Nte Afo Omowụt Esịtekọm Aban̄a Esop Jehovah Eke Isọn̄?
SE ATA ediye, nnyayama daimọn, ndien nso ke afo okụt? N̄kpọuto oro ke akpanikọ edide ediye n̄kpọ. Idahaemi se daimọn oro ke n̄kpọ-use-n̄kpọ emi anamde n̄ken̄e n̄kpọ ẹkponi, ndien nso ke afo okụt? Anaedi n̄kpri unan, mme nsiaha, ye mme n̄kpọ eken ẹdu, m̀mê mme ndo eken.
Ndi afo eyebiat m̀mê otop daimọn oro ọduọk n̄kukụre ke ntak nte enye etiede ke n̄kpọ-use-n̄kpọ emi anamde n̄ken̄e n̄kpọ ẹkponi? Ke akpanikọ afo udutopke enye uduọk! Kam yak n̄kpọ-use-n̄kpọ emi anamde n̄ken̄e n̄kpọ ẹkponi nịm, ndien afo emekeme ndisụk n̄wụt esịtekọm mban̄a uyai ye utịbe utịbe uyama oro anamde enye ọwọrọ ada ke otu n̄kpọuto eken.
Ukem nte daimọn, esop Jehovah eke isọn̄ ọwọrọ ada ke ediwak usụn̄. Idụhe esop efen ekededi ke isọn̄ oro adarade n̄kpet n̄kpet itie ebuana ye Andibot. Ke n̄wed oro ekewetde ọnọ mme Christian akpa isua ikie oro ẹyetde aran, oro ẹkenyenede idotenyịn uka heaven, apostle Peter ama etịn̄ aban̄a san̄asan̄a itie ebuana emi. Enye ọkọdọhọ ete: “Mbufo ẹdi ubon eke ẹmekde, ẹdi mme oku edidem, ẹdi edisana obio, ẹdi ikọt eke Abasi onịmde ọnọ Idemesie.” (1 Peter 2:9) Mfịn akwa otuowo eke “mme erọn̄ en̄wen,” ye idotenyịn nsinsi uwem ke isọn̄, ẹmediana ye nsụhọ eke “edisana obio” oro ke ndituak ibuot nnọ Abasi. (John 10:16) Ke edidianakiet otu mbiba ẹmi ẹnam esop oro ọwọrọde ada nte ediye ye nnyayama utịbe utịbe n̄kpọuto.
Fep Ndise Mmọ En̄wen ye Enyịn Ukụt Ndudue Nnọ
Edi ana nnyịn ifiọk ite ke mme anana mfọnmma owo ẹnam esop ofụri ererimbot emi. Ntre, nso ikpetịbe edieke nnyịn ikpesede enye ke ndamban̄a n̄kpọ-use-n̄kpọ emi anamde n̄ken̄e n̄kpọ ẹkponi? Ih, nnyịn ikpokụt mme ntụhọ unam idiọkn̄kpọ ye mme ndo ke edu uwem mme owo kiet kiet oro ẹdide ubak esie.—Rome 3:23.
Apostle Paul ama onyịme ete ke imọ imenyene mme ndo ntre. Enye ọkọdọhọ ete: “Idiọkn̄kpọ osụk ododu ye ami emi nyomde ndinam nti n̄kpọ.” (Rome 7:21) Kpukpru Christian ẹsisobo ukem en̄wan oro. Kpukpru owo ẹnanam ndudue. Adianade do, awarade-wara m̀mê ebịghide-bịghi ediwak owo ẹsibọ ufen ke ntak ndudue owo en̄wen. Nte nnyịn ikpanana udọn̄ inyụn̄ iduọk idotenyịn ke ini mme ndo ye mme unana mfọnmma ekemmọ mme Christian ayararede? Nte oro okposụhọde esịtekọm oro inyenede inọ esop Jehovah? Ke akpanikọ ikposụhọkede! Utu ke oro, yak idọhọ, nnyịn ikpenyene ndikpọnọde n̄kpọ-use-n̄kpọ emi anamde n̄ken̄e n̄kpọ ẹkponi nnịm, inyụn̄ ifep ndiwụk enyịn nse mme unana mfọnmma mme owo kiet kiet.
