Idara Ofụri Ererimbot

“SESE, ikọt mi ẹyekwọ ke idatesịt.” (Isaiah 65:14) Jehovah eketịn̄ ntre ebe ke prọfet esie, Isaiah, ndien nso akwa edisu ke ikọ esie enyene ntem ke otu Mme Ntiense Jehovah! Esịt idara mmọ oto m̀mọ̀n̄? Oto edidianakiet mmọ ke utuakibuot Jehovah Abasi. Enye edi “Abasi inemesịt,” ndien mbon oro ẹtuakde ibuot ẹnọ enye “ẹdat esịt ke Jehovah.” (1 Timothy 1:11, NW; Zechariah 10:7, NW) Idara idara utuakibuot emi adian mmọ ke idụt kiet nte mmọ ẹkwọrọde eti mbụk Obio Ubọn̄ ọtọkiet ẹnyụn̄ ẹsiode n̄kpo itoro ẹnọ Abasi mmọ ke ofụri ererimbot.—Ediyarade 7:9, 10.

“Idara Emi Owo Ndomokiet Mîkemeke Ndimen Mfep”

Ke akpanikọ, nditan̄a enyịn̄ Abasi ye Ọbio Ubọn̄ edi ntak idara ofụri ini ọnọ Mme Ntiense Jehovah. (Mark 13:10) Mmọ ẹnam n̄kpọ ẹban̄a ikọ andiwet psalm oro: “Mbufo ẹbụre ke edisana enyịn̄ esie: esịt eyedat mmọ eke ẹyomde Jehovah.”—Psalm 105:3.

Ekese ini, mmọ ẹsikan n̄kpọ ubiọn̄ọ man ẹnam emi. Ke Spain, Isidro ama ayak idemesie ọnọ Jehovah, onyụn̄ oyom nditịn̄ nnọ mbon en̄wen mban̄a Enye. Edi enye edi awat o-moto mbiomo emi enyenede esisịt ini, emi esikade isan̄ ke okoneyo onyụn̄ edede idap ke uwemeyo. Isidro ama oyom ndinọ mme awat o-moto eken ikọ ntiense, edi didie ke enye ekpekeme ndinam emi?

Enye ama esịn radio CB (citizens band) ke moto esie, man enye ekpekeme ndida ntịn̄ ikọ ye mme awat o-moto eken. Ikebịghike enye ama okụt itie utịn̄ikọ ẹkotde channel 13, oro owo mîsiwakke ndibre, onyụn̄ ebiere ndida enye nnam n̄kpọ. Nte ededi, ke ini enye ke akpa ọkọnọde mme awat o-moto eken ekikere ete ẹsitịn̄ ikọ ẹban̄a Bible ke radio CB, ediwak mmọ ikonyịmeke. Edi ndusụk owo ẹma ẹkpan̄ utọn̄. Ikọ ama asuana, ndien ata ediwak mme awat o-moto efen efen oro edide mbon Spain ẹma ẹsibre channel 13. Ndondo emi, Isidro ama okop ete ke owo kiet ke nsụhọde n̄kaha ke anam n̄kpọ ndikaiso ke ukpepn̄kpọ Bible esie.

Ke Italy eren kiet ama okop aban̄a Mme Ntiense Jehovah ke nneme oro enye ekenyenede ke bọs. N̄wan esie ama osobo ye mmọ ebe ke ufan. Mmọ mbiba ẹma ẹkpep Bible ẹnyụn̄ ẹnyene udọn̄ ndibuana se mmọ ẹkekpepde ye mmọ en̄wen. Mmọ ẹma ẹtịm ẹnyene udọn̄ tutu eren oro ama esịn ndibọ edimenede itie ke itieutom esie ndien n̄wan esie ama ọkpọn̄ utom oro ẹkpede enye okụk ọfọn man mmọ ẹkpesịn ediwak ini ke editịn̄ nnọ mbon en̄wen mban̄a eti mbụk Obio Ubọn̄. Nte edinam oro ama odot? Ih. Eren oro ọdọhọ ete: “Tọn̄ọ nte nnyịn ikedifiọk akpanikọ, ami ye n̄wan mi imadara ndin̄wam owo 20 ndinyene nnennen ifiọk uduak Abasi. Ke eyo okụtde ndien ami mfiak nnyọn̄ ufọk ke mma n̄kokụre usen oro ke utom Jehovah, edi akpanikọ, ami nyekop mba. Edi ami nyekop inemesịt, nnyụn̄ n̄kọm Jehovah ke ndikọnọ mi idara emi owo ndomokiet mîkemeke ndimen mfep.”

