“Afo Eyedu ye Ami ke Paradise”
NTE enye ọkọkọn̄ọde ke eto n̄kpa, ke ekperede ndikpa ke ọkpọsọn̄ ubiak, abiatibet oro ama eben̄e eren oro ọkọkọn̄ọde enye ke n̄kan̄ ete: “Jesus, ti mi ke adan̄aemi afo edide ndida ubọn̄.” Jesus, idem okposụkedi enye n̄ko ekekperede ndikpa ke ọkpọsọn̄ ubiak, ama ọbọrọ ete: “Ke akpanikọ ke ndọhọ fi mfịn emi, Afo eyedu ye ami ke Paradise.” (Luke 23:42, 43, NW) Nso idotenyịn oro ọnọde ndọn̄esịt ke ẹkenọ eren oro ekekperede ndikpa mi ntem!
Ndi afo, nte ededi, ama okụt nte New World Translation—kpa edikabade oro ẹkotde ẹsịn ke mbemiso ikpehe ekikere—esịnde idiọn̄ọ uduọk ibifịk ke ẹma ẹkebe ikọ oro “mfịn” ke ini enye esịnde ikọ ẹmi Jesus eketịn̄de mi? Emi ọnọ ekikere nte ke idem usen oro enye akakpade, Jesus ama ekeme ndin̄wọn̄ọ uwem ke Paradise nnọ abiat ibet oro. Ke n̄kan eken, The New English Bible esịn idiọn̄ọ uduọk ibifịk ke ikọ Jesus ẹmi ke usụn̄ emi: “Ami ntịn̄ emi nnọ fi: mfịn afo eyedu ye ami ke Paradise.” N̄wakn̄kan ibat edikabade eken ẹnyịme ye The New English Bible, ẹnọde ekikere nte ke Jesus ye abiatibet oro ekekperede ndikpa do ẹma ẹka Paradise kpa ke usen oro. Ntak emi ukpụhọde odude? Ndien ewe idiọn̄ọ uduọk ibifịk inen?
Ke akpanikọ, idiọn̄ọ uduọk ibifịk ikodụhe ke akpa uwetn̄kpọ Bible eke usem Greek. Ntre, ke ini ẹkesiode idiọn̄ọ uduọk ibifịk ẹdi, mme osion̄o Bible ye mme andikabade ẹkenyene ndisịn enye nte akpanikọ Bible an̄wan̄ade mmọ. Ntem, nte akpa edisịn oro enen? Ndi Jesus ye anam idiọk oro ẹkeka Paradise ke usen oro mmọ ẹkekpade?
Baba, nte ekemde ye Bible, mmọ ẹkeka ebiet oro ẹkotde ke usem Greek Haʹdes ye ke Hebrew Sheʹol, mbiba ẹdade ẹnọ udi ofụri ubonowo. (Luke 18:31-33; 24:46; Utom 2:31) Kaban̄a mmọemi ẹdude do, Bible ọdọhọ ete: “Amaedi mme akpa n̄kpa, mmọ ifiọkke baba n̄kpọ kiet . . . Baba edinam, baba uduak, baba ifiọk, baba mbufiọk [idụhe] ke obio ekpo [usem Greek, Haʹdes] emi afo akade do.” Utọ itie oro ikpekemeke-keme ndidi Paradise!—Ecclesiastes 9:5, 10.
Ekedi tutu ke ọyọhọ usen ita ke Jesus ekeset ọwọrọ ke Hades. Ekem, ke se ikperede urua itiokiet enye ama owụt mme anditiene enye idem ediwak ini ke n̄kanade idụt Palestine. Ke kiet ke otu idaha emi, Jesus ama ọdọhọ Mary ete: “Ndọkke kan̄a ntiene Ete.” (John 20:17) Ntre, idem ke ini oro enye ikosịmke kan̄a ebiet ekededi oro ẹkpekemede ndikot Paradise.—Ediyarade 2:7.
Ke ọyọhọ isua ikie ita C. E.—ke ini edibuak ukpepn̄kpọ Ido Ukpono Christ ye akwa ifiọk mbon Greek akatarade usọp usọp—Origen ama ọdọhọ ke Jesus ọkọdọhọ ete: “Mfịn afo eyedu ye ami ke Paradise Abasi.” Ke oyọhọ isua ikie inan̄ C.E., mme ewetn̄wed ufọkederi ẹma ẹfan̄a ẹban̄a edinịm idiọn̄ọ uduọk ibifịk ke ẹma ẹkebe “mfịn.” Emi owụt nte ke ido edikot ikọ Jesus oro edi mbụk anyanini. Enye n̄ko owụt ete idem ke ọyọhọ isua ikie inan̄ C.E., ndusụk owo ẹkekot ikọ Jesus nte ẹsịnde ke New World Translation.
Mfịn n̄ko, okpsosụkedi ediwak mme andikabade ẹsịnde idiọn̄ọ uduọk ibifịk ke Luke 23:43 nte ekemde ye ido ufọkederi, ndusụk ẹsịn idiọn̄ọ uduọk ibifịk nte New World Translation esịnde. Ke uwụtn̄kpọ, ke edikabade eke usem Germany oro, emi Prọfesọ Wilhelm Michaelis akabarede, ikọ Jesus okot ete: “Ke akpanikọ, ami nnọ fi un̄wọn̄ọ emi idem mfịn emi: afo (ke ndusụk usen) eyedu ọtọkiet ye ami ke “paradise.”
Nso, ndien, ke ikọ Jesus ọkọwọrọ ọnọ anamidiọk oro? Ekeme ndidi enye ama okop nte ẹdọhọde ke Jesus edi Edidem oro ẹken̄wọn̄ọde. Nte eyịghe mîdụhe, enye ama ọdiọn̄ọ aban̄a udorienyịn̄ oro “Edidem mme Jew” oro Pilate ọkọdọhọde ẹwet ẹkọn̄ ke ibuot Jesus. (Luke 23:35-38) Okposụkedi mme adaiso ido ukpono ke nsọn̄ibuot ẹkesịnde Jesus, anamidiọk oro akakabarede esịt do ama owụt mbuọtidem esie, ọdọhọde ete: “Jesus, ti mi ke adan̄aemi afo edide ndida ubọn̄.” Enye ikodorike enyịn ndikara ye Jesus, edi okoyom ndidia ufọn nto ukara Jesus. Ntre, Jesus, idem ke ata ọkpọsọn̄ usen oro, ama ọn̄wọn̄ọ ete ke anamidiọk oro eyedu ye imọ ke Paradise.
Ke ewe paradise? Ke Bible, ata akpa Paradise ekedi in̄wan̄ Eden mbiet itie unọ idem inemesịt oro akpa ete ye eka nnyịn ẹkeduọkde. Bible ọn̄wọn̄ọ nte ke ẹyefiak ẹwụk Paradise eke isọn̄ oro ke idak Obio Ubọn̄ Abasi, emi Jesus edide Edidem. (Psalm 37:9-11; Micah 4:3, 4) Ntre, Jesus eyedu ye anamidiọk oro ye anana ibat mme akpan̄kpa eken ke ini enye edinamde mmọ ẹset ẹwọn̄ọ ke udi ẹdinyene uwem ke Paradise isọn̄ nnyụn̄ nnyene ifet edikpep ndinam uduak Abasi nnyụn̄ ndu uwem ke nsinsi.—John 5:28, 29; Ediyarade 20:11-13; 21:3, 4.