Idahaemi Edi Ini Ndiyom Jehovah
“Jehovah etie ke enyọn̄, osụk iso ese nditọ owo, ete ise m̀mê enyene owo eti ibuot, owo eke ebịnede Abasi.”—PSALM 14:2.
1, 2. (a) Didie ke ediwak owo ẹse Abasi akpanikọ, kpa Jehovah? (b) Nnyịn isan̄a didie ifiọk ke Jehovah enyene ifiọk aban̄a unana udọn̄ ubonowo?
MFỊN, mbon oro mînịmke edidu Abasi ke akpanikọ, mbon oro ẹdọhọde ke owo ifiọkke m̀mê Abasi odu m̀mê idụhe, mme andituak ibuot nnọ mme nsunsu abasi, ye ediwak million owo ẹmi ẹdọhode ke imonịm Abasi ke akpanikọ edi ẹkan̄de enye ke edinam mmọ, ẹmesịn Abasi akpanikọ, kpa Jehovah. (Titus 1:16) Ediwak owo ẹnyene edinịm ke akpanikọ ebietde eke akwa owoifiọk Germany eke isua ikie-19 oro, Nietzsche nte ke “Abasi amakpa.” Nte Jehovah anana ifiọk aban̄a ndisịme unana udọn̄ emi? Baba, koro enye ama ọnọ David odudu ndiwet ete: “Ndisịme owo ọdọhọ ke esịt esie, ete, Abasi idụhe. Mmọ ẹmediọk, ẹnyụn̄ ẹnam mbubiam n̄kpọ; baba owo kiet eke anamde eti ido idụhe.”—Psalm 14:1.
2 David ama akaiso ete: “Jehovah etie ke enyọn̄, osụk iso ese nditọ owo, ete ise m̀mê enyene owo eti ibuot, owo eke ebịnede Abasi.” Ih, Ọbọn̄ Andikara enyene ifiọk aban̄a mbon oro ẹyomde ndifiọk nnyụn̄ nnam n̄kpọ esie. Ntem, nnyịn ndiyom enye ifịk ifịk idahaemi edi akpan n̄kpọ. Emi eyewọrọ se inamde owo odu nsinsi uwem ye se inamde owo ọbọ nsinsi nsobo.—Psalm 14:2; Matthew 25:41, 46; Mme Hebrew 11:6.
3. Nso idotenyịn idu inọ ini iso?
3 Ntre, nnyịn imekeme ndikụt ntak edide ata akpan n̄kpọ nte nnyịn in̄wam mbon en̄wen ndiyom Jehovah idahaemi. Ediwak million owo ẹsụk ẹdodu oro akanam mîsoboke ye kiet ke otu Mme Ntiense Jehovah m̀mê ndikop “gospel Ubọn̄ Abasi.” Ndien nnyịn ifiọkke m̀mê adan̄a didie ke ibat “akwa otuowo” ediwak mbemiso “akwa ukụt.” Edi ke akpanikọ idotenyịn odu ọnọ ediwak owo efen efen ndiyom nnyụn̄ n̄kụt Jehovah Abasi ke n̄kpet n̄kpet ini iso mbemiso ini ebede akaha. Mbụme odude idahaemi edi, Nso ke nnyịn ikeme ndinam ndin̄wam ediwak owo efen efen ndiyom Abasi?—Matthew 24:14; Ediyarade 7:9, 14.
4, 5. Ke ediyom oro mmọ ẹyomde abasi, nso ke ekese owo ẹmek?
4 Mfịn, ediwak owo ke ererimbot ke ẹyom, edi ẹyom nso? Ata ibat ibat owo ẹnen̄ede ẹyom n̄kukụre Abasi akpanikọ, kpa Jehovah. Ediwak owo ẹmek abasi oro ẹkemde ye mme ọkpọ ọkpọ udọn̄ ye ukwan̄ ekikere idemmọ. Nte anam ndụn̄ọde owo U.S. oro, George Gallup, Jr., ọkọdọhọde ete: “Afo ke akpanikọ ukwe akwa ukpụhọde ke ufọt mme aka ederi ye mbon oro mîkaha ke se iban̄ade utụk, edidịbe mbọhọ ukpe tax, ye ediyịp n̄kpri n̄kpọ, akpan akpan koro ekese ido ukpono ebuana otuowo ẹdude.” Enye adian do ete ke “ekese mmọ ẹsiak ido ukpono nte ẹnemde mmọ onyụn̄ aduaide mmọ ke idem . . . Owo kiet okokot enye ido ukpono ndia.”
