Sem Edisana Usem Ndien Du uwem ke Nsinsi!
“Ẹyom Jehovah; mbufo ẹyom edinen ido, ẹyom sụn̄sụn̄ ido: m̀mê mbufo ẹyedịbe ke usen iyatesịt Jehovah.”—ZEPHANIAH 2:3.
1. (a) Mme usụn̄ ewe ke nditọ ufọkn̄wed ẹda ẹkpep usem esenidụt? (b) Ntak esemde edisana usem-e?
NDITỌ ufọkn̄wed ẹkeme ndikpep obufa usem ebe ke ndida usụn̄ nte ẹbonde ikọ usem oro m̀mê usụn̄ nte ẹsemde usem oro. Ke usụn̄ nte ẹbonde ikọ usem oro, mmọ ke ofụri ofụri ẹsikama mme n̄wed ukpepn̄kpọ ẹnyụn̄ ẹkpep mbet ke nte ẹbonde ikọ. Ke usụn̄ nte ẹsemde usem, mmọ ẹsikpebe mme uyoikọ ye uduot ikọ oro andikpep mmọ ẹtịn̄de. Ẹsikama usụn̄ mbiba ẹmi ke ndikpep “edisana usem.” Ndien edi akpan n̄kpọ nte nnyịn isem usem emi edieke nnyịn idoride enyịn ‘ndidịbe ke usen iyatesịt Jehovah.’—Zephaniah 2:1-3; 3:8, 9.
2. Didie ke nnyịn ikeme ndikpep se ekemede ndikot mme mbet ke nte ẹbonde iko usem ke edisana usem?
2 Akpan n̄wed ukpepn̄kpọ ẹkamade ke ndikpep edisana usem edi Bible. Ifịk ifịk edikpep enye ye mme n̄wed ẹkọn̄ọde ke Bible ekpep fi se ẹkpekotde mme mbet ke nte ẹbonde ikọ usem ke edisana usem. Ukpepn̄kpọ Bible oro owo kiet ke otu Mme Ntiense Jehovah onịmde edi eti ntọn̄ọ. Amaedi mbon oro ẹma ẹkeyayak idem ẹnọ Abasi, mban̄ mban̄ ye ifịk ifịk edikpep N̄wed Abasi edi akpan n̄kpọ. Edi nte mme akpan usụn̄ ẹnyenede ufọn ẹdu ndikpep edisana usem? Ndien nso mme ufọn ẹsụn̄ọ ẹto edisem enye?
Nte Ẹkemede Ndikpep Edisana Usem
3. Nso idi usụn̄ kiet ndikpep edisana usem?
3 Usụn̄ kiet ndikpep edisana usem edi ndibuan akpanikọ ẹmi afo ekpepde ye akpan n̄kpọ ẹmi ama ọkọfọfiọk, kpa nte eyen ufọkn̄wed akpabuande nsio nsio mbet nte ẹbonde ikọ usem nsịt nsịt. Ke uwụtn̄kpọ, inikiet ko ekeme ndidi afo ama ọdiọn̄ọ ete ke Jesus Christ edi Eyen Abasi, edi afo ọkọdiọn̄ọ esisịt n̄kpọ aban̄a utom esie. Tọn̄ọde ke ini oro, ekeme ndidi ukpepn̄kpọ Bible ama ekpep fi nte ke Christ idahaemi ke akara nte Edidem eke heaven ye nte ke Ukara Tọsịn Isua esie, ẹyemenede okopitem ubonowo okosịm mfọnmma. (Ediyarade 20:5, 6) Ih, ndibuan mbufa ekikere ye mmọemi ama ọkọfọfiọk ọkọri edifiọk oro afo ọfiọkde edisana usem.
4. (a) Nso idi usụn̄ efen ndikpep ‘mme mbet ke nte ẹbonde ikọ’ ke edisana usem, ndien ẹda ewe mbụk Bible ẹnam emi an̄wan̄a? (b) Nso ikotịbe nte Gideon ye irenowo esie ikie ita ẹkenamde n̄kpọ? (c) Mbụk aban̄ade Gideon ọnọ nso ukpepn̄kpọ?
