Akam Ẹmi Anade Ẹbọrọ

NTE an̄wan̄ade odu akam oro anade ẹbọrọ. Akpan n̄kpọ oro ẹsịnede ke mmọ ẹdu ke uwụtn̄kpọ oro Jesus Christ ọkọnọde mme mbet esie ke ini enye ọkọdọhọ ete: “Ẹbọn̄ akam ntem ndien, ẹte, Ete nnyịn emi odude ke heaven: yak ikpono enyịn̄ Fo, yak ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.”—Matthew 6:9-13.

Ẹma ẹtịn̄ ẹfiak ẹtịn̄ mme ikọ akam uwụtn̄kpọ Jesus oro ediwak miliọn ini. Okposụkedi Christ mîkodorike enyịn mme ata anditiene enye nditịn̄ utọ akam oro ke ibuot, ana ẹbọrọ mme eben̄e mmọ ẹwụtde ukem ekikere oro. (Matthew 6:7, 8) Ntre, ndikpono enyịn̄ Abasi ọwọrọ nso? Ntak emi ibọn̄de akam iyom Obio Ubọn̄ esie edi-e? Ndien ntak emi iben̄ede ite yak ẹnam uduak Abasi?

“Yak Ikpono Enyịn̄ Fo”

Jehovah, kpa “Ata Edikon̄ ke ofụri ererimbot,” edi Owo oro Jesus okokotde nte “Ete nnyịn emi odude ke heaven.” (Psalm 83:18) Abasi ‘okobon’ nditọ Israel ebe ke ndinam mmọ ẹbọhọ ufụn nditọ Egypt ye ke ndidụk itie ebuana ediomi ye mmọ. (Deuteronomy 32:6, 18; Exodus 4:22; Isaiah 63:16) Mfịn, mme Christian oro ẹyetde aran ẹnyene ima ima ukpono ẹnọ Jehovah nte Ete mmọ. (Rome 8:15) Ndien nsan̄a mmọ, oro ẹnyenede idotenyịn eke isọn̄, ukem ntre ẹsibọn̄ akam ẹnọ Jehovah Abasi nte Ete mmọ.—John 10:16; Ediyarade 7:1-9.

Edi ntak ẹbọn̄de akam ẹte ẹkpono enyịn̄ Abasi? Ọfọn, toto ke nsọn̄ibuot akpa owo iba oro ke in̄wan̄ Eden, ẹmesuene enyịn̄ Abasi. Ke ndibọrọ utọ akam oro, Jehovah eyemen kpukpru esuene oro akanam ẹyetde nsinsi enyịn̄ esie efep. (Psalm 135:13) Enye edinam emi ebe ke ndisio idiọkido mfep ke isọn̄. Kaban̄a ini oro, Abasi ọkọdọhọ ebe ke prọfet Ezekiel ete: “Ami nyenyụn̄ nnịm idemmi ke akwa ye ke edisana, nnyụn̄ nnam mmọ ẹfiọk mi ke enyịn ediwak mme idụt. Ndien mmọ ẹyefiọk ẹte ke ami ndi Jehovah.”—Ezekiel 38:23.

Jehovah Abasi edi edisana ye ediden̄i. Ke ntre ẹnyene ndikpono enyịn̄ esie, mme ẹsio ẹnịm san̄asan̄a nte edisana. Enye eyewụt edisana idaha esie ebe ke ndinam n̄kpọ man onịm idemesie ke edisana ke enyịn kpukpru edibotn̄kpọ. (Ezekiel 36:23) Mmọ oro ẹnyenede udọn̄ ndibọ mfọn esie ye nsinsi uwem ana ẹkpono Jehovah ye ndịk ẹnyụn̄ ẹnam enyịn̄ esie asana ebe ke ndikama enye nte san̄asan̄a enyịn̄ oro onyụn̄ okon̄de akan kpukpru enyịn̄ eken. (Leviticus 22:32; Isaiah 8:13; 29:23) Nte odotde, Jesus ama asian mme anditiene enye ete ẹbọn̄ akam ẹte: “Yak ikpono enyịn̄ Fo” m̀mê, “inịm ke edisana; ida nte edisana.” Nnyịn imekeme ndinịm ke akpanikọ nte ke Abasi eyebọrọ ikpehe akam uwụtn̄kpọ emi.

“Yak Ubọn̄ Fo Edi”

Jesus n̄ko ama asian mme anditiene enye ete ẹbọn̄ akam ẹte: “Yak Ubọn̄ Fo edi.” Ke akpanikọ ẹyebọrọ akam oro ẹbon̄de ẹban̄a edidi Obio Ubọn̄ Abasi. Obio Ubọn̄ edi akakan ukara Jehovah nte ẹwụtde ebe ke ukara Messiah eke heaven ke ubọk Eyen esie, Jesus Christ, ye nsan̄a “edisana ikọt.” (Daniel 7:13, 14, 18, 22, 27; Isaiah 9:6, 7) Mme Ntiense Jehovah ke anyanini ẹma ẹwụt ke N̄wed Abasi nte ke ẹma ẹdori Jesus ke ebekpo nte Edidem eke heaven ke isua 1914. Ntak, ndien, owo ekededi ọkpọbọn̄de akam ete Obio Ubọn̄ “edi”?

