Mme Mbụme Ẹtode Mme Andikot

◼ Nso akpan item ke Mme N̄ke 27:23 ọnọ mme ekpemerọn̄ eke spirit ọkọrọ ye mme Christian ke ofụri ofụri?

Ufan̄ikọ oro okot ete: “Diọn̄ se n̄kpri ufene fo iso: nịm ibuot ke mme enan̄ fo.” (Mme N̄ke 27:23) Ẹsiwak ndida itien̄wed emi ke ndisịn udọn̄ nnọ mme ekpemerọn̄ eke spirit ndiwụt udọn̄ nnyụn̄ mmehe ye idaha ye mme mfịna oro mme Christian ke esop ẹsobode. Utọ nsịnudọn̄ oro edi se idotde, sia Bible adade mbiowo nte mme ekpemerọn̄ ye esop nte otuerọn̄. (Utom 20:28, 29; 1 Peter 5:2-4) Edi, okposụkedi edumbet eke enyọn̄ emi abuanade, ufan̄ikọ emi akpan akpan ibuanake mme ekpemerọn̄ eke spirit.

N̄wed Mme N̄ke esịne ediwak ufan̄ikọ oro ẹdade san̄asan̄a nte akpan ikọ item, edi Mme N̄ke 27:23 edi ubak ke otu mme ufan̄ikọ ẹmi: “Diọn̄ se n̄kpri ufene fo iso: nịm ibuot ke mme enan̄ fo: koro inyene mîdibịghike ke nsinsi: idem anyanya idinyụn̄ mîbịghike ke ofụri emana. Nnyanyan̄a ebe, ndien ẹkụt mbiet, ẹnyụn̄ ẹtan̄ ikọn̄ ikpọ obot. Nditọerọn̄ ẹdi ẹdisịnen̄kpọ fo: mme okpoebot ẹnyụn̄ ẹdi ekọmurua in̄wan̄. Ndien mmọn̄eba ebot eyekem ke udia fo, ye ke udia ufọk fo, ye ke uwem nditọiban fo.”—Mme N̄ke 27:23-27.

Udịmikọ eke odudu spirit emi otoro edinyene usụn̄uwem oro ntịn̄enyịn, nsịnifịk, mmemmem uwem, ye edidiọn̄ọ ibetedem nnyịn ke Jehovah ẹnịmde idiọn̄ọ. Enye anam emi ke ndisio mme akpan n̄kpọ ke uwem ekpemerọn̄ Israel n̄n̄wụt, iso-ọfọn edide isio ye uwem owowo inyene oro ọkọn̄ọde ke mme edinam mbubehe ye edinyene usọp usọp inyene.

“Inyene,” m̀mê imọ oro ẹnyenede ke edisịn idem ke usọp usọp mbubehe, osụn̄ọde ke uwọrọetop (“anyanya”), ekeme ndibe mfep mmemmem mmemmem, nte ediwak owo ẹkemede ndisọn̄ọ. Ediwak n̄kpọ odu ke ntem nditịn̄ mban̄a mmemmem uwem, utọ nte enyeoro mme ekpemerọn̄ eset ẹkedude ke ndise mban̄a otuerọn̄. Usụn̄uwem oro ikedịghe mmemmem ke usụn̄ifiọk eke edidu ke unana ukpeme. Ekpemerọn̄ ekenyene nditịn̄ enyịn n̄kpeme otuerọn̄ esie, okụtde ete ke mme erọn̄ ẹdu ke ukpeme. (Psalm 23:4) Edieke, ke edinọ mmọ ntịn̄enyịn, enye okụt erọn̄ oro ọdọn̄ọde m̀mê adade unan, enye ada aran eyet enye. (Psalm 23:5; Ezekiel 34:4; Zechariah 11:16) Ke n̄wakn̄kan idaha ekpemerọn̄ oro etịn̄de enyịn owụk ekikere ke ufene esie eyekụt nte ukeme esie osion̄ode ediwak mfri—kpa n̄kaiso n̄kọri ke otuerọn̄ esie.

Ekpemerọn̄ oro anamde utom ọkpọsọn̄ onyụn̄ etịn̄de enyịn enyene ebiet ibetedem—kpa Jehovah. Didie ke edi ntre? Ọfọn, Abasi ọnọ eyo ye mme ini oro ẹsisụn̄ọde ke nsehe mbiet ọnọ mme erọn̄ ndita. (Psalm 145:16) Ke eyo ẹkpụhọrede, ke ini awawa mbiet ekemede ndikụre ke mme unaisọn̄, mmọ ẹkeme ndiyọhọ ke mme obot, ke ebiet emi ekpemerọn̄ oro etịn̄de enyịn ekemede ndida ufene esie n̄ka.

Mme N̄ke 27:26, 27 asiak utịp utọ utom oro—udia ye edisịnen̄kpọ. Ih, edinam an̄wan̄a emi itịn̄ke iban̄a ọkpọmiọk ọkpọmiọk inem inem udia m̀mê ọkpọsọn̄ udia ye edin̄wọn̄ n̄kpọ, m̀mê enye ndinọ anamutom idotenyịn edinyene nye n̄kan m̀mê mfọnn̄kan n̄kon̄ine ọfọn̄ oro ẹsion̄ode ẹdi. Edi edieke enye okonyịmede ndisịn ukeme, ekpemerọn̄ oro ye ufọk esie ẹkpekeme ndinyene mmọn̄eba nto erọn̄ oro, ọkọrọ ye idet erọn̄ ndida ndọk ọfọn̄ oro ọsọn̄de idem.

Ntre item oro: “Diọn̄ se n̄kpri ufene fo iso” inyeneke mme esenyịn eke spirit akpan akpan; enye enyene kpukpru mme Christian. Enye osio owụt ufọn ediyụhọ ke se idiade ye se idade ifụk iferi oro inyenede ito utom ntịn̄enyịn oro enyenede iwụk, ibuọtde idem nte ke Abasi idikpọn̄ke nnyịn. (Psalm 37:25; 2 Thessalonica 3:8, 12; Mme Hebrew 13:5) Ke imende Mme N̄ke 27:23-27 idomo ye item oro odude ke Luke 12:15-21 ye; 1 Timothy 6:6-11, nnyịn imokụt nte item Abasi odude ke n̄kemuyo kaban̄a n̄kpọ emi. Ntre nnyịn owo kiet kiet imekeme ndifiak n̄kot Mme N̄ke 27:23-27, ibụpde idem nnyịn ite, ‘Nte ami mmada emi nsịn ke esịt nnyụn̄ nda enye nsịn ke edinam ke uwem eke usen ke usen mi?’

[Ebiet Ẹdade Ndise Ẹto ke Page 31]

Pictorial Archive (Near Eastern History) Est.