Ntọt M’ọkwọrọ Obio Ubọn̄

Ndikwọrọ “Uwọrọ-Ufụn Nnọ Mbuotekọn̄” ke Brazil

SPIRIT Jehovah ke anam utom ọkpọsọn̄ ọkpọsọn̄ ke idem ikọt esie ke Brazil nte mmọ ẹkwọrọde eti mbụk uwọrọ-ufụn ẹnọ mbon oro ẹdude ke ufụn nsunsu ido ukpono. (Isaiah 61:1, 2; Luke 4:18) Ke 1947 Mme Ntiense 648 kpọt ẹkedu ke idụt oro. Ke 1967 ibat oro ama ọdọk okosịm 41,548. Ye edidiọn̄ Jehovah, ke ntọn̄ọ ntọn̄ọ 1991 enye ama osịm n̄wakn̄kan ibat oro awakde ebe 302,000! Ke akpanikọ, ‘Abasi ama anam enye ọkọri.’ (1 Corinth 3:7) Ke isua utom eke 1990 ikpọn̄, ẹma ẹnịm mme owo 27,068 baptism.

Utọ n̄kọri oro ama oyom ẹsitịm obufa circuit kiet ke kpukpru ọfiọn̄, ndien ẹma ẹyak mbufa Ufọkmbono Obio Ubọn̄ 150 ẹnọ ke n̄kpasịp isua kiet. Akande oro, n̄kọk itieutom ama edep acre isọn̄ 450 nditat ndutịm umịn̄-n̄wed mmọ, emi mmọ ẹmịn̄de Bible idahaemi ke ukwak umịn̄-n̄wed mmọ. Ntre Mme Ntiense ke Brazil ẹnam utom ọkpọsọn̄ ndin̄wam mbon oro ẹnyenede eti esịt ndiwọrọ ke “Akwa Babylon” mbemiso “akwa ukụt.”—Ediyarade 7:9, 10, 14; 18:2, 4.

□ Asuanetop ọsọn̄de isua-itiaita ama ọkpọn̄ n̄wed ye n̄wan etubom mme borisi ndien ekem, ke asan̄ade ikpọn̄, ama anam mfiakn̄ka. Uduak esie ekedi ndinam n̄wan oro okot ndusụk mbụk onyụn̄ etịn̄ ọnọ enye adan̄a nte mbụk oro kiet kiet an̄wan̄ade enye. Nte n̄wan oro anamde mbụk oro an̄wan̄a enye, n̄wan oro ke idemesie ama ọtọn̄ọ ndiwụt esịtekọm nnọ n̄wed oro onyụn̄ ọdọhọ enye anam imọ ifiọk eka esie. Enye ama anam ntre, ndien idahaemi n̄wan oro ke adara ukpepn̄kpọ Bible ofụri ini.

□ Ke 1984, Maria ama akpa mba aban̄a mbubịk oro enye okokụtde ke n̄kaowo, ndien enye ama ọduọk idotenyịn ke ntak mme afanikọn̄ oro enye okokotde aban̄a nte ẹtịbede ke ererimbot. Ntre enye ama ọtọn̄ọ usụn̄uwem nsọn̄ibuot. Enye obụk ete: “Utịtmbuba nnyịn ekedi ndibiọn̄ọ kpukpru n̄kpọ ye kpukpru owo. Ukamaidem mi ekedi sụk ndinam mme owo ẹdịghe—utịn̄e utịn̄e, obubịt-enyịn ọfọn̄, n̄kporode idet ibuot n̄kan̄ kiet. Mma mfre mban̄a ebe mi, nditọ, ye ufọkidụn̄ nnyụn̄ ntọn̄ọ ndin̄wọn̄ ikọn̄ekpo nnyụn̄ nda cocaine man mfre mban̄a ata idem n̄kpọ ke uwem. Edi emi akakam anam n̄kpọ ọdọdiọk akan ye mi. Mma ntua eyet. Ke ini n̄kokotde Bible, n̄kọfiọkke se ọwọrọde. Ntre mma mbọn̄ akam nnọ Abasi nyom un̄wam.

“Usen kiet Mme Ntiense iba ẹma ẹdi ufọk mi ndien ke ibio ibio nneme ama okokụre, ẹma ẹnọ mi magazine iba. Ke n̄kûbọrede kiet ke otu mmọ, mma n̄kụt ibuotikọ kiet ọdọhọde ‘Edida ke Idem N̄kpọn̄ Abasi—Ntak Mîfọnke?’a Ibuotikọ oro ama otụk ke idem. Mma n̄kere nte ke Abasi ama okop akam mi, ndien kpa ke usen oro, Mme Ntiense oro ẹma ẹtọn̄ọ ndikpep Bible ye ami. Ọtọn̄ọde ke ini oro kaiso mma nnam mme ukpụhọde oro akanamde mi n̄kabade mfọn n̄kan. Ebe mi ye ubon ke akpa ẹma ẹbiọn̄ọ mi ndikpep Bible, edi nte mmọ ẹkekụtde mme ukpụhọde oro n̄kanamde, mmọ ẹma ẹtọn̄ọ ndisịn udọn̄ nnọ mi. Ami idahaemi ndi asan̄autom Abasi oro anade baptism.”

Mme Ntiense Jehovah ke Brazil, ukem nte edide ke mme ikpehe eken ke isọn̄, ẹsịn ifịk ke ndikwọrọ “uwọrọ-ufụn nnọ mbuotekọn̄.” Akwa udịm owo ke ẹyere ikot, ẹkụtde ata ubọhọ ye inemesịt ke ndinam n̄kpọ Jehovah.

[Mme Ikọ idakisọn̄]

[Ekebe ke page 30]

BRAZIL

Ibatowo - 150,367,800

N̄wakn̄kan Ibat M’asuanetop 1990 - 293,466

Udeme, Asuanetop 1 Enyene - 512

Ibat Ẹkenịmde Baptism ke 1990 - 27,068

Ukem Mbahade Ibat M’asiakusụn̄ - 30,115

Ibat Mme Esop - 4,625

Ukem Mbahade Ukpepn̄kpọ Bible - 341,305

Ibat Ẹkedụkde Editi - 790,926