọ akpan ntọt oro esin̄wam mme asiakusụn̄ ẹmi ndidụk nsụn̄ikan̄ ye mme n̄wed ke nnennen usem. Edi ana mmọ n̄ko ẹka ke nnennen ini. Ntak-a?
Edika ke Ekemini ye Ekemini Etop
Mme asiakusụn̄ ẹmi ẹkeme ndinyene nneme ye mbonutom nsụn̄ikan̄ n̄kukụre ke ekpri ini nduọkodudu usenubọk ye uwemeyo mîdịghe ke ini udia uwemeyo mmọ. Mme etemudia, nte ededi, ẹnyene nsio nsio ini utom, ẹnyụn̄ ẹkeme ndikụt etubom nsụn̄ikan̄ ye mme akamautom eken ke ini ekededi ke usen. Akande oro, mme asiakusụn̄ ẹma ẹfiọk ẹte ke nsụn̄ikan̄ mbon Britain ẹmi ẹdiande ke Rotterdam ẹsinam n̄kpọ etiene ini mbon Britain (emi adade hour kiet okpụhọde ye ini mbon Netherlands), man mbonutom nsụn̄ikan̄ mmọ ẹwọrọ ẹka ubetudia ke ini mbonutom nsụn̄ikan̄ oro mîdịghe mbon Britain ẹfiakde ẹka utom. Nte an̄wan̄ade, ye asiakusụn̄ oro anamde utom ke itiembehe nsụn̄ikan̄, n̄kanika ubọk oro ẹkemede ndiberi edem edi se ẹyomde.
Nte ededi, nte mme awat nsụn̄ikan̄ ẹmi ẹsinyịme ndida ini nduọkodudu mmọ nnyene nneme Bible? Geert emi edide isua 31 ke emana ọdọhọ ete, “Ke ofụri ofụri, mmokụt mmọ nte mmọemi ẹnyenede in̄wan̄în̄wan̄ esịt ẹban̄a etop Obio Ubọn̄. Iso-ọfọn emi ekeme ndidi ke ntak oro mmọ ẹkụtde ke akpa itie nte mme ukara owo ẹkpude.” Ke uwụtn̄kpọ, ndusụk mme awat nsụn̄ikan̄ ẹma ẹsian Geert ẹte ke eboho ibokpot emi mmimọ ikosion̄ode ibọn inọ mme akpa ọ-biọn̄ ẹtode Ethiopia ẹkesụk ẹbobono do ke esụk ke ini mmimọ ikafiakde idika esụkmbehe oro, etisịm adan̄aoro ibokpot oro ẹma ẹbiara eku ẹnyụn̄ ẹnam idụn̄ do. Geert ọbọrọ ete, “Mmosụk nse ntak ediwak mme awat nsụn̄ikan̄ ẹduọkde idotenyịn ke ukaraidem. Ntre un̄wọn̄ọ Bible oro edide ukara kiet ndidu nnọ ofụri ubonowo edemede mmọ udọn̄.”
Peter onyịme emi. “Etubom nsụn̄ikan̄ kiet edide owo Germany ọkọdọhọ ete ke isua duop ẹmi ẹkebede mbonutom nsụn̄ikan̄ imọ ẹkpekesio mi ke nsụn̄ikan̄ ẹduọk, edi mme ukpụhọde idaha eke ererimbot mfịn ama edemede mmọ udọn̄ ke ekemini etop Bible.” Etemudia kiet ke nsụn̄ikan̄ mbon Korea ama obụk ete ke ini ekọn̄ Iran ye Iraq, enyịmikan̄ ama editọ moto ekọn̄ oro imọ ikanamde utom ke esịt onyụn̄ obubede ikan̄ ke Persian Gulf. Enye ama ọn̄wọn̄ọ ete ke edieke imọ idude uwem, imọ iyeyom Abasi. Enye ama ọbọhọ. Ke ini mme asiakusụn̄ ẹmi ẹkesobode enye ke ukperedem ke Rotterdam, enye ama oyom kpukpru n̄wed usem Korea oro mmọ ẹkekemede ndida nsọk enye.