N̄wed Abasi abat ediwak edu oro edinamde ẹdiọn̄ọ mmọ oro edisana spirit anamde utom ke idemmọ. Ndusụk mmọ ẹdi “ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem.” (Galatia 5:22, 23) Ke edide isio, mme n̄ka ido ukpono, ukaraidem, ye unyamurua ererimbot emi ẹsiwụt se Bible okotde ubọkutom obụkidem: “usua, ye utọk, ye ufụp, ye iyatesịt, ye ndomoidem, ye ubahade, ye edisiak isio n̄ka, ye udu, ye ediyụhọ mmịn, ye otịme otịme ido, ye mme ido eke ẹtiede ntre.” (Galatia 5:20, 21) Ntre, ukem nte nnyayama daimọn ke otu ikpîkpu itiat, ikọt Jehovah ẹwọrọ ẹda ke ufọt ererimbot oro abiarade ke n̄kan̄ eke spirit.—Matthew 5:14-16.
“Ẹfon Ẹma ke Edinyene Esịt Kiet”
N̄wọrọnda n̄kpọ kiet aban̄ade daimọn edi edidiana oro mme n̄kpri mbak idem esie ẹnen̄erede ẹdiana kiet. Ukem ntre, esop Jehovah eke isọn̄ owụt edidianakiet oro udomo mîdụhe ke ukpepn̄kpọ ye itie nditọete. Mbon oro ẹdide ubak esop oro ẹda item oro ẹkụtde ke Bible ke 1 Corinth 1:10 ẹsịn ke edinam, emi ọdọhọde ete: “Edi mmada enyịn̄ Ọbọn̄ nnyịn Jesus Christ n̄kpe mbufo ubọk, nditọete, nte mbufo kpukpru ẹnyene ikọ inua kiet, ubahade okûnyụn̄ odu ke otu mbufo; edi mbufo ẹtọn̄ọ ntak ẹkabade ẹfọn ẹma ke edinyene esịt kiet ye ekikere kiet.”
Mme Ntiense Jehovah n̄ko ẹmekon̄ ẹbe asari eke orụk ye ntan̄idem eke idụt. Sia ẹnyenede “eti ibuot emi otode ke enyọn̄,” mmọ inamke ‘ubahade ukwan̄ikpe.’ (James 3:17) Nnyịn inọ Jehovah ubọn̄ ke se enye anamde aban̄a emi ke esop oro mme anana mfọnmma owo ẹnamde.
Ke edide isio, magazine oro The Christian Century, ke enemede aban̄a isua 1990, ọkọdọhọ ete ke “etie nte mme n̄ka ido ukpono ye mme ekikere ekpụk ye idụt oro otịmde enyene ebuana ye ukpepn̄kpọ ido ukpono ẹbahade ererimbot ẹkan nte akanam edide. Tọn̄ọ ke India sịm Europe nyụn̄ tọn̄ọ ke Middle East sịm Pacific, ido ukpono adiana kiet ke edinam akpanikọ nnọ ekpụk ye idụt—ediwak ini ye mme utịp usọp usọp ukpụhọde ke n̄kan̄ ukaraidem.” Nte an̄wan̄ade, mbon oro ẹyomde ndinam n̄kpọ Abasi ẹkeme n̄kukụre ndiwọn̄ọde mbịne esop kiet oro enyenede spirit ye edidiọn̄ Jehovah.
