Ntọt M’ọkwọrọ Obio Ubọn̄
Edu Oro Anamde Utom Christian Nnyịn Enyene Uku
APOSTLE Peter ọkọnọ mme Christian item ete: “Ẹkama idem nte odotde ke iso mme Gentile.” (1 Peter 2:12) Apostle Paul owụt ete ke ebede ke eti edu nnyịn, nnyịn “[imanam] ukpepn̄kpọ Abasi Andinyan̄a nnyịn enyene uku ke kpukpru usụn̄.” (Titus 2:10) Mme Ntiense Jehovah ke ofụri ererimbot ẹmenyene eti enyịn̄ ke ntak eti edu. Tịmfiọk ndusụk uwụtn̄kpọ.
Eti Edu Otụk Andikpep Esịt
◻ Ọfis n̄kọk itieutom Watch Tower Society ke Costa Rica ọtọt ete ke akamba ibat n̄kparawa owo ke idụt oro ẹnịm eti uwụtn̄kpọ. Eyenete eren kiet etịn̄ se ikodụride enye inọ akpanikọ. Enye obụk ete: “N̄kpọ oro okodụride mi akpan akpan ekedi eti edu eke mme uyen ye ikpọ owo edi akpan akpan mme uyen. Ke adan̄aemi nnamde utom nte andikpep, ami mma nnyene ifet ndinen̄ede ntịn̄ enyịn nse Mme Ntiense ke ufọkn̄wed mi. Ndien sia ami n̄kodụn̄de ye ubon Mme Ntiense Jehovah, ami mma ntịn̄ enyịn nse edu nditọn̄wọn̄ do n̄ko.
“Ami n̄kekemeke ndinyan̄a edi ndikụt ukpụhọde odude ke ufọt nditọ ufọkn̄wed oro ẹkedide Mme Ntiense ye nditọ ufọkn̄wed eken ke ufọkn̄wed mi. Mme Ntiense oro ẹma ẹsidi ke eti ini kpukpru ini ẹnyụn̄ ẹdu uwem nte ọfọnde, akananam isụho nsu, ẹnyụn̄ ẹsinam utomufọk mmọ kpukpru ini. Ami n̄ko mma n̄kụt nte ke mmọ ẹma ẹsinam akpanikọ ke ini ẹtiede udomo, idem okposụkedi nditọ ufọkn̄wed eken ke ofụri ofụri ẹsiyịpde udomo. Adianade do, mmọ ẹma ẹnen̄ede ẹnyene eti ido ẹnyụn̄ ẹkpono mi nte andikpep mmọ. Ke edu mme uyen Ntiense ke ufọkn̄wed ye ke ufọk oro n̄kodụn̄de otụkde mi, mma ntọn̄ọ ndidụn̄ọde ido ukpono emi ndien ke akpatre mma mbọ akpanikọ.”
Nti Utịp Ẹtode Edu Christian ke Mbono
◻ Kiet ke otu Mme Ntiense Jehovah ke esop odude ke ikpehe edem usoputịn El Salvador ama enyene udọn̄ ndibuana eti mbụk Obio Ubọn̄ ye ata nditọeka esie iren iba. Kiet ama akpan̄ utọn̄ onyụn̄ ọtọn̄ọ ndikpep Bible ye Mme Ntiense Jehovah. Eyeneka esie eken akabuana ye ufọkederi Evangelist ẹkotde Prince of Peace, ndien enye ama ọdọhọ eyeneka esie ete: “Kûtịn̄ unọ mi; afo anam mme udọn̄ Devil.” Ke ini mbono district ama ekedisịm, enyeemi ekekpepde n̄kpọ ama ọnọ eyeneka esie ikot ndisan̄a ye enye n̄ka mbono. Eyeneka esie oro ọkọdọhọ ete: “Ọfọn, ami nnyetiene ndi; ami n̄kukụre n̄ka man n̄kokụt se n̄kemede ndida mmụm Mme Ntiense.” Nditọeka iba ẹmi ẹma ẹdụk mbono ọtọkiet. Akwa ibatowo ye eti ndutịm ke mbono oro ama otụk owo Evangelist oro, emi ọkọdọhọde ete ke akananam imọ ikwe n̄kpọ ekededi oro ebietde oro ke mbemiso. Ke ini enye okosịmde ufọk, enye ama ọdọhọ eyeneka esie ete: “Nnọ mi ubọk.” Eyeneka esie ama obụp ete: “Nso ke kpukpru ẹmi ọwọrọ?” Ibọrọ ekedi, “Kam nnọ mi ubọk.” Mmọ ẹma ẹkọm ubọk, ndien eyeneka oro akabuanade ye ufọkederi Evangelist ama ọdọhọ ete: “Tọn̄ọ kemi kaiso ami mmọn̄ n̄kpep n̄kpọ ye Mme Ntiense Jehovah. Ke akpanikọ, ami n̄kọfiọkke se n̄katabade.” Idahaemi enye n̄ko edi ọsọn̄idem ye ifịk ifịk anditan̄a eti mbụk Obio Ubọn̄ Abasi.