4 Usụn̄ en̄wen ndikpep ‘mme mbet ke nte ẹbonde ikọ’ edisana usem edi ndida enyịn ikike n̄kụt mme n̄kpọntịbe eke Bible. Ke ndinam an̄wan̄a: Domo ‘ndikụt nnyụn̄ n̄kop’ mbụk oro ẹwetde ke Judges 7:15-23. Sese! Gideon ebiereikpe Israel amabahade udịmekọn̄ esie esịn ke udịm ita emi kiet kiet esịnede owo ikie. Ke ekịm, mmọ sụn̄sụn̄ ẹto Obot Gilboa ẹsụhọde ẹnyụn̄ ẹkanade nna mbon Midian oro ẹdede idap ẹkụk. Nte owo ikie ita ẹmi ẹma ẹbọbọ n̄kpọekọn̄ mfọn mfọn? Idịghe n̄kpọekọn̄. Kamse, mmọ ẹkpedi n̄kpọ nsahi ke iso mbonekọn̄ oro ẹkohorede idem! Owo kiet kiet akama sụk obukpon̄, akamba aban̄, ye nsadan̄ikan̄ ke aban̄. Edi kpan̄ utọn̄! Ke ẹnọde idiọn̄ọ, owo ikie oro ẹdude ye Gideon ẹfụri obukpon̄ mmọ ẹnyụn̄ ẹnuak aban̄ mmọ. Owo ikie iba eken ẹnam kpasụk ntre. Nte kpukpru mmọ ẹmenerede nsadan̄ikan̄ ke enyọn̄, afo omokop mmọ ẹfioride ẹte: “Ofụt Jehovah ye eke Gideon.” Emi anam mbon Midian ndịk didie ntem! Mmọ ẹbụmede ẹwọn̄ọ ke itienna mmọ, enyịn idap mmọ atara ke nyekidem ke ẹkụtde edeme ikan̄ eke asakde oro anamde ẹkụt n̄kpọ mbukpọn̄ mbukpọn̄ onyụn̄ edemerede ọkpọsọn̄ ndịk. Nte mbon Midian ẹtọn̄ọde ndifehe, ikọt Gideon ẹkaiso ndifụri obukpon̄ mmọ, Abasi onyụn̄ anam mme asua mmọ ẹn̄wana ye kiet eken. Nso okopodudu ukpepn̄kpọ idu ntem ke edisana usem! Abasi ekeme ndinyan̄a mme asan̄autom esie ye unana edida udịmekọn̄ edide owo. Adianade do, ‘Jehovah idikpọn̄ke ikọt esie kaban̄a akamba enyịn̄ esiemmọ.’—1 Samuel 12:22.
5. Didie ke mme mbonoesop Christian ẹkeme ndin̄wam ndidiọn̄ usem nnyịn?
5 Ke ini ẹkpepde nditọ ufọkn̄wed usem esenidụt ebe ke usụn̄ nte ẹsemde usem, mmọ ẹsidomo ndimana ntịn̄ uyoikọ ye uduot ikọ andikpep nnennen nnennen. Nso nti ifet idu ntem ndisem edisana usem ke mme mbonoesop Christian! Do nnyịn imesikop mbon en̄wen ẹdade usem akpanikọ eke N̄wed Abasi ẹtịn̄ se idide ekikere mmọ, ndien nnyịn ke idem nnyịn imekeme ndinyene ifet ndinọ ibọrọ. Nte nnyịn imesikop ndịk ite ke nnyịn imekeme nditịn̄ se ikwan̄ade? Yak oro okûdi akpan n̄kpọ oro nnyịn ikerede, koro ndudue emi ebiowo oro etiede ibuot ke mfọnido enen̄erede ke utọ mbonoesop nte Ukpepn̄kpọ Enyọn̄-Ukpeme eke urua ke urua ekeme ndidiọn̄ usem nnyịn. Ke ntre, dụk nnyụn̄ buana ke mme mbonoesop Christian ofụri ini.—Mme Hebrew 10:24, 25.