Ndibọn̄ akam nnyom Obio Ubọn̄ edi ke akpanikọ ọwọrọ ndiben̄e nte enye edi edisobo kpukpru mme andibiọn̄ọ ukara Abasi ke isọn̄. Ibịghike kemi “ubọn̄ [Abasi] . . . eyenuak onyụn̄ ama kpukpru mme idụt [eke isọn̄] ẹmi, ndien enye eyeda ke nsinsi.” (Daniel 2:44) N̄kpọntịbe emi eyetịp n̄kpọ esịn ke edinam edisana enyịn̄ Jehovah asana.

“Yak Inam Uduak Fo”

Jesus ama akaiso eteme mme mbet esie ndibọn̄ akam nte: “Yak inam uduak Fo; nte ẹnamde ke heaven, yak inam ke isọn̄ kpasụk ntre.” Emi edi eben̄e nte yak Jehovah anam n̄kpọ ke n̄kemuyo ye uduak esie kaban̄a isọn̄. Enye edi ukem ye ikọ andiwet psalm emi: “Jehovah akanam kpukpru se enye amade ke enyọn̄, ye ke isọn̄, ye ke mmọn̄, ye ke kpukpru mme udem. Enye anam ntụhube adaha ke mme utịt ererimbot ọdọk; anam obuma ọnọ edịm; osio ofụm ke n̄kpọuto esie ada edi. Emi okowotde mme akpan Egypt, ọtọn̄ọde ye owo tutu osịm ufene. Emi ọkọnọde mme idiọn̄ọ ye mme utịben̄kpọ ẹsọk ke otu mbufo, O Egypt, kpa ke idem Pharaoh ye ofụri ikọt esie. Emi akasuande ikpọ mme idụt, onyụn̄ owotde n̄kpọsọn̄ ndidem.”—Psalm 135:6-10.

Ndibọn̄ akam nte uduak Jehovah ada itie ke isọn̄ edi eben̄e nte yak enye anam uduak esie aban̄ade ekondo emi. Emi abuana edisio mme andibiọn̄ọ enye mfep ke nsinsi, idem kpa nte enye okosiode mmọ efep ke esisịt udomo ke eset. (Psalm 83:9-18; Ediyarade 19:19-21) Ke akpanikọ ẹyebọrọ akam oro ẹbọn̄de ẹte ẹnam uduak Abasi ke ofụri isọn̄ ye ekondo.

Ke Ini Obio Ubọn̄ Akarade

Utu ke idiọkido oro asuanade ọyọhọ n̄kaowo idahaemi, nso ke ẹkeme ndidori enyịn ndikụt ke ini Obio Ubọn̄ Abasi akarade ndien ẹnamde uduak Abasi ke isọn̄ kpa nte ẹnamde ke heaven? Nte ekemde ye apostle Peter, “nnyịn itie ibet obufa enyọn̄ ye obufa isọn̄, nte un̄wọn̄ọ [Abasi] edide, ndien edi do ke edinen ido edidụn̄.” (2 Peter 3:13) “Obufa enyọn̄” edi ndinen odudu ukara eke spirit—Jesus Christ ye nsan̄a mme ada udeme 144,000 ke Obio Ubọn̄ eke heaven. (Rome 8:16, 17; Ediyarade 14:1-5; 20:4-6) “Obufa isọn̄” idịghe ererimbot isọn̄ en̄wen. Utu ke oro, enye edi edinen n̄kaowo ẹdụn̄de ke isọn̄.—Men Psalm 96:1 domo.

Ke idak ukara Obio Ubọn̄, ẹyenam isọn̄ akabade edi paradise ofụri ererimbot. (Luke 23:43) Ubonowo ẹyedara ata emem ye uforo adan̄aoro. (Psalm 72:1-15; Ediyarade 21:1-5) Afo emekeme ndidu ke otu idara idara udịm owo oro edieke afo edide anam-akpanikọ andida nnọ ukara Messiah oro akarade mme okopitem andidu ke idak esie ke isọn̄. Mme andida nnọ utọ ukara oro ẹbọn̄ akam ifịk ifịk ẹyom ẹnam enyịn̄ Jehovah asana, ẹyom Obio Ubọn̄ esie edi, ẹnyụn̄ ẹyom uduak esie ada itie. Ana ẹbọrọ akam ofụri esịt mmọ.