Ndifiọk S’idude ke Mbụk
Ẹbiọn̄ọ Owo Ndidọ Ndọ
Nte bishop Lutheran kiet anamde an̄wan̄a nte “mfịna kiet oro ẹkedịpde-dịp ke ediwak emana,” oburobụt ido idan̄ mme ọkwọrọ ederi ke akpatre ‘amayarade ana an̄wan̄wa.’ Nte ededi, Los Angeles Times ọtọt nte ke adianade ye emi edi “esuene esuene an̄wan̄wa uyarade ye ikpọ ukotikpe ẹmi ẹnyịkde ediwak ufọkederi ndikama isọn.” Times oro owụt ete ke mbonutom insurance ẹdọhọ ẹte ke ikpe usabade owo ke idan̄ oro awakde osịm 2,000 ẹmi abuanade mme ọkwọrọ ederi ke ebet ke esop.
Odot ẹtịm ẹfiọk n̄ko nte ke ndusụk ata oburobụt mme andidue nte ẹdọhọde ẹdi mme ọkwọrọ ederi Roman Catholic. A. W. Richard Sipe, kpa abiaibọk ekikere ye akani owo n̄ka St. Benedict, ama anam ndụn̄ọde ye mme oku 1,000 ye irenowo ye iban 500 en̄wen, ediwak owo ke akpatre emi ẹdọhọde ke ima ibuana ke unam idan̄ ye mme ọkwọrọ ederi. Magazine Time ọtọt ẹte ke enye ekere ke se ikperede mbahade iba ke otu mme oku Roman Catholic 53,000 ke United States ẹmebiat en̄wọn̄ọ unana edidọ ndọ mmọ. Nte Sipe ọdọhọde, n̄kpọ nte mbahade 28 eke ikie ke otu kpukpru oku ke ẹkaiso ndinyene ebuana idan̄ ye iban, ke adan̄aemi, ke adianade do, ọtọn̄ọde ke mbahade 10 osịm 13 eke ikie ẹnyenede ebuana idan̄ ye ikpọ irenowo, ndien mbahade 6 eke ikie ẹbịne nditọn̄wọn̄ kaban̄a idan̄, ediwak ini nditọn̄wọn̄ iren. Se iwakde ibe ubiereikpe 100 ke ntak oburobụt ido mme ọkwọrọ ederi ke isua itiokiet ẹmi ẹkebede amakpa ndutịm ukara Catholic n̄kpọ nte dollar million 100 osịm million 300.
Ediwak owo ẹkere ẹte ke ẹkeme ndimen ata ediwak mfịna ẹmi mfep edieke ẹyakde mme oku ẹdọ ndọ. Ndusụk owo ẹkeme ndidu ke n̄kpaidem ndidiọn̄ọ nte ke idụhe ebiet ndomokiet ke Bible oro akpande mme asan̄autom Abasi ẹdide Christian ndidọ ndọ. Ufọkederi Catholic, nte ededi, ọmọbiọn̄ọ mme oku ndidọ ndọ ọtọn̄ọde ke ọyọhọ isua ikie-12. Nte enemde, ke ini eketịn̄de abaha akwa nsọn̄ibuot ye utuakibuot akpanikọ oro edidide ke n̄kpa mme apostle ebede, Paul ama ewet ete ke “owo ẹyefiak edem ẹkpọn̄ mbuọtidem, ẹnyụn̄ ẹkpan̄ utọn̄ ẹnọ mme spirit abian̄a ye ukpepn̄kpọ mme demon, emi mbon nsu, eke esịt mmọ odorode ufiọn, ẹdade mbubịk ẹkpep. . . .ẹbiọn̄ọ owo ndidọ ndọ.”—1 Timothy 4:1-3.
Ntak Akpakịp Afai-a?