5 Mmọ eken ẹyedọhọ ẹte, “Ido ukpono mi ọfọn ye ami.” Nte ededi, mbụme ekpenen̄ede edi, “Nte ido ukpono mi ọfọn ye Abasi?” Edi akpanikọ, ediwak mbon Christendom ye mbon Ido Ukpono Hindu ẹkop uyụhọ ke ndikpono ndisọi mbiet ye ndem. Ediwak mme Christian inua inua ẹkụt nte ke anana enyịn̄ abasi eke Abasi-Ita-ke-Kiet ekem ye mmimọ. Ndien mbon Muslim ẹwakde ebe million 900 ẹnịm Allah ke akpanikọ. Ke n̄kan̄ eken, ediwak million mbon oro mînịmke edidu Abasi ke akpanikọ ẹdọhọ ke Abasi idụhe.
Mbon Oro Ẹyomde Un̄wam
6. Nso ke ekese mme andikot Enyọn̄-Ukpeme ẹkụt?
6 Edi nso kaban̄a ndusụk nnyịn oro isikotde magazine emi kpukpru ini? Nnyịn ima iyom Abasi akpanikọ inyụn̄ ikụt enye. Nnyịn imowụt nte ikọ James 4:8 edide akpanikọ: “Ẹsan̄a ẹkpere Abasi, ndien enye eyesan̄a ekpere mbufo.” Ebede ke ifịk ifịk edibuana ye esop Christian, nnyịn imasan̄a ikpere Abasi, ndien nnyịn imokụt ke idem nnyịn nte Jehovah asan̄ade ekpere nnyịn.—John 6:44, 65.
7. Nnyịn isan̄a didie ifiọk ke ediwak owo ẹdu oro ẹsụk ẹnyenede udọn̄ ndikabade nsọn̄idem ke akpanikọ?
7 Nte ededi, nnyịn imofiọk ite ke ekese owo ke ẹsụk ẹdu oro ẹsikopde inemesịt ndibuana ye ikọt Jehovah ke ini ke ini edi ẹmi mîdaha eti idaha kan̄a ndisan̄a n̄kpere Jehovah ebe ke uyakidem ye baptism. Nnyịn isan̄a didie ifiọk emi? Ke 1990 se ikperede million owo duop ẹkedụk Editi n̄kpa Jesus. Edi owo ifan̄ isuan eti mbụk Obio Ubọn̄ ifịk ifịk? Se iwakde ibe million inan̄ kpọt. Oro ọwọrọ nte ke nnyịn imenyene n̄kpọ nte owo million itiokiet oro ẹsinamde n̄kpọ ufan ufan ẹban̄a akpanikọ ẹnyụn̄ ẹsidarade ndibuana ndusụk ini edi oro mîtọn̄ọke kan̄a ndisem edisana usem akpanikọ ke ndikwọrọ eti mbụk Obio Ubọn̄. Ye unana eyịghe, ke mbabuat idaha ekese mmọ ẹsitịn̄ ikọ ke ibuot Jehovah ye ukara Obio Ubọn̄ esie. Nte ededi, mmọ iwụtke idemmọ an̄wan̄wa kan̄a nte Mme Ntiense Jehovah. Nnyịn imoyom ndin̄wam mmọemi n̄ko.—Zephaniah 3:9; Mark 13:10.
8, 9. (a) Nso ke Jehovah esịn udọn̄ ọnọ nnyịn ndinam? (b) Ntak emi mîwụtke ifiọk ndifụmi item Jehovah?