Ata ediwak nsụn̄ikan̄ ẹsidu ke itiembehe nsụn̄ikan̄ ke ediwak usen. Emi esinọ mme asiakusụn̄ ẹmi ifet ndifiak n̄ka utịm ikaba, ikata, m̀mê awakde akan oro man ẹkeka iso ke nneme Bible mmọ ke ini utom ama akasuana. Edi, ke ini engine nsụn̄ikan̄ enyenede mfịna, enye ekeme ndikaiso ndu do ke urua ita. Asiakusụn̄ oro ke mbubru ama asak onyụn̄ ọdọhọ ete, “Oro ifọnke ye usiakifia oro, edi ọfọn ye utom nnyịn.” Ndien, adianade ye edikaiso nnyene nneme ke Bible, mme asiakusụn̄ ẹmi ẹnam ndutịm n̄ko ndiwụt kiet ke otu ndise N̄ka, “The Bible—The Book for This Generation,” ke ubetudia mmọ. Ndusụk mme awat nsụn̄ikan̄ n̄ko ẹma ẹdidụk mme mbonoesop ke ediwak otu usem esenidụt eke Mme Ntiense Jehovah ke Rotterdam. Emi esibịghi tutu ẹdiọn̄ engine. Ekem eyekịbi Bible. Ẹyetat urụk nsụn̄ikan̄, ndien nsụn̄ikan̄ eyesop ke itiembehe nsụn̄ikan̄—edi isopke ke ekikere mme asiakusụn̄ ẹmi.
Mme Mbụk Awat Nsụn̄ikan̄ Ẹmi Ọnọde Nsịnudọn̄
Ebede ke enyịn̄ oro ẹwetde ke n̄wedmbụk n̄kpọntịbe mîdịghe ke kọmputa itieutom oro esede n̄kpọ aban̄a itiembehe nsụn̄ikan̄ emi, mme asiakusụn̄ ẹmi ẹnamde utom ke itiembehe nsụn̄ikan̄ mi ẹyefiọk nsụn̄ikan̄ emi odụkde-dụk edi ye oro ọwọrọde-wọrọ, emi mmọ ẹkekade ẹkese. Ndondo oro kiet ke otu mmọ afiakde odụk edi, mme asiakusụn̄ ẹmi ẹsinyene udọn̄ ndika n̄kese mme awat nsụn̄ikan̄ ẹmi man ẹkefiọk se ikotịbede tọn̄ọ nte mmọ ẹkedi do akpatre. Nso mme ọnọ-nsịnudọn̄ mbụk ke mme awat nsụn̄ikan̄ ẹmi ẹsibụk ntem!
Awat nsụn̄ikan̄ kiet ama ayak n̄wed oro Afo Emekeme Ndidu Uwem ke Nsinsi ke Paradise ke Isọn̄ ọnọ nsan̄autom nsụn̄ikan̄ esie ition ke ini nsụn̄ikan̄ esie ama akadianade odụk akpa, ndien mmọ mbitiokiet ẹma ẹnyene ukpepn̄kpọ Bible. Enye n̄ko ama omụm ibuot oro etịn̄de n̄kpọ aban̄a uwem ufọk esịn ke kaset onyụn̄ afiak ebre enye ke ubetudia ke ufọn kpukpru mbonutom nsụn̄ikan̄. Ke esịt nsụn̄ikan̄ efen, awat nsụn̄ikan̄ efen emi akakade ekese Ufọkmbono Obio Ubọn̄ kiet ke n̄kpet n̄kpet esụkmbehe Antwerp ama adian ọfọn̄ emi ẹwetde mme ikọ ẹmi “Kingdom Hall of Jehovah’s Witnesses” ke ikpọ abc ke ibibene ubetudia. Ekem enye ama okot mbonutom nsụn̄ikan̄ ẹdi do ke ini enye onịmde mbono ukpepn̄kpọ Bible. Mbemiso adianarede ọfọn̄ emi osio, enye ama ọnọ mbonutom nsụn̄ikan̄ emi ikot ndidụk udiana mbonoesop. Ke urua oro etienede, ọfọn̄ emi ye mbonutom nsụn̄ikan̄ ẹmi ẹma ẹfiak ẹdidu ke itie.
