Ntak Emi Abasi Emede Ime Ntre?

SESE mfụhọ mfụhọ iso eyenọwọn̄ oro etiede biọn̄. Se ọkpọ ọkpọ idem ye mfofụt idịbi esie. Kere ban̄a mbrenyịn mbrenyịn udọn̄ esie ndinyene udia, nyụn̄ se ukpọk usan oro enye akamade. Eyedi eka esie ese ye enyịn oro etịn̄ede ọdọn̄ọ esịt, iso esie owụt unana idotenyịn. Ekem domo ndisụhọde mfụhọ fo nnịm—ih, domo nditre nditua eyet.

N̄kpọntịbe emi otịbe afiak otịbe ke ediwak itie miliọn ke itiat miliọn 2.3 ke n̄kan̄ edem mbinan̄ ke ikpehe oro akan̄ ọnọmọde emi ẹdiọn̄ọde nte Sahel. Enye anyanade ana ke se iwakde ikan itiat 3,000 ebe Africa ke n̄kan̄ usụk usụk Sahara Desert, ọtọn̄ọde ke Senegal ke Mbenesụk Atlantic osịm Ethiopia ke Ididuot Inyan̄. Ke akpanikọ, akan̄ n̄ko ọmọnọmọ ediwak owo ke mme idụt eken. World Health Organization (Esop Ererimbot Esede Aban̄a Nsọn̄idem) ọtọt ete ke n̄kpọ nte owo tọsịn miliọn 1.1 ke ofụri isọn̄ ẹdọn̄ọ n̄kpa n̄kpa mîdịghe inyeneke udia.

Biọn̄, nte ededi, edi sụk kiet ke otu ikpehe afanikọn̄ ubonowo. Owo amasabade isọn̄, ndien emi otụk ofụri nnyịn. Mme ndutịm ukaraidem ẹnyịme ukwan̄ikpe ye ekọn̄ oro adade mfụhọ ye n̄kpa ọsọk ediwak owo. Ntak emi Abasi ayakde mme utọ n̄kpọ ẹmi ẹtịbe? Nte enye ekere aban̄a nnyịn?

Abasi Ekere Aban̄a!

Andibot nnyịn ekere aban̄a nnyịn. Ekese uyarade ẹdu kaban̄a emi ye ukeme esie ndinam mme n̄kpọ ẹnam utom ọtọkiet ke ufọn nnyịn ye ke n̄kemuyo ke kpukpru edibotn̄kpọ esie. Ke uwụtn̄kpọ, se ndise oro etienede mi, emi ọkwọk ọsọrọde ke frawa ke eto mfri. Ọkwọk eberi edem ke frawa ndinyene inịn̄e inịne mmọn̄ oro enye oyomde ke udia. Ke n̄kan̄ eken, eto oro eberi edem ke ntọn̄ frawa oro idem ọkwọk emi emende oto ukem eto emi. Ke usụn̄ emi, ke ẹken̄ ntọn̄ ẹdori ke frawa man idem ọkọri. Idịghe kpukpru eto mfri ke ẹsiken̄ ntọn̄ ẹdori ke usụn̄ emi. Edi Abasi ke akpanikọ amanam ndutịm ọnọ esen esen edidianakiet ke afan̄ emi. Ndien eti ido esie osụn̄ọ ke mfri oro nnyịn ikemede ndidia ye inem ye ufọn.

Ọkwọk ke idemesie edi ubak ke otu udịm udịm okwọk ẹmi ẹsiwakde ẹkan ọkwọk 30,000 ẹmi ẹtịmde mfọn mfọn. Ndusụk ẹkpeme aba-ọkwọk, ke adan̄aemi mmọ eken ẹnamde enye asana m̀mê ofụm ebe odụk. Mmọ en̄wen ẹda inịn̄e inịn̄e mmọn̄ ye ntọn̄ ẹdibon, ẹnọ nditọ mmọ udia, mîdịghe ẹyom mme itie obufa inịn̄e inịn̄e mmọn̄. Abasi ke idemesie emenen̄ede otịm mme n̄kpọ tutu nnyịn isibọ ufọn ke ini mme utọ ọkwọk oro ẹnamde ọkpọsọn̄ utom do ẹsion̄ode inịn̄e inịn̄e ye ọnọ-nsọn̄idem aran ọkwọk oro enịn̄ede nsịn̄ nnyịn.

Utịben̄kpọ aban̄ade edidianakiet ke ufọt ọkwọk ye eto ye ke ufọt n̄kpri unam ke idemmọ edi kiet kpọt ke otu ediwak uyarade nte ke Andibot ke mfọnmma usụn̄ ekeme ndinam mme odu-uwem n̄kpọ ẹdiana ye kiet eken. Kaban̄a oro, “Abasi idịghe Abasi ndutịme, edi edi Abasi emem.” (1 Corinth 14:33) Ntak, ndien, emi enye ayakde ubonowo odu uwem ke utọ ndutịme oro, osụn̄ọde ke unana inemesịt ọnọ ediwak owo ntre? Edieke Abasi ekerede aban̄a nnyịn, ntak emi enye ebetde ke ayanini ntre ndinen̄ede idaha emi-e? Ke akpanikọ, ntak emi Abasi emede ime ntre?

Ikọ Abasi, kpa Bible, ọbọrọ mme utọ mbụme oro. N̄wọrọnda n̄wed emi asian nnyịn ete ke Jehovah Abasi eme ime ye eti ntak. Nso idi ntak oro? Ndien ime Abasi edibịghi adan̄a didie?

[Ebiet ẹdade ndise ẹto ke page 2]

Photo Ikpaedem: Frilet/Sipa