8 Nnyịn iyom ndisịn udọn̄ nnọ mmọemi ndikabade ndi idara idara, ifịk ifịk Mme Ntiense Jehovah ke akpatre ikpehe akwa utom emi ẹnamde idahaemi ke ofụri ererimbot. Mbọk tịmfiọk ima ima ikot oro Jehovah ọnọde ke Mme N̄ke 1:23: “Mbufo ẹkabade ke nduari mi: sese, nyan̄wan̄a spirit mi nduọk mbufo ke idem, nyenam mbufo ẹfiọk ikọ mi.” (Men John 4:14 domo.) Edi n̄kpọ nsịnudọn̄ didie ntem ndidiọn̄ọ nte ke Jehovah eyenam n̄kpọ aban̄a in̄wan̄în̄wan̄ usio-ukot oro nnyịn inamde ndiwụt idem nnyịn nte ke ida inọ enyịn̄ ye utuakibuot esie! Ke akpanikọ, nnyịn iyomke ẹbat nnyịn ẹsịn ke otu mbon oro ẹtịn̄de ẹban̄a ke Mme N̄ke 1:24, 25 ẹte: “Ami [n̄kokot], ndien mbufo ẹsịn; n̄kanyan ubọk mi, ndien baba owo kiet eke ẹsede idụhe; ndien mbufo ẹma ẹduọk kpukpru item mi, inyụn̄ inyịmeke nduari mi.”
9 Mbon oro ẹfụmide item Jehovah oro nte yak mmọ ẹyom enye ke adan̄aemi ẹkemede ndikụt enye ẹnyụn̄ ẹsịkde ubiere mmọ ẹnịm tutu mmọ ẹnen̄ede ẹkụt akwa ukụt ọtọn̄ọde ẹyekụt nte ke mmimọ ima ibet ọniọn̄ ini akaha. Utọ edinam oro okpowụt unana mbuọtidem ye eti ibuot okponyụn̄ edi edisịn mfọnido Jehovah oro owo mîdotke ke ndek.—2 Corinth 6:1, 2.
10. Ntak emi unana udọn̄ ye umiọn̄ ẹdide n̄kpọ ndịk-e?
10 Ke ndinam ufọn edinam n̄kpọ usọp usọp an̄wan̄a, nte afo ekpetiene eti item dọkta n̄kukụre ke ini afo ama ekenyenyene udọn̄ọ ke obufre edem mbiba? Mîdịghe, utu ke oro, ke ini afo okụtde akpa idiọn̄ọ ntọn̄ọ udọn̄ọ oro? Do ntak abiatde ini ndidianade idemfo n̄kpọn̄ ọdọn̄ọ udọn̄ọ ererimbot Satan nnyụn̄ nda ke n̄kan̄ Jehovah ye Mme Ntiense esie? Ẹnam mme utịp unana udọn̄, umiọn̄ ye unana editịn̄ enyịn ke n̄kpọ an̄wan̄a ke Mme N̄ke 1:26-29 ẹte: “Ami n̄ko nyesak ke ini nnanenyịn mbufo; nyenyụn̄ mbian̄a ke ini ndịk anamde mbufo . . . Ke ini oro mmọ ẹyeseme ẹkot mi, edi ndiyereke; ẹyebak ẹyom mi, ndien idikwe mi. Koro mmọ ẹkesuade ifiọk, mînyụn̄ imekke nditiene Jehovah.” Ẹyak owo okûkụt nnyịn nte ‘iyomde Jehovah’ ke idiọk ini!
11. Nso un̄wam idu inọ mbon oro ẹyomde ndinam n̄kpọ Abasi?
11 Ẹkeme ndidi ndusụk mbon ẹmi ẹkotde magazine emi ẹsụk ẹdu ke usụn̄ ediyom Abasi akpanikọ. Nnyịn imadat esịt nte ke mbufo ke ẹsọn̄ọ ẹyịre ke ediyom mbufo. Nnyịn ibọn̄ akam ite ifiọk Bible oro mbufo ẹnyenede akpakam onụk mbufo ndinam n̄kaiso usio-ukot ndisọn̄ọ nda nnọ akpanikọ. Ẹnyene mbuọtidem ẹte ke esop Mme Ntiense Jehovah kiet kiet odu ke mben̄eidem ndin̄wam mbufo ke ndụn̄ọde mbufo.—Philippi 2:1-4.