Mme asiakusụn̄ ẹmi ẹma ẹkụt n̄ko ẹte ke ndusụk mme awat nsụn̄ikan̄ ẹmi isimenke n̄wed mmọ ikesịn ke itie ubon n̄wed. Meinard obụk ete, “Ke ini nnyịn ikasan̄ade idụk ekpri ubet Isaac, kpa akamautom ke ufọkutom usuanetop West Africa kiet, ekedi ọkpọsọn̄ n̄kpọ ndikụt n̄kpọitie. Mme magazine, mme n̄wed, ye mme concordance N̄ka ẹkedu ke kpukpru ebiet—ẹkenyụn̄ ẹkekûbọde mmọ ẹnịm.” Isaac n̄ko ama enyene udịm udịm mbume Bible ẹmi enye ekewetde obon, nte enye ekebetde mme asiakusụn̄ ẹmi ndifiak n̄waha.
Nte ededi, ndusụk mme awat inyan̄ isibetke mme asiakusụn̄ ẹmi ẹkaka ẹbịne mmọ. Okoneyo kiet urụk ukopikọ Geert ama osioro uyo ke enye ama okodụk idap.
Geert ama okụni ke adan̄aemi ọfiọn̄ọde ubọk oyom ndimen urụk ukopikọ ete, “Anie owo ke ererimbot ekpededi oro?”
Idara idara uyo ama asian ete, “Mmọkọm-o, emi edi ufan fo!”
Geert ama an̄wana ndikere m̀mê anie ke ekpedi.
Uyo oro ama afiak ọdọhọ ete, “Ufan fo emi odude ke nsụn̄ikan̄.”
Geert ama ọdọhọ ete, “N̄kanika ita usenubọk edi emi!”
“Ih, edi afo ọkọdọhọ mi n̄kot fi ndondo oro nsụn̄ikan̄ mi afiakde edi Rotterdam. Ntre, ami mi!” Esisịt ini ke oro ebede, Geert ama ọtọn̄ọ isan̄ ndikosobo ufan emi ekenyenede udọn̄ mi ke Ikọ Abasi.
“Duọk Uyo Fo”
Ẹwụt esịtekọm oro ẹnyenede ẹnọ mme n̄wed Bible n̄ko ke mme leta oro mme awat nsụn̄ikan̄ ẹmi ẹsiwetde ẹnọ ẹsọk mme asiakusụn̄ ẹmi. Se itienede mi edi mme ikọ ẹdade ẹto mme leta oro:
‘Ami mma ntọn̄ọ ndikot n̄wed oro Afo Emekeme Ndidu Uwem ke Nsinsi ke Paradise ke Isọn̄ . . . Idahaemi ami mmọfiọk ediwak n̄kpọ oro mmen̄kọfiọkke ke mbemiso. Ami mmodori enyịn ke nsụn̄ikan̄ nnyịn eyefiak edi Rotterdam.’—Angelo.
‘Ami mma n̄kot n̄wed oro, ndien mmọnọ mme mbụme ẹmi ẹsọk fi man afo ọkpọbọrọ mmọ ke mme leta fo.’—Alberta.
‘Idahaemi ami mmesikot Bible kpukpru usen. Ami mmadat esịt ndidi ufan fo. Ndikụt mme ufan oro ẹwụtde mi usụn̄ Abasi edi mfọnn̄kan n̄kpọ oro adade itie ke uwem mi.’—Nickey.
Mme utọ leta oro ẹdemerede owo esịt mi ẹsiti mme asiakusụn̄ ẹmi ẹban̄a se Bible etịn̄de ke Ecclesiastes 11:1 ete: “Duọk uyo fo ke enyọn̄ mmọn̄: koro afo eyekụt enye ke ediwak usen ẹbede.” Mmọ ẹdat esịt akpan akpan ke ini mmọ ẹkopde ẹte ke ndusụk mme awat inyan̄ ẹma ẹwụt nte mmimọ idade inọ Jehovah.
