Ndidiọn̄ọ Edisana Spirit
NTE ama ọdiọn̄ọ ke edisana spirit otụk uwem kpukpru nnyịn owo kiet kiet? Nte ama onyụn̄ ọfiọk ke enye ekeme ndinam ata akamba ukpụhọde ke uwem fo? Emi ekeme ndikpa fi idem. Ke akpanikọ, afo emekeme ndibụp ete: ‘Anie, m̀mê nso idi edisana spirit?’
Edieke afo edide andibuana ke kiet ke otu mme ufọkederi Christendom, eyedi ama okop nte ọkwọrọ ederi ọdiọn̄de nsekeyen “ke enyịn̄ Ete ye Eyen ye Edisana Spirit.” (Matthew 28:19, The New English Bible) Ke ini ẹbụpde se edisana spirit edide, ediwak mme ọkwọrọ ederi ẹyebọrọ usọp usọp ẹte: ‘Edisana spirit edi ọyọhọ owo ita ke otu Abasi-Ita-ke-Kiet, n̄ka ke kpukpru usụn̄ ye Abasi Ete ye Ọbọn̄ Jesus Christ.’
Nte ededi, owo ikenyeneke ekikere emi ke mme ntọn̄ọ ntọn̄ọ isua ikie ifan̄ eke Eyo Nnyịn. Ke uwụtn̄kpọ: N̄kpọ nte isua ikie ita ebede ke mme apostle Jesus Christ ẹma ẹkekpan̄a, Gregory eke Nazianzus ama ewet ete: “Ndusụk owo ẹkere ke [edisana spirit] edi odudu (energeia), ndusụk ẹte ke edi edibotn̄kpọ, ndusụk ẹte ke enye edi Abasi, ndusụk ikemede ndibiere m̀mê ewe ke otu mmọemi.”
Mfịn, ediwak ufọkederi ke Christendom ẹnyịme ekikere ukpepn̄kpọ Abasi-Ita-ke-Kiet oro aban̄ade edisana spirit. Edi nte oro edi se Bible ọsọn̄ọde? Mîdịghe nte enye edi ikpîkpu ekikere oro ọkọn̄ọde ke item owo? Ke akpanikọ, Bible akananam itịn̄ke iban̄a edisana spirit ke ukem usụn̄ oro enye ẹtịn̄de aban̄a Abasi m̀mê Jesus. Ke uwụtn̄kpọ, ke Bible, edisana spirit inyeneke ọkpọ ọkpọ enyịn̄.
Nte oro akam edi ikpîkpu ikọ? Baba, enyịn̄ edi akpan n̄kpọ ke Bible. Abasi ama ọsọn̄ọ nte enyịn̄ esie edide akpan n̄kpọ ke ini enye ọkọdọhode ete: “Ami ndi Jehovah; enyịn̄ mi edi oro: ndinyụn̄ nnọhọ owo efen ubọn̄ mi, nnọhọ ndisọi mbiet itoro mi.” (Isaiah 42:8) Ẹma ẹsọn̄ọ nte enyịn̄ Jesus Christ edide akpan n̄kpọ mbemiso emana esie ke ini angel ọkọdọhọde Mary ete: “Onyụn̄ osio enye enyịn̄ Jesus.” (Luke 1:31) Edieke enyịn̄ Ete ye Eyen edide akpan n̄kpọ ntre, ntak emi edisana spirit mînyeneke ọkpọ ọkpọ enyịn̄-e? Ke akpanikọ, akpan n̄kpọ emi ikpọn̄ ekpenyene ndinam idem akpa owo m̀mê spirit enen̄ede edi n̄ka ye Ete ye Eyen.
N̄wed Abasi ye Edisana Spirit
Ke N̄wed Abasi eke usem Hebrew, m̀mê “Akani Testament,” ẹtịn̄ ẹtụk “edisana spirit” ye “spirit mi [Abasi].” (Psalm 51:11; Joel 2:28, 29) Nnyịn imokot ite ke edisana spirit ekeme ndisịne owo ke idem, odoro owo ke idem, onyụn̄ ọyọhọ owo ke idem. (Exodus 31:3; Judges 3:10; 6:34) Ẹkeme ndida ubak edisana spirit Abasi emi esịnede owo kiet ke idem nnọ owo efen. (Numbers 11:17, 25) Edisana spirit ekeme ndidụk owo ke idem, an̄wamde enye ndinam mme n̄kpọ oro akande ukeme owo.—Judges 14:6; 1 Samuel 10:6.