Ndek Atara Asuana
6. Ntak emi utọ ukpụhọde oro odude ke ufọt Mme Ntiense Jehovah ye mme esop ido ukpono Christendom?
6 Mbon oro ẹtan̄ade uduak Jehovah ẹnyụn̄ ẹtọtde ẹban̄a Obio Ubọn̄ esie eke heaven ke ẹsem edisana usem nte Mme Ntiense esie. Mmọ ẹnam ẹdiọn̄ọ enyịn̄ esie ẹnyụn̄ ẹnam n̄kpọ esie “ke esịt kiet,” m̀mê ye unyịme kiet. (Zephaniah 3:9) Okposụkedi mme ido ukpono Christendom ẹnyenede Bible, mmọ isemke edisana usem m̀mê ndiseme n̄kot enyịn̄ Jehovah ke mbuọtidem. (Joel 2:32) Mmọ inyeneke etop emi odude ke n̄kemuyo oro ọkọn̄ọde ke N̄wed Abasi. Ntak-a? Koro mmọ ẹnịmde ido edinam ido ukpono, akwaifiọk ererimbot, ye edinam akpanikọ nnọ ukaraidem ke enyọn̄ ẹkan Ikọ Abasi. Uduak, idotenyịn, ye mme usụn̄ unam n̄kpọ mmọ ẹdi eke idiọk ererimbot emi.
7. Nso mme ukpụhọde ke ufọt Mme Ntiense Jehovah ye nsunsu ido ukpono ke ẹwụt ke 1 John 4:4-6?
7 Christendom—ke akpanikọ, ofụri ukara ererimbot eke nsunsu ido ukpono—isemke ukem usem oro Mme Ntiense Jehovah ẹsemde. Nte enemde, apostle John ekewet ọnọ mbon oro ẹsemde edisana usem ete: “Mbufo ẹnyene Abasi, . . . ẹmenyụn̄ ẹkan mmọ; koro Enyeemi odude mbufo ke idem okpon akan enyeemi odude ke ererimbot. Mmọ ẹdi mbon ererimbot; ntre ke mmọ ẹtetịn̄ ikọ nte mbon ererimbot, ererimbot onyụn̄ akpan̄ utọn̄ ọnọ mmọ. Nnyịn idi nditọ Abasi; owo eke ọfiọkde Abasi ọbiọn̄ utọn̄ okop ikọ nnyịn; edi owo eke mîdịghe owo Abasi ikopke ikọ nnyịn.” (1 John 4:4-6) Mme asan̄autom Jehovah ẹmekan mme nsunsu andikpep koro Abasi, emi odude ye ikọt esie, “okpon akan [Devil, emi] odude ke ererimbot,” kpa idiọk n̄kaowo. Sia mbon mfiakedem “edi[de] mbon ererimbot” ẹnyụn̄ ẹnyenede idiọk edu esie, “mmọ ẹtetịn̄ ikọ nte mbon ererimbot, ererimbot onyụn̄ akpan̄ utọn̄ ọnọ mmọ.” Edi mbon mbieterọn̄ ẹsikpan̄ utọn̄ ẹnọ mbon oro ẹdide nditọ Abasi, ẹdiọn̄ọde ẹte ke ikọt Jehovah ẹsem edisana usem eke akpanikọ Bible oro ẹnọde ebe ke esop esie.
8. Nso idi idiọn̄ọ ata abiatibet?
8 Ẹma ẹbemiso ẹtịn̄ ẹban̄a akwa nsọn̄ibuot, ndien ‘ndịbe ndịbe ubiatibet’ ama ọtọtọn̄ọ utom ke akpa isua ikie C.E. Nte ini ebede, irenowo oro ẹkenyịmede—m̀mê ẹkebọde—mbiomo unọ ukpep ke esop ẹma ẹkpep ediwak nsunsu ukpepn̄kpọ. Usem mmọ ikekpetke-kpet ndidi edisana. Ntre otu “owo eke edide ata abiatibet” ama adaha ada, kpa mme ọkwọrọ ederi Christendom, ẹsọn̄ọde ẹyịre ke mme edinam nsunsu ido ukpono, akwaifiọk ererimbot, ye mme ukpepn̄kpọ oro mîtoho n̄wed Abasi.—2 Thessalonica 2:3, 7.