Awat nsụn̄ikan̄ owo Poland, Stanislav, ke uwụtn̄kpọ, ama okop nduaidem aban̄a se enye ekekpepde oto mme n̄wed N̄ka. Enye ama ọsọsọp enyene ekpri itie ubon mme n̄wed Bible ndien, ekpep kpukpru mmọ ke adan̄aemi odude ke inyan̄. Meinard ọdọhọ ete, “Ke ini enye akafiakde ewet nnyịn, enye ama etịn̄ ete ke imọ ima ina baptism.”
Folkert, awat nsụn̄ikan̄ umen owo, ekebemiso okop etop Obio Ubọn̄ ke Rotterdam. Ke kpukpru ọfiọn̄ iba enye ama esifiak edi esụkmbehe onyụn̄ edidu urua kiet ekpep Bible ke ofụri usen itiaba. Ndien, mbemiso enye afiakde adaha isan̄ emi edidade ọfiọn̄ iba efen, mme asiakusụn̄ ẹmi ẹma ẹnọ enye udịm udịm adres Ufọkmbono Obio Ubọn̄ ẹmi ẹdude ke usụn̄ uwat esie. Folkert ama esiwaha mme ufọkmbono ẹmi onyụn̄ okop nduaidem oto ufiop ufiop usụn̄ oro ẹkedarade enye. Ikebịghike, awat nsụn̄ikan̄ emi ama ana baptism ndien idahaemi ke anam utom Jehovah ifịk ifịk.
Mike, etubom mme An̄wana-ekọn̄-mmọn̄ mbon Britain, ama osobo ye Mme Ntiense ke mbemiso ndien ke ekesikpep Bible ke ini odude ke inyan̄ibom. Ini kiet, ke ini ekpri nsụn̄ikan̄ ekọn̄ mmọn̄ emi enye anamde utom ke esịt akadiande ke Rotterdam, enye ama awat ke mbụn̄-ndọn̄ enan̄ukwak esie aka Ufọkmbono Obio Ubọn̄. Ima ye edidianakiet oro enye okokụtde ama otụk enye esịt ndien enye ama asian mme ufan ete ke imọ imebiere ndikpọn̄ utom imọ. Okposụkedi akayakde isua inan̄ kpọt enye ndibọ uwak okụk ukpọn̄ utom esie, enye ama ọsọn̄ọ ada ke ubiere esie onyụn̄ ana baptism ke ukperedem.
Meinard ọdọhọ ete: “Udọn̄ oro Mike, Stanislav, Folkert, ye mbon eken ẹkenyenede ndinam n̄kpọ Jehovah ama onụk nnyịn ndikaiso ndụn̄ọde esụkmbehe oro nnyom mme awat nsụn̄ikan̄ ẹmi ẹtiede nte mmọ.”
Nte Afo Emekeme Nditiene Mbuana?
Ke ẹfiakde ẹse edem ke se ikperede ndisịm isua duop ẹmi ẹkwọrọde ikọ ke kiet ke otu n̄kponn̄kan esụkmbehe ke ererimbot, “mme isụn̄utom esụkmbehe” itiokiet ẹmi ẹnyịme ye esịt kiet ẹte—utom emi ekedi kiet oro odoride ata edi asan̄ade ye utịp. Meinard etịn̄ ibio ibio ete, “Ke ikụrede ukwọrọikọ ke usen kiet kiet, nnyịn iyewat inyọn̄ ufọk ye ekikere nte ke ndusụk ke otu mme awat nsụn̄ikan̄ ẹmi ke ẹbebet nnyịn ndifiak n̄waha.”
Nte ekeme ndidi odu mme awat nsụn̄ikan̄ ẹmi ẹbetde afo ndika n̄kese mmọ ke esụkmbehe ke n̄kann̄kụk mbufo? Iso-ọfọn mbiowo ke esop mbufo ẹkeme ndinam ndutịm man afo enyene udeme ke utom emi odoride ata mi edi ọnọde utịp.
[Ekebe ke page 20]
NDINYANADE NSỊM EFAKUTOM ẸMI ẸDORIDE UKPAN
Isua kiet ke ndondo emi, nsụn̄ikan̄ ẹwakde ẹbe 2,500 ẹmi ẹtode mme idụt ẹmi ẹdoride ukpan ke utom Mme Ntiense Jehovah ẹma ẹdidian ke Rotterdam. Ndien mme asiakusụn̄ esụkmbehe emi ẹma ẹda oro nte ifet ndinyanade nsịm mme efakutom ẹmi ye etop Bible.
