Nte Afo Emesikan̄ Mme Ntụhọ Unam Idiọkn̄kpọ?

“N̄KỤT emi ndien mban̄a ibet nte, idiọkn̄kpọ osụk odudu ye ami emi nyomde ndinam eti n̄kpọ. Koro ndara ibet Abasi ke ọwọn̄esịt mi: edi n̄kụt ibet efen ke mbakidem mi, nte an̄wanade ye ibet emi esịt mi amade, onyụn̄ adade mi nte mbuotekọn̄ esịn ke idak ibet idiọkn̄kpọ ẹmi ẹdude ke mbakidem mi.”—Rome 7:21-23.

Ama oyom nsụhọdeidem man apostle Paul onyịme ikọ eke enyọn̄ emi. Edi, ke enye ndinam ntre, enye ama an̄wam ndibiọn̄ọ mme ntụhọ unana mfọnmma esie ndikan enye.

Enye edi ukem oro ye mme ata Christian mfịn. Ke ini nnyịn ikedide idinyene nnennen ifọk akpanikọ Bible, nnyịn ima inam mme ukpụhọde oro ẹyomde ke usụn̄uwem nnyịn, idade ekekem ye mme edumbet Jehovah. Okposụkedi ntụhọ unam idiọkn̄kpọ ẹsụk ẹdude “koro ekikere esịt owo ọdiọkde toto ke uyen esie.” (Genesis 8:21) Nte nnyịn imanam akpanikọ ikem ndinyịme mme akpan ntụhọ oro ẹfịghede nnyịn ke idem? Mîdịghe nte nnyịn imakan̄ nte ke nnyịn inyeneke mmọ, iso-ọfọn iberide ite, ‘Mmọemi ẹdi iso mfịna ẹnọ mmọ en̄wen edi idịghe inọ mi’?

Utọ edibian̄a idem oro ekeme ndikama n̄kpa. Uwụtn̄kpọ oro ọkọn̄ọde ke Bible ekeme ndin̄wam ndikụt ufọn edidiọn̄ọ mme ntụhọ idiọkn̄kpọ nnyịn nnyụn̄ mkpeme mmọ.

Ntak Edikan̄ Akamade N̄kpa

Ke mme ini Bible ibibene ẹkesikpeme ediwak ikpọ obio. Mme inuaotop—ẹkesiwakde ndida eto nnam—ẹkesidi uke uke ikpehe oro ẹkemede ndibe ndụk esịt obio; ke ntre, ẹma ẹsisọn̄ọ ẹkpeme mmọ. Mme andidụn̄ ẹkesinam sụk inuaotop oro awakde ekem ẹnọ mme owo ndisan̄a mbe ke ini emem. Ẹma ẹsiwak ndida ukwak mfụk mme inuaotop oro ẹdade eto ẹnam, man ikan̄ okûta. Ẹma ẹsibọp mme tọwa ke ibibene oro man mbon ukpeme oro ẹdoride ẹkpekeme ndida n̄kụt mme asua ẹdide ke anyan usụn̄.

Kemi kere: Nso ikpetịbe edieke mme andidụn̄ obio ẹkpekan̄de nte ke inuaotop idịghe se mme owo ẹkemede ndibe ndien ke ntre inọhọ ukpeme oro odotde? Mbonekọn̄ ẹdide mme asua ẹkpebe ẹdụk obio oro mmemmem mmemmem, osụn̄ọde ke ndikan enye.

Ntre ke edi ye nnyịn. Jehovah ọfiọk mmeme nnyịn owo kiet kiet. “Baba n̄kpọ kiet eke odịbede Enye ke enyịn inyụn̄ idụhe; edi kpukpru n̄kpọ ẹna iferi ye ata in̄wan̄în̄wan̄ ke enyịn Abasi, emi nnyịn isan̄ade n̄kpọ ye Enye.” (Mme Hebrew 4:13) Ekeme ndidi Satan n̄ko omokụt ndusụk ntụhọ idiọkn̄kpọ ke idem nnyịn, edide edi ndiyụrọde akpanikọ, ndisọp nyat esịt, ndinyene udọn̄ ke oburobụt ido idan̄, uma-inyene, n̄kohodeidem, m̀mê n̄kpọ efen ekededi. Edieke nnyịn ikan̄de mme ntụhọ idiọkn̄kpọ nnyịn, nnyịn itotịm iyak idem nnyịn inọ en̄wan oro Satan an̄wanade ye mbuọtidem nnyịn. (1 Peter 5:8) Ẹkeme ndikan nnyịn nte idiọk udọn̄ ọkọride ọkpọn̄ ikpîkpu ntụhọ onyụn̄ amande idiọkn̄kpọ. (James 1:14, 15) Oyom nnyịn itie nte Paul, inyịmede ‘inuaotop oro ẹdade eto ẹnam’ ekededi oro ekemede ndidu.

Tịm Idemfo!

Ọkpọwọrọ ikpîkpu n̄kpọ owo ndikụt ndiọi ntụhọ edi ekem inamke n̄kpọ ndomokiet iban̄a mmọ. Emi ekpetie nte owo oro esede idemesie ke ukụtiso, okụt mme ikpehe oro oyomde ẹnam n̄kpọ ẹban̄a ndien asan̄a adaha ye unana ndinam mme edinen̄ede oro ẹyomde. (James 1:23-25) Ih, nnyịn inyene ndinam n̄kpọ ndin̄wam idem nnyịn mbak mme ntụhọ unam idiọkn̄kpọ ẹdikan nnyịn. Didie ke nnyịn ikeme ndinam emi?