Ẹkop Edisana Usem ke Ofụri Ererimbot
9. Mme n̄kọri ido ukpono ewe ikodu ke isua ikie-19?
9 Ekpri ibatowo kpọt ẹmi ẹbakde Abasi “ẹsọn̄ọ ẹn̄wana kaban̄a ikọ mbuọtidem, ẹmi ẹma ẹkeyak ini kiet ko ẹsịn nti ikọt Abasi ke ubọk.” (Jude 3) M̀mọ̀n̄ ke ẹkeme ndikụt utọ mme andinịm ke akpanikọ oro? Ke ediwak isua ikie, nsunsu ido ukpono ama onịm ediwak owo ke ekịm eke spirit, edi Abasi ama ọdiọn̄ọ ibat ibat owo oro ẹkenyenede unyịme esie. (2 Timothy 2:19) Ndien ekem, ke otu mme ukpụhọde oro ẹdude ke unyamurua, usiakifia, ye ebuana otuowo eke ọyọhọ isua ikie-19, uyo ẹma ẹwọrọ ẹmi ẹkesọn̄de ẹkan ofụri ofụri ndutịme eke nsunsu ido ukpono. N̄kpri otu ẹma ẹdomo ndikot mme idiọn̄ọ eke mme ini nnyụn̄ mbemiso ntịn̄ mban̄a edifiak ndi Jesus ọyọhọ ikaba, edi idịghe kpukpru mmọ ẹkesem edisana usem.
10. “Edifiak ndi ọyọhọ ikaba” eke ewe otu ke Abasi ekemek ndisem edisana usem, ndien ntak emi uyarade odude nte ke ubọk Jehovah omodu ye mmọ?
10 Ke 1879, nte ededi, enye ama akabade ana in̄wan̄în̄wan̄ m̀mê uyo “edifiak ndi ọyọhọ ikaba” ewe ke Jehovah emek ndisem edisana usem nte Mme Ntiense esie. Ke ini oro ekpri otu ukpepn̄kpọ Bible oro Charles Taze Russell akadade usụn̄ ama esisop idem ke Pittsburgh, Pennsylvania, U.S.A. Mmọ ẹma ẹtịm ẹfiọk ẹte ke edifiak ndi Jesus ọyọhọ ikaba editọn̄ọ edidu esie oro enyịn mîkwe, nte ke ini ukụt ererimbot odu ke ini iso, ye nte ke Tọsịn Isua Ukara Christ oro ẹdifiakde ẹwụk Paradise ke isọn̄ eyetiene emi, ye nsinsi uwem odude ọnọ mme okopitem ubonowo. Ke July 1879 Nditọ Ukpepn̄kpọ Bible ẹmi ẹma ẹtọn̄ọ ndimịn̄ magazine oro ẹdiọn̄ọde idahaemi nte Enyọn̄-Ukpeme. Sụk idem 6,000 ke ẹkesuan ke akpa nsiondi esie. Edi “ubọk Ọbọn̄ [“Jehovah,” NW]” ama odu ye Mme Ntiense ẹmi, koro ẹmịn̄ magazine emi idahaemi ke usem 111, ye ukem mbahade edimịn̄ oro ebede 15,000,000 ke nsiondi kiet kiet.—Men Utom 11:19-21 domo.
11, 12. Nso idi ndusụk akpanikọ N̄wed Abasi oro mbon oro ẹsemde edisana usem ẹdiọn̄ọde?
11 Otode Bible ye n̄wed Mme Ntiense Jehovah, ndien akpan akpan ebede ke ifịk ifịk mme Christian oro ẹtan̄ade eti mbụk, ẹmedidiọn̄ọ edisana usem ke ofụri isọn̄. Ndien nso akwa ufọn ke mbon oro ẹsemde enye ẹdia ntem! Utu ke ndidọhọ ke ‘Abasi edi Abasi, Christ edi Abasi, Edisana Spirit onyụn̄ edi Abasi’ ke ayan̄a-owo-ifiọk ukpepn̄kpọ Abasi-Ita-ke-Kiet oro edide ndịben̄kpọ, mmọ ẹnyịme ye idaha Bible nte ke Jehovah edi Ata Edikon̄, Jesus Christ nte usụhọde owo edi Eyen esie, ndien edisana spirit edi utịbe utịbe anamutom odudu Abasi. (Genesis 1:2; Psalm 83:18; Matthew 3:16, 17) Mbon oro ẹsemde edisana usem ẹdiọn̄ọ ẹte ke owo ikoforoke-foro ito usụhọde uduot uwem n̄kpọ edi nte ke ima ima Abasi okobot. (Genesis 1:27; 2:7) Mmọ ẹdiọn̄ọ ẹte ke ukpọn̄ ikaha iso idu uwem ke owo akpade—kpa akpanikọ oro emende ndịk n̄kpa efep. (Ecclesiastes 9:5, 10; Ezekiel 18:4) Ẹdiọn̄ọ hell nte udi ofụri ubonowo, idịghe ebiet ikan̄ ikan̄ ndutụhọ oro ubi ubi abasi etịbide. (Job 14:13) Mmọ ẹdiọn̄ọ n̄ko ẹte ke ediset ke n̄kpa edi idotenyịn oro Abasi ọnọde mme akpan̄kpa.—John 5:28, 29; 11:25; Utom 24:15.
