Ntọt M’ọkwọrọ Obio Ubọn̄
“Kpukpru Itien̄wed Abasi Oro Enye Okokotde Ama Otụk Mi Esịt”
APOSTLE Paul ọkọdọhọ ete, “Iko Abasi enyene uwem, onyụn̄ ananam n̄kpọ.” (Mme Hebrew 4:12) Emi ama ọwọrọ edi akpanikọ ke uwem n̄wan kiet otode Vietnam emi ẹkebọkde nte owo Buddha. Emi edi mbụk esie.
“Ete ye eka mi, ẹmi ẹsụk ẹdude ke Vietnam, ẹdi inua-okot mbon Buddha, ntre ẹkebọk mi nte owo Buddha tutu osịm ini ndọ mi ke ndide isua 22. Mbonufọk ebe mi ẹma ẹnyịk mi ndina baptism ke Ufọkederi Catholic. Mmọ ẹkedọhọ ẹte ke ẹma ẹbiọn̄ọ ekaebe mi oro akakpade ndika heaven sia ami n̄kedide owo Buddha! Ke akpa mma nsịn ndinam ntre, edi ke ukperedem mma nna baptism man nnem mmọ esịt. Nte ededi, ke esịt mi, eketie mi nte n̄kpọ nsahi koro ami mma nsua mbubịk oro okodude ke Ufọkederi Catholic. Enye ikenyeneke ukpụhọde ye ido ukpono Buddha. Enye ama abuana ke ekọn̄ ye mbre ukara ukem ukem, ndien ido ukpono mbiba ẹmi ẹma ẹsịn udọn̄ ẹnọ utuakibuot nnọ mme eteete.
“Edieke edide n̄kodu ke Vietnam, ami n̄kpekenyene ata ekpri ifet ndikpep akpanikọ. Ami n̄kọkọri n̄kpon ke ini ndutịme ukaraidem akadade itie ke Edem Usụk Vietnam, ndien ami n̄kodu ke obio oro enen̄erede oyom usụn̄ ọkpọn̄ Saigon. Ntre ekedi edidiọn̄ ndikeme ndibọhọ n̄ka Australia.
“Ami n̄kedi kiet ke otu mbon ubom oro ẹkenyenede mfọniso ẹkan. Ye eyen mi ọsọn̄de ofiọn̄ iba ke ubọk mi, ami n̄kenyene ndifehe ke ekịm man mbọhọ mme borisi nnyụn̄ ndụk ekpri ubon ukoiyak. Ke usen itiaba ẹma ẹkebe ke inyan̄ibom, nnyịn ima idibehe ke Malaysia, ke ebiet emi nnyịn ikodude ke ọfiọn̄ ifan̄ ke itienna mbonitọk ekọn̄ mbemiso ikade Australia.
“Ke isua iba ye ubak ẹma ẹkebe ke Australia, Mme Ntiense Jehovah ẹma ẹsobo ye ami ke utom ukwọrọikọ mmọ eke ufọk-ke-ufọk. Ke akpa ediwaha, ami mma nnyịme ukpepn̄kpọ Bible ofụri ini koro ami n̄kada emi nte eti ifet ndikpep Ikọmbakara. Edi edu Ntiense oro okokụtde mi ye akpanikọ oro n̄wan emi ekekpepde mi ama enen̄ede otụk mi. Kpukpru itien̄wed Abasi oro enye okokotde ama otụk mi esịt, ndien n̄kekemeke ndikụt mbubịk ke esop Jehovah. Ke mma n̄kekpep Bible ke isua kiet ye ubak, mma nnyak uwem mi nnọ Jehovah nnyụn̄ nna baptism.
“Ana ndọhọ nte ke akpanikọ omokpụhọde ofụri usụn̄ oro ami n̄kesede uwem. Ebe mi edi enyeoro mînịmke ke akpanikọ, edi Jehovah aman̄wam onyụn̄ ọsọn̄ọ omụm mi akama, adianade ye ekpri ubon mi. Enye edi Akwa Andikpep mi omonyụn̄ ekpep mi ndikabade ndi eti n̄wanndọ ye ekaeyen. Ami ke n̄kaiso ndikọm Jehovah nte ke enye aman̄wam mi osio ke ekịm eke spirit esịn ke un̄wana akpanikọ Bible.”
Edi akpanikọ, Ikọ odudu spirit Abasi ama enyene nsinsi odudu ke afan̄ emi. Ndikpep Bible nnyụn̄ nda se ẹkpepde nsịn ke edinam anam uwem enyene se ọwọrọde onyụn̄ enyene uduak onyụn̄ ada osịm nsinsi uwem ke obufa ererimbot Abasi. Nte Abasi ọkọnọde Moses odudu ndiwet ete, “Koro enye mîdịghe n̄kpọ mbubru ye mbufo: koro edide uwem mbufo.”—Deuteronomy 32:47.