Ke mme ini Bible, n̄kpri obio, m̀mê mme “obio-in̄wan̄” ikesiwakke ndinyene mme ibibene. (Numbers 21:25, 32; Judges 1:27; 1 Chronicles 18:1; Jeremiah 49:2) Mme andidụn̄ ke mme obio ẹmi ẹma ẹsifen̄e ẹnyọn̄ mme obio oro ẹnyenede ibibene ke ini mme asua ẹdade en̄wan edi. N̄kpọsọn̄ obio ke ntre ẹkesinam n̄kpọ nte ebiet ubọhọ ẹnọ mme owo ke ikpehe n̄kann̄kụk oro.

Bible okot Jehovah tọwa, ebiet ubọhọ, ibibene oro nnyịn ikemede ndifehe ndụk nyene ubọhọ. (Mme N̄ke 18:10; Zechariah 2:4, 5) Ntre Jehovah edi akpan ukpeme mme asan̄autom esie. Ndikọbọ ke edibọn̄ akam nnọ enye edi ata akpan n̄kpọ. (1 Thessalonica 5:17) Un̄wam efen edi Bible. Ke ndida Ikọ Abasi, nnyịn iyenam ọfọn ndinam san̄asan̄a ukpepn̄kpọ ke mme ikpehe oro inyenede mmeme. Nnyịn imekeme n̄ko ndisio mme ibuotikọ ẹmi ẹkọn̄ọde ke Bible, oro ẹban̄ade ‘inuaotop [idem nnyịn] oro ẹdade eto ẹnam’ inịm ndụn̄ọde ndien ndien.

N̄ko, ukem nte mbon-ukpeme ke enyọn̄ tọwa, yak idọhọ, nnyịn imekeme ndikụt owo usua ke anyan usụn̄, inyụn̄ inam n̄kpọ nte odotde. Didie? Ke ndifep mme idaha oro nnyịn ikemede ndisobo idomo m̀mê mfịghe. Ke uwụtn̄kpọ, owo emi oyomde ndifara ke idem ke edida ọkpọsọn̄ mmịn ke eti ibuot eyemek nditre ndidu ke ebiet oro n̄kpọsọn̄ mmịn ẹdude ediwak m̀mê ẹkam ẹsịnde udọn̄ ẹnọ ndin̄wọn̄ ediwak.

Kpukpru ẹmi ẹyom ukeme. Nte ededi, edieke akanade apostle Pual ‘ọtọn̄ọ idemesie ita’ man ekeme ndibiọn̄ọ ntụhọ unana mfọnmma, nte iyomke nnyịn n̄ko isịn ukeme? Utọ ntịn̄enyịn ofụri esịt oro ke mme ntụhọ idiọkn̄kpọ nnyịn eyewụt nte ke nnyịn ke ida item apostle Peter emi isịn ke edinam: “Ẹnyene ifịk ndien, man Enye okposịm mbufo nte ẹtiede ke emem, ẹnana ntọi, ẹnyụn̄ ẹnana ndo ke enyịn Esie.”—1 Corinth 9:27; 2 Peter 3:14.

Fiọk Nyụn̄ Nam N̄kpọ

Kûyak idem emem fi edieke mme ntụhọ unana mfọnmma fo ẹsụk ẹdude, kpa ye ofụri ukeme fo. Adan̄a nte nnyịn isụk idide mme anana mfọnmma owo, ndiọi ntụhọ ẹyesụk ẹdu ke ndusụk udomo, ukem nte ekedide ke idaha Paul. Edi nnyịn inyene ndika iso nnam n̄kpọ ndifịk mmọemi nnịm, man ikpan mmọ ndiman idiọkn̄kpọ.

Nte ededi, fiọk ukpụhọde odude ke ufọt edinyịme ata idem n̄kpọ eke unana mfọnmma ye ediyak enye akaiso. Ekeme ndinam oro an̄wan̄a ye owo emi enyenede mmemmem esịt ke ikpanesịt esie. Enye ekeme ndisak iso nse ata idem n̄kpọ emi ebe ke ndidomo ndinịm esịt esie ke eti idaha ke adan̄a nte enye ekekeme ndidot enyịn ndinam. Enye ikereke ite sia ata esịt imọ enyenede mmeme, imọ n̄ko imekeme nditre kpukpru ukeme inyụn̄ ikaiso idu uwem ke usụn̄ ekededi oro imade.

Fiọk, ndien, ete ke ukeme nnyịn ikọn̄ọke ke nnannan edikan̄ mme ntụhọ idiọkn̄kpọ edi ke ndifiọk mmọ nnyụn̄ nnam n̄kpọ ndibiọn̄ọ mmọemi. Ntre kûkop ndịk ndinyịme nnọ idemfo ye Jehovah ebiet eke idomo m̀mê mfịghe esisọpde osịm fi. Afo unyeneke ndisua idemfo ke ndinam ntre, ima oro Jehovah enyenede ọnọ fi inyụn̄ isụhọkede. Ke akpanikọ, nte afo asan̄ade ekpere Abasi ke ofụri esịt kaban̄a edinyene unyịme esie, enye eyekam asan̄a ekpere fi akan.—James 4:8.

[Ndise ke page 31]

Mbiet eke Megiddo emi owụt n̄kpọsọn̄ inuaotop ye ibibene ukpeme obio eset

[Ebiet Ẹdade N̄kpọ Ẹto]

Pictorial Archive (Near Eastern History) Est.