12 Mbon oro ẹsemde edisana usem ẹkpono iyịp ye uwem. (Genesis 9:3, 4; Utom 15:28, 29) Mmọ ẹfiọk ẹte ke uwem Christ eke isọn̄ edi ekọmurua ufak oro ẹkekpede ẹnọ mme okopitem ubonowo. (Matthew 20:28; 1 John 2:1, 2) Akananam mmọ ibọn̄ke akam inọ “ndisana owo,” ẹfiọkde ẹte ke ana akam mmimọ aka nnennen ebịne Abasi ebe ke Jesus Christ. (John 14:6, 13, 14) Sia Ikọ Abasi obiomde ukpono ndem ikpe, mmọ ikamake ndisọi mbiet ke utuakibuot mmọ. (Exodus 20:4-6; 1 Corinth 10:14) Ndien mmọ ẹfep mme afanikọn̄ ẹtode utuakibuot nnọ demon koro mmọ ẹsịnde ubụpekpo, oro n̄ko ẹbiomde ikpe ke Bible.—Deuteronomy 18:10-12; Galatia 5:19-21.
13. Ntak emi ekikere mîtịmekede mbon oro ẹsemde edisana usem?
13 Mme asan̄autom Jehovah, ẹmi ẹsemde edisana usem itịmekede ekikere iban̄a ebiet oro nnyịn idude ke ubatini. Jehovah emekpep mmọ ete ke mmọ ẹdu ke “utịt ini,” ye Jesus odude nte ubọn̄ ubọn̄ spirit oro enyịn̄ mîkwe. (Daniel 12:4; Matthew 24:3-14; 2 Timothy 3:1-5; 1 Peter 3:18) Ye n̄kpọsọn̄ udịmekọn̄ eke heaven ke edem esie, Christ ọmọn̄ ọtọn̄ọ ndiwat ndụk an̄waekọn̄ man ebiere ikpe Abasi ọnọ editịm n̄kpọ emi. (Daniel 2:44; Ediyarade 16:14, 16; 18:1-8; 19:11-21) Ih, ndien mbon oro ẹsemde edisana usem ke ẹsịn idem ẹtan̄a eti mbụk ẹte ke Obio Ubọn̄ Abasi ke ubọk Christ ibịghike eyeda mme akwa edidiọn̄ ọsọk kpukpru okopitem ubonowo ke paradise isọn̄. (Isaiah 9:6, 7; Daniel 7:13, 14; Matthew 6:9, 10; 24:14; Luke 23:43) Kpukpru ẹmi, nnyịn ikam inyụn̄ idụn̄ọde enyọn̄ enyọn̄ kpọt! Ke akpanikọ, edisana usem enyene inyene akan, kpa usem oro ọsọn̄de urua akan ke isọn̄!
14. Mme edidiọn̄ ewe ke mbon oro ẹsemde edisana usem ẹnyene?
14 Mme ufọn oro mbon ẹmi ẹsemde edisana usem ẹdiade esịne “emem Abasi” emi akarade esịt ye ekikere. (Philippi 4:6, 7) Mmọ ẹnịm mme mbet Bible, oro ẹnọde nsọn̄idem, inemesịt, ye uyụhọ oro otode edinam se inemde Jehovah esịt. (1 Corinth 6:9, 10) Ih, mbon oro ẹsemde edisana usem ẹnyene idotenyịn nsinsi uwem ke obufa ererimbot oro Abasi on̄wọn̄ọde.—2 Peter 3:13.