Ke kiet ke otu akpa nsụn̄ikan̄ mbon Asia oro mmọ ẹkekade ẹkese, mme asiakusụn̄ ẹmi ẹma ẹnịm kpukpru n̄wed 23 oro mmọ ẹkekamade, anamde esịt ayat ndusụk mbonutom nsụn̄ikan̄ koro mmọ mîkekemeke ndinyene idem kiet. Eyeneren kiet emi anamde utom ke ufọk utemudia ke nsụn̄ikan̄ mbon Asia efen ama owụt ata mbufiọk. Ke ama ọkọbọ asiakusụn̄ n̄wed kiet, enye ama ada babru awan̄ n̄wed oro onyụn̄ ewet adres esie ada afiak ọsọk asiakusụn̄ oro. N̄kpọ emi ama an̄wan̄a asiakusụn̄ oro. Ekedi ata n̄kpọndịk eyeneren emi ndikama n̄wed oro nsan̄a. Ke kpasụk usen oro ẹma ẹnọ enye ke post aka Far East.
Awat nsụn̄ikan̄ kiet ama asan̄a ke nsụn̄ikan̄ kiet otode Africa edi ye mme udịm enyịn̄ n̄wed oro Mme Ntiense ke obio esie ẹkeyomde. Ọtọn̄ọde ke ini oro kaiso, ekpatisan̄ awat nsụn̄ikan̄ emi ama esiyọhọ ye mme n̄wed, ini ekededi oro enye afiakde ọnyọn̄ ufọk. Awat nsụn̄ikan̄ emi otode idụt Africa efen ama okụt edikpu idiọk idiọk ke ini asiakusụn̄ emi esikpepde n̄kpọ ye enye ọkọnọde enye n̄wed Ndinam Uwem Ufọk Fo Enem ita kpọt. Awat nsụn̄ikan̄ oro ama ọduọn̄ọ ubọk ye unana idotenyịn onyụn̄ ofiori ete, “Oro ikemke n̄kpọ ndomokiet! Nditọete ko ke ufọk ẹyom n̄wed 1,000!” Mbak afanikọn̄, mme asiakusụn̄ oro ẹma ẹben̄e enye ẹte ada idem 20 ke ini kiet kiet.
Iso-ọfọn enyeemi otụkde owo esịt akan ekedi ini emi mme asiakusụn̄ ẹmi ẹkekopde ẹte ke nsụn̄ikan̄ ama oto idụt oro ẹkekọbọde Mme Ntiense kaban̄a se mmọ ẹnịmde ke akpanikọ edibehe, ye nte ke ediwak mmọ ẹma ẹtaba utom ye inyene mmọ. Ke ini mmọ ẹkefiọkde ẹte ke etemudia emi odude ke nsụn̄ikan̄ oro edi Ntiense, mmọ ẹma ẹkot etubom nsụn̄ikan̄ oro ẹnyụn̄ eben̄e enye ndiyak ẹnọ mme n̄kpọ un̄wam asan̄a ke nsụn̄ikan̄ esie. Etubom nsụn̄ikan̄ oro ama onyịme, ndien usen ifan̄ ke oro ebede, ẹma ẹnọ ikpọ ekpatọfọn̄, ikpaukot, ye mme n̄kpọ eken ke itie ikie ẹsọk Mme Ntiense ke idụt oro.