Nte esịnede ifiọk, nso ke ẹkeme ndibiere nto mme utọ ikọ ẹmi? Ke akpanikọ, idịghe nte ke edisana spirit edi owo. Didie ke ẹkeme ndida ubak idem owo kiet nyak nnọ owo efen? Akande oro, uyarade ndomokiet idụhe nte ke ini Jesus okodude ke isọn̄, ke mme anam-akpanikọ mme Jew ẹkese edisana spirit nte owo emi edide n̄ka ye Ete. Mmọ ke akpanikọ ikatuakde ibuot inọ edisana spirit. Utu ke oro, utuakibuot mmọ nnennen akaka ebịne Jehovah ikpọn̄, kpa Enyeemi Jesus ke idemesie okokotde “Ete Mi” ye “Abasi Mi.”—John 20:17.
Ukem nte Akani Testament inua-inua, ikpehe Bible oro ẹkotde N̄wed Abasi eke Christian usem Greek, m̀mê “Obufa Testament,” ọdọhọ ke edisana spirit ekeme ‘ndiyọhọ’ owo ke idem m̀mê “odoro” enye ke idem. (Utom 2:4; Luke 2:25-27) Ẹma ‘ẹnọ,’ ‘ẹn̄wan̄a ẹduọk,’ ẹnyụn̄ ‘ẹdeme’ edisana spirit. (Luke 11:13; Utom 10:45; Mme Hebrew 2:4) Ke Pentecost 33 C.E., mme mbet ẹma ẹbọ spirit Abasi. (Utom 2:17) N̄wed Abasi n̄ko etịn̄ aban̄a edinịm owo baptism ke edisana spirit ye edida enye nyet owo aran.—Matthew 3:11; Utom 1:5; 10:38.
Mme utọ ikọ ẹmi ke Bible ẹwụt ke edisana spirit idịghe owo. Ẹsọn̄ọ ubiere emi ke ini nnyịn ikụtde nte ke ẹsiak edisana spirit ẹsịn ke otu mme n̄kpọ oro mîdịghe owo. Ke uwụtn̄kpọ, Bible ọdọhọ ke Steven ama “[ọyọhọ] ye mbuọtidem ye edisana spirit.” (Utom 6:5) Ndien apostle Paul ama otoro idemesie nte asan̄autom Abasi “ke edisana ido, ke ifiọk, ke anyanime, ke mfọnido, ke spirit eke asanade [“edisana spirit,” NW], ke ata ima.”—2 Corinth 6:4-6.
Edi akpanikọ, Bible ke ndusụk ini etịn̄ aban̄a edisana spirit nte owo. Ke uwụtn̄kpọ, Isaiah ọkọdọhọ ke ndusụk mbon nsọn̄ibuot ‘ẹma ẹyat edisana spirit Abasi esịt.’ (Isaiah 63:10) Paul ama etịn̄ nte ke edisana spirit ekeme ‘ndiyat esịt.’ (Ephesus 4:30) Ndien ediwak itien̄wed Abasi ẹdọhọ ke edisana spirit esikpep owo n̄kpọ, ada owo usụn̄, etịn̄ ikọ, onyụn̄ etie ntiense. (John 14:26; 16:13, 14; 1 John 5:7, 8) Edi Bible etịn̄ n̄ko aban̄a mme n̄kpọ efen oro mînyeneke uwem nte owo, utọ nte ọniọn̄, n̄kpa, ye idiọkn̄kpọ. (Mme N̄ke 1:20; Rome 5:17, 21) Emi ke akpanikọ edi in̄wan̄în̄wan̄ usụn̄ emi N̄wed Abasi ke ndusụk idaha esinamde mme n̄kpọ an̄wan̄a.
Mfịn, nnyịn isitịn̄ iban̄a Bible ke ukem ido oro ke ini nnyịn idọhọde ite ke enye etịn̄ n̄kpọ m̀mê ekpep ukpepn̄kpọ. Ke ndida mme utọ ikọ oro, nte nnyịn idọhọ ke Bible edi owo? Bible inyụn̄ idọhọke ke edisana spirit edi owo ke ini enye adade ikọ ẹmi ẹmende n̄kpọ ẹdomo ye n̄kpọ.
Nso, ndien, edi edisana spirit? Enye idịghe owo. Utu ke oro, enye edi anamutom odudu Abasi, oro enye akamade ndiyọhọ uduak esie. (Genesis 1:2) Edi didie ke edisana spirit otụk uwem nnyịn? Ndien didie ke nnyịn ikeme nditịm mbọ ọkpọ ọkpọ ufọn nto utom esie?