Sem Enye Mîdịghe Ataba Enye
15. Didie ke afo ekeme ndibọ ufọn nto edinyene ifiọk ọfọnde mban̄a edisana usem?
15 Edieke afo oyomde ndisem edisana usem ke obufa ererimbot, ana afo ọfiọk enye ata mfọn mfọn tutu enye akabade edi usem emi afo ekerede aban̄a. Ke ini owo ekpepde-kpep usem, enye ke akpa ekere n̄kpọ ke usem isọn̄ emana esie onyụn̄ akabade ekikere esie ọdọn̄ ke obufa usem oro. Edi nte enye akabarede emehe ye obufa usem oro akan, enye ọtọn̄ọ ndikere n̄kpọ ke enye ye unana ediyom ndinam edikabade. Ukem ntre, otode ifịk ifịk ukpepn̄kpọ, afo emekeme ndinyene ifiọk ọfọnde mban̄a edisana usem tutu eyedi se afo ọfiọkde ndibuan mme mbet ye edumbet Bible ndikọk mme mfịna nnyụn̄ nsọn̄ọ ndu ke “usụn̄ uwem.”—Psalm 16:11.
16. Nso ikeme nditịbe edieke afo mûtịn̄ke edisana usem emi kpukpru ini?
16 Ana afo esem edisana usem kpukpru ini, mîdịghe ntre afo eyetaba ukeme edisem enye mfọn mfọn. Ke ndinam an̄wan̄a: Ediwak isua ẹmi ẹkebede, ndusụk nnyịn ima ikpep usem esenidụt. Nnyịn imekeme nditi ndusụk ikọ ke usem oro edi anaedi ima itaba nte nnyịn ikesidade enye itịn̄ ikọ sia nnyịn mîkamake enye itịn̄ ikọ kpukpru ini. Ukem n̄kpọ emi ekeme nditịbe ye edisana usem. Edieke nnyịn mîdaha enye itịn̄ ikọ kpukpru ini, nnyịn imekeme nditaba nte ikesidade enye itịn̄ ikọ, ndien oro ekeme ndinyene utịp mmọn̄eyet ke n̄kan̄ eke spirit. Ẹyak nnyịn ke ntre isisem enye kpukpru ini ke mme mbonoesop ye ke utom an̄wautom Christian. Utom ẹmi, ọkọrọ ye ọkpọ ọkpọ ukpepn̄kpọ, eyen̄wam nnyịn nditịn̄ n̄kpọ nnennen ke edisana usem. Ndien oro edi akpan n̄kpọ didie ntem!
17. Nso inam an̄wan̄a nte ke ikọ ekeme ndinyan̄a uwem m̀mê ndida n̄kpa ndi?
17 Ikọ ekeme ndidi se inyan̄ade uwem m̀mê se idade n̄kpa idi. Ẹma ẹwụt emi ke ini en̄wan okodude ke ufọt nditọ Israel eke esien Ephraim ye Jephthah, Ebiereikpe Gilead. Man ẹdiọn̄ọ mbon Ephraim oro ẹkedomode ndifehe mbe Akpa Jordan, mbon Gilead ẹma ẹda ikọ-idiọn̄ọ oro “Shibboleth,” emi ntọn̄ọ uyo esie edide “sh.” Mbon Ephraim ẹma ẹduọ ẹdụk ubọk mbon ukpeme Gilead ke ube-inyan̄ Jordan ke ndidọhọ “Sibboleth” utu ke “Shibboleth,” ẹkotde ntọn̄ọ ikọ oro ukwan̄ ukwan̄. Nte utịp, ẹma ẹwot mbon Ephraim 42,000! (Judges 12:5, 6) Kpasụk ntre, se mme ọkwọrọ ederi Christendom ẹkpepde ekeme ndibiet edisana usem ke utọn̄ mbon oro mîtịmke imehe ye akpanikọ Bible. Edi ndisem usem ke usụn̄ nsunsu ido ukpono eyeda n̄kpa edi ke usen iyatesịt Jehovah.
Nnyịn Idu ke Edidianakiet
18, 19. Nso ke Zephaniah 3:1-5 ọwọrọ?