[Ekebe ke page 21]
NDIKWỌRỌ IKỌ TO KE NSỤN̄IKAN̄ SỊM NSỤN̄IKAN̄—EKIKERE AN̄WAN
Karin, emi ekedide n̄kukụre eyenan̄wan ke otu mme asiakusụn̄ oro eti ete, “Ke akpa ini, ami mma mmen̄e nditiene Peter, koro mma n̄kop ediwak mbụk nte ke mme awat nsụn̄ikan̄ ẹsiwak ndisọn̄ ido ẹnyụn̄ ẹkpa mmịn. Nte ededi, ami mmedikụt nte ke ediwak mmọ ẹtie ufan ufan. Ediwak ini, ke ini awat nsụn̄ikan̄ ọfiọkde ete ke nnyịn idi mme ọdọ ndọ, enye eyesio ndise emi n̄wan ye nditọ esie ẹdade onyụn̄ ọtọn̄ọ nditịn̄ n̄kpọ mban̄a ubon esie. Ke usụn̄ oro, nnyịn ima inịm uwak n̄wed Ndinam Uwem Ufọk Fo Enem.”
Ndisan̄a nte ebe ye n̄wan n̄kese mme nsụn̄ikan̄ amanam edi mmemmem n̄kpọ n̄ko ndisobo ye iban mbonutom nsụn̄ikan̄ ye iban eken ẹmi ẹnamde utom ndusụk ini nte nurse. Karin ọdọhọ ete, “Ediwak ini mmọ ẹsifefehe isenowo, edi ke ini mmọ ẹkụtde mi, mmọ ẹsitịm ẹma ndibuana ke nneme.”
Nso ikedi n̄kponn̄kan n̄kpọ-ata ke utom an̄wan emi? Karin ọbọrọ ete, “Mme eberi ẹmi ẹdade urụk ẹnam. Ami mma nsua utọ mfefere n̄kpọ oro.” Nte enye ama akan ndịk esie? Karin ọbọrọ ye inua imam ete, “Ih, ini kiet ke ini n̄kemen̄ede ndidọk kiet, otu mme awat nsụn̄ikan̄ ẹmi ẹtode Paraguay ẹma ẹda ẹse ẹnyụn̄ ẹfiori ẹte: ‘Afo emekeme ndidọk enye. Kam buọt idem ye Abasi.’ Nte ededi, ke mmọ ẹma ẹketịn̄ ntre ẹma, ami n̄kenyeneke n̄kpọ efen ndinam akan ndidọk.” Edima ebe esie ọdọhọ ete: “Isua inan̄ ye ekese eberi ẹdade urụk ẹnam ke ukperedem, enye idahaemi esidọk ukem nte awat nsụn̄ikan̄.”
Karin ye ebe esie, Peter, ẹma ẹdụk otu nditọ ufọkn̄wed ọyọhọ 89 eke Watchtower Bible School of Gilead ke United States. Ke September 28, 1990, mmọ ẹma ẹkpọn̄ ẹka obufa itieutom mmọ, Ecuador, kpa idụt emi enyenede esụkmbehe. Mmọ ẹkpenyene ndikop inem do nte ẹdu ke ufọk mmọ.
[Ekebe ke page 22]
NTE AFO EDI AWAT NSỤN̄IKAN̄?
Nte afo omoyom ndidụk mbonoesop Ikọmbakara eke Mme Ntiense Jehovah ke adan̄aemi nsụn̄ikan̄ fo adiande ke kiet ke otu n̄kponn̄kan esụkmbehe oro odude ke ererimbot? Do nam udịm udịm adres Ufọkmbono Obio Ubọn̄ ẹmi ye mme ini mbonoesop eke ndondo emi ekpere fi ubọk:
Hamburg, Schellingstr. 7-9; Saturday, 4:00 p.m.; phone: 040-4208413
Hong Kong, 26 Leighton Road; Sunday, 9:00 a.m.; phone: 5774159
Marseilles, 5 Bis, rue Antoine Maille; Sunday, 10:00 a.m.; phone: 91 79 27 89
Naples, Castel Volturno (40 km north of Naples), Via Napoli, corner of Via Salerno, Parco Campania; Sunday, 2:45 p.m.; phone: 081/5097292
New York, 512 W. 20 Street; Sunday, 10:00 a.m.; phone: 212 627-2873
Rotterdam, Putsestraat 20; Sunday, 10:00 a.m.; phone: 010-41 65 653
Tokyo, 5-5-8 Mita, Minato-ku; Sunday, 4:00 p.m.; phone: 03-3453-0404
Vancouver, 1526 Robson Street; Sunday, 10:00 a.m.; phone: 604-689-9796