Ini Nsịnifịk ye Edinam
12, 13. Ntak emi nnyịn iyomde ndinam n̄kpọ mban̄a utuakibuot akpanikọ?
12 Ntak edide akpan n̄kpọ nte kpukpru nnyịn inam n̄kpọ ndiwụt nte ke nnyịn ida inọ Jehovah Abasi ye utuakibuot akpanikọ esie? Koro mme n̄kpọntịbe ererimbot ke ẹsan̄a ẹkpere ata utịt. Mbụk ke ọwọn̄ọde ọsọp akan se owo ekemede ndikot mmọ. Idahaemi idịghe ini owo ndinana n̄kan̄ oro adade ọnọ m̀mê nditie ndebe ndebe. Jesus ama etịn̄ in̄wan̄în̄wan̄ ete: “Owo eke mîdaha ye Ami an̄wan̄wana ye Ami; owo eke mînyụn̄ ibokke ye Ami asasuan.” Enye ama ọdọhọ n̄ko ete: “Owo ekededi eke edikopde bụt ye Ami ye ikọ Mi, Eyen Owo eyekop bụt ye enye, ke ini Enye edidide ke Ubọn̄ Esie ye Ubọn̄ Ete Esie ye eke ndisana angel.”—Matthew 12:30; Luke 9:26.
13 Idahaemi edi ini nsịnifịk ye edinam! Nnyịn imọfiọk usụn̄ emi mme n̄kpọntịbe ererimbot ẹsan̄ade ẹka, ndien Armageddon ke otịm asan̄a ekpere. Ke ntre, ikot ẹnọde edi ndiyom Jehovah idahaemi mbemiso ‘usen iyatesịt esie, ke adan̄aemi ẹkemede ndikụt enye.’ Ke akwa ukụt, ini eyebe akaha.—Zephaniah 2:2, 3; Rome 13:11, 12; Ediyarade 16:14, 16.
14. Mme ntak ewe ke nnyịn inyene ndiyom Abasi?
14 Ke akpanikọ, ofụri ubonowo ẹkpenyene ndiyom mfọn Abasi idahaemi. Apostle Paul ama owụt emi nnennen nnennen ke Utom Mme Apostle 17:26-28 ete: “[Abasi] anam kpukpru mme idụt ẹto ke ekpụk kiet ẹwọrọ edidụn̄ ke ofụri iso isọn̄: onyụn̄ edi Enye onịm iduọk ini uwem mmọ ye adan̄a ebietidụn̄ mmọ; kpan̄ mmọ ẹyom Abasi, ẹte ndusụk ifiọn̄ọ ubọk in̄wana ndisịm Enye, nnyụn̄ n̄kụt Enye; okposụkedi nte Enye mîyomke usụn̄ ye baba nnyịn owo kiet. Koro nnyịn idodu ke Enye, inyụn̄ isan̄a ke Enye, inyụn̄ inyene uwem nnyịn ke Enye.” Akpatre ikọ oro, “koro nnyịn idodu ke Enye, inyụn̄ isan̄a ke Enye, inyụn̄ inyene uwem nnyịn ke Enye,” ọnọ nnyịn n̄kem n̄kem ntak ndiyom Abasi. Ke ntak mfọnido Jehovah oro owo mîdotke, nnyịn imodu uwem ke mfafaha edi akpan ekpri ikpehe isọn̄ emi uwem odude. Nte nnyịn ikpowụtke esịtekọm inọ Ọbọn̄ Andikara ekondo? Ndien nte nnyịn ikpowụtke esịtekọm nnyịn inọ enye ke ndinanam n̄wụt?—Utom 4:24.
15. (a) Nso ke ewetmbụk oro, Arnold Toynbee, ekekere nte edide uduak n̄kokon̄ ido ukpono? (b) Nso ke ana nnyịn inam man ikeme ndinọ Abasi ubọn̄?