18 Ke ẹtịn̄de ẹban̄a anana mbuọtidem Jerusalem eset ye mbiet esie eke eyomfịn, Christendom, ẹdọhọ ke Zephaniah 3:1-5 ẹte: “Ọdiọk ọnọ owo eke ọsọn̄de ibuot onyụn̄ edehede, obio ukụt! Enye ikopke uyo: ibọhọ item: ibuọtke idemesie ye Jehovah; isan̄ake ikpere Abasi esie. Mbọn̄ esie ke ufọt esie ẹdi lion mfiori: mme ebiereikpe esie ẹdi wolf mbubịteyo; mmọ isụhọke baba n̄kpọ kiet inọ usenubọk. Mme prọfet esie ẹdi mbon n̄kịmenyịn ye mbon mbubịk; mme oku esie ẹsabade edisana n̄kpọ: mmọ ẹbiat ibet. Edinen Jehovah odu enye ke esịt: enye idinamke se ikwan̄ade: eyeda ikpe esie kpukpru usenubọk onịm ke un̄wana: enye ikpụhe; edi owo n̄kwan̄a ifiọkke bụt.” Nso ke ikọ ẹmi ẹwọrọ?
19 Jerusalem eset ye Christendom eyomfịn ẹma ẹsọn̄ ibuot ye Jehovah ẹnyụn̄ ẹda nsunsu utuakibuot ẹsabade idemmọ. Ukwan̄ edinam mbọn̄ mmọ ama osụn̄ọ ke ufịk. Kpa ye oro Abasi odụride mmọ utọn̄ afiak odụri, mmọ ikakpan̄ke utọn̄ inyụn̄ isan̄ake ikpere enye. Mbọn̄ mmọ ẹbiet mme lion mbụme, ẹmi ke ntan̄idem ẹfụmide edinen ido. Ukem nte wolf oro okopde biọn̄, mme ebiereikpe mmọ ẹma ẹwai unenikpe mbai mbai. Mme oku mmọ ‘ẹmesabade se idide edisana ẹnyụn̄ ẹbiat ibet’ Abasi. Ntem Jehovah ọmọn̄ ‘osop mme idụt, onyụn̄ obon mme obio ndidem, man an̄wan̄a mmọ ifụtesịt esie ke idem, ofụri ikan̄ iyatesịt esie.’—Zephaniah 3:8.
20. (a) Nso ke ana ẹnam man ẹbọhọ usen iyatesịt Jehovah? (b) Didie ke nnyịn ikeme ndidori enyịn ndibọ nsinsi edidiọn̄ ẹtode Abasi?
20 Usen iyatesịt Jehovah ke asan̄a ekpere usọp usọp. Man ọbọhọ odụk obufa ererimbot Abasi, kemi, kpep nnyụn̄ sem edisana usem ye unana ubiatini. Ke ndinam ntem ikpọn̄îkpọn̄ ke afo ekeme ndibọhọ afanikọn̄ eke spirit idahaemi ye nsobo ofụri ererimbot oro otịmde ekpere. Mme Ntiense Jehovah ke etan̄a usen iyatesịt Abasi ye inem inem etop aban̄ade Obio Ubọn̄ esie. Mmọ ẹkop idatesịt didie ntem nditịn̄ mban̄a ubọn̄ ye itie edidem esie! (Psalm 145:10-13) Kabade dianakiet ye mmọ, ndien afo eyekeme ndidot enyịn ndinyene nsinsi uwem ye mme edidiọn̄ eken ẹtode Anditọn̄ọ edisana usem, kpa Ọbọn̄ Andikara, Jehovah.
Didie ke Afo Ọkpọborọ?
◻ Nso idi ndusụk usụn̄ ndikpep edisana usem?
◻ Ntak ọfọnde ndikpep edisana usem?
◻ Nso ikeme nditịbe edieke afo mûsemke edisana usem kpukpru ini?
◻ Didie ke owo ekeme ndibọhọ usen iyatesịt Jehovah nnyụn̄ mbọ mme nsinsi edidiọn̄?
[Ndise ke page 16]
Gideon ye irenowo esie ẹma ẹfụri obukpon̄ ẹnyụn̄ ẹmenede nsadan̄ikan̄ ke enyọn̄
[Ndise ke page 18]
Ọtọn̄ọde ke 1879 kaiso ama ana in̄wan̄în̄wan̄ nte ke Abasi akada Charles Taze Russell ye nsan̄a esie ndimenede edisana usem ke enyọn̄
[Mme ndise ke page 20]
Nte afo amadiana kiet ye Mme Ntiense Jehovah ke ndisem edisana usem?