‘Mmanam Ọkpọiso Fo Etie Nte Daimọn’
Daimọn edi oto obot n̄kpọ emi ọsọn̄de akan oro owo ọfiọkde. Bible etịn̄ aban̄a edida daimọn n̄wet m̀mê n̄kap mme n̄kpọ oro ẹsọn̄de. (Jeremiah 17:1) Tịmfiọk, n̄ko, ikọ oro Jehovah eketịn̄de ọnọ Ezekiel ete: “Sese, mmanam iso fo ọsọn̄ ekem ye iso mmọ, ye ọkpọiso fo ọsọn̄ ekem ye ọkpọiso mmọ. Mmanam ọkpọiso fo etie nte adamant [“daimọn,” NW] ọsọn̄ akan afransi.” (Ezekiel 3:8, 9) Jehovah ọkọnọ Ezekiel ubiere oro ọsọn̄de nte daimọn oro akanamde enye ekeme nditịn̄ prọfesi nnọ mbon nsọn̄ibuot.—Ezekiel 2:6.
Ukem ntre mfịn, Jehvah ọmọnọ ikọt esie iso oro ọsọn̄de nte daimọn ke ini ẹsobode akwa ubiọn̄ọ. Mme Ntiense Jehovah ẹmeyọ ukpan ẹtode ukara, edinam mbon ntịme, n̄kpa unana ntak, imia, edisịn ke ufọk-n̄kpọkọbi nte mîdotke, ndutụhọ, idem ediwowot. Kpa ye oro, mmọ ẹmewụt mbuọtidem mmọ nte mîsehekede.
“Ikọt Mi Ẹyedat Esịt”
Bible ama ebemiso etịn̄ ọnịm aban̄a ini oro mme owo ẹdinyenede “enyọn̄ enyọn̄ ido uten̄e Abasi” edi isan̄ake n̄kpọ “ye odudu eke odude ke uten̄e Abasi.” (2 Timothy 3:1, 5) N̄wedmbụk n̄kpọntịbe kiet ọtọt ete ke “Mbon Protestant, Roman Catholic ye mme Jew ẹdiọn̄ọ ẹban̄a edisụhọde oro ibat owo osụhọrede” ke mme ufọkederi ye mme synagogue mmọ. Mme Ntiense Jehovah, ke n̄kan̄ eken, ẹdi ifịk ifịk nditọ ukpepn̄kpọ Bible. Ke ibat oro ọkọride-kọri, n̄kpri ye ikpọ, iren ye iban, kpukpru mmọ ẹsidụk ediwak mbonoesop ke urua ke urua. Leta kiet ẹkenọde ẹsọk mme emịn̄ n̄wedmbụk n̄kpọntịbe kiet eketịn̄ aban̄a mmọ ete ke “ido ukpono mmọ edi n̄kpọ oro otịmde ọsọn̄ urua akan oro mmọ ẹnyenede, ndien n̄kukụre se ibehede mmọ edi ndibuana enye ye mmọ en̄wen.”
Utọ edu oro anam esop Jehovah ọwọrọ ada nte ọsọn̄urua daimọn. Ndien ukpono aka ebịne Enyeemi ọsọn̄ọde onyụn̄ ọnọde mme anana mfọnmma owo kiet kiet ndausụn̄ ebe ke edisana spirit esie.
Prọfet Isaiah ama ebemiso etịn̄: “Ntem ke Ọbọn̄ Jehovah ọdọhọ, ete, Sese, ikọt mi ẹyedia n̄kpọ . . . sese, ikọt mi ẹyen̄wọn̄ . . . sese, ikọt mi ẹyedat esịt . . . sese, ikọt mi ẹyekwọ ke idatesịt.”—Isaiah 65:13, 14.
Mfịn nnyịn imokụt edisu oro prọfesi emi osude. Abasi emekpeme ikọt esie ke n̄wọrọnda usụn̄! Ntem, edieke afo abuanade ye mmọ, kûyak etikwo etikwo ekikere ndomokiet ọbọ fi idatesịt fo ọduọk. Se ofụri ofụri idaha nnyụn̄ ti ete: Baba esop kiet efen ke isọn̄ idarake san̄asan̄a ntịn̄enyịn ye ukpeme Abasi. Kûdede utre ndibat ifet fo ndidi ubak esie nte n̄kpọuto.