15 Ewetmbụk oro, Arnold Toynbee, ama ewet inikiet ete: “Ata uduak n̄kokon̄ ido ukpono edi ndinọ adan̄a ediwak ukpọn̄ nte enye ekekeme item ye akpanikọ eke spirit ẹmi ẹdide isọn̄ ukpepn̄kpọ esie, man otode ukpọn̄ ẹmi kiet kiet ẹkpekeme ke ntre ndisịm ata uyọhọ Owo. Ata uyọhọ eke owo edi ndinọ Abasi ubọn̄ nnyụn̄ ndara Enye ke nsinsi.” (An Historian’s Approach to Religion, page 268-269) Man inọ Abasi ubọn̄, ana nnyịn ibemiso iyom enye inyụn̄ inyene nnennen ifiọk iban̄a enye ye mme uduak esie. Ntem, ikot Isaiah emi otịm odot: “Mbufo ẹyom Jehovah, ke ini ẹkemede ndikụt enye, ẹseme ẹkot enye, ke ini enye ekperede: yak idiọkowo ọkpọn̄ usụn̄ esie, yak oburobụt owo ọkpọn̄ ekikere esie: onyụn̄ afiak etiene Jehovah: ndien enye eyetua enye mbọm; ẹtiene Abasi nnyịn, koro Enye eyewak ndidahado.”—Isaiah 55:6, 7.
Nso Eti Un̄wam ke Nnyịn Ikeme Ndinọ?
16. (a) Nso n̄kpọ-ata asak iso ese esop Christian? (b) Ke ewe eti usụn̄ ke nnyịn ikeme ndin̄wam mbon en̄wen ndinam n̄kpọ Jehovah?
16 Ediwak million mbon oro ẹnyenede udọn̄ ẹmi mîdịghe kan̄a mme ọsọn̄idem asuanetop ẹnịm n̄kpọ-ata ẹnọ kpukpru nnyịn. Nso ke nnyịn inam ke eti usụn̄ nte mbiowo, mme asan̄autom unamutom, mme asiakusụn̄, ye mme asuanetop ndin̄wam mbon oro ẹnamde n̄kpọ ufan ufan ẹban̄a akpanikọ ndikabade ndi ifịk ifịk mme andibuana ke utuakibuot akpanikọ ye nnyịn? Usụn̄ kiet ndinọ eti un̄wam ke ebiet oyomde edi ndika ufọk mmọ n̄kada mmọ n̄ka mme mbonoesop ke Ufọkmbono Obio Ubọn̄ man mmọ n̄ko ẹkeme ndibọ mme ufọn ẹtode spirit Jehovah kpukpru ini. Item oro Paul ọkọnọde mbon Hebrew, ke Heb ibuot 10, ufan̄ikọ 24 ye 25, edi usọp usọp n̄kpọ mfịn ukem nte ekedide ini oro: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọkiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.” Nnyịn imesịn udọn̄ inọ kpukpru mbon oro ẹyomde ndifiọk eti uduak Jehovah ndibuana ye Mme Ntiense Jehovah kpukpru ini ke Ufọkmbono Obio Ubọn̄ mmọ.
17. Edieke anade nnyịn in̄wam nditọ ukpepn̄kpọ Bible ke ediyom oro mmọ ẹyomde Jehovah, nso mme mbụme oyom ẹte ẹbọrọ?
17 Edieke nnyịn ikpepde Bible ye owo oro ẹsidụkde mme mbonoesop kpukpru ini, nte nnyịn imekeme ndin̄wam owo oro ndidot nte asuanetop eti mbụk? (Se Organized to Accomplish Our Ministry, page 97-99.) Ndien ke ndondo oro enye akabarede edi asuanetop oro mînaha baptism, nte imọnọ ikot ndisan̄a ye nnyịn kpukpru ini ke an̄wan̄wa utom ukwọrọikọ ye ke ndusụk ukpepn̄kpọ ye mfiakn̄ka nnyịn? (Se nsiondi Enyọn̄-Ukpeme eke December 1, 1989, page 31.) Ke ikọ efen, ke ndondo oro utọ mbufa owo oro ẹdotde, nte nnyịn imesisịn udọn̄ inọ mmọ ke ndiyak mmọ ẹkụt ke akpa ifet ndusụk in̄wan̄în̄wan̄ utịp utom ukwọrọikọ nnyịn?—Matthew 28:19, 20.