“Tutu Osịm Utịt Ererimbot”

Mbon oro ẹdude ke idara idara idụt Abasi ẹwụt ukem ifịk oro ke ebiet ekededi oro mmọ ẹdụde, idem ke ‘ata nsannsan ikpehe ererimbot.’ (Utom 1:8) Ibat ibat ebiet ẹyom usụn̄ ẹkan edere edere Greenland. Edi, idem do, ke itiat 200 ke edem edere Arctic Circle, ekpri esop mbon Ilulissat odu, emi owo 19 ẹnamde. Mmọ ẹkwọrọ ukem eti mbụk nte ebe ye n̄wan mbon Italy oro, ndien mmọ ẹma ẹkop nduaidem isua oko ndikụt mbon Greenland itiaba ẹnade baptism ke uyarade uyakidem mmọ nnọ Jehovah.

Anjinee enyene ukem idara oro ke usụk usụk n̄kan̄ ikpehe ufiop isọn̄ isuo Mauritius eke Indian Ocean, emi oyomde usụn̄ ọkpọn̄ Greenland ke ediwak tọsịn itiat. Ke akpa n̄kpọ ikememke inọ Anjinee. Ke Mauritius, owo isehe edidụk mme mbonoesop Christian ye an̄wan̄wa edikwọrọ ikọ mban̄a Abasi nte edinam oro odotde ọnọ eyenan̄wan Hindu otode India emi mîdọhọ ndọ. Edi Anjinee ama esịn ifịk. Idahaemi, isua usụkkiet ke enye ama ọkọtọn̄ọ usụn̄ uwem Christian esie, ndusụk ke otu iman esie n̄ko ke ẹkpep Bible.

Adianade ye Anjinee, ẹnyene ndisiak Emilio, emi odụn̄de ke n̄kan̄ ererimbot eken, ke Honduras. Emilio ama okop nte nsan̄autom ẹnemede ẹban̄a Bible ke itieutom onyụn̄ eben̄e ete ẹbuan imọ. Enye ikekemeke ndikot n̄wed edi ama esikpan̄ utọn̄ ye idatesịt ke ini ẹkesikotde mme itien̄wed Bible. Nte akpanikọ Christian okosụhọrede odụk esịt esie, Emilio ama etre oburobụt usụn̄ uwem esie onyụn̄ etre ebeubọk un̄wọn̄ mmịn. Mme Ntiense Jehovah ẹma ẹkpep enye ndikot nnyụn̄ n̄wet n̄wed, ndien idahaemi enye edi asan̄autom ke idara idara idụt Abasi.

Ediwak tọsịn itiat ke edere edere edem usoputịn Honduras, ekaeyen kiet edide owo Eskimo ke Alaska ama ekpep ukem akpanikọ Christian oro. N̄wan emi okodụn̄ ke obio-in̄wan̄ oro odude ata nsannsan, ndien n̄kukụre edisobo esie ye Mme Ntiense Jehovah ekebe ke leta. Ntre enye ekekpep n̄kpọ ebe ke leta, obụp mbụme esie ebe ke leta, ndien idahaemi ke abuana se enye ọfiọkde ye mme mbọhọidụn̄ esie ifịk ifịk. Mme utọ uwụtn̄kpọ nte mmọemi ẹkeme ndiwak tutu inyeneke utịt. Ke ofụri ererimbot, mbon nsụkesịt ke edi man “ẹnam n̄kpọ ẹnọ Jehovah ke idatesịt.”—Psalm 100:1b.

‘Ẹnyene Ima ke Otu Idem Mbufo’

N̄kpọ kiet oro odụride kpukpru mmọemi edi ima oro odude ke idara idara idụt Abasi. Jesus ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo edi mbet Mi.” (John 13:35) Ẹkụt ima Christian ke uwem eke usen ke usen mme ata Christian emi, n̄ko akpan akpan ke mme ini afanikọn̄.

Ke idụt Africa kiet emi ke ndiọkiso ẹkpande utom Mme Ntiense Jehovah, ọkpọsọn̄ eyo ama ada. Owo tọsịn duop ẹma ẹkpan̄a, ndien ofụri otu enan̄ ẹma ẹtak. Didie ke Mme Ntiense ẹkebọhọ? Ke ndita mme orụn̄ eto ye n̄kpasịp eben mbakara oro ẹtemde! Edi nnanenyịn mmọ ama etre ke n̄wọrọnda usụn̄ ke ini, ye un̄wam Abasi, Mme Ntiense ke mme idụt en̄wen ke unana idotenyịn ẹkebode unyịme ndinọ mme n̄kpọ un̄wam ẹkedide tọn 25. Ke akpanikọ, kpa ye ukpan, mbonekọn̄ ẹkeda mme n̄kpọ ẹmi ẹkeyak man ẹkụt ete mmọ ekosịm ke ifụre!

Ke akpanikọ, Mme Ntiense mbon Africa oro ẹma ẹkop idatesịt etieti ndibọ uyarade ima emi nditọete mmọ ẹmade mmọ, nte mmọ ẹkụtde edisu ikọ Isaiah: “Sese, ubọk Jehovah ikabakede imụhọ ikan nte enye anyan̄ade; utọn̄ esie inyụn̄ idobike ikan nte enye okopde.”—Isaiah 59:1.

Emem Emem Mme Owo

Ẹdụri mbon nsụkesịt n̄ko ẹsịn ke idara idara idụt Abasi sia mme andibuana ke enye ẹma ẹkekpọn̄ mme usụn̄ en̄wan ererimbot emi ẹnyụn̄ ‘ẹda ofụt mmọ ẹdom ikwa udiọn̄ eto.’ (Isaiah 2:2) Ke El Salvador, ufọk akani owoekọn̄ kiet ọkọyọhọ ye mme n̄kpọ editi utom ekọn̄ esie. Edi ke ini enye ọkọtọn̄ọde ndikpep Bible ye Mme Ntiense Jehovah, enye ama ọkọri emem emem edu. Ke akpatre, enye ama osion̄o kpukpru n̄kpọ oro ẹnyenede n̄kpọ ndinam ye ekọn̄ efep ke ufọk esie onyụn̄ ọtọn̄ọ utom ukwọrọikọ ifịk ifịk.

Ke ini mbonekọn̄ ukpụhọ ukara ẹkedade obio esie enyene, ẹma ẹmụm enye nte owo n̄kpọkọbi—nte an̄wan̄ade owo kiet akanyan ubọk owụt enye nte akani owoekọn̄. Nte ededi, enye ama anam an̄wan̄a ete ke imọ idịghe owoekọn̄ aba edi nte ke idi kiet ke otu Mme Ntiense Jehovah. Mbon en̄wan ukpụhọ ukara oro ẹma ẹdori enye ikọ nte enyenede n̄kpọekọn̄ ke ufọk esie, edi ndụn̄ọde ẹkenamde ama ayarade nte ke ndomokiet ikodụhe. Ekem adaibuot ke otu mbon en̄wan ukpụhọ ukara oro ama obụp mme mbọhọidụn̄ aban̄a enye. N̄wọrọnda ibọrọ ekedi: “Enye akam esidi ọdọdọk onyụn̄ ososụhọde efak ọkwọrọde aban̄a Bible ke usen ke usen.” Ẹma ẹsana eren oro ẹyak. Nte eyịghe mîdụhe, ifịk esie akanam n̄kpọ ndinyan̄a uwem esie.

Ifiọkutom otode idụt Africa kiet etịn̄ aban̄a mbonekọn̄ iba oro ẹkekpepde Bible ye Mme Ntiense Jehovah. Kiet akanam utom ke udịmekọn̄ ukara, enye eken akan̄wana ekọn̄ ọnọ mbon en̄wan ukpụhọ ukara. Ke akpatre, mmọ mbiba ẹma ẹbiere ‘ndida ofụt mmọ ndom ikwa udiọn̄ eto’ nnyụn̄ n̄kpọn̄ utom ekọn̄. Ke ini mmọ ẹkedụkde mme mbonoesop Christian ke akpa ini, owoekọn̄ eke mbon en̄wan ukpụhọ ukara ama obụp enye eken ete: “Nso ke afo oyom mi?” Enye ama ọbọrọ ete: “Afo n̄ko, oyom nso mi?” Ifiọkutom oro eberi ete, “Ekem, ke ẹfatde kiet eken, mmọn̄eyet idara ama asiaha mmọ koro mmọ ẹkemede ndidu ọtọkiet ke emem.” N̄kani mbonekọn̄ ẹmi nte eyịghe mîdụhe ẹma ẹbọn̄ akam ẹnọ Abasi ẹte: “Biomode mi iyịp ke idem fep. O Abasi, Abasi edinyan̄a mi: edeme mi eyetan̄a edinen ido fo.”—Psalm 51:14.

‘Afo Ama Okụt Ukụt Mi’

“Ima fo eyenem onyụn̄ adat mi esịt: emi afo okụtde ukụt mi; onyụn̄ ọfiọkde ndutụhọ esịt mi.” (Psalm 31:7) Ntre ke andiwet psalm ọkọbọn̄ akam, ndien ediwak owo mfịn ẹdara koro Ikọ Abasi an̄wamde mmọ ndiyọ ukụt mmọ. Ke France, owo Ntiense Jehovah kiet esinịm ukpepn̄kpọ ye n̄wan kiet emi ọdọn̄ọde udọn̄ọ mbeibuot. N̄wan emi ama odu ke idak usọbọidem udọn̄ọ mbeibuot ke anyanini, edi emi ikan̄wamke. Urua kiet ke enye ama ọkọtọn̄ọ ukpepn̄kpọ esie, ọkọk udọn̄ọ mbeibuot ama obụp ete: “Nte afo emenen̄ede ọdiọn̄ọ se n̄wan emi esitịn̄de ọnọ fi oto Bible?” Ntem ke urua oro eketienede, Ntiense emi ama aka ọfis eren oro onyụn̄ okonịm ukpepn̄kpọ Bible ye n̄wan oro ke iso esie.

Ke ukpepn̄kpọ oro okụrede, ọkọk udọn̄ọ mbeibuot oro ama asian Ntiense oro ete: “Ke ediwak isua ẹmi ẹkebede ami mmesinyene udọn̄ ke ido ukpono mbon udọn̄ọ mi, edi ami mmokụt nte ke ido ukpono ekededi inọhọ ata un̄wam ndomokiet. Ke n̄kan̄ fo, nte ededi, mme n̄kpọ edi isio. Mma P —— esidi edisobo ye ami ikaba ke urua, ndien enye esikpe mi okụk ke ndinam oro. Edi, ye ukpepn̄kpọ Bible fo ye eti item, afo anam utom oro ọfọnde akan ke mfọn. Enye ke anam eti n̄kọri. Kaiso, ndien mmọn̄wọn̄ọ ndinnọ fi ọyọhọ un̄wam edieke afo edikam oyomde.”

Bible ọdọhọ ete: “Ọfọfọn [“Inemesịt odu,” NW] ọnọ mmọ eke ẹfiọkde n̄kpo idara: O Jehovah, mmọ ẹyesan̄a ke un̄wana iso fo. Ẹyedara enyịn̄ fo ofụri usen.” (Psalm 89:15, 16) Kpukpru Mme Ntiense Jehovah ẹfiọk ẹte ke psalm emi edi akpanikọ. Mfiori idara ofụri ererimbot ke ọwọrọ oto inua mmọ ke itoro Jehovah. Ata ediwak mmọ ẹwọn̄ọ ẹto mme idụt ndidiana ye mmọ ntoro Abasi. Ntak mûbuanake ye mmọ unyụn̄ unyene idara oro ke idemfo?

[Ndise ke page 7]

Mme Ntiense Jehovah ke Edem Usiahautịn Europe kemi ẹdara ke obufa ifụre oro mmọ ẹnyenede ndisibọ nnyụn̄ n̄kpep “Enyọn̄-Ukpeme” ke usem mmọ