Ediyarade Mme Idiọkn̄kpọ—Nte Edi N̄kpọ Akwan̄ade?

“EDIYARADE ndudue edi edinam owo asana ke n̄kan̄ eke spirit, usụn̄ edifiak ntọn̄ọ, usụn̄ edifre mban̄a idiọkn̄kpọ ini edem. Ami mmesima ndika n̄kayarade ndudue, ntịn̄de mme idiọkn̄kpọ mi nnọ oku, nnyomde enye efen ọnọ mi ye inemesịt oro etienede.” Ntre ke ọsọn̄idem owo Catholic kiet ọdọhọ.—Bless Me, Father, for I Have Sinned.

Nte ekemde ye New Catholic Encyclopedia, “edi oku ikpọn̄îkpọn̄ ke Christ ọkọnọ m̀mê akayak odudu ọnọ ndibọp nnyụn̄ ntat, ndifen nnọ nnyụn̄ ntre ndifen” mme idiọkn̄kpọ. Ukem n̄wed ẹkotde ẹto mi ọdọhọ ete ke ẹyarade ndudue kpukpru ini man “ẹfiak ẹwụk edisana uwem oro mfụhọ idiọkn̄kpọ ekemende efep ẹnyụn̄ . . . ẹnam ubieresịt owo asana.” Edi, idaha ido uwem ke ediwak idụt owụt nte ke ediyarade ndudue kpukpru ini inamke ediwak owo oro ẹnamde enye ‘ẹwọn̄ọde ẹkpọn̄ idiọk, ẹnyụn̄ ẹnam eti.’ (Psalm 34:14) Ntre nte edi n̄kpọ akwan̄ade?

Sụk Ido Edinam?

Ediyarade ndudue ekeme nditọn̄ọ nte ikpîkpu ido edinam. Ke Ireland, akpa ediyarade ndudue esida itie usọp usọp mbemiso akpa Udia Ọbọn̄. Ndien ndi ekpedi n̄kpọ n̄kpaidem eyenan̄wan ọsọn̄de isua-itiaba ndikere ekese mban̄a ediye, mbiet ọfọn̄ ndọ oro enye edisịnede akan nte ekpedide ye edikere mban̄a ‘edifiak n̄wụk edisana uwem oro mfụhọ idiọkn̄kpọ ekemende efep’?

“N̄kpọ oro ekenemde mi esịt akan ekedi ọfọn̄, ke ẹsiode edinyene okụk nto mme iman mi efep,” ntre ke Ramona ọdọhọ, emi akanamde akpa ediyarade ndudue ke ini ekedide isua itiaba. Enye akaiso ete, “Ke otu kpukpru nditọiban oro n̄kọdiọn̄ọde, ekikere n̄kan̄ eke spirit ndomokiet ikodụhe. Idụhe owo nnyịn ndomokiet oro akakam ekerede aban̄a Abasi ke ini oro.”

Ke akpanikọ, ndikpak n̄kpri nditọ ndiyarade idiọkn̄kpọ kpukpru ini ekeme ndisụn̄ọ ke editịn̄ se mîtoho esịt. “Ami n̄kakam nsida ukem ikọ ndien ndien,” ntre ke Michael ọdọhọ, emi n̄ko ọkọtọn̄ọde edinam ediyarade ndudue ke ọsọn̄de isua-itiaba.

Ikọ ndusụk mbon Catholic ẹmi ẹkotde ẹsịn ke n̄wed Bless Me, Father, for I Have Sinned ẹwụt nte ke ediyarade ndudue ekenyene esisịt ufọn ke n̄kan̄ eke spirit ọnọ mmọ idem ke ẹma ẹkekabade ẹkponi. Owo kiet ọkọdọhọ ete, “Ediyarade ndudue ekpep fi ndisu nsu, koro odu ndusụk n̄kpọ emi afo mûkemeke ndida nditịn̄ nnọ oku.” Unana iwụk ke otu mme oku ekeme ndinam ẹyom ufen oro osụhọde ubọk. Ndusụk owo ẹsiyom “eti” okop ndudue man ẹbo item oro mmọ ẹyomde ndikop. Eyenan̄wan kiet ọkọdọhọ ete, “Ke mma n̄kodụn̄ọde ye ntịn̄enyịn nnyom ke ọfiọn̄ ita, mma n̄kụt okop ndudue mi. Mma nsikụt enye kpukpru ọfiọn̄, iso-ye-iso ke ubet ukpe emem, ndien enye enyene uten̄e.” Owo Catholic efen ọkọdọhọ ete, “Edieke afo ọkpọsọpde idem, afo okpokokụt oku oro mîsọpke utọn̄ mînyụn̄ itịn̄ke Ikọmbakara ndomokiet ke mîbọhọke ‘mmọkọm Mary utịm ikata.’”

Nte an̄wan̄ade, ndien, n̄kpọ akwan̄a ye ediyarade ndudue nte ndusụk owo ẹnamde. Edi Bible owụt nte ke ufọn odu ndiyarade idiọkn̄kpọ, koro enye ọdọhọde ete: “Baba owo kiet eke odịpde mme idiọkn̄kpọ esiemmọ idikwe mfọn, owo ekededi eke ayarade onyụn̄ ọkpọn̄de mmọ eyekụt mbọm.”—Mme N̄ke 28:13, The New Jerusalem Bible.

Ndi emi ọwọrọ ke Christian ekpenyene ndiyarade kpukpru idiọkn̄kpọ esie? Ke edide ntre, ẹnọ mmanie? Udiana ibuotikọ eyedụn̄ọde mme mbụme ẹmi.