Jehovah Omodot Se Ẹyomde
18. Didie ke Jehovah owụt ubonowo mbọm esie?
18 Ke ntak uwa ufak Christ Jesus, Jehovah imụmke mme akpa idiọkn̄kpọ nnyịn ikama inyụn̄ isịn nnyịn edieke nnyịn ikabarede esịt inyụn̄ inyenede mbuọtidem. Tịmfiọk ikọ David ẹmi: “Enye inamke nnyịn nte mme idiọkido nnyịn ẹsan̄ade; inyụn̄ isioho usiene ye nnyịn nte mme ukwan̄n̄kpọ nnyịn ẹdotde. Koro adan̄a nte enyọn̄ okon̄de akan isọn̄, kpa ntre ke ima esie okpon ye mmọ eke ẹbakde enye. Adan̄a nte edem usiahautịn oyomde ye edem usụk, kpa ntre ke enye ọbọ nnyịn mme idiọkido nnyịn onịm anyan ebiet. Kpa nte ete atuade nditọ esie mbọm, kpa ntre ke Jehovah atua mmọ eke ẹbakde enye mbọm. Koro enye ọfiọkde nte iborode, emeti ete ke nnyịn idi ntan.”—Psalm 103:10-14; Mme Hebrew 10:10, 12-14.
19. Nso nsịnudọn̄ idu inọ mbon oro ẹkemede ndidi ẹma ẹyo ẹkpọn̄ akpanikọ?
19 Jehovah edi Abasi mfọnido ye mbọm ke akpanikọ. Edieke nnyịn ikade ibịne enye ke nsụhọdeidem ye edikabade esịt, enye efen onyụn̄ efre. Enye ikamake nsinsi udu ye nsinsi ndutụhọ ke hell ikan̄ nte utịp. Baba, enye edi nte Jehovah ọkọdọhọde ete: “Ami, ami ndi andisọhi mme idiọkido fo mfep mban̄a idemmi, ndinyụn̄ ntịhi mme ukwan̄n̄kpọ fo.” Nso ikọ nsịnudọn̄ ke oro ekpedi ntem ọnọ owo ekededi oro ekemede ndidi ama oyo ọkpọn̄ akpanikọ onyụn̄ ofụmi itie ebuana mmọ ye Jehovah! Ẹsịn udọn̄ ẹnọ mmọ n̄ko ndiyom Jehovah idahaemi nnyụn̄ mfiak mbuana ifịk ifịk ye ikọt enyịn̄ esie.—Isaiah 43:25.
20, 21. (a) Nso uwụtn̄kpọ nsịnudọn̄ ke nnyịn inyene ito Judah eset? (b) Nso ke mme andidụn̄ Judah ẹkenyene ndinam man ẹnyene edidiọn̄ Jehovah?
20 Ke afan̄ emi nnyịn imenyene uwụtn̄kpọ nsịnudọn̄ ito Edidem Asa eke Judah eset. Enye ama osio nsunsu utuakibuot efep ke obio ubọn̄ esie, edi mme idiọn̄ọ ukpono ndem ẹkesụk ẹdodu. Mbụk oro odude ke 2 Chronicles 15, ufan̄ikọ 2 osịm 4, asian nnyịn se prọfet Azariah eketịn̄de ọnọ Asa nte n̄kpọ editi ete: “Jehovah ada ye mbufo ke ini mbufo ẹdeda ye enye; ndien edieke mbufo ẹdiyomde enye, mbufo ẹyekụt enye; edi edieke mbufo ẹdikpọn̄de enye, enye eyekpọn̄ mbufo. Usen ẹnyụn̄ ẹwak ẹmi Israel mînyeneke Abasi akpanikọ . . . Ekem ke nnanenyịn mmọ, mmọ ẹfiak ẹtiene Jehovah Abasi Israel, ẹnyụn̄ ẹyom enye; ndien enye ayak mmọ ẹkụt enye.”
