Ido Ukpono ‘Nyoyok Mbuọtidem’

“Ukeme oro Ido Ukpono Mormon esịnde ndidọn̄ n̄kam ke mme ọkpọmiọk ọkpọmiọk idụt ukara mbio obio ye ke mme n̄kaowo oro kpukpru n̄kpọ ẹnyenede ukara edi n̄kpọ n̄kpaidem.” Ntre ke The Wall Street Journal eketịn̄ ke ini ukara Hungary ọkọnọde Church of Jesus Christ of Latter-day Saints ọyọhọ ọyọhọ unyịme. Didie ke ufọkederi emi ekenyene emi? Nte Journal oro ọdọhọde, “Ukpọhọde idịghe ke sụk uwak ibat owo oro ẹmande ẹdọn̄ ke ido ukpono Mormon m̀mê ke utọk utọk usụn̄ usuan gospel mmọ. Utu ke oro, enye edi nyoyok edinam oro mmọ ẹdade ẹsịn ke mbuọtidem mmọ.” Didie ke edi ntre?

Ke etịn̄de aban̄a iduọk ini oro okodude mbemiso mme ukpụhọde ukaraidem eke ndondo emi ke Edem Usiahautịn Europe, Journal oro ọkọdọhọ ete: “Ke adade otu n̄kaikwọ ye unek ẹtode Brigham Young University, mbon Mormon ẹdomo ndikan ufịk ye unana edidianakiet oro mme isụn̄utom ẹkesiwakde ndisobo ke ekese idụt Communist.” N̄kaikwọ mmọ ẹma ẹka Romania, Czechoslovakia, Hungary, Poland, Russia, ye China, ọkọrọ ye Saudi Arabia, Libya, Egypt, Jordan, Somalia, ye Israel. Akande oro, “ẹkama inyene Ufọkederi Mormon nte n̄kpọ ndida mbe ndụk obio ukara Marxist ye mme Idụt oro Ẹtọn̄ọde-tọn̄ọ Ntatenyịn.” Edisịbe mmọn̄ ye edidọk obube mmọn̄ ẹsịne ke otu utom oro ẹdade etịbe mbon Mormon ẹn̄wam.

Ke ererimbot uma-mbre ye uyom-okụk eke eyomfịn, idịghe n̄kpọ n̄kpaidem nte ke utọ ikwọ ye unek oro ye edida okụk nnọ un̄wam man ẹnyene mme mbet emenyene akwa odudu. (2 Timothy 3:2, 4) Edi uyo Eti Ekpemerọn̄, Jesus Christ, esidụri ata mbon mbieterọn̄ ada. (John 10:27) Ntak edi oro, ke ini enye ọkọnọde mme anditiene enye uyo ete “ẹkenam kpukpru mme idụt ẹdi mbet,” enye ikọdọhọke ite ẹnam ntre ke usụn̄ ekededi m̀mê ke ekọmurua ekededi edi ke ‘ndikpep mmọ ẹnam kpukpru n̄kpọ eke enye eketemede.’ (Matthew 28:19, 20) Ke ndinam utom emi, ufan̄ idụhe nditop mme edumbet Bible nduọk.