Akpatre Ikpe
“KE INI mbufo ẹkpade ukpọn̄ mbufo ikpọn̄îkpọn̄ ke editụhọde; oro edidi hell ọnọ enye: edi ke usen ikpe ikpọkidem mbufo eyediana ye ukpọn̄ mbufo, ndien ke ini oro mbufo ẹyenyene hell iba, ukpọn̄ mbufo ọwọrọde ntọi iyịp, ikpọkidem mbufo onyụn̄ odude ke ọkpọsọn̄ ubiak.”
EMI edi nte ọkwọrọikọ ọyọhọ isua ikie-19 oro, C. H. Spurgeon eketịn̄de ekikere mme ọkwọrọ ederi kaban̄a usen ikpe ye ufen nsinsi ndutụhọ. Ewet ndise owo Italy oro, Michelangelo ama enyene ukem enyene-ndịk edinịm ke akpanikọ oro, nte ẹkụtde ke mbuwed esie oro, “Akpatre Ikpe,” ke ibibene ufọkakam Sistine ke Rome (kpa ikpehe oro ẹfiakde ẹsio ke enyọn̄ emi). The New Encyclopædia Britannica etịn̄ aban̄a mbuwed oro: “Christ ke Ikpe edi enyene-ndịk abasi utu ke andinyan̄a Christian, ọdọn̄de enyịn ke nditụhọde ekpụk ubonowo akan ke ẹdidara nti owo nsịn ke heaven.”
Ukpepn̄kpọ Christendom
Ke ediwak isua ikie ẹmi ẹkebede, usen ikpe ye hell ikan̄ ekedi ibuotikọ ukwọrọikọ oro ẹmade. Ke ẹdade ke n̄kpoto mmọ, mme ọkwọrọikọ utọ nte C. H. Spurgeon ẹsifiori ye in̄wan̄în̄wan̄ utịn̄ikọ ẹban̄a ubi ubi ndutụhọ oro anade ebet mme anamidiọk. Ke usen mfịn, owo iwakke ndikop utọ ukwọrọikọ oro aba. Edi hell ikan̄ ye akpatre ikpe ẹsụk ẹdedi akpan ukpepn̄kpọ n̄wakn̄kan ufọkederi.
Ediwak ido ukpono Christendom ẹsiwak ndinyịme ye ukpepn̄kpọ Roman Catholic oro nte ke ikpe Abasi edi ke ikpehe iba. Akpa, “san̄asan̄a ikpe” odu. Ke ini owo akpade, ẹyesọp ẹkpe ikpe ẹnọ ukpọn̄ esie oro ẹkerede nte enye enyenede ẹnyụn̄ ẹnọ aka nsinsi ebietidụn̄ edide ke hell m̀mê ke heaven.a Ekem akpatre ikpe, m̀mê eke ofụri owo, eyedi ke utịt ini ke ini ẹdinamde ikpọkidem mme akpan̄kpa ẹset ẹnyụn̄ ẹkediana ye ukpọn̄ mmọ oro mîkemeke ndikpa.
Ke usen ikpe emi, mme ukpọn̄ oro ẹdude ke heaven ẹsụk ẹdu do ndien ikpọkidem oro ẹnamde ke usụn̄ oro mîkemeke ndibiara akadiana ye mmọ. Mbon oro ẹbọde ufen ke hell ẹsụk ẹdu do n̄ko, ndien ikpọkidem oro mîkemeke ndibiara, oro ẹnamde ẹset, akadiana ye ukpọn̄ mmọ n̄ko. Nte ndusụk owo ẹtịn̄de, emi anam ufen mmọ ototịm ọsọn̄ ubọk akan. Mmọ oro ẹsụk ẹdude uwem nte mme owo ikpaha. Ẹkpe ikpe mmọ ke adan̄aemi mmọ ẹsụk ẹdude uwem ndien ẹka, yak idọhọ “ikpọkidem ye ukpọn̄,” nnennen ke heaven m̀mê hell.
Edikụt ndutụhọ oro inua mîkemeke nditịn̄ ke hell ikan̄ amanam ofụri ibuot nneme aban̄ade akpatre ikpe ke ubọk Jesus Christ edi n̄kpọ oro ẹkopde ndịk ndikere mban̄a. Ye emi ke ekikere, nte afo okpodu ke n̄kpaidem ndifiọk nte ke ikpe Abasi, ke akpanikọ, esiwak ndidi n̄kpọ idara ye nte ke Usen Ikpe edidi kiet ke otu ini oro ẹkopde inemesịt ẹkan ke ofụri mbụk ubonowo? Didie ke emi ekeme ndidi ntre?
[Mme Ikọ idakisọn̄]
a Mbon Roman Catholic n̄ko ẹnịm ọyọhọ ikpehe ita ke akpanikọ: ndutụhọ ibio ini ke purgatory mbemiso ẹkade heaven ke akpatre.
[Ebiet Ẹdade Ndise Ẹto ke page 3]
Random/Sipa Icono