21 Jehovah ikebreke udịbe ye edidem Asa edi ama “ayak mmọ ẹkụt enye.” Didie ke edidem akanam n̄kpọ aban̄a etop emi? Ke ukem ibuotn̄wed oro, 2Ch 15 ufan̄ikọ 8 ye 12 ọbọrọ ete: “Adan̄aemi Asa okopde ikọ emi . . . , esịt ọsọn̄ enye, ndien enye osion̄o mbubiam n̄kpọ efep ke ofụri isọn̄ . . . onyụn̄ ọdiọn̄ itieuwa Jehovah emi odude ke iso etehe Jehovah. [Judah] ẹnyụn̄ ẹdụk ke ediomi, ẹte mmimọ iyeyom Jehovah Abasi mme ete mmimọ, ke ofụri esịt mmimọ, ye ke ofụri ukpọn̄ mmimọ.” Ih, mmọ ke esịt akpanikọ ẹma ẹyom Jehovah ‘ke ofụri esịt mmọ, ye ke ofụri ukpọn̄ mmọ.’ Nso ikedi utịp inọ idụt oro? 2Ch 15 Ufan̄ikọ 15 asian nnyịn ete: “Ndien ofụri Judah ẹdat esịt ẹban̄a un̄wọn̄ọ oro: koro mmọ ẹken̄wọn̄ọde ke ofụri esịt mmọ, ẹnyụn̄ ẹyomde enye ke ofụri itọn̄ mmọ; ndien mmọ ẹkụt enye; Jehovah onyụn̄ anam mmọ etie sụn̄ ke edem kpukpru.”
22. Nso isịn udọn̄ inọ nnyịn ndisịn ifịk idahaemi ke utom Jehovah?
22 Kemi, nte oro idịghe n̄kpọ nsịnudọn̄ inọ kpukpru nnyịn ndinam n̄kpọ in̄wan̄în̄wan̄ mban̄a edisana utuakibuot Jehovah? Nnyịn imọfiọk ite ke idotenyịn odu ọnọ ediwak million owo efen efen nditoro Jehovah. Ye unana eyịghe ekese ke otu mmọemi ke ẹnam mme ukpụhọde ke uwem mmọ man ẹsịm mme n̄kpọ oro N̄wed Abasi oyomde ke utom Jehovah. Mmọ eken ke ẹkọri ke ikike ye mbuọtidem, ke ẹyom Jehovah, ndien ibịghike ẹyenụk mmọ ndibuana edisana usem emi ye mbon en̄wen ke ndida ọyọhọ ifiọk akpanikọ aban̄ade Jehovah ye Obio Ubọn̄ esie nsọk mmọ. Ndien ntak emi edide akpan n̄kpọ ntre nte kpukpru nnyịn iyom Jehovah idahaemi ke adan̄aemi ẹkemede ndikụt enye-e? Koro obufa ererimbot esie oro enye ọn̄wọn̄ọde emekpere!—Isaiah 65:17-25; Luke 21:29-33; Rome 10:13-15.
Nte Afo Emeti?
◻ Mmanie ẹwụt unana udọn̄ ẹban̄a Abasi akpanikọ, kpa Jehovah?
◻ Ke nso udomo ke ido ukpono ẹsiwak nditụk edu uwem?
◻ Nso idotenyịn idu iban̄a n̄kọri ke ifịk ifịk Mme Ntiense?
◻ Ntak emi idahaemi edide ini nsịnifịk ye edinam?
◻ Ntak odotde ẹyom Jehovah?
[Ndise ke page 10]
Ediwak ufan Mme Ntiense Jehovah ẹmi ẹsidụkde Editi edi mme asan̄autom Abasi ini iso
Ibat mme andikodụk Editi ke 1990: 9,950,058
N̄wakn̄kan ibat mme asuanetop ke 1990: 4,017,213
[Ndise ke page 12]
Ke eyo Edidem Asa, idụt oro ama ọwọn̄ọde etiene Jehovah