Canada ama odu ke n̄kpaidem onyụn̄ okop ndịk ndikop nte ke Marc Lepine edide isua 25 ke emana ama owot ediwak owo ke an̄wa University of Montreal. Ke afai afai uduọkiyịp enye ama owot nditọ ufọkn̄wed iban 14 ẹdide mme obot ukwakutom, ọnọde nditọ ufọkn̄wed 13 eken unan, ẹsịnede irenowo 4, mbemiso ọwọn̄ọrede ikan̄ otop idemesie. Emi ekedi kiet ke otu ndiọkn̄kan uwotowo ke mbụk idụt oro. Akwa isụn̄utom ukara eketịn̄ aban̄a ubi ubi uwotowo oro nte “n̄kpọ mmọn̄eyet oro osịmde owo ke ata akamba udomo.”
Nte The Toronto Star ọdọhọde, ke United States, “se iwakde ikan mme owotowo ke ediwak usụn̄ 100 ẹdu toto ke Ekọn̄ Ererimbot II ndien ata ediwak mmọ ẹwọrọ ẹwụt idem ke isua edịp ẹmi ẹkebede.” Edi, nte ete owo kiet emi okosobode ndiọkiso ke ubọk Lepine okobụpde mbọm mbọm: “Ntak emi akpakịp afai odude ke ererimbot? Ntak emi mme owo ẹnamde kiet eken orụk n̄kpọ emi?”
Nte Bible anamde an̄wan̄a, ntak n̄kọri ke afai ke eyo nnyịn ana in̄wan̄în̄wan̄. Apostle John ekewetde ete: “Ofụri ererimbot onyụn̄ esịne ke ubọk andidiọk.” (1 John 5:19) Ke ndimen ndomo ye ofụm oro nnyịn in̄wekde, idiọk edu oro otode Satan, kpa “andidiọk,” amakara ekikere, udọn̄, ye mme idem edinam ata ediwak owo. Ye edu nsọn̄ibuot, ibụk, ye ntan̄idem esie, enye ‘ke abian̄a ofụri ererimbot.’ (Ediyarade 12:9) Mme ata andituak ibuot nnọ Abasi ẹnyene ndọn̄esịt, nte ededi, ke ndifiọk nte ke “ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:17.
“Obio David” Odu ke M̀mọ̀n̄?
Edieke afo akpakade Jerusalem, ndien ọdọhọ owo ada fi usụn̄ aka Obot Zion, anaedi ẹkpeda fi ẹka ibombom, m̀mê obot, oro anade ke usụk usụk Akani Obio. Ke adiaharede adaha kiet ye Itịghede Tyropoeon ke n̄kan̄ edem usiahautịn ye Itịghede Hinnom ke edem usoputịn, edidu oro Ufọkederi Dormition odude anam ẹdiọn̄ọ obot emi, ye ekara ekara etịn̄e esie.
Nte ededi, mme n̄wed ndise obio ye mme ndise oro Watch Tower Society emịn̄de ẹnịm Obot Zion ke ekpri obot oro odude ke n̄kan̄ edem usiahautịn ebiet oro ẹkotde mfịn Obot Zion. Itịghede Tyropoeon abahade ekpri obot emi ye obot enye eken ke n̄kan̄ edem usoputịn onyụn̄ adian̄ade adaha kiet ye Itịghede Kidron ke n̄kan̄ edem usiahautịn.
Ewe ke otu itie iba ẹmi ẹdi ebiet oro ata Obot Zion okodude? Magazine oro Biblical Archaeology Review (May/June 1990) onyịme ete ke “ibombom, m̀mê obot n̄kan̄ edem usiahautịn, ekedi ata Obot Zion, . . . emi Edidem David ọkọbọde mme Jebusite.” Ke enye ama ọkọduọ, ẹkedidiọn̄ọ ọkpọsọn̄ ebiet mme Jebusite emi nte ‘Obio David,’ ẹkotde n̄ko “Zion.” (2 Samuel 5:7) Biblical Archaeology Review owụt nte ke “mme ọdọkisọn̄ nyom n̄kpọeset ẹma ẹbiere, ye unana eyịghe nte ke ekpri obot emi,” ẹwakde nditịn̄ mban̄a nte obot edem usiahautịn, edi Obot Zion eke Bible emi David okonịmde ifụm ukara ye eke ido ukpono idụt Israel.—2 Samuel